1 Timoteo 1 - Xochapa Mixteco

Káꞌan ndioxi ra Pablo xiꞌin ra Timoteo

¹ Yeꞌe Pablo, ra xíka chiñu nuu Tata yo Jesucristo, ra ti̱ꞌvi Ndioxi vaxi sikaku yoo xiꞌin suvi mií Tata yo Jesucristo, ra ndinuꞌu ni ndáa ini yo.

² Chíndee ni i yóꞌo̱ ñani yo Timoteo, chi yóꞌo̱, ta tá káa seꞌe mií i, saa káa un, xaꞌa ya si̱naꞌa i yóꞌo̱ ichí xaꞌa Tata yo Jesucristo. Ta mií Tata yo Jesucristo xiꞌin mií Iva yo Ndioxi ná kundaꞌvi ni ini ra kuni ra yóꞌo̱, saa ná taxi ra koo vaꞌa ni ini un xiꞌin ya kúꞌvi ni ini ra xíni ra yóꞌo̱.

Káꞌan ra Pablo xiꞌin ra Timoteo ya ná kundaa ni ra mií ra nuu naꞌa, na sínaꞌa ya vata

³ Ta xa kúndaa ini un tá kivi ke̱e i chí ñuu Éfeso saa ndi̱kiꞌin i kuaꞌan i chí ñuu Macedonia ta ndi̱kaꞌan i xiꞌin un ndoo un koo un ñuu Éfeso ñaa, ya ná kaꞌnda chiñu un nuu sava naꞌa, na sínaꞌa ya vata, ya ná sïnaꞌa ka na kuꞌva saa.

⁴ Ta kaꞌan un xiꞌin na, ná ndïtuꞌun na kuento yata ya köo ndáa yaꞌvi, ni ná ndïtuꞌun na xaꞌa xií síkua na ndá na veꞌe ku xií na, chi yakan ta ndee ni kǎni kuaꞌan ya, takua síkani taꞌan ya na, ta köo chíndee taꞌan ya xiꞌin na ya kundaa ini na xaꞌa chiñu kúni Iva yo Ndioxi. Chi ndisaa ya ndáa ni ini yo xíni yo Tata yo Jesucristo va kua ndee ni ndáa yaꞌvi.

⁵ Yakan káꞌan i xiꞌin un ya kaꞌan un xiꞌin na ñani yo ya ná kuꞌvi ni ini na kuni taꞌan na xiꞌin ndinuꞌu nima na, ta ni ya xínituni na ta täxi ya kuachi xaꞌa na nuu ra, chi ndinuꞌu ni ini na ndáa ini na xíni na ra.

⁶ Chi sava na ta xaꞌa ya köo ndi̱xiin na xaa súvi na ndiꞌi ya yóꞌó, yakan ku̱xika na ta saa xa̱á na ndítuꞌun na ndisaa xaꞌa ñaꞌa ya köo ndáa yaꞌvi.

⁷ Kúni na kuu na maestro na yáꞌa ni ndíchi sínaꞌa ley Ndioxi ya ta̱xi ra ndaꞌa ra Moisés, ta ni köo kúndaa ini na xiꞌin ya káꞌan ya ni ya sínaꞌa na.

⁸ Ta xa kúndaa ini yo ya vaꞌa ni ku ley Ndioxi tá tu xíniñuꞌu yo ya tá kuꞌva kúni mií Ndioxi.

⁹ Saa chi yoo ta xíni yo ya vaꞌa ni ku ya, ta köo ndi̱taxi ra ya ndaꞌa ra Moisés xaꞌa naꞌa, na vaꞌa, na kándixa ñaꞌa, xaꞌa naꞌa, na íkan ya väꞌa kua ta̱xi Ndioxi ya, xaꞌa na kini, na iku ini, na köo káñuꞌu Ndioxi ta ni köo xáa súvi na ya káꞌan ra xiꞌin na, na xáꞌni iva siꞌí, xiꞌin na xáꞌni taꞌan,

¹⁰ xiꞌin nda taa kuakiꞌvi xiꞌin ná ñaꞌa ta süvi ná síꞌi nda ku ná, ta saa tu ná ñaꞌa ta süvi ií ná ku nda. Saa tu nda taa, nda kuakiꞌvi xiꞌin taꞌan mií nda, saa tu naꞌa, na síkuiꞌna sěꞌe naꞌa, xiꞌin na vata, xiꞌin na chínaꞌa xaꞌa ya síki íkan na, saa tu naꞌa, na sáa ini xíni tuꞌun ya ndaa sínaꞌa yo.

¹¹ Ta naꞌa, na íkan ya väꞌa, ta köo íyo yuꞌu na xiꞌin tuꞌun vaꞌa ya ndaa, ya luvi ni sínaꞌa yo, chi mií Ndioxi ra vaꞌa ni ku ra ta̱xi chiñu ikán ndaꞌa i ya kaꞌan ndoso i ya xiꞌin naꞌa.

Táxi ra Pablo tixaꞌvi ndaꞌa Jesucristo

¹² Táxi ni i tixaꞌvi ndaꞌa Tata yo Jesucristo, taa ra ta̱xi ni ndee ndaꞌa i, saa chi ndáa ni ini ra xíni ra yeꞌe yakan ndi̱kaxin ra yeꞌe ya xaa súvi i chiñu nuu ra.

¹³ Chi yachi ta ndi̱kaꞌan ndikuu ni va i xaꞌa Tata yo Jesucristo, saa xa̱a ndu̱vaꞌa ni i xiꞌin na ndíkun sata ra, ta ndi̱kaꞌan kini ni i xaꞌa ra. Vani saa i̱kan i ta ku̱ndaꞌvi ni ini ra xi̱ni ra yeꞌe, saa chi yeꞌe köo ndi̱kundaa ini va ku i, yeꞌe naá nuu va ndi̱xiyo i, yakan i̱kan i saa.

¹⁴ Ta yáꞌa ni vi ku̱ndaꞌvi ini ra xi̱ni ra yeꞌe, ñaa chi̱ndee ra yeꞌe ndáa ni ini i xíni i ra, saa ta̱xi ra ndee ndaꞌa i ya kuꞌvi ni ini i kuni i inka naꞌa xaꞌa mií ra.

¹⁵ Ta vaꞌa ná kundaa ini un xiꞌin ya káꞌan i xiꞌin un, chi ya ndaa ni kua, ta ndiꞌi na xíniñuꞌu kundaa ini xaꞌa ya yóꞌó: Chi Tata yo Jesucristo ku ra ki̱xi ñuu ivi yóꞌó ya sikaku ra yo ivi kuachi, ta kúni i káꞌan i xiꞌin un, xiꞌna yeꞌe ku ra ndee ni kuachi íyo nuu ndiꞌi na ivi.

¹⁶ Xaꞌa ya ikán kua ku̱ndaꞌvi ni ini Tata yo Jesucristo xi̱ni ra yeꞌe. I̱kan ra saa xiꞌin i ya kúni ra ná kuni naꞌa ya ndee ni kaꞌnu ini ra xiꞌin na ndee ni ndee kuachi kúu mií nuu ra. Ta kúni ra ná kuni na ya ndo̱ꞌo i, ta saa kuchiñu na kandixa na ra, ta saa niꞌi na kutaku na xiꞌin ra ndiꞌi saa kivi ya vaxi.

¹⁷ Xaꞌa ya ikán kua, ¡ná xaa kaꞌnu ni yo Ndioxi, ná xaa toꞌo ni yo ra! ¡Chi nda xi̱naꞌa táku ra ta saa kutaku ra ndiꞌi saa kivi ya vaxi, nda iin yo köo kúchiñu kuni xiꞌin nuu yo ra, ta mií ra ku ra xáꞌnda chiñu nuu ndiꞌi ni kúu yo! ¡Iindaa mií ra ku Ndioxi ra ndaa ni, ra ndíchi ni! ¡Saa ná koo ya!

¹⁸ Ñani yo Timoteo, tá káa seꞌe i saa káa un, ta chiñu yóꞌó kua ndúku i nuu un xaa súvi un, chi ya yóꞌó, ta iin káchi ku ya xiꞌin tuꞌun ya ndi̱kaꞌan nda ñani yo, nda ndi̱kaꞌan tuꞌun yuꞌu Ndioxi ya ta̱xi Tachi Ndioxi ndaꞌa un tixin nda ñani yo ikán tá yachi. Chi tá ná ikan un saa ta koo un tá kuꞌva íyo iin ra lapa, ra xíni ni kaka nuu kuachi.

¹⁹ Ta xaꞌa ni un ndee ya kundaa ni ini un kuni un Ndioxi, ya xaa súvi un ya táxi ya xínituni un ndaꞌa un. Saa chi sava na ta köo ndi̱kan na saa, ni xa xíni na unkua vaꞌa, ta köo ndi̱xiin na xaa súvi na ya, yakan kua ndi̱ꞌi xaꞌa na, köo ndáa ka ini na xíni na Tata yo Jesucristo. Tá ndóꞌo itun barco tá ndíꞌi xaꞌa nu ini nduta ñûꞌu, saa ndo̱ꞌo na.

²⁰ Ta saa ndo̱ꞌo ra Himeneo xiꞌin ra Alejandro. Xaꞌa ya íkan kua ndi̱taxi i uvi saa nda ndaꞌa kiti nǎꞌa, ya ná sikuaꞌa nda ya käꞌan ndikuu nda xaꞌa Ndioxi.