1 Tesalonicenses 2 - Xochapa Mixteco

Chiñu ya i̱kan ra Pablo ñuu Tesalónica

¹ Ñani yo xiꞌin kuꞌva yo, xíni mií ndo tá ndi̱xaꞌan nde ndi̱kaꞌan ndoso nde tuꞌun vaꞌa xaꞌa Tata yo Jesucristo xiꞌin ndo, ta süvi ya mani uun kua ndi̱xaꞌan nde nuu ndo.

² Saa chi xíni mií ndo tá täꞌan xaa nde ñuu ndo ta xiꞌna ñuu Filipos ndi̱yaꞌa nde, ta ikán ka̱ni ni na ndeꞌe, xa̱a ndu̱vaꞌa ni na xiꞌin nde. Saa tá ndi̱xaa nde ñuu ndo ta ndee ni sáa ini na ñuu ndo xíni na ndeꞌe, ta köo ndi̱ndiꞌvi nde nuu na, chi ndinuꞌu ni va ini nde ndi̱kaꞌan nde xiꞌin ndo xaꞌa tuꞌun vaꞌa ya ta̱xi Iva yo Ndioxi ndaꞌa nde.

³ Saa chi süvi ya sána ini nde ku ya ndi̱kaꞌan ndoso nde xiꞌin ndo, ta ni köo ndi̱xika kiꞌvi ini nde xiꞌin ndo, ni köo ndi̱sindaꞌvi nde nda iin ndo.

⁴ Chi mií Ndioxi ku ra xi̱to ndoso ndeꞌe, ta xi̱ni ra kuchiñu nde xiꞌin chiñu ya ta̱xi ra ndaꞌa nde ya kaꞌan ndoso nde tuꞌun vaꞌa xaꞌa ra xiꞌin naꞌa. Ta ndeꞌe, ta köo íkan nde ndá ka ñaꞌa ya xaa sií nde ini na ñuu ivi yóꞌó, sundi íkan nde ñaꞌa ya xaa sií nde ini Ndioxi, chi mií ra ku ra xíto ndoso nima ndiꞌi yo án ya vaꞌa kua, án süvi ya vaꞌa kua.

⁵ Xa xíni mií ndo nda iin ichí köo ndi̱kaꞌan vata nde xiꞌin ndo ya sixinu nde ini ndo, ni köo ndi̱sindaꞌvi nde ndóꞌo̱ ya taxi ndo xuꞌun ndaꞌa nde. Mií Ndioxi ku ra ndíkuiin xaꞌa ya káꞌan nde xiꞌin ndo.

⁶ Chi nda iin ichí köo ndi̱xaá naꞌnu nde mií nde nuu nda iin naꞌa, ni nuu ndóꞌo̱, ni nuu ndá ka inka naꞌa. Vani kúu mií nde ichí ya ikan ndo saa xiꞌin nde xaꞌa ya kúu nde nda xáa chiñu nuu Tata yo Jesucristo, ta köo ndi̱kan nde saa xiꞌin ndo.

⁷ Vií ni va ndi̱kaꞌan nde xiꞌin ndo, tá íkan iin ñaꞌa yá vaꞌa ni ndáa seꞌe, saa i̱kan nde xiꞌin ndo.

⁸ Ta kúꞌvi ni ini nde xíni nde ndóꞌo̱ xaꞌa ya ñaa kua kúsini ni nde ndítuꞌun nde tuꞌun vaꞌa xaꞌa Tata yo Jesucristo xiꞌin ndo. Ta nda ndi̱taxi nde mií nde ya kuvi nde xaꞌa ndo, saa chi yáꞌa ni kúꞌvi ini nde xíni nde ndóꞌo̱.

⁹ Xa ñúꞌu vaꞌa ini mií ndo ndá kuꞌva xa̱a chiñu ni nde tá ndi̱xiyo nde xiꞌin ndo, nduvi niuu xa̱a chiñu ni nde ya ka̱na xuꞌun kuniñuꞌu nde sata nde ñaꞌa kuxi nde. Ta köo ndi̱sindiꞌi nde ini nda iin ndo ya chindee ndo ndeꞌe xaꞌa ya káꞌan ndoso nde tuꞌun vaꞌa xaꞌa Iva yo Ndioxi xiꞌin ndo.

¹⁰ Ta mií ndo ku ndo ndíkuiin xaꞌa nde xiꞌin Ndioxi, chi tá kivi ndi̱xiyo nde xiꞌin ndo ta vívií ni va ndi̱xiyo nde xiꞌin ndo, tá kuꞌva íyo naꞌa, na i̱í ini, na nda̱a̱ ni ini, na ndǎku ini, kuꞌva saa ndi̱xiyo nde xiꞌin ndo.

¹¹ Tá íkan iin taa, ra vaꞌa ni ini xiꞌin seꞌe ra, saa i̱kan nde xiꞌin ndo, chi ndi̱kaꞌan ni nde xiꞌin ndo ya koo vií ndo xiꞌin taꞌan ndo, ta saa si̱ndiko nde ini ndo.

¹² Ta ndi̱xaꞌa ni nde ndee xiꞌin ndo ya ná koo ndo tá kuꞌva kúni mií Iva yo Ndioxi, chi ka̱na ra ndóꞌo̱ ya koo ndo xiꞌin ra nuu luvi ni káa nuu xáꞌnda chiñu ra.

¹³ Yakan ndiꞌi saa ichí táxi ni nde tixaꞌvi ndaꞌa Ndioxi xaꞌa ndo, saa chi kivi tá ndi̱kiꞌin ndo tuꞌun ra ya xi̱ni soꞌo ndo ndi̱kaꞌan nde xiꞌin ndo, ta ndi̱kuni ndo ya kúu ya tuꞌun Ndioxi chi süvi tuꞌun na ñuu ivi yóꞌó kua. Ta ya ndixa kua kúu ya tuꞌun Ndioxi, chi kúu mií ya ndee ndínama ya ndóꞌo̱ xaꞌa ya kándixa ndo ya.

¹⁴ Ñani yo, ndóꞌo̱ ta ndee ni ndóꞌo ndo íkan na ñuu mií ndo, tá ndóꞌo na ñani yo na veꞌe ñuꞌu Iva yo Ndioxi, na ndíkun Jesucristo ndóo estado Judea, saa ndóꞌo tu ndóꞌo̱ va, chi na ikán ta ka̱nitaꞌan ni na judío taꞌan mií na xiꞌin na.

¹⁵ Suvi na ikán ku na xa̱ꞌni Tata yo Jesús, ta saa i̱kan tu na xiꞌin nda ndi̱kaꞌan ndoso tuꞌun yuꞌu Ndioxi xinaꞌa va, ta saa tu ndeꞌe va, ta̱va ndaꞌa na ndeꞌe ka̱na koo nde ñuu nde. Xaꞌa ya íkan na saa, ta köo íkan na ya kúni Ndioxi, ta kuakiꞌvi na kuachi xiꞌin ndiꞌi naꞌa.

¹⁶ Tá kúni nde kaꞌan nde xiꞌin naꞌa, na köo kúu judío ya kuchiñu na kaku na, ta köo táxi na judío taꞌan nde kaꞌan nde xiꞌin na ikán. Ta xaꞌa ya íkan na saa, ta ndee ni kuandaa kuachi sata na ndúkuaꞌa ka ya, yáꞌa ni ndee kundoꞌo na tixuꞌvi ni na.

Kúni tuku ra Pablo kuꞌun ra koto ra na ñuu Tesalónica

¹⁷ Ñani yo xiꞌin kuꞌva yo, vani xa ku̱naꞌa vaꞌa loꞌo va ku̱xika yo nuu taꞌan yo, köo xíni taꞌan ka yo, sundi ndóꞌo̱ ta íyo ndo nima nde, ta ndiꞌi saa kivi ndíkani ni ini nde xaꞌa ndo, saa kúni ni nde xaa nde koto nde ndóꞌo̱.

¹⁸ Ta xa kuaꞌa ni ichí ku̱ni nde xaa nde koto nde ndóꞌo̱. Mií yeꞌe Pablo ku ra kúni ni xaa nuu ndo, sundi köo ndi̱kuchiñu nde xaa nde nuu ndo, chi mií kiti nǎꞌa, kiti Satanás ku ri ndi̱kasi nuu nde, köo ndíkuvi xaa nde koto nde ndóꞌo̱.

¹⁹ Ta kúni ni nde xaa nde nuu ndo chi ndóꞌo̱ ku ndo xáꞌa ni ndee xiꞌin nde xaꞌa ya ndee ni vaꞌa ndíkun ndo Tata yo Jesucristo, xaꞌa ya ñaa kua kúsini ni nde xiꞌin ndo. Tá ná ndiko koo Tata yo Jesucristo ñuu ivi yóꞌó ta vaꞌa ni kuni nde xiꞌin ndo, chi ndóꞌo̱ ta tá íin ñaꞌa ya luvi ni níꞌi iin naꞌa nuu kuaꞌan na kéꞌe taꞌan na, saa íin ndo nuu nde. Ta niꞌi ni nde ya vaꞌa nuu Ndioxi xaꞌa ndo tá ná sinaꞌa nde ndóꞌo̱ nuu ra.

²⁰ Ta xaꞌa ya vaꞌa ni kándixa ndo Ndioxi ta ndee ni vaꞌa ínuu tuꞌun xaꞌa nde nuu naꞌa, ta xaa kaꞌnu Ndioxi ndeꞌe xaꞌa ndo. Kúsini ni nde xiꞌin ndo.