1 Tesalonicenses 3 - Xochapa Mixteco

¹ Ta köo ndi̱kundee ka ini nde kundatun ni nde xaꞌa ya xa ku̱naꞌa ni täꞌan kuni soꞌo nde tuꞌun xaꞌa ndo, yakan va ka ndi̱kani ini nde ndoo nde koo nde ñuu Atenas,

² ta ti̱ꞌvi nde ra Timoteo, ñani yo, xaa ra nuu ndo koto ra ndóꞌo̱. Ta ra ñaa iin káchi vaꞌa ni xáa chiñu ra nuu Ndioxi xiꞌin nde, káꞌan ndoso ra tuꞌun vaꞌa xaꞌa Tata yo Jesucristo. Ta ti̱ꞌvi nde ra xaa ra nuu ndo koto ra ndóꞌo̱, ya chindee ra ndóꞌo̱ kandixa ni ka ndo tuꞌun xaꞌa Tata yo Jesucristo, saa xaꞌa ni ra ndee xiꞌin ndo,

³ ya ná ndïkava ini ndo xaꞌa ya tíxuꞌvi ni ndo vitin. Xa xíni tu mií va ndo ya xíniñuꞌu yo ndoꞌo ni yo.

⁴ Chi tá kivi ndi̱xiyo nde xiꞌin ndo ta ndi̱kaꞌan ni nde xiꞌin ndo ya ndoꞌo ni ndo kivi vaxi, ka̱chi nde xiꞌin ndo, ta saa ndixa ndóꞌo ndo vitin.

⁵ Xaꞌa ya ñaa kua köo ndi̱kundee ka ini i kundatun i, chi kúni ni i kundaa ini i ndá kuꞌva kándixa ndo Tata yo Jesucristo, yakan vaꞌa ka ti̱ꞌvi i ra Timoteo ñani yo xaa ra nuu ndo koto ra ndóꞌo̱. Süvi ka vi ya sindaꞌvi kiti nǎꞌa ndóꞌo̱ ya ikan ndo ya väꞌa, chi tá tu ná ikan ndo saa ta ni köo ndáa yaꞌvi ya i̱kan nde xiꞌin ndo, ya uun kuiti va kua xa̱a chiñu nde xiꞌin ndo.

⁶ Ta vitin xa ke̱e ra Timoteo ñani yo, ñuu ndo Tesalónica ikán, ndi̱ko koo ra xa̱a ra nuu nde ta vaꞌa ni va káꞌan ra xaꞌa ndo ya ndee ni kándixa ndo Tata yo Jesucristo ta saa kúꞌvi ni ini ndo xíni taꞌan ndo, ta ndíkaꞌán ni ini ndo xaꞌa nde, saa kúni ni ndo kuni ndo ndeꞌe, káchi ra. Ta saa tu ndeꞌe va, ndee ni kúni nde kuni nde ndóꞌo̱.

⁷ Yakan kua vani ndee ni ndóꞌo̱ nde ñúꞌu nde nuu tindiꞌi ini kúu mií nde, ta vaꞌa ni va ndu̱vaꞌa ini nde chi si̱ndiko ni ndo ini nde xaꞌa ya xi̱ni soꞌo nde xaꞌa ndo ya ndee ni ndáa ini ndo xíni ndo Tata yo Jesucristo.

⁸ Ndakua vaꞌa ku̱ni nde, ndi̱kiꞌin ni nde ini nde tá ku̱ndaa ni nde xaꞌa ndo ya vaꞌa ni tuun ndíkun ndo Tata yo Jesucristo.

⁹ Ta ndixaꞌvi ni ndo ya íkan ndo saa, yáꞌa ni vi kúsini nde nuu Ndioxi xaꞌa ya xi̱ni soꞌo nde íkan ndo saa, ni köo níꞌi nde kuꞌva taxi nde tixaꞌvi ndaꞌa ra xaꞌa ndo.

¹⁰ Nduvi niuun káꞌan ni nde xaꞌa ndo xiꞌin ra ya ná chindee ra ndeꞌe xaa tuku nde koto nde ndóꞌo, ta saa chindee ka nde ndóꞌo̱ xaꞌa ndá ka ñaꞌa ya xíniñuꞌu kundaa ini ndo xaꞌa, ya kandixa ka ndo Tata yo Jesucristo.

¹¹ Siin mií Iva yo Ndioxi xiꞌin Tata yo Jesucristo ná taxi ichí ndaꞌa nde ya kuchiñu xaa nde koto nde ndóꞌo̱.

¹² Ta ná chindee ni Tata yo Jesucristo ndóꞌo̱ kuaꞌnu ni ka ndo xiꞌin ya kúꞌvi ni ini ndo xíni taꞌan ndo, ta saa ná kuꞌvi ni ini ndo kuni ndo ndiꞌi naꞌa. Ta saa kuꞌvi ni ini ndo kuni taꞌan ndo tá kuꞌva kúꞌvi ni ini nde xíni nde ndóꞌo̱.

¹³ Ta káꞌan ni nde xiꞌin Ndioxi ya ná chindee ra ndóꞌo̱ koo tuun ni tuꞌun ra nima ndo, saa nduu ndo naꞌa, na i̱í ni, na köo nda iin kuachi kúu mií nuu Iva yo Ndioxi. Ta saa kua koo ndúvi ndo, tá ná ndiko koo tuku Tata yo Jesucristo kixi ra xiꞌin ndiꞌi na ñuu ra, na i̱í.