1 Tesalonicenses 4 - Xochapa Mixteco

Ndá kuꞌva kúni Ndioxi koo yo

¹ Ñani yo xiꞌin kuꞌva yo, xíkan ni nde ya mani nuu ndo, káꞌan ni nde xiꞌin ndo xaꞌa ya xa si̱naꞌa nde ndóꞌo̱ ndá kuꞌva koo ndo tá kuꞌva kúni mií Ndioxi. Saa xíkan ni nde ya mani nuu ndo tixin ichí mií Tata yo Jesucristo káꞌan nde xiꞌin ndo ya ná xaꞌa ni ka ndo ndee koo vaꞌa ni ndo.

² Xa xíni vaꞌa ni va ndo chiñu ya xa̱ꞌnda chiñu mií Tata yo Jesucristo nuu nde ndi̱kaꞌan nde xiꞌin ndo.

³ Chi Ndioxi ta kúni ra ya ná nduu ndo naꞌa, na i̱í nuu ra iin iin kivi, ta ná kuxika ndo nuu ndiꞌi kuachi kini íyo ñuu ivi yóꞌó.

⁴ Xaꞌa ya ikán kua xíniñuꞌu ndo kundaa ini ndo ndá kuꞌva kundàà vií ndo yá síꞌi ndo xiꞌin ya i̱í nuu xáa kaꞌnu ndo Iva yo Ndioxi.

⁵ Ta xäa kini ni ndo xiꞌin ikin kuñu ndo, ndixita ndo mií ndo nuu kuachi ivi yóꞌó. Ïkan ndo tá íkan naꞌa, na köo xíni Ndioxi.

⁶ Sïndaꞌvi taꞌan ndo käka sěꞌe ndo xiꞌin yá síꞌi ñani ndo, án xiꞌin i̱í kuꞌva ndo. Saa chi ndiꞌi na íkan saa ta sindoꞌo ni Ndioxi na. Tá íyo ya xa ndi̱kaꞌan ni nde xiꞌin ndo yachi, saa íyo ya.

⁷ Saa chi Ndioxi ta ka̱na ra yoo ya kuu yo naꞌa, na i̱í nuu ra, ta köo ndi̱kana ra yoo kundikun yo ra ya ikan yo ya väꞌa nuu ra.

⁸ Ta ndiꞌi naꞌa, na köo xíin xaa súvi ya yóꞌó, ta süvi ya káꞌan ndeꞌe kua köo xíin na xaa súvi na, chi ya káꞌan mií Iva yo Ndioxi kua köo xíin na xaa súvi na, chi mií ra ku ra táxi Tachi I̱í ra ndaꞌa yo íyo ya xiꞌin yo.

⁹ Ta köo xíniñuꞌu ka i kaꞌan i xiꞌin ndo ya kuꞌvi ini ndo kuni taꞌan ndo, saa chi xa mií Ndioxi ku ra si̱naꞌa ndóꞌo̱ kuꞌvi ni ini ndo kuni taꞌan ndo.

¹⁰ Ya ndixa kua kúꞌvi ni ini ndo xíni ndo ndiꞌi na taꞌan yo, na ndóo ndiꞌi ñuu ya ñúꞌu estado Macedonia. Saa xíkan ni nde ya mani nuu ndo kuꞌvi ni ka ini ndo kuni taꞌan ndo iin iin ichí.

¹¹ Xaꞌa ni ndo ndee ya kuchiñu ndo koo vií ndo xiꞌin taꞌan ndo. Ta kundiꞌi ni ini ndo xiꞌin chiñu íkan ndo, xaa chiñu ndo xiꞌin ndaꞌa ndo saa kuxi ndo. Tá íyo ya xa ndi̱kaꞌan nde xiꞌin ndo, saa ikan ndo, xaa chiñu ndo.

¹² Tá íkan ndo saa xáa súvi ndo ya káꞌan nde xiꞌin ndo, ta köo xíniñuꞌu ndo nduku ndo ya xíniñuꞌu ndo nuu inka naꞌa. Ni naꞌa, na köo xíni Ndioxi ta chinuu vaꞌa ni na tuꞌun ndo.

Ya kuu tá ná ndikoo koo Tata yo Jesucristo

¹³ Ñani yo xiꞌin kuꞌva yo, kúni nde ná kundaa ini ndo xaꞌa na taꞌan yo na xa ndi̱xiꞌi, ya ná küsuchi ni ini ndo xaꞌa na tá kuꞌva kúsuchi ini naꞌa, na köo xíni Tata yo Jesucristo, chi na ikán ta ni köo xíni na unkua kundoꞌo na.

¹⁴ Chi xaꞌa ya kándixa yo ndi̱xiꞌi Jesús saa kándixa tu yo ya ndi̱taku ra. Ta kuꞌva saa sitaku Ndioxi ndiꞌi yoo kándixa ñaꞌa, sitaku ra yo koo yo xiꞌin Jesús.

¹⁵ Yakan kua káꞌan nde xiꞌin ndo vitin xaꞌa tuꞌun ya ta̱xi Tata yo Jesucristo ndaꞌa nde. Kivi ná ndiko koo ra kixi tuku ra ñuu ivi yóꞌó ta xiꞌna ka naꞌa, na xa ndi̱xiꞌi kuꞌun xiꞌin ra, sindiꞌi saa kuꞌun yoo xiꞌin ra.

¹⁶ Saa chi kivi tá ná ndiko koo ra kixi ra nuu ndivi, ta yáꞌa ni ndee kaꞌan ra xaꞌa ya kúu mií ra ichí xáꞌnda chiñu ra. Saa ndee ni tu kaꞌan iin mií tatun Ndioxi ya ínuu nuu ndiꞌi na tatun ra, ndee ni tivi ya itun trompeta Ndioxi tá ná ndiko koo Tata yo Jesucristo. Ta xiꞌna naꞌa, na ka̱ndixa ra ku na nditaku.

¹⁷ Sindiꞌi saa kuꞌun yoo ndi̱ndoo sindikuita ra yoo ndaa yo kuꞌun yo koo yo nuu viko nuu ndikitaꞌan yo xiꞌin naꞌa, na xa ndi̱taku. Ta ikán ndikitaꞌan yo ndikiꞌin yo Tata yo Jesucristo, ta saa koo yo xiꞌin ra ndiꞌi saa kivi ya vaxi.

¹⁸ Xiꞌin tuꞌun ya káꞌan i xiꞌin ndo yóꞌó kua kaꞌan ndo xiꞌin na taꞌan ndo, xaꞌa ndo ndee xiꞌin na.