1 Pedro 5 - Xochapa Mixteco

Soꞌva xíniñuꞌu na ndíso chiñu xiꞌin na veꞌe ñuꞌu koo na

¹ Ta xáku ndaꞌvi ni i nuu nda ñani yo, nda xikuaꞌa nda ñúꞌu xiꞌin ndo, nda ndóso nuu na ñani yo na veꞌe ñuꞌu, nda xikuaꞌa taꞌan yeꞌe. Chi yeꞌe ta ndíkuiin i xaꞌa Tata yo Jesucristo ya ndee ni ndi̱xuꞌvi ra xaꞌa yo. Ta kivi tá ná ndiko koo ra ta saa kuni yo ya yéꞌe̱ luvi ni xiꞌin ndee chee ni kúu mií ra, ya ndituvi kuni yo.

² Ta yeꞌe xíkan ni i ya mani nuu ndo, kundaa ni ndo na ñani yo, na si̱kuiso chiñu Tata yo ndóꞌo̱. Tá kuꞌva ndáa iin taa levo sana ra, kuꞌva saa vívií kundaa ndo na, ta ïkan ndo ya xaꞌa ya nduxa án xaꞌa xuꞌun. Vaꞌa ikan ndo tá kuꞌva kúni mií Ndioxi, kusini ni ndo ya íkan ndo saa.

³ Ta käꞌnda chiñu ndo nuu na, ya nduu ndo tá íyo xitoꞌo na, na ndee ni íyo ichí ndaꞌa ya kaꞌnda chiñu ndo nuu na. Ya ndee ni vaꞌa ikan ndo xiꞌin na kua sinaꞌa ndo na ná ikan na tá kuꞌva vií ni íkan mií ndo.

⁴ Saa chi tá ná ndiko koo Tata yo Jesucristo, ra ndáa yoo, ra chee nuu yo, ra íyo tá íyo nda ndáa levo, ta saa kua niꞌi yo iin corona ya ndee ni luvi ta nda iin ichí ndïꞌi xaꞌa ya.

⁵ Ta saa íyo tu ya káꞌan i xiꞌin ndóꞌo̱ kuâán va, ya ná kuni soꞌo ndo ya káꞌan na xikuaꞌa veꞌe ñuꞌu xiꞌin ndo, ta xaa ni̱nu̱ ndo mií ndo, saa xaa súvi ndo chiñu nuu taꞌan ndo. Chi saa káꞌan tuꞌun Ndioxi ya ta̱a na xinaꞌa, káchi ya saa: Kúndasi nuu va Ndioxi xíni ra naꞌa, na xáa kaꞌnu ni xiꞌin mií, ta chíndee ni va ra naꞌa, na ni̱nu̱ kúni.

⁶ Ta xaꞌa ya ikán kua xaa ni̱nu̱ xiꞌin mií ndo tixin ndee chee ni kúu mií Ndioxi, saa tá ti̱ndaa kivi ya chi̱tuni mií ra saa kua xaa kaꞌnu ra ndóꞌo̱.

⁷ Ta nditaxi ndiꞌi ndo tindoꞌo ya síndiꞌi ini ndo ndaꞌa ra, saa chi mií ra ku ra ndáa ndóꞌo̱.

⁸ Ta káxin teꞌe koo ini ndo, küsun ndo, kundito ndo, saa chi kiti nǎꞌa, ri kánitaꞌan xiꞌin ndo ta ndá yokan ndíkun ri xíka ri sata ndo. Tá kuꞌva íkan kiti lion, ri ndee ni ndíkun xíka ndúku tiin kiti kaxi ri, kuꞌva saa íkan kiti nǎꞌa xiꞌin ndo.

⁹ Ndaku ni koo ini ndo, tuun ni kundaa ini ndo Tata yo Jesucristo, täxi ndo keꞌe ri nǎꞌa ndóꞌo̱. Chi tá kuꞌva ndóꞌo ndóꞌo̱, saa ndóꞌo ndiꞌi ni kúu na taꞌan yo, na kándixa Tata yo Jesucristo na ndóo ndiꞌi saa kúu xaꞌa ñuu ivi.

¹⁰ Sundi ndóꞌo̱ ta kündiꞌi ini ndo chi tá sindiꞌi ndi̱yaꞌa uvi ndaa kivi ya ndi̱xuꞌvi ni ndo, ta mií Ndioxi ku ra ndasa xuxa ini ndo, ta saa taxi ra ndee ndaꞌa ndo ya tuun ni kundikun ndo ra, saa niꞌi ndo ndee nuu ra ndundee ini ndo ta ta̱xi ra ichí ndaꞌa ndo tuun ni koo ndo xiꞌin ra.

¹¹ ¡Ná xaa kaꞌnu yo Ndioxi ndiꞌi saa kivi, ta ndiꞌi saa kivi ná kaꞌnda chiñu ra nuu ndiꞌi ñaꞌa íyo ñuu ivi! Saa ná koo.

Tuꞌun sindiꞌi táa ra Pedro kuaꞌan ndaꞌa na veꞌe ñuꞌu

¹² Ra Silvano ñani yo ku ra ndee ni tuun ndíkun Tata yo Jesucristo, ta ra yóꞌó ku ra kuniꞌi tutu yóꞌó xaa ya ndaꞌa ndo, ta̱a i uvi ndaa tuꞌun xaa ya nuu ndo ya xáꞌa ni i ndee xiꞌin ndo káꞌan i xiꞌin ndo xaꞌa tindoꞌo ya ndee ni ndóꞌo ndo vitin, ta ya ñaa kua káꞌan ya ndee ni kúꞌvi ini Ndioxi xíni ra ndóꞌo̱.

¹³ Ta tíꞌvi ni na taꞌan yo, na ndíkun Tata yo Jesucristo ndóo ñuu Babilonia tuꞌun mani xaa nuu ndo. Na yóꞌó ku na ndi̱kaxin ra tá kuꞌva ndi̱kaxin ra ndóꞌo̱. Saa tu ra Marcos, ra íyo tá íyo seꞌe mií i, tíꞌvi ni ra tuꞌun mani xaa ya nuu ndo.

¹⁴ Ta vaꞌa kaꞌan ndioxi ndo xiꞌin taꞌan ndo, xaꞌa ya kúꞌvi ni ini ndo xíni taꞌan ndo. Ta saa ná koo vaꞌa ni ini ndo kunitaꞌan ndo xaꞌa ya xa iin káchi kándixa ndiꞌi ndo Tata yo Jesucristo. Saa ná koo.