1 Timoteo 2 - Xochapa Mixteco

Káꞌan ra Pablo ya ná kaꞌan ni yo xiꞌin Ndioxi xaꞌa ndiꞌi naꞌa

¹ Ñani yo, ya núnu̱ú ndúku i nuu un kua yóꞌó, kaꞌan ni ndo xiꞌin Ndioxi xaꞌa ndiꞌi naꞌa. Ta kuaku ndaꞌvi ndo nuu ra ná chindee ra na, ná chikaa ra ya vaꞌa ndiꞌi na. Saa kaꞌan ni ndo xiꞌin ra taxi ndo tixaꞌvi ndaꞌa ra xaꞌa ya ndi̱kuiin ra yuꞌu ndo xaꞌa ya káꞌan ndo xaꞌa xiꞌin ra.

² Saa kaꞌan ni ndo xiꞌin ra xaꞌa ndiꞌi ni kúu na chiñu naꞌnu xiꞌin na chiñu vali ya ná kuchiñu koo vaꞌa ni ini yo xiꞌin taꞌan yo, ta ná kandixa ni yo Ndioxi. Saa ná koo vaꞌa ndiꞌi yo xiꞌin taꞌan yo, ná xaa toꞌo taꞌan yo.

³ Tá tu íkan yo saa ta vaꞌa ni íkan yo, ta saa Ndioxi, ra sikaku yoo, ta kusini ni ra xiꞌin yo.

⁴ Chi ya kúni ra kua ná kaku ndiꞌi naꞌa, ta saa ná kundaa ini ndiꞌi na xaꞌa ya ndaa.

⁵ Ta iindaa va ku Iva yo Ndioxi, ta iindaa ku tu taa ra si̱kitaꞌan mani yoo va xiꞌin Iva yo Ndioxi, ta taa ikán ku ra ku Tata yo Jesucristo.

⁶ Saa ta̱xi ra mií ra ndi̱xiꞌi ra xaꞌa kuachi ndiꞌi yo. Ta xaꞌa ya i̱kan ra saa kua cha̱ꞌvi ra xaꞌa yo, ya vaꞌa ku̱chiñu yo ndi̱saña ndika yo nuu kuachi yo. Ta ya yóꞌó ku tuꞌun vaꞌa ya ta̱xi Iva yo Ndioxi ndaꞌa na ñuu ivi yóꞌó, tá kivi chi̱tuni mií ra.

⁷ Ta xaꞌa ya ikán kua ta̱xi ra chiñu ndaꞌa i kaka i kaꞌan ndoso i tuꞌun ra ya ndaa xiꞌin naꞌa. Saa ta̱xi ra chiñu ndaꞌa i kúu i apóstol ra xáa chiñu nuu Tata yo Jesucristo, ta xa̱ꞌnda ra chiñu nuu i ya sinaꞌa i naꞌa, na köo kúu judío. Ta ya káꞌan i xiꞌin ndo ta ya ndaa ni kua, köo síndaꞌvi i ndóꞌo̱.

⁸ Ta ya yóꞌó kua kúni i ná ikan ndiꞌi nda taa: Vaꞌa ná kaꞌan nda xiꞌin Ndioxi ndiꞌi ni kúu ñaꞌñu nuu ndíkitaꞌan ndo xáa kaꞌnu ndo ra. Ta vaꞌa ná ndaniꞌi ndaꞌa nda nuu ndivi kaꞌan nda xiꞌin ra, i̱í ná koo ini nda, ta ná säa ini nda kuni nda naꞌa, ni ná käni taꞌan nda xiꞌin nda iin naꞌa.

⁹ Saa káꞌan i xiꞌin un xaꞌa ná síꞌi, ya ná kundixi vií ná, ta ná kündixi kini ni ná, toꞌo ná kundixi ná. Ta saa toꞌo ná katun ná xi̱ní ná, ná küñuꞌu ni ná kàà ya oro án yu̱ú ya ndee ni saví náꞌa, ni ná kündixi ná toto yaꞌvi ni.

¹⁰ Ta ya ndee ni xíniñuꞌu ná ikan ná ku ñaꞌa ya vaꞌa ni, xaꞌa ya xáa toꞌo ni ná Ndioxi.

¹¹ Tá síkuaꞌa ná tuꞌun Ndioxi, ta vaꞌa táxíín ná koo ná kuni soꞌo ná, toꞌo ná kundoo ná.

¹² Ta yeꞌe, köo táxi i ichí ndaꞌa ná síꞌi ya sinaꞌa ná na veꞌe ñuꞌu, ta ni köo táxi i ichí ndaꞌa ná ya kaꞌnda chiñu ná nuu nda taa. Vaꞌa táxíín ná koo ná.

¹³ Chi xiꞌna ra Adán ra núnuu ku ra si̱kuaꞌa Ndioxi, ta si̱ndiꞌi saa si̱kuaꞌa ra yá Eva.

¹⁴ Ta köo ndi̱sindaꞌvi kiti nǎꞌa ra Adán, chi mií yá ñaꞌa kua si̱ndaꞌvi ri, saa ndi̱kava yá nuu kuachi.

¹⁵ Xaꞌa ya ikán kua sikaku Ndioxi ná síꞌi tá íyo ná káku seꞌe ná, chi ndáa ni ini ná xíni ná ra, saa kúꞌvi ni ini ná xíni ná ra, ta ndúu i̱í ni ka va ná xaꞌa ya vaꞌa íkan ná nuu ra.