1 Timoteo 3 - Xochapa Mixteco

Ndá kuꞌva xíniñuꞌu koo na xáꞌnda chiñu veꞌe ñuꞌu

¹ Ta vaꞌa ná kundaa ini un xaꞌa ya káꞌan i xiꞌin un, chi ya ndaa ni kua káꞌan i xiꞌin un: Tá ndá nda ñani yo kúni kunuu nuu na veꞌe ñuꞌu, ta ya vaꞌa ni kua ndíkani ini nda ikan nda saa.

² Chi ndiꞌi ñani yo, nda kúni ikán taꞌan chiñu yóꞌó ta xíniñuꞌu ndâku ni ná koo ini nda, ya ná köo naꞌa kaꞌan xaꞌa nda, ta iindaa ná koo yá síꞌi nda, ta ná kuñuꞌu káxin teꞌe ini nda, ndíchi ná koo xi̱ní nda, ta i̱í ná koo ini nda, ta ná koo ndúvi nda ndikuiso nda naꞌa, na xáa veꞌe nda, saa ná koo ndúvi nda ya vaꞌa ni sinaꞌa nda tuꞌun Ndioxi.

³ Ta ná kuu nda taa, nda köo kútoo kaka koꞌo ndixi, ni küvi sa̱á kama ni nda án kanitaꞌan nda xiꞌin naꞌa, xíniñuꞌu nda kaꞌnu ni koo ini nda, ná sïkuaꞌa nda kuachi xiꞌin naꞌa, saa ná kütoo ni nda xuꞌun.

⁴ Saa xíniñuꞌu nda kuniꞌi vií nda na veꞌe nda, ta vií ná sinaꞌa nda seꞌe nda ya ná xaa súvi na ya káꞌan nda, saa kua koo toꞌo na nuu ndiꞌi naꞌa.

⁵ Chi tá tu köo xíni nda kuniꞌi vií nda na veꞌe nda, ta saa ni küchiñu nda kundàà vií nda na veꞌe ñuꞌu.

⁶ Nda ñani yo, nda kúni kuu mií taꞌan chiñu yóꞌó, ta köo xíniñuꞌu koo nda, nda sikan xa̱á xíni tuꞌun Ndioxi, saa chi ìyo ni ndutái ini nda ta koyo nda nuu ya väꞌa, tá ndo̱ꞌo mií kiti nǎꞌa.

⁷ Ta vaꞌa ná ikan nda nina ya vaꞌa, ta nda naꞌa, na köo xíni tuꞌun Ndioxi ta kaꞌan vaꞌa na xaꞌa nda. Tá tu íkan nda saa ta ndíkasi nda yuꞌu naꞌa ya köo ya niꞌí na kaꞌan na xaꞌa nda, ta ni kiti nǎꞌa küchiñu ri sikoyo ri nda nuu kuachi.

Ndá kuꞌva xíniñuꞌu koo nda chíndee taꞌan xiꞌin nda ínuu nuu na veꞌe ñuꞌu

⁸ Ta saa tu nda chíndee taꞌan xiꞌin na ínuu nuu na veꞌe ñuꞌu, xíniñuꞌu nda koo nda taa nda ínuu vaꞌa tuꞌun xaꞌa, ta ná sixinu nda tuꞌun ya káꞌan nda, saa ná kuu nda taa nda köo kútoo kaka koꞌo ndixi, ta ná sïndaꞌvi nda naꞌa xiꞌin ya vata, tava nda xuꞌun ndaꞌa na.

⁹ Xíniñuꞌu kuu nda taa nda kándixa ni tuꞌun vaꞌa xaꞌa Tata yo Jesucristo ya si̱tuvi Ndioxi nuu yo ku̱ndaa ini yo, ta saa ná koo vaꞌa ya xínituni nda, ná täxi ya kuachi xaꞌa nda.

¹⁰ Ta xiꞌna xíniñuꞌu koto ndoso vaꞌa ndo nda ñani yo ñaa, tá tu xíto ndo ya síxinu ndiꞌi nda ya káꞌan nde xiꞌin ndo, ta saa kua vaꞌa chindee taꞌan nda xiꞌin na ínuu nuu na veꞌe ñuꞌu.

¹¹ Tá kuꞌva íyo nda taa, saa xíniñuꞌu koo tu ná ñaꞌa va. Köo xíniñuꞌu ná kaꞌan vata ná xaꞌa naꞌa, ta xíniñuꞌu ná ndi̱xita ná mií ná nuu ya väꞌa, saa xíniñuꞌu ná vií xa súvi ná ndiꞌi ndá ka chiñu ya káꞌan ná, saa kua vaꞌa kandixa naꞌa ndiꞌi ya káꞌan ná xiꞌin na.

¹² Ta nda ñani yo, nda chíndee taꞌan xiꞌin nda ínuu nuu na veꞌe ñuꞌu, ta iin va xíniñuꞌu koo yá síꞌi nda, saa xíniñuꞌu nda taxi vií nda ichí nuu seꞌe nda xiꞌin na veꞌe nda.

¹³ Tá tu vií chíndee taꞌan nda xiꞌin na ínuu nuu na veꞌe ñuꞌu, ta nda naꞌa ta xaa toꞌo ni na nda, saa nduu ndee ni ka ini nda ya ndáa ni ini nda xíni nda Tata yo Jesucristo.

Ya ndaa ni ku tuꞌun vaꞌa xaꞌa Tata yo Jesucristo ya si̱tuvi Iva yo Ndioxi nuu yo

¹⁴ Ñani yo, Timoteo, kama ni va kúni i xaa i koto i yóꞌo̱, sundi xa tíꞌvi kuee i tutu yóꞌó xaa ya ndaꞌa un,

¹⁵ chi án sana kuachi loꞌo ka i yóꞌó, yakan káꞌan kuee i xiꞌin un ya ná kundaa ini un ndá kuꞌva xíniñuꞌu ndo ikan ndo, xaꞌa ya kúu ndo na veꞌe Iva yo Ndioxi, ra táku. Ta tá kuꞌva tuun ni kuáꞌa xaꞌa veꞌe án tá káa itun ndee ni ndíso xi̱ní veꞌe, saa íin ndo, xaꞌa ya ndaa ku̱ndaa ini ndo xaꞌa tuꞌun ra.

¹⁶ Ta saa ná kundaa ini ndo chi nda vitin ta ndee ni ndee ya ndaa si̱naꞌa Tata yo Jesucristo nuu yo kándixa ñaꞌa, ta soꞌva íyo ya: Tata yo Jesucristo ta ndu̱u ra taꞌan mií yo ivi yóꞌó, ta ki̱xi ra ñuu ivi yóꞌó. Ta Tachi I̱í Ndioxi kua ndíkuiin xaꞌa ra. Ta xi̱ni na tatun Ndioxi ra. Saa ndi̱kaꞌan ndoso nda xi̱ndikun sata ra xaꞌa ra nuu ndiꞌi naꞌa, na köo kúu judío. Ndiꞌi ni kúu xaꞌa ñuu ivi yóꞌó íyo naꞌa, na kándixa ra. Saa ndi̱kiꞌin tuku Iva yo Ndioxi ra, nda̱a tuku ra kuaꞌan ra nuu ndivi.