1 Pedro 4 - Xochapa Mixteco

Vívií ná koo yo nuu Ndioxi

¹ Ta ndo̱ꞌo ni Cristo xaꞌa yo, ndi̱taxi ra ikin kuñu ra ndi̱xuꞌvi ni ra. Yakan saa xíniñuꞌu ndóꞌo̱ xaꞌa ni ndo ndee ya ndoꞌo ndo tá kuꞌva ndo̱ꞌo mií ra. Chi ndiꞌi naꞌa, na ndee ni tíxuꞌvi, ta na ikán sínaꞌa na mií na ya ndixa kua si̱ndoo ndiꞌi na ichí väꞌa i̱kan na,

² xaꞌa ya íyo ndúvi na ya xaa súvi na ya kúni mií Ndioxi tiempo ya táxi ra táku ka na ñuu ivi yóꞌó, ta köo íyo ka na tá kuꞌva kúni mií ikin kuñu na.

³ Ta ndóꞌo̱ xa kuaꞌa ni tiempo ndi̱xika ndo tá kuꞌva xíka naꞌa, na köo kándixa Ndioxi ndóo ñuu ivi yóꞌó, ndi̱xika sií ndo xiꞌin ná síꞌi ta süvi ná síꞌi ndo ku ná, saa ná síꞌi ndi̱xika sií ná xiꞌin taa, ta süvi ií ná ku nda. Ndiꞌi nuu ya väꞌa kúni mií ndo i̱kan ndo. Ndee ni xi̱ꞌi ndo, ndakua ndi̱xini mií ndo ndi̱xika ndo, ta i̱kan ndo ya kaꞌa̱n ni nuu, ndi̱xika ndo nuu viko xa̱a kaꞌnu ndo ndioxi ya ndíi, ya köo kúu Ndioxi ndinuꞌu.

⁴ Xaꞌa ya ñaa kua káꞌan väꞌa naꞌa xaꞌa ndo, chi köo ítaꞌan ka ndo xiꞌin na, köo íkan ka ndo taꞌan ñaꞌa ya kini ni i̱kan ndo xiꞌin na yachi, ya síndiꞌi xaꞌa ndóꞌo̱ nuu Ndioxi.

⁵ Ta kündiꞌi ini ndo xaꞌa na, chi vaxi kivi ta ndikuaꞌa ndiꞌi na kuenta nuu Iva yo Ndioxi xaꞌa ya väꞌa íkan na, chi mií ra ku ra íyo ichí ndaꞌa, ta xa íyo ndúvi ra ya xaa nani ra kuachi xiꞌin ndiꞌi naꞌa, nuu taxi ra kuachi xaꞌa na táku tin na xa ndi̱xiꞌi.

⁶ Xaꞌa ya ñaa kua xa ndi̱kaꞌan ndoso naꞌa tuꞌun vaꞌa xaꞌa Tata yo Jesucristo xiꞌin naꞌa, na xa ndi̱xiꞌi, ya kuchiñu kutaku ya vaꞌa na nuu Ndioxi, vani xa̱a nani na ñuu ivi yóꞌó kuachi xiꞌin na tá kivi xi̱taku na.

Vívií ná kuñuꞌú yo ya vaꞌa ndi̱niꞌi yo nuu Ndioxi

⁷ Ta vaꞌa ná kundaa ini ndo chi xa yati ni va ndiꞌi xaꞌa ñuu ivi yóꞌó, yakan ndóꞌo̱ ta káxin teꞌe koo ini ndo, ta ndinuꞌu ni ini ndo kaꞌan ni ndo xiꞌin Ndioxi ndiꞌi saa kivi.

⁸ Chi ya ndee ni ndee nuu ndiꞌi ya kua kuꞌvi ni ini ndo kuni taꞌan ndo, chi saa kua kuchiñu ndo xaa kaꞌnu ini ndo xaꞌa kuachi na taꞌan ndo, ta xaꞌa ya kúꞌvi ni ini ndo xíni ndo na kua kuchiñu ndo xaa kaꞌnu ini ndo xaꞌa kuachi na, ni ndee ni ndee káa ya.

⁹ Ta kusini ni ndo ndikuiso vií ndo na ñani yo na xáa uvi ndaa kivi veꞌe ndo, ta käꞌan kuachi ndo xaꞌa ya íkan ndo saa xiꞌin na.

¹⁰ Saa chi Iva yo Ndioxi ta xa kuaꞌa ni va ya vaꞌa, ya xínituni ke̱e nuu ndivi ta̱xi ra ndaꞌa iin iin ndo, ya kuniñuꞌu ndo ya ikan ndo ya vaꞌa xiꞌin taꞌan ndo. Saa kua kuchiñu ndo ikan ndo kuaꞌa ni ya vaꞌa xaꞌa ya kúꞌvi ni ini Ndioxi xíni ra ndóꞌo̱.

¹¹ Ta ndóꞌo̱ ndi̱niꞌi ya vaꞌa xínituni ke̱e nuu Ndioxi ya kaꞌan ndoso ndo, ta vaꞌa kaꞌan ndoso ndo tá kuꞌva kúni mií Iva yo Ndioxi. Ta saa ndóꞌo̱ ndi̱niꞌi ya vaꞌa chindee taꞌan ndo xiꞌin inka naꞌa, ta vaꞌa chindee taꞌan ndo xiꞌin na xiꞌin ndiꞌi ndee ya ta̱xi Iva yo Ndioxi ndaꞌa ndo. Ta ndiꞌi ya íkan ndo, ta vaꞌa ikan ndo ya, ya xaa kaꞌnu ndo Ndioxi tixin Tata yo Jesucristo, ra ndee ni ndee ku mií xiꞌin ya luvi ni kúu mií ra, ta saa koo ra ndiꞌi saa kúu tiempo. Saa ná koo.

Tá ndóꞌo yo xaꞌa Tata yo Jesucristo ta ná kusini ni yo

¹² Ñani yo, ndïkanda ni ini ndo tá ndee ni vaxi tindoꞌo xíto ndoso ya ndóꞌo̱ xaꞌa ya ndíkun ndo Tata yo Jesucristo, ta ndïkani tu ini ndo ndisaa ndóꞌo̱ ku ndo ndee ni ndóꞌo, túvi ndo.

¹³ Tá ndóꞌo ndo saa ta kusini ni ndo, chi iin káchi ndóꞌo ndo tá kuꞌva ndo̱ꞌo mií Tata yo Jesucristo. Saa tá ná ndiko koo tuku ra kixi ra ta kuni ndo ndee ya chee luvi ni kúu mií ra, ta kusini ni ndo.

¹⁴ Tá ndá naꞌa kánaꞌa xaꞌa ndo ya ndíkun ndo Tata yo Jesucristo, ta vaꞌa ni kée ndo chi íyo Tachi I̱í Ndioxi ya ndee ni xiꞌin ndo, chi naꞌa, na köo xíni Ndioxi ta na kánaꞌa va ku na xaꞌa ra, ta ndóꞌo̱ ta xáa kaꞌnu ni va ndo ra.

¹⁵ Yakan tá ndóꞌo̱ ndo, ta süvi xaꞌa ya xáꞌni ndo ndìì án ya kuiꞌna ndo, án ya íkan ndo ndá ka ya väꞌa, án ya kuakiꞌvi niꞌnu yuꞌu ndo xiꞌin naꞌa kua ndóꞌo ndo.

¹⁶ Sundi tá xaꞌa ya ndíkun ndo Cristo kua ndóꞌo̱ ni ndo ta kükaꞌán nuu ndo, taxi ni ndo tixaꞌvi ndaꞌa Ndioxi xaꞌa ya ndóꞌo ndo saa xaꞌa ra.

¹⁷ Saa chi vitin kua ti̱ndaa tiempo ya xaa nani Ndioxi kuachi xiꞌin ndiꞌi naꞌa. Tá kuꞌva kéꞌe na saa ikan ra xiꞌin na, ta xiꞌna xiꞌin naꞌa, na ndíkun ñaꞌa kua xáa ra ikan ra saa. Tá tu xiꞌna xiꞌin yoo kua íkan ra saa ya ndee ni ndóꞌo yo, ta yáꞌa ni ka va ndee kundoꞌo naꞌa, na köo xíin xaa súvi tuꞌun vaꞌa xaꞌa ra.

¹⁸ Chi saa káꞌan tuꞌun Ndioxi ya ta̱a na xinaꞌa, káchi ya saa: Tá tu uꞌvi ni kua kaku naꞌa, na vaꞌa, na ndíkun ichí Ndioxi. Ta yáꞌa ni ka uꞌvi kundoꞌo naꞌa, na väꞌa, na köo xíin kandixa Ndioxi, káchi tuꞌun ra.

¹⁹ Xaꞌa ya ñaa kua ndiꞌi ndóꞌo̱ tá ndóꞌo ni ndo tíxuꞌvi ni ndo xaꞌa ya xáa súvi ndo ya kúni Ndioxi, ta vaꞌa nditaxi ndiꞌi ndo mií ndo ndaꞌa ra xaꞌa ya vaꞌa ni si̱kuaꞌa ra ya vaꞌa ndo, chi nda iin ichí sïndoo ndaꞌa ra ndóꞌo̱, ta saa niꞌi ndo ndee ya ikan ka ndo ya vaꞌa.