1 Juan 5 - Xochapa Mixteco

Yo ndíkun Jesús ta kúchiñu yo nuu ya väꞌa íyo ñuu ivi yóꞌó

¹ Ndiꞌi na kándixa ya ti̱ꞌvi Ndioxi Jesús ki̱xi ra sikaku ra yoo, ta na ikán ta seꞌe Ndioxi ndu̱u na. Ndiꞌi na kúꞌvi ini xíni Iva yo, ta kúꞌvi tu ini na xíni na ndiꞌi seꞌe va ra.

² Tá kúꞌvi ini yo xíni yo Ndioxi ta xáa súvi yo ya káꞌan ra xiꞌin yo, saa kúndaa ini yo kúꞌvi ini yo xíni yo ndiꞌi seꞌe ra.

³ Tá tu xáa súvi yo ya xáꞌnda chiñu Ndioxi nuu yo ta sínaꞌa yo mií yo ya kúꞌvi ini yo xíni yo ra. Saa chi ya xáꞌnda chiñu ra nuu yo ta süvi tá káa iin ya vee ndíso yo káa ya.

⁴ Saa chi ndiꞌi yo kúu seꞌe Ndioxi, ta kúchiñu yo nuu ya väꞌa íyo ñuu ivi yóꞌó. Xaꞌa ya ndáa ni ini yo Ndioxi xiꞌin Tata yo Jesucristo yakan vaꞌa kúchiñu yo nuu ya väꞌa.

⁵ Ndiꞌi na kándixa Jesús ya kúu ra Seꞌe Ndioxi, na ikán ku na kúchiñu nuu ya väꞌa íyo ñuu ivi yóꞌó.

Uni kua ndíkuiin xaꞌa Jesucristo

⁶ Ya si̱naꞌa Tata yo Jesucristo nuu yo ya ke̱e ra nuu Ndioxi kua yóꞌó: tikuii nduta chi̱chi ra tin nií ra nduta ndi̱xita nuu cruzin tá ndi̱xiꞌi ra. Nduta ikán ku rá sínaꞌa yoo ya kúu ra Seꞌe Ndioxi. Ta süvi ndisaa tikuii ndíkuiin xaꞌa ra, ndíkuiin tu nií va ra xaꞌa ra. Ta saa ndíkuiin tu Tachi Ndioxi va xaꞌa ra, saa chi ya ikán ku ya ndaa.

⁷ Uni ku na ndíkuiin xaꞌa ra nuu ndivi: Iva yo Ndioxi tin Tuꞌun ra xiꞌin Tachi I̱í Ndioxi ku na ndíkuiin xaꞌa ra, ta iin ku uni saa na yóꞌó.

⁸ Tachi Ndioxi tin tikuii nduta chi̱chi ra xiꞌin nií ra nduta ndi̱xita nuu cruzin ku rá ndíkuiin xaꞌa ra ñuu ivi yóꞌó. Ta iin yuꞌu ku uni saa ya.

⁹ Tá ndítuꞌun naꞌa xiꞌin yo ta kándixa yo ya káꞌan na xiꞌin yo, ta na ivi taꞌan mií yo ku na. Ta ndisaa ka vi ya káꞌan Ndioxi xaꞌa Seꞌe ra, ndáa yaꞌvi ni ya káꞌan ra, saa chi mií Ndioxi ku ra káꞌan xaꞌa Seꞌe ra nuu yo.

¹⁰ Ta ndiꞌi na kándixa Jesús ra kúu Seꞌe Ndioxi, ta íyo tu ya ndíkuiin xaꞌa ra ini na ikán va. Ta naꞌa, na xïin kandixa ya káꞌan Ndioxi xaꞌa Seꞌe ra, ta tá káa ra vata saa ndása na ra, saa chi köo xíin na kandixa na ya káꞌan Ndioxi xaꞌa Seꞌe ra.

¹¹ Ta ya ndíkuiin ini yo kua yóꞌó, ta̱xi Ndioxi ichí táku yo xiꞌin ra ndiꞌi saa tiempo. Chi Jesucristo Seꞌe ra ku ra táxi táku yo xiꞌin ra.

¹² Ndiꞌi na táku Seꞌe Ndioxi ini ta táku na xiꞌin Ndioxi. Ta ndiꞌi na köo táku Seꞌe Ndioxi ini ta küchiñu na kutaku na xiꞌin Ndioxi.

Tuꞌun sindiꞌi káꞌan ra Juan xiꞌin na veꞌe ñuꞌu

¹³ Táa i tutu yóꞌó xaa nuu ndiꞌi ndóꞌo̱ na kándixa Jesús ra kúu Seꞌe Ndioxi. Táa i ya xaa nuu ndo ya ná kundaa ini ndo ya koo ndo xiꞌin Ndioxi ndiꞌi saa tiempo ya vaxi, saa táa i ya nuu ndo ya ná kandixa ni ndo tixin kivi ra.

¹⁴ Kándixa yo Ndioxi ta xíni yo tá ndá ñaꞌa ndúku yo nuu ra tá kuꞌva kúni mií ra ta kuni soꞌo ra ya kaꞌan yo xiꞌin ra.

¹⁵ Xíni yo ya xíni soꞌo ra ya káꞌan yo xiꞌin ra, ta kándixa yo ra xaꞌa ndá ka mií ñaꞌa ya ndúku yo nuu ra, ta taxi ra ya ndaꞌa yo.

¹⁶ Tá ndá ndóꞌo̱ xíto ndo íkan na taꞌan yo na ndíkun Jesús ya väꞌa, ta saa ná kaꞌan ndo xaꞌa na xiꞌin Ndioxi, ta xaa kaꞌnu ini ra xaꞌa na. Tá tu süvi kuachi ya káꞌan kuvi na nuu Ndioxi kua, ta taxi ra kutaku na. Saa chi íyo kuachi ya väꞌa ya káꞌan ndiꞌi xaꞌa na nuu ra. Tá tu taꞌan kuachi ñaa kua i̱kan na ta käꞌan ndo xaꞌa na. Sundi tá tu inka kuachi kua, ta kaꞌan ndo xaꞌa na xiꞌin Ndioxi ta kutaku na xiꞌin ra.

¹⁷ Saa chi ndiꞌi kúu ya väꞌa íkan yo, ta kuachi ku ndiꞌi ya nuu Ndioxi. Sundi íyo kuachi ya köo síndiꞌi xaꞌa yoo.

¹⁸ Ta yoo ndixa ndíkun Iva yo Ndioxi ta küvi ikan yo ya väꞌa tutuku tutuku. Saa chi ndáa Jesucristo Seꞌe Ndioxi mií yo ndíkun ñaꞌa. Ta täxi ra ndikava ndikuu yo ndaꞌa kiti nǎꞌa.

¹⁹ Xíni yo seꞌe Ndioxi ku yoo ta ndáa ra yoo. Ta ndiꞌi ka naꞌa, na köo ndíkun ñaꞌa, ta kiti nǎꞌa ku ri xáꞌnda chiñu nuu na.

²⁰ Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.

²¹ Ñani yo, ndóꞌo̱ ta tá íin seꞌe i saa íin ndo. Ta ya yóꞌó ku tuꞌun ya sindiꞌi káꞌan i xiꞌin ndo: Küyati ndo nuu naꞌna ya káꞌan na xiꞌin kúu ndioxi, kuxika ndo nuu ya.