1 Pedro 3 - Xochapa Mixteco

Soꞌva kua xíniñuꞌu ikan naꞌa na xa ti̱ndaꞌa

¹ Saa ndóꞌo̱ kuꞌva yo, ndóꞌo̱ xa ti̱ndaꞌa, íyo ií, ta xaa toꞌo ndo ií ndo. Chi sava ií ndo ta täꞌan kandixa nda tuꞌun Tata yo, tá ná kuni nda ya vaꞌa ni íkan ndo, ta nda iin tuꞌun köo xíniñuꞌu ndo kaꞌan ndo xiꞌin nda,

² ta xaꞌa ya ndee ni vaꞌa xáa toꞌo ndo Ndioxi, ta saa vií ni tu íkan va ndo, xaꞌa ya ñaa kua kandixa nda tuꞌun Ndioxi.

³ Ta ndäsa savi ni ndo mií ndo. Saa chi ya ndixa ni ndása savi ná ñaꞌa, ta süvi ya luvi ni núꞌni ixi xi̱ní ná kua, ni süvi ya ñúꞌu ni kàà ya oro ndaꞌa ná kua, ni süvi xaꞌa ya ndíxi ná toto vaꞌa yaꞌvi ni kua.

⁴ Ya ndee ni ndása vaꞌa ná nuu Ndioxi kua vaꞌa ni íyo nima ná, i̱í ni ini ná, kaꞌnu ni ini ná, köo kuachi ini ná, ya ikán kua ndáa yaꞌvi ni nuu Ndioxi, chi nda iin ichí ndïꞌi xaꞌa ya íkan ná saa.

⁵ Kuꞌva saa kua xa̱a súvi ná síꞌi mií na, ná i̱í ni ini xi̱ndoo xinaꞌa, saa kua xa̱a súvi ni ná mií ná chi ndee ni ka̱ndixa ná Ndioxi, ta xa̱a toꞌo ni ná ií ná.

⁶ Saa ndi̱xiyo yá Sara xa̱a súvi ni yá ya ndi̱kaꞌan Abraham ií yá xiꞌin yá, saa ndi̱kaꞌan yá xiꞌin ra “Tata”. Tá tu íkan ndo tá kuꞌva ndi̱xiyo yá Sara saa kua ndixa ndúu ndo seꞌe yá xaꞌa ya vaꞌa ikán ndo, ta ku ïꞌvi ndo nuu nda iin ñaꞌa.

⁷ Ta saa tu ndóꞌo̱ va ñani yo, ndo íyo ná síꞌi, ndíchi ni va ndikani ini ndo ndá kuꞌva xíniñuꞌu koo vií ndo xiꞌin ná síꞌi ndo. Ta xaa toꞌo ndo ná, saa vívií ndikani vaꞌa ini ndo koo ndo xiꞌin ná tá kuꞌva i̱í ni íyo kisi ya ndasun ni, kuꞌva saa xíniñuꞌu ndo ikan ndo xiꞌin ná. Chi iin káchi ndi̱niꞌi taꞌvi tu ná ñaa va xiꞌin ndo ya niꞌi ná ya vaꞌa nuu Ndioxi kutaku ná xiꞌin ra. Tá íkan ndo saa xiꞌin ná síꞌi ndo, ta köo ñaꞌa kasi nuu tuꞌun ya káꞌan ndo xiꞌin Ndioxi, tá káꞌan ndo xiꞌin ra, ta kuni soꞌo ra ya káꞌan ndo.

⁸ Vitin káꞌan i xiꞌin ndo, vívií koo ndo xiꞌin taꞌan ndo, iin yuꞌu koo ndo. Vívií kutaꞌan ndo. Kuꞌvi ini ndo kuni taꞌan ndo, kundaꞌvi ini ndo kuni taꞌan ndo, xaa ni̱nu̱ ndo mií ndo.

⁹ Tá ndá na íkan ya väꞌa xiꞌin ndo, ta ïkan ndo ya väꞌa xiꞌin na, käꞌan kini ndo xiꞌin na, vaꞌa ka kaꞌan ndo xaꞌa na xiꞌin Ndioxi ná chikaa ra ya vaꞌa na, ta saa kua niꞌi tu ndóꞌo̱ va ya vaꞌa nuu ra. Chi xaꞌa ya ikán kua ka̱na ra ndóꞌo̱ ya niꞌi ndo ya vaꞌa nuu ra.

¹⁰ Saa chi saa káꞌan tuꞌun Ndioxi, káchi ya saa: Tá ndá na kúni kutaku koo vií na xiꞌin ya vaꞌa, Ta kuenta ná koo na xiꞌin yuꞌu na, ná käꞌan na tuꞌun vata.

¹¹ Ta vaꞌa ná kuxika na nuu ya väꞌa íkan na, ta saa xáa na ikan na ya vaꞌa. Ná nduku ka na kuꞌva ya koo vaꞌa na xiꞌin taꞌan na, ta ná koo vaꞌa ni ini na.

¹² Saa chi mií Ndioxi ku ra ndáa naꞌa, na vaꞌa, na ndaa ini, ta xíni soꞌo ra ya káꞌan na xiꞌin ra. Sundi sâa va ra xiꞌin naꞌa, na íkan ya väꞌa, káchi tuꞌun Ndioxi.

¹³ Tá tu nina ya vaꞌa íkan ndo, ta nda iin naꞌa küchiñu ikan ya väꞌa xiꞌin ndo.

¹⁴ Tá tu ndóꞌo ni ndo xaꞌa ya íkan ndo ya vaꞌa, ta kusini ni ndo, chi ndóꞌo̱ ta ndo vaꞌa ni kée va ndo ku ndo. Ta kündiꞌi ini ndo, ni ku ïꞌvi ndo nuu na xáa nduvaꞌa xiꞌin ndo.

¹⁵ Ya ndee ni xíniñuꞌu ndo ikan ndo kua yóꞌó, ná kuñuꞌu ni ini ndo ya xaa kaꞌnu ni ndo Tata yo Jesucristo. Ta ndiꞌi saa ichí koo ndúvi ndo ya ndikani ndo nuu naꞌa, na ndákan tuꞌun ndóꞌo̱ xaꞌa ya kándixa ndo ra.

¹⁶ Tá ndíkuiin ndo yuꞌu na, ta vií ndikuiin ndo yuꞌu na xiꞌin ya toꞌo, ni̱nu̱ koo ini ndo xiꞌin na, ni ya xínituni ndo ta täxi ya kuachi xaꞌa ndo. Tá ndá naꞌa kánaꞌa xaꞌa ndo xaꞌa ya vaꞌa íkan ndo, ya ndíkun ndo Tata yo Jesucristo, ta kukaꞌan nuu mií va na xaꞌa ya íkan na saa xiꞌin ndo.

¹⁷ Tá tu saa kúni mií Ndioxi kundoꞌo ndo xaꞌa ya íkan ndo ya vaꞌa, ta vaꞌa ni kée ndo, süvi ka vi tá tu tíxuꞌvi ndo xaꞌa ya íkan ndo ya väꞌa.

¹⁸ Saa chi saa kua ndo̱ꞌo tu mií va Tata yo Jesucristo xaꞌa yo, ndi̱xiꞌi ra xaꞌa kuachi yo, ta iindaa ichí ndo̱ꞌo ra ndi̱xiꞌi ra, ta küvi ka ra. Ra vaꞌa ni ndi̱xiyo ra, ta ndi̱xiꞌi ra xaꞌa ndiꞌi yo ivi kuachi ya kuchiñu kundaka ra yoo kuꞌun yo nuu Ndioxi. Tá ndi̱xiꞌi ra ta ndi̱ꞌi xaꞌa ikin kuñu ra, saa tá ndi̱taku ra xiꞌin ikin kuñu ra ya xa̱á küvi kuni yo.

¹⁹ Ta xiꞌin ikin kuñu ra ya xa̱á, küvi kuni yo kua ndi̱xaꞌan ra ndi̱kaꞌan ndoso ra xiꞌin tachi na ndíi ñúꞌu veꞌe kàà.

²⁰ Chi na ikán ta köo ndi̱xiin na xaa súvi na ya ndi̱kaꞌan Ndioxi xiꞌin na tá tiempo ya ndi̱xiyo ra Noé. Ndee ni ndi̱xaꞌa ndee ini Ndioxi xi̱ndatun ra na tá ndi̱xika ra Noé si̱kuaꞌa ra itun barco ya kaku na. Ta ndisaa una kuiti ndi̱xiyo na ndi̱kaku, köo ndi̱xiꞌi na xiꞌin tikuii.

²¹ Taꞌan tikuií ikán ku tikuií rá síkuchi naꞌa ndóꞌo̱ vitin, rá síkaku ndóꞌo̱. Ta tikuií ikán ta köo ndíkata rá ya väꞌa íyo ikin kuñu yo, sundi ndása vaꞌa rá ya xínituni yo, saa síkaku rá yoo xaꞌa ya ndi̱taku Tata yo Jesucristo tañu na ndíi.

²² Ta nda̱a ra kuaꞌan ra nuu ndivi, índuꞌu ra ñaꞌñu kuáꞌá Ndioxi. Ta mií ra ku ra xáꞌnda chiñu nuu na tatun Ndioxi, saa xáꞌnda chiñu ra nuu ndiꞌi ndee ya íyo nuu ndivi tin ya íyo nuu ñuꞌú yóꞌó.