1 Pedro 1 - Xochapa Mixteco

Káꞌan ndioxi ra Pedro xiꞌin na ndíkun Jesucristo

¹ Yeꞌe Pedro, ra kúu apóstol ra ti̱ꞌvi Tata yo Jesucristo xáa chiñu nuu ra ku i táa tutu yóꞌó xaa ya nuu ndóꞌo̱ ñani yo xiꞌin kuꞌva yo na ndi̱kaxin Ndioxi. Ndóꞌo ka̱na koo kuaꞌan ndóo ndo inka ñuu xíka ni ya kúu ñuu Ponto xiꞌin ñuu Galacia tin ñuu Capadocia xiꞌin ñuu Asia tin ñuu Bitinia.

² Saa chi xa yachi vi ndi̱kaxin Ndioxi ndóꞌo̱, saa nda̱sa vaꞌa ra ndóꞌo̱ tixin Tachi ra. I̱kan ra saa xiꞌin ndo chi kúni ra xa̱a súvi ndo ya ndi̱kaꞌan ra, saa nda̱sa i̱í ra ndóꞌo̱, ya ná xaa súvi ndo ya káꞌan ra xiꞌin ndo, ta tixin nií Tata yo Jesucristo kua ndi̱kata ra kuachi ndo. Ta mií Iva yo Ndioxi ná taxi ni ka ya vaꞌa ndaꞌa ndo xaꞌa ya kúꞌvi ni ini ra xíni ra ndóꞌo̱, saa ná koo vaꞌa ni ndo.

Yáꞌa ni luvi ya ndi̱kaꞌan Ndioxi taxi ra ndaꞌa yo

³ Ta ná xaa kaꞌnu yo Iva yo Ndioxi ra kúu Iva Tata yo Jesucristo, saa chi kúndaꞌvi ni ini ra xíni ra yoo, ta yakan ta̱xi ra ndi̱kaku uvi tuku yo xaꞌa ya ndi̱taku Tata yo Jesucristo tañu na ndíi, saa kua ta̱xi ra ya kúndaa teꞌe ini yo

⁴ ndikiꞌin yo iin ya vaꞌa ni, ya chi̱vaꞌa ra xaꞌa yo íyo ya nuu ndivi. Ta ya ikán ta nda iin kivi tïvi ya, ni küu yakua ya, nda iin kivi ndïꞌi xaꞌa ndee kúu mií ya.

⁵ Xaꞌa ya ndáa ni ini ndo Ndioxi kua kundaa ra ndóꞌo̱ xiꞌin ndee ra, chi saa chi̱tuni ra sikaku ra ndóꞌo̱ iin saa nda ná tindaa kivi sindiꞌi.

⁶ Xaꞌa ya ñaa kua kusini ni ndo vitin, vani vaxi kivi ya ndee ni kuaꞌa nuu tindoꞌo kixi nuu ndo koto ndoso ya ndóꞌo̱, ta kuaꞌa ndee ni ini ndo xiꞌin ya.

⁷ Chi ndiꞌi tindoꞌo ya vaxi nuu ndo, ta tá kuꞌva xíto ndoso na kàà ya oro xiꞌin ñu̱ꞌu̱ iꞌni ni, ya ná nduyéꞌe̱ luvi ya nduu latun ni ka ya. Ta kuꞌva saa íyo ya ndáa ni ini ndo Ndioxi, chi ya ikán kua ndáa yaꞌvi ni ka nuu oro ya ndíꞌi xaꞌa, yakan tá ndóꞌo̱ ndo saa, ta ndïkava ini ndo, chi tá ná ndiko koo Tata yo Jesucristo kixi ra ta vaꞌa ni kaꞌan ra xaꞌa ndo, chinuu vaꞌa ni ra tuꞌun ndo.

⁸ Vani täꞌan kuni xiꞌin nuu ndo Tata yo Jesucristo, ta kúꞌvi ni ini ndo xíni ndo ra. Saa kándixa ni ndo ra ta täꞌan kuni ndo ra. Ta ndee ni kúsini ndo, ni köo níꞌi ndo kuꞌva ndikani ndo ya ndóꞌo ndo kúsini ni ndo xiꞌin ra.

⁹ Saa chi kúndaa ini ndo ya sikaku Ndioxi ndóꞌo̱ xaꞌa ya ndáa ni ini ndo Tata yo Jesucristo, ta ya ikán kua ndee ni vaꞌa ikan ra xiꞌin ndo, chindee ra ndóꞌo̱.

¹⁰ Ya yóꞌó kua ndi̱kaꞌan nda ndi̱kaꞌan ndoso xaꞌa tuꞌun Ndioxi xinaꞌa, ndee ni ka̱ꞌvi xiní nda xiꞌin ya xaꞌa ya kúni nda kundaa ini nda xaꞌa ya vaꞌa niꞌi yo nuu Ndioxi, ya sikaku ra yoo.

¹¹ Ta Tachi ya kúu mií Cristo, ra ndi̱kaxin Ndioxi kixi ndoꞌo ni xaꞌa yo kua ta̱xi xiní ndaꞌa nda ndi̱kaꞌan tuꞌun yuꞌu Ndioxi, ya kundaa ini nda xaꞌa ñaꞌa ya chee ni kuu mií ra kixi kivi vaxi, ta ndu̱ku ni tu nda kuꞌva kundaa ini nda xaꞌa ra ndá taa kuu ra, ta saa ndu̱ku tu nda kundaa ini nda ndá kivi kua kixi ra.

¹² Ta ya ta̱xi Ndioxi ku̱ndaa ini nda ndi̱kaꞌan tuꞌun yuꞌu ra xaꞌa, ta süvi xaꞌa mií nda kua ndi̱kaꞌan ya, xaꞌa yoo kua ndi̱kaꞌan ya. Ta taꞌan ya ikán ku tuꞌun vaꞌa xaꞌa Tata yo Jesucristo ya ndi̱kaꞌan ndoso inka nda xiꞌin ndo tixin Tachi I̱í Ndioxi ya ke̱e nuu ndivi. Ta nda mií na tatun Ndioxi ta kútoo ni na kuni na ya vaꞌa ikan Ndioxi xiꞌin yo.

I̱í ná koo yo nuu Ndioxi

¹³ Xaꞌa ya ikán kua koo ndúvi ndo vívií ndikani ini ndo, táku koo ini ndo, ndee ni ndaku koo ini ndo ya ndikiꞌin ndo ñaꞌa vaꞌa ya niꞌi ndo nuu Tata yo Jesucristo tá ná ndiko koo ra kixi ra.

¹⁴ Yachi ta köo ndi̱kundaa ini ndo xaꞌa tuꞌun ra, yakan ke̱ꞌe ndo ya väꞌa nuu ra, sundi vitin ta ndu̱u ndo seꞌe ra, na xáa súvi ni ya kúni ra, yakan köo xíniñuꞌu ka ndo koo ndo tá kuꞌva ndi̱xiyo ndo yachi.

¹⁵ Ya vaꞌa ni ka kua ná nduu ndo naꞌa, na i̱í ni, ta kuꞌva saa xaa súvi ndiꞌi ndo chiñu ya íkan ndo, chi Ndioxi ra ka̱na ndóꞌo̱ kundikun ndo ra, ta i̱í ni ra.

¹⁶ Saa íyo ya káꞌan tuꞌun Ndioxi ta̱a na xinaꞌa, káchi ya soꞌva: “Xíniñuꞌu ndo koo ndo na ivi vaꞌa, na i̱í ni, saa chi yeꞌe ta ra i̱í ni ku i”, káchi ya.

¹⁷ Ta ndóꞌo̱, tá káꞌan ndo xiꞌin Ndioxi, ta kaꞌan ndo xiꞌin ra ya kúu ra Iva ndo. Ta vaꞌa va chi köo ndi̱kaxin ra nda iin naꞌa, iin kuꞌva xáa nani ra kuachi xiꞌin ndiꞌi na. Xaꞌa ya ñaa kua xíniñuꞌu ndo xaa súvi ndo ndiꞌi ñaꞌa íkan ndo xiꞌin ya toꞌo, nani ndóo naꞌa ndo ñuu ivi yóꞌó.

¹⁸ Chi xa xíni mií ndo Ndioxi ku ra cha̱ꞌvi xaꞌa ndo nuu ndi̱saña ndo ndaꞌa ichí ya väꞌa ya köo ndáa yaꞌvi si̱ndikoo xií si̱kuaꞌa ndo ndaꞌa ndo. Ta süvi xiꞌin yu̱ú ya oro án ya plata kua ndi̱xiniñuꞌu ra chaꞌvi ra xaꞌa ndo, ni ya yaꞌvi ni kua ikán, ta köo ndee ni ya,

¹⁹ tá kuꞌva yáꞌa ni ndee kúu mií nií Tata yo Jesucristo nduta ndáa yaꞌvi ni, rá vaꞌa, rá ndi̱xita nuu cruzin, rá káa tá káa nií kiti levo loꞌo ri sóko sutu nuu Ndioxi, ri vaꞌa ni, ri köo nda loꞌo ya väꞌa kúu mií. Kuꞌva saa ndi̱xiyo nií ra, rá cha̱ꞌvi Ndioxi xaꞌa kuachi yo.

²⁰ Tá täꞌan ka xikoo xaꞌa ñuu ivi yóꞌó vi kua ndi̱kaꞌan Iva yo Ndioxi xaꞌa Tata yo Jesucristo ya kuvi ra xaꞌa kuachi yo ñuu ivi yóꞌó. Saa tá xa kuaꞌan kúyati kivi sindiꞌi saa kua ti̱ꞌvi Ndioxi Tata yo Jesucristo ki̱xi ra ñuu ivi yóꞌó xaꞌa ya vaꞌa yoo chi kúꞌvi ni ini ra xíni ra yoo.

²¹ Xaꞌa ya vaꞌa i̱kan Tata yo Jesucristo kua xa̱á ndo kándixa ni ndo Iva yo Ndioxi, ra si̱taku Tata yo Jesucristo tañu na ndíi, saa ta̱xi ni Ndioxi ya toꞌo ndaꞌa ra. Yakan kua ndátun ni ndo, saa ndáa ni ini ndo ya xaa súvi ndiꞌi ra ya ndi̱kaꞌan ra xiꞌin ndo taxi ra ndaꞌa ndo.

²² Ta xaꞌa ya xáa súvi ni ndo tuꞌun vaꞌa ya ndaa xi̱ni soꞌo ndo yakan ndu̱vaꞌa ya vaꞌa ndo, saa chíndee taꞌan Tachi I̱í ra xiꞌin ndo ya ndinuꞌu ni kúꞌvi ini ndo xíni taꞌan ndo. Ikan ndo saa: ndinuꞌu ni ini ndo kuꞌvi ini ndo kuni taꞌan ndo.

²³ Saa chi ndóꞌo̱, ta ndi̱kaku uvi tuku ndo, ta köo ndi̱kaku ndo tixin iva siꞌí ndo na ñuu ivi yóꞌó, chi tixin tuꞌun Ndioxi ya táku ndiꞌi saa kivi kua ka̱ku ndo.

²⁴ Tá káchi tuꞌun ra ya ta̱a na xinaꞌa, káchi ya saa: Tá íin i̱ku̱ kuií saa íin ndiꞌi na ñuu ivi yóꞌó. Ta ndiꞌi ya saví án ya vaꞌa ni náꞌa kúu mií na, ta tá íin ita ikú va saa íyo ya.

²⁵ Sundi tuꞌun Ndioxi ta nda iin kivi ndïꞌi xaꞌa ya, ndiꞌi saa kivi kutaku ya. Ta tuꞌun vaꞌa yóꞌó kua xi̱ni soꞌo ndo xaꞌa Tata yo Jesucristo.