1 Tesalonicenses 1 - Xochapa Mixteco

Káꞌan ndioxi ra Pablo xiꞌin na ñuu Tesalónica

¹ Yeꞌe Pablo xiꞌin ra Silvano tin ra Timoteo ku nde tíꞌvi tutu yóꞌó xaa ya ndaꞌa ndiꞌi ndóꞌo̱ ñani yo xiꞌin kuꞌva yo, na veꞌe ñuꞌu ndóo ñuu Tesalónica. Káꞌan ndioxi nde xiꞌin ndiꞌi ndo. Ta mií Iva yo Ndioxi xiꞌin Tata yo Jesucristo ná ikan ni ya vaꞌa xiꞌin ndo, saa ná taxi ra koo vaꞌa ni ini ndo.

Ndee ni ínuu vaꞌa tuꞌun xaꞌa na ñuu Tesalónica ya vaꞌa ni íkan na

² Ndiꞌi saa ichí táxi ni nde tixaꞌvi ndaꞌa Ndioxi xaꞌa ndiꞌi ndo, ta káꞌan ni nde xaꞌa ndo xiꞌin ra chi ndíkaꞌán ni ini nde xaꞌa ndo.

³ Ta táxi ni nde tixaꞌvi ndaꞌa Iva yo Ndioxi xaꞌa kuꞌva ya kándixa ni ndo ra, saa kúꞌvi ni ini ndo xíni ndo ra, ta ya ñaa kua xáꞌa ni ndee xiꞌin ndo ya ndee ni vaꞌa xáa chiñu ndo nuu ra, chi kúndaa teꞌe ini ndo ya xaa súvi ra ya ndi̱kaꞌan ra xiꞌin ndo, ta ya ñaa kua chíndee ni ndóꞌo̱ ndee ni tuun ndíkun ndo Tata yo Jesucristo.

⁴ Ñani yo xiꞌin kuꞌva yo, na kúꞌvi ni ini Ndioxi xíni ra, chi xíni nde ya ndi̱kaxin ra ndóꞌo̱, ya nduu ndo na ñuu ra.

⁵ Chi tá kivi ndi̱kaꞌan ndoso nde tuꞌun vaꞌa xaꞌa ra xiꞌin ndo, ta köo ndi̱kaꞌan nde tuꞌun mií nde xiꞌin ndo. Sundi xiꞌin ndee Tachi I̱í Ndioxi kua ndi̱kaꞌan nde xiꞌin ndo, saa ndinuꞌu ni ini nde kándixa nde ya ndaa kua ndi̱kaꞌan nde xiꞌin ndo. Ta xi̱ni mií ndo ndá kuꞌva ndi̱xiyo nde tá kivi xi̱ndoo nde xiꞌin ndo xaꞌa ya kúꞌvi ni ini nde xíni nde ndóꞌo̱.

⁶ Saa ta ndi̱nama ini ndo xa̱á ndo íkan ndo tá kuꞌva i̱kan nde, chi ndeꞌe ta i̱kan nde tá kuꞌva íkan mií Tata yo Jesucristo kivi xi̱ndoo nde xiꞌin ndo. Vani ndee ni ndi̱xiyo tindoꞌo nuu ndo xaꞌa tuꞌun ra, ta saa ni ndi̱kiꞌin ndo tuꞌun ra ya ndi̱kaꞌan nde xiꞌin ndo, saa ndu̱u sií ni ini ndo i̱kan mií Tachi I̱í ra.

⁷ Xaꞌa ya íkan ndo saa ta ndíkunuu vaꞌa ni tuꞌun ndo, nuu na ñani yo xiꞌin kuꞌva yo, na ndóo estado Macedonia xiꞌin na ndóo estado Acaya.

⁸ Chi ndóꞌo̱ ku ndo ndítuꞌun tuꞌun vaꞌa xaꞌa Tata yo Jesucristo, ta süvi ndisaa estado Macedonia ñaa xiꞌin estado Acaya kua xíta niꞌnu ya, chi ndiꞌi ni kúu ñaꞌñu xíta niꞌnu tuꞌun ra. Ta kuaꞌa ni na xíni soꞌo xaꞌa ya ndee ni ndáa ini ndo xíni ndo ra. Yakan ndeꞌe ta nda iin ka ya köo xíniñuꞌu nde ndituꞌun nde xiꞌin na xaꞌa ndo.

⁹ Ndiꞌi ni kúu ñaꞌñu káꞌan vaꞌa ni na xaꞌa ndo ya ndi̱kuiso vaꞌa ni ndo ndeꞌe tá ndi̱xaa nde nuu ndo. Saa káꞌan na xaꞌa ndo ya si̱ndoo ndo ya káñuꞌu ndo ndioxi ndíi, ta chi̱kaa ini ndo kundikun ndo Ndioxi ra ndaa ni, ra táku.

¹⁰ Ta káꞌan na xaꞌa ndo ya ndátun ndo Jesús, ra kúu seꞌe Ndioxi ra ke̱e nuu ndivi, ta ndiko koo tuku ra kixi ra ñuu ivi yóꞌó. Chi Ndioxi ku ra si̱taku ñaꞌa tañu na ndíi, ta ra ikán ku ra sikaku yoo nuu tindoꞌo ya ndee ni vaxi sata na ñuu ivi yóꞌó.