1 Timoteo 4 - Xochapa Mixteco

Káꞌan ra Pablo xiꞌin ra Timoteo kuenta ná koo ra xiꞌin nda sínaꞌa ya vata

¹ Ta ndee ni va téꞌe ndi̱kaꞌan Tachi I̱í Ndioxi xaꞌa naꞌa, na koo tá xa kuaꞌan kúyati ndiꞌi xaꞌa ñuu ivi, chi sava na ikán ta sindikoo na ya kándixa na Tata yo Jesucristo, ta saa xáa na kuni soꞌo na ya káꞌan tachi nduvaꞌa xiꞌin na, án ya vata sínaꞌa tachi nǎꞌa na.

² Ta kuni soꞌo na ya sínaꞌa naꞌa, na vata, na uvi yuꞌu, chi na vata ikán, ta ni köo xíni ka na ya kaꞌa̱n nuu, tá íin ya xa ndíi va saa ndu̱u ya xínituni na.

³ Ta ya sínaꞌa na kua küvi tindaꞌa taa xiꞌin ñaꞌa, saa káꞌan na ya küvi kuxi naꞌa sava ñaꞌa vaꞌa xíxi, káchi na. Sundi naꞌa, na kándixa Tata yo Jesucristo ta xa xíni na ya ndaa, yakan vaꞌa xíni na ya vaꞌa kuxi na ndiꞌi ñaꞌa, ta saa taxi na tixaꞌvi ndaꞌa ra xaꞌa ñaꞌa xíxi na.

⁴ Chi ndiꞌi ñaꞌa ya si̱kuaꞌa Ndioxi ta ya vaꞌa ku ndiꞌi ya, yakan köo ya kundasi yo, tá tu táxi yo tixaꞌvi ndaꞌa ra xaꞌa ya.

⁵ Saa chi mií tuꞌun Ndioxi kua ndása i̱í ñaꞌa xíxi yo tá káꞌan yo xiꞌin ra táxi yo tixaꞌvi ndaꞌa ra xaꞌa ya.

Káꞌan ra Pablo xiꞌin ra Timoteo ya ná xaa chiñu vií ra

⁶ Tá sínaꞌa un tuꞌun ya ndaa yóꞌó nuu na ñani yo xiꞌin kuꞌva yo, na veꞌe ñuꞌu, saa kua koo un iin ra vaꞌa ni xáa chiñu nuu Tata yo Jesucristo. Saa chi tá íyo ya vaꞌa ni xíxi yo táxi ndee ndaꞌa yo, kuꞌva saa íyo tuꞌun Tata yo Jesucristo ya kándixa ni yo xiꞌin tuꞌun ra ya xa si̱kuaꞌa un.

⁷ Ta küni soꞌo un kuento vata, ya köo ndáa yaꞌvi ndítuꞌun naꞌa. Ya vaꞌa ni kua xaꞌa ni un ndee kuu un iin taa, ra vaꞌa ni xáa súvi ya kúni Ndioxi.

⁸ Ta ya vaꞌa ni kua ikan loꞌo yo ejercicio nuu ndúndee ikin kuñu yo, sundi ya ndee ni ka xíniñuꞌu yo ikan yo kua koo vií ni yo nuu Ndioxi, chi tá íkan yo saa kua niꞌi ni yo ya vaꞌa nuu ra tiempo táku yo vitin xiꞌin tiempo ya vaxi.

⁹ Ta ya ndixa ni ku tuꞌun ya káꞌan i xiꞌin ndo yóꞌó, yakan ndiꞌi na xíniñuꞌu kandixa ya.

¹⁰ Xaꞌa ya yóꞌó kua ndíkundee ni yo xáa chiñu yo, saa tíxuꞌvi ni yo ta kánaꞌa ni na xaꞌa yo. Chi saa íkan yo kándixa ni yo Ndioxi ra táku, chi mií ra ku ra síkaku ndiꞌi na ñuu ivi yóꞌó, sundi ndisaa na kándixa ni ñaꞌa ku na káku íkan ra.

¹¹ Ta ya káꞌan i xiꞌin un yóꞌó kua sinaꞌa un ndiꞌi naꞌa, saa kaꞌnda chiñu un nuu na ná xaa súvi na ya.

¹² Täxi un xaa ni̱nu̱ na yóꞌo̱, xaꞌa ya loꞌo un, kuâán un. Vivií koo un nuu na ya ná kuni na ikan na taꞌan ya vaꞌa íkan un, xaꞌa kuꞌva ndituꞌun un xiꞌin na, xiꞌin kuꞌva xíka un nuu na, xiꞌin kuꞌva kúꞌvi ini un xíni un na, saa kundaa ni ini un kuni un Tata yo Jesucristo, kundaa ni un mií un, xäa yakua xiꞌin mií un.

¹³ Ta ya yóꞌó kua xíniñuꞌu un ikan un xiꞌin na ñani yo tin kuꞌva yo nda kivi ná xaa i: Vaꞌa kaꞌvi un tuꞌun Ndioxi xiꞌin na, ta xaꞌa ni un ndee xiꞌin na sixinu un ini na, saa sinaꞌa un na.

¹⁴ Ta kuenta ni koo un, ndïndoso ini un xaꞌa ndee vaꞌa ni ta̱xi Ndioxi ndaꞌa un, tá kivi síndikaꞌán mií Tachi ra ini nda ñani yo, nda xikuaꞌa veꞌe ñuꞌu nuu chi̱nuu ndaꞌa nda xi̱ní un.

¹⁵ Chikaa ni soꞌo un xiꞌin ya káꞌan i xiꞌin un yóꞌó, ta xaa súvi un ya, saa kuni naꞌa ya vaꞌa ni xáa chiñu un iin iin kivi.

¹⁶ Ta kuenta ni koo un xaꞌa kuꞌva íyo un xiꞌin kuꞌva ya sínaꞌa un na, kundiꞌi ni ini un xaa súvi un ya, chi tá vaꞌa íkan un ta síkaku un mií un xiꞌin na xíni soꞌo ya káꞌan un.