1 Pedro 2 - Xochapa Mixteco

¹ Xaꞌa ya ñaa kua sindikoo ndo ya väꞌa íkan ndo, sïndaꞌvi taꞌan ka ndo, köo ka ndo na uvi ini, ta ni kûni ini ndo kuni taꞌan ndo, ni käꞌan vata ka ndo xaꞌa taꞌan ndo.

² Koo ndo tá kuꞌva íin na vali, na sikan ka̱ku, na ndee ni káꞌun ini ta kúni ni na chichin na, kuꞌva saa xíniñuꞌu ndo nduku ni ndo nina tuꞌun ya vaꞌa, ya kúu tuꞌun Tata yo, saa kua nduu ndo na ndinuꞌu ni ndíkun ichí ra, ya kaku ndo.

³ Chi xa ku̱ndaa ini ndo ya ndee ni vaꞌa taa ku Tata yo Jesucristo.

Tá káa iin yu̱ú ya kaꞌnu ni ya táku saa káa Tata yo Jesucristo

⁴ Vaꞌa kuyati ndo nuu Tata yo Jesucristo ra káa tá káa yu̱ú ya táku, ya ku̱ndasi nda síkuaꞌa veꞌe, sundi Ndioxi ta ndi̱kaxin ñaꞌa ra, chi ya ikán ka kua ndee ni ndáa yaꞌvi nuu ra, ta yáꞌa ni yaꞌvi ya.

⁵ Ta saa ndóꞌo̱ tá káa yu̱ú táku ikán saa íin ndo, chi yu̱ú ikán kua ndee ni xíniñuꞌu ra síkuaꞌa ra veꞌe ñuꞌu i̱í ya küvi kuni yo. Ta ndóꞌo̱ ku ndo xáa chiñu ini veꞌe ñuꞌu ikán chi tá íin sutu nda i̱í, saa íin ndo xáa chiñu ndo ini ya, ta tixin Jesucristo kua sóko ndo ya i̱í, ya vaꞌa nuu Ndioxi.

⁶ Saa káꞌan tuꞌun Ndioxi ya ta̱a na xinaꞌa, káchi ya saa: Koto ndo chinduꞌu i yu̱ú ya ndee ni ndáa yaꞌvi, ya luvi ni ndíkaa tutun xaꞌa veꞌe i ya kuaꞌa ñuu Sión. Ndiꞌi naꞌa, na kándixa ni taa ra káa tá káa yu̱ú ikán, ta nda iin kivi kükaꞌán nuu na, ni ndïkava ini na xiꞌin ra, káchi tuꞌun Ndioxi.

⁷ Ndiꞌi ndóꞌo̱ kándixa ni Jesucristo ta nda tá káa yu̱ú ya ndee ni ndáa yaꞌvi saa káa ra nuu ndo, ta nuu naꞌa, na köo xíin kandixa ra, ta ni köo ndáa yaꞌvi ra nuu na, ta saa xáa ndúvi na tuꞌun Ndioxi ya káchi saa: Yu̱ú ya ku̱ndasi nda síkuaꞌa veꞌe. Ya ikán kua ndu̱u yu̱ú núnu̱ú ya ndee ni vaꞌa ndíkaa xaꞌa veꞌe, káchi tuꞌun Ndioxi.

⁸ Saa káꞌan ka tuꞌun Ndioxi, káchi ya saa: Yu̱ú ikán kua síkakiꞌi xaꞌa naꞌa, na köo xíin kandixa, ta kákiꞌi xaꞌa na nuu ya. Ndiꞌi na kákiꞌi xaꞌa ta kóyo na nuu ya, na ikán ku na köo xíin kuni soꞌo ya káꞌan Ndioxi, ni köo xíin na xaa súvi na ya káꞌan ra. Chi xa saa chi̱tuni Ndioxi kundoꞌo na xïin kuni soꞌo ya káꞌan tuꞌun ra.

⁹ Sundi ndóꞌo̱, ta mií Iva yo Ndioxi ku ra ndi̱kaxin ndóꞌo̱ ndu̱u ndo seꞌe mií ra, saa nda̱sa ra ndóꞌo̱ sutu na xáa chiñu nuu rey, ra kúu Tata yo Jesucristo, ta ndu̱u ndo iin ñuu na i̱í ni, na kúu kuenta mií Ndioxi. Ta mií Iva yo Ndioxi ku ra ndi̱kaxin ndóꞌo̱, ta̱va ra ndóꞌo̱ ichí nuu naá nuu xi̱ndoꞌni ndo, saa chi̱ndoo ra ndóꞌo̱ nuu luvi ni káa nuu íyo ñu̱ꞌu̱ yéꞌe̱ ya kúu mií ra. Ta ndi̱kaxin ra ndóꞌo̱ ya kaꞌan ndoso ndo tuꞌun ra ya ndee ni ndee kúu mií, ya kaꞌan ndo ya xiꞌin naꞌa ya kundaa ini na xaꞌa ya vaꞌa ni íkan Ndioxi.

¹⁰ Chi xa xíni mií ndo tá yachi ta ndaꞌvi ni ndi̱xiyo ndo, tá íyo ndo ndi̱xika ndaꞌvi saa ndi̱xiyo ndo, ta vitin ndi̱kuiso vií Ndioxi ndóꞌo̱ ndu̱u ndo na ñuu mií ra. Chi yachi ta ni köo ndïkuvi kundaꞌvi ini ra kuni ra ndóꞌo̱, ta vitin ta ndiniꞌi taꞌvi ndo nuu ra kúndaꞌvi ni ini ra xíni ra ndóꞌo̱.

Vií koo ndo tá kuꞌva kúni mií Ndioxi

¹¹ Ñani yo tin kuꞌva yo, ndóꞌo̱ ta tá íin naꞌa, na ndóo tóo xiꞌin na xíka tóo ñuu ivi yóꞌó saa íin ndo, yakan xíkan ni i ya mani nuu ndo, ndee koo ini ndo ta täxi ka ndo kaꞌnda chiñu ya väꞌa kúni kaꞌnda chiñu nuu ikin kuñu ndo, chi ndiꞌi ya väꞌa ñaa ta kánitaꞌan ya xiꞌin ya vaꞌa ndo.

¹² Vívií koo ndo tañu naꞌa, na köo xíni Ndioxi, chi án sana kaꞌan na xaꞌa ndo ya köo vaꞌa íkan ndo, kachi na. Ta saa tá ná kuni na ya vaꞌa ní íyo ndo ta saa xaa kaꞌnu na Ndioxi tá kivi ná kixi ra xaa nani ra kuachi xiꞌin na ñuu ivi.

¹³ Xaꞌa ya ndíkun ndo Tata yo Jesucristo, ta xaa toꞌo ndo ndiꞌi na chiñu, ni nda rey ku nda án ndá ka na kúu mií chiñu ndee ni nuu ndo ku na, ta xaa toꞌo ndo ndiꞌi na.

¹⁴ Ta saa tu ndá ka mií na chiñu na táxi ra rey ichí ndaꞌa ya sindoꞌo na naꞌa, na íkan ya väꞌa, ta kaꞌan vaꞌa na xaꞌa naꞌa, na íkan ya vaꞌa.

¹⁵ Saa chi Ndioxi ta kúni ra ya ná ikan ndo ya vaꞌa, saa kua küchiñu na kíꞌvi, na köo xíin kundaa ini xaꞌa ya ndaa, küchiñu na taxi na kuachi síki xaꞌa ndo.

¹⁶ Chi ndóꞌo̱ ta ndo xa xíka ndíka ku ndo, köo núꞌni ka ndo ndaꞌa ya väꞌa ya ikan ndo ya väꞌa, yakan ndóꞌo̱ ta täa nuu ndo ya ñaa ya ikan ndo ndá ka chiñu väꞌa. Ya vaꞌa ni kua koo ndo tá kuꞌva íin naꞌa, na xáa chiñu nuu Ndioxi.

¹⁷ Xaa toꞌo ndo ndiꞌi naꞌa, ta kuꞌvi ni ini ndo kuni ndo nda ñani yo xiꞌin ná kuꞌva yo, na ndíkun Tata yo Jesucristo. Ta xaa kaꞌnu ni ndo Ndioxi, saa xaa toꞌo ndo na chiñu naꞌnu, na kúu rey.

¹⁸ Ta ndóꞌo̱ ñani yo, ndo sa̱ta na xitoꞌo ndo xáa chiñu ndo nuu na xiꞌin ya nduxa, ta xaa súvi ndo ya kúni na, án na vaꞌa ini ku na án na iku ini ku na, án na väꞌa ku na, ta xaa súvi ndo ya kúni na.

¹⁹ Saa chi naꞌa, na ndee ni ndóꞌo ta niꞌi ni na ya vaꞌa nuu Ndioxi tá ndóꞌo na saa, tá chíkaa naꞌa kuachi síki sata na xaꞌa ya kúni na xaa súvi na ya kúni mií Ndioxi.

²⁰ Tá ndá ndóꞌo̱ tíxuꞌvi xaꞌa ya väꞌa íkan ndo, ta köo xíniñuꞌu naꞌa kaꞌan vaꞌa na xaꞌa ndo ya tíxuꞌvi ni ndo. Sundi tá tu vaꞌa ni kéꞌe ndo, ta vaꞌa xaꞌa ndee ni ini ndo xaꞌa ya tíxuꞌvi ni ndo íkan na, chi tá xáꞌa ndee ini ndo ta vaꞌa ni kúni Ndioxi xiꞌin ndo.

²¹ Xaꞌa ya ñaa kua ka̱na Ndioxi ndóꞌo̱ ya xaꞌa ndee ni ini ndo kundoꞌo ndo tá kuꞌva ndo̱ꞌo mií Cristo xaꞌa ndo, kuꞌva saa xíniñuꞌu ndo ikan ndo, chi saa íyo ya si̱naꞌa ra ndóꞌo̱ ikan ndo.

²² Nda iin kuachi ra köo ndi̱xiyo, ni köo ndi̱sindaꞌvi ra nda iin naꞌa.

²³ Tá ndi̱kanaꞌa na xiꞌin ra ta köo ndi̱kuiin ra kaꞌan kini ra xiꞌin na, tá xa̱a ndu̱vaꞌa na xiꞌin ra, ta köo ndi̱kaꞌan ra xiꞌin na ya xaa nduvaꞌa ra xiꞌin na vaxi kivi. Si̱ndoo ndiꞌi ra ya i̱kan na xiꞌin ra ndaꞌa mií Ndioxi, ra xáa nani kuachi xiꞌin ya ndaa.

²⁴ Tá ndi̱xiꞌi Cristo nuu itun cruzin ta nuu nu ikán kua ndi̱kundiso ndiꞌi ra kuachi yo to̱so ra ya sata ikin kuñu ra kuaꞌan ya xiꞌin ra. I̱kan ra saa xiꞌin yo ya ná köo ka ndee kuu mií kuachi yo ya kaꞌnda chiñu ka ya nuu yo, saa kutaku yo ikan yo ya vaꞌa. Xaꞌa ya ndo̱ꞌo ni ra yakan si̱ndaꞌa ra yoo.

²⁵ Chi yoo ta tá íin kiti levo, kiti nda̱ñuꞌu saa ndi̱xiyo yo. Ta vitin ndi̱ko koo yo nuu Tata yo Jesucristo ta ndee ni vaꞌa ndáa ra yoo, tá íkan iin ra ndee ni vaꞌa ndáa kiti levo sana ra, saa íkan ra xiꞌin yo.