1 Timoteo 5 - Xochapa Mixteco

Káꞌan ra Pablo xiꞌin ra Timoteo ndá kuꞌva koto vií ra xiꞌin ná ndi̱xiꞌi ndaa tin na nana chee xikuaꞌa xiꞌin na tata xikuaꞌa veꞌe ñuꞌu

¹ Ñani yo Timoteo, tá ndá chiñu väꞌa íkan na ñani yo na xikuaꞌa, ta käꞌan kueꞌe un xiꞌin na, vívií ndikani un nuu na, tá kuꞌva káꞌan un xiꞌin tata un, saa kaꞌan un xiꞌin na. Ta saa tu nda kuâán va, tá kuꞌva íkan un xiꞌin ñani un, saa ikan un xiꞌin nda.

² Saa ikan tu un xiꞌin ná kuꞌva yo, ná nana chee xikuaꞌa, vií kaꞌan un xiꞌin ná, tá kuꞌva káꞌan un xiꞌin nana un saa kaꞌan un xiꞌin ná. Saa tu ná kuâán vali, vií kaꞌan un xiꞌin ná, tá kuꞌva káꞌan un xiꞌin ná kuꞌva un, saa kaꞌan un xiꞌin ná.

³ Ta vaꞌa chindee taꞌan un xiꞌin ná kuꞌva yo, ná kuâán ndi̱xiꞌi ndaa, ná köo naꞌa chindee ñaꞌa.

⁴ Tá tu íyo ná kuâá ndi̱xiꞌi ndaa, ta íyo seꞌe ná án seꞌe ñani ná, ta na veꞌe ná ikán ku na xíniñuꞌu kundaa ñaꞌa, saa xáa kaꞌnu na Ndioxi xaꞌa ya íkan na saa. Ta saa kua xáa súvi na tá kuꞌva i̱kan iva siꞌí na xiꞌin na, tá íkan na saa ta xáa sií ni na ini Ndioxi.

⁵ Ta ná kuꞌva yo, ná kuâán ná ndi̱xiꞌi ndaa, ná köo nda iin naꞌa chindee ñaꞌa, ta ndáa ni ini ná xíni ná Ndioxi, saa káꞌan ni ná xiꞌin ra nduvi niuun ya ná chindee ra ná.

⁶ Ta ná kuâán ná ndi̱xiꞌi ndaa, ná xíka sií, ta xáa sií ná ini mií va ná, ni táku ná, ta tá íin ná xa ndi̱xiꞌi va, saa íin ná.

⁷ Saa kaꞌan un xiꞌin ndiꞌi na, kaꞌnda chiñu un nuu na ya ná kundaa na, na veꞌe na, ya ná köo naꞌa kaꞌan xaꞌa na ya köo xíto vií na, na veꞌe na.

⁸ Saa chi tá ndá nda ñani yo köo chíndee taꞌan xiꞌin na veꞌe mií nda, ta kúni kachi ya, köo kándixa nda Tata yo Jesucristo, ta kini ni ka káa ya íkan nda ñaa nuu naꞌa, na köo kándixa tuꞌun ra.

⁹ Ta ná kuâán ná ndi̱xiꞌi ndaa, ná ndixa xíniñuꞌu na veꞌe ñuꞌu chindee taꞌan na xiꞌin ku taꞌan ná yóꞌó: ná kúu mií uni xiko kuiya án yáꞌa ka ya, tá tu iindaa ndi̱xiyo ií ná, ta ná ñaa ku ná xíniñuꞌu na veꞌe ñuꞌu chindee taꞌan na xiꞌin.

¹⁰ Ta saa tu ná ndóso vaꞌa tuꞌun xaꞌa ya íkan ná ya vaꞌa, ta vaꞌa ni xi̱ndaa ná seꞌe ná, ta saa ndi̱kuiso vaꞌa ni ná na xáa veꞌe ná, ta ndi̱kata ná xaꞌa nda ñani yo xiꞌin ná kuꞌva yo, saa chi̱ndee taꞌan ná xiꞌin naꞌa tá xi̱ñúꞌu na nuu tindoꞌo, ta vaꞌa ni i̱kan ná xiꞌin ndiꞌi naꞌa.

¹¹ Ta ná kuâán ndi̱xiꞌi ndaa, ná vali kúni ta töso un kivi ná nuu lista un ya chindee taꞌan na ñani yo, na veꞌe ñuꞌu xiꞌin ná. Saa chi vaxi kivi ta kutoo tuku ná tindaꞌa ná xiꞌin taa, ta küchiñu ka ná xaa súvi ná chiñu ya ki̱ndoo ná ikan ná xaꞌa ichí Tata yo Jesucristo.

¹² Ta ìyo ni kundiso ná kuachi xaꞌa ya yáꞌa ná nuu tuꞌun Tata yo Jesucristo ya ki̱ndoo ná xaa súvi ná tá kuꞌva núnu̱ú.

¹³ Ta süvi ndisaa ya ñaa kua ikan ná, chi kuni xúxan ná ta xaá ná kaka ná tá veꞌe, tá veꞌe. Ta süvi ndisaa ya xúxan kuni ná, ìyo ni kutoo ná kaka ná ndituꞌun vata ná, ta xáa ná kiꞌvi ná xiꞌin naꞌa, kaꞌan ná ya íin ya köo.

¹⁴ Xaꞌa ya ñaa kua vaꞌa ka ná tindaꞌa va ná kuâán vali ndi̱xiꞌi ndaa, káchi yeꞌe. Ta ná kaku seꞌe ná, saa ná kiꞌin ná kuenta xiꞌin na, ná kundaa ná na veꞌe ná, chi tá íkan ná saa ta köo ñaꞌa niꞌi naꞌa, na köo xíni tuꞌun Ndioxi, na sáa ini xíni yoo, köo ya niꞌi na kanaꞌa kini na xaꞌa yo.

¹⁵ Ndítuꞌun i ya yóꞌó xiꞌin un, saa chi saa íkan sava ná vali, ná kuâán ndi̱xiꞌi ndaa, ta ku̱xika ná nuu Ndioxi, saa ndi̱kundikun ná ichí kiti nǎꞌa, kiti Satanás.

¹⁶ Tá ndá nda ñani yo án ndá ná kuꞌva yo íyo ná kuâán ndi̱xiꞌi ndaa nuu, ta vaꞌa ná chindee taꞌan mií na veꞌe ná xiꞌin ná, ta saa kündiꞌi ka ini na veꞌe ñuꞌu ya chindee taꞌan na xiꞌin ná, saa kuchiñu na chindee taꞌan na xiꞌin ná ndixa xíniñuꞌu chindee taꞌan na xiꞌin.

¹⁷ Ta ndee ni xíniñuꞌu na veꞌe ñuꞌu xaa toꞌo na ndiꞌi nda ñani yo nda xikuaꞌa nda ndee ni vaꞌa xáa súvi chiñu kúu mií nda veꞌe ñuꞌu. Ná xaa toꞌo ni na nda xaꞌa chiñu íkan nda, káꞌan ndoso nda tuꞌun Ndioxi xiꞌin na saa sínaꞌa nda na.

¹⁸ Saa chi saa káꞌan tuꞌun Ndioxi ya ta̱a na xinaꞌa, káchi ya saa: “Chïkaa ndo ñunu yuꞌu kiti sindiki sana ndo tá xíka ri xáñu ri siꞌva trigo ya síkoyo ri ya”. Ta saa káꞌan tuku tuꞌun ra inka ñaꞌñu nuu ta̱a na, káchi ya saa: “Ndiꞌi naꞌa, na xáa chiñu, ta xíniñuꞌu na koo yaꞌvi na”, káchi ya.

¹⁹ Tá ndá na táxi kuachi xaꞌa nda ñani yo, nda xikuaꞌa ndíso chiñu xiꞌin na veꞌe ñuꞌu, ta küni soꞌo kama un ya káꞌan na xiꞌin un. Vaꞌa tá tu íyo uvi án uni naꞌa, na ndíkuiin xaꞌa kuachi ya káꞌan na xaꞌa nda, ta saa kua kundaa vaꞌa ini un xaa súvi un ya kaꞌan na xaꞌa nda.

²⁰ Tá tu ya ndixa kua íyo kuachi nda ta köo xíin nda sindoo nda ya väꞌa íkan nda, ta vaꞌa kaꞌan un xiꞌin nda nuu chútu ndiꞌi na veꞌe ñuꞌu ya ná sindikoo nda ya väꞌa íkan nda. Ta saa ku íꞌvi naꞌa ya ná ïkan na tá kuꞌva íkan nda.

²¹ Ta ya káꞌan i xiꞌin un yóꞌó, ta nuu Iva yo Ndioxi xiꞌin nuu Tata yo Jesucristo tin nuu na tatun ra, na ndi̱kaxin ra kua káꞌan i xiꞌin un: Xíkan ni i ya mani nuu un ya xaa súvi un ya káꞌan i xiꞌin un, ta kïꞌin un sata nda iin nda, iin káchi xaa súvi un kuachi xiꞌin ndiꞌi nda.

²² Saa kuenta ni koo un tá chínuu ndaꞌa un sata iin ra ñani yo ya ndíkuiso chiñu ra xiꞌin na veꞌe ñuꞌu. Saa chi tá väꞌa íkan ra, ta mií un ndíkuiso kuachi xaꞌa ya íkan ra ñaa. Yakan yóꞌo̱, ta kuenta ni koo un, kundaa ni un mií un, nina ya vaꞌa ndikani ini un ikan un.

²³ Xaꞌa ya ndee ni kúꞌvi tixin un, ta köꞌo un ndisaa tìkuíi mií, vaꞌa koꞌo loꞌo un nduta vino ya ná kïꞌin ni kueꞌe kúꞌvi tixin yóꞌo̱.

²⁴ Ta xaꞌa ya káꞌan i xiꞌin un xaꞌa nda ñani yo, nda ndikaxin un kundiso chiñu xiꞌin na veꞌe ñuꞌu, tá íyo ya káꞌan i xiꞌin un saa koo ya ikan un, chi íyo sava nda ni köo naꞌa táxi kuachi xaꞌa nda, ta kama ni va ndíkuni yo nda ya íkan nda ya väꞌa, sundi sava nda ta köo kúndaa kama ini yo xiꞌin nda.

²⁵ Saa tu chiñu vaꞌa íkan sava na, kama ni va kúndaa ini yo xiꞌin ya íkan na. Ta sava tuku na ta naꞌá ni va saa kúndaa ini yo xaꞌa ya vaꞌa íkan na, ni saa va, ta nda iin ñaꞌa kïndoo sěꞌe, chi ndituvi ndiꞌi ya íkan na.