1 Juan 4 - Xochapa Mixteco

Ná koto ndoso yo unku na ndaa ta unku na vata

¹ Ñani yo, ndóꞌo̱ ku ndo kúꞌvi ni ini i xíni i, ta vitin káꞌan i xiꞌin ndo. Kändixa ndo ndiꞌi na káꞌan Tachi I̱í Ndioxi síkaꞌán ini na kaꞌan na, káchi na. Chi vitin ta xa kuaꞌa ni na vata ka̱na koo ñuu ivi yóꞌó, ta káꞌan na síkaꞌán Tachi Ndioxi ini na kaꞌan na tuꞌun ra.

² Ta xiꞌin ya yóꞌó ndíkuni ndo na, tá tu ndixa Tachi Ndioxi síkaꞌán ini na kaꞌan na: tá ndíkuni na Tata yo Jesucristo ya ki̱xi ra ñuu ivi yóꞌó ta ndu̱u ra ra ivi tá íin mií yo na ivi yóꞌó, káchi na, ta na ñaa ku na kúu mií Tachi Ndioxi.

³ Sundi na köo ndíkuni ra ya ndu̱u ra tá íin mií yo ivi yóꞌó, ta na ñaa ta süvi Tachi Ndioxi kúu mií na. Tachi na sáa ini xíni Cristo va kua kúu mií na. Ta xa xi̱ni soꞌo ndo xaꞌa na ñaa tá yachi, chi vitin ta xa íyo na ñuu ivi yóꞌó.

⁴ Ñani yo, kuenta Ndioxi ku yo ta xa ku̱chiñu yo nuu na sáa ini xíni Tata yo, saa chi ndee ni ka Ndioxi ra íyo xiꞌin yo nuu tachi nduvaꞌa ya xáꞌnda chiñu nuu na ñuu ivi yóꞌó.

⁵ Na ñaa ta na ñuu ivi yóꞌó ku na yakan káꞌan ni na xaꞌa ya kúu kuenta ivi yóꞌó, saa xíni soꞌo ni mií na ivi yóꞌó ya káꞌan na xiꞌin taꞌan na.

⁶ Ta yoo, ta kuenta Ndioxi ku yo, ta na ndíkun Ndioxi ku na xíni soꞌo ya káꞌan yo. Ta naꞌa na köo ndíkun Ndioxi ta köo xíin na kuni soꞌo na ya káꞌan yo. Tixin ya yóꞌó kua ndíkuni yo unku na kúu mií Tachi Ndioxi ya ndaa ta unku na kúu mií tachi nduvaꞌa ya vata.

Kúꞌvi ni ini Ndioxi xíni ra yoo

⁷ Ñani yo, ná kuꞌvi ni ini yo kuni taꞌan yo chi ya kúꞌvi ni ini yo taꞌan yo ta nuu Ndioxi vaxi ya, saa xáꞌnda chiñu ra nuu yo. Ta ndiꞌi na kúꞌvi ni ini xíni taꞌan, ta na ñaa ku na ka̱ku nuu Ndioxi saa xíni na Ndioxi.

⁸ Na köo kúꞌvi ini xíni taꞌan, kúni kachi ya köo xíni na Ndioxi, saa chi Ndioxi ta kúꞌvi ni ini ra xíni ra ndiꞌi na.

⁹ Ta soꞌva kua si̱naꞌa Ndioxi yoo ya kúꞌvi ni ini ra xíni ra yoo, saa chi ti̱ꞌvi ra Seꞌe mani ra, ra iindaa mituꞌun nuu ra, ki̱xi ra taxi ra kutaku yo tixin ra.

¹⁰ Káꞌan i xiꞌin ndo unkua káchi mií ya ndaa ni kúꞌvi ini Ndioxi xíni ra yoo, saa chi süvi yoo ku yo xiꞌna ndi̱kuꞌvi ini kuni Ndioxi, xiꞌna mií ra ku ra xa̱á kúꞌvi ni ini xi̱ni yoo ta xaꞌa ya ikán kua ti̱ꞌvi ra Seꞌe ra, ra kúu Jesucristo. Ta ra ikán ndi̱soko ra mií ra ndi̱xiꞌi ra xaꞌa yo, cha̱ꞌvi ra xaꞌa kuachi yo nuu Ndioxi.

¹¹ Ñani yo, tá tu soꞌva kúꞌvi ini Ndioxi xíni ra mií yo, ta saa tu yoo va xíniñuꞌu yo kuꞌvi ni ini yo kuni taꞌan yo.

¹² Nda iin naꞌa köo ndi̱xini xiꞌin nuu Ndioxi. Sundi tá tu kúꞌvi ini yo xíni taꞌan yo, ta kúni kachi ya ítaꞌan vaꞌa Ndioxi xiꞌin yo. Ta saa kuchiñu yo kuꞌvi ini yo tá kuꞌva kúꞌvi ini mií ra xíni ra yoo.

¹³ Ta xíni yo ya ítaꞌan yo xiꞌin Ndioxi, saa ítaꞌan ra xiꞌin yo, saa chi ta̱xi ra Tachi ra íyo ya xiꞌin yo.

¹⁴ Ta ndeꞌe xi̱ni xiꞌin nuu nde Jesús, ra kúu Jesucristo ra ti̱ꞌvi Iva yo Ndioxi ki̱xi ñuu ivi yóꞌó. Ta ndíkuiin nde xaꞌa ra ya ki̱xi ra sikaku ra ndiꞌi na ñuu ivi yóꞌó.

¹⁵ Ndiꞌi na ndíkuni Jesús ta káꞌan na xaꞌa ra kúu ra Seꞌe Ndioxi, ta na ikán ku na ítaꞌan vaꞌa xiꞌin Ndioxi. Saa íyo na xiꞌin ra.

¹⁶ Xíni yo ndá kuꞌva íyo ini Ndioxi, ta kúndaa ini yo ya kúꞌvi ni ini ra xíni ra yoo. Saa chi Ndioxi ta mani ni yoo nuu ra. Ndiꞌi na kúꞌvi ini xíni taꞌan, ta ítaꞌan vaꞌa na xiꞌin Ndioxi, saa Ndioxi ítaꞌan vaꞌa ra xiꞌin na.

¹⁷ Tá ndixinu yo ndinuu kúꞌvi ini yo xíni yo Ndioxi xiꞌin na taꞌan yo, ta ku ïꞌvi yo nuu ra kivi xaa nani ra kuachi yo. Chi tá íyo mií Jesucristo saa íyo yo kivi xíka yo ñuu ivi yóꞌó.

¹⁸ Tá kúꞌvi ini yo xíni yo Ndioxi ta ku ïꞌvi ka yo nuu ra. Saa chi mií ya ndee ni kúꞌvi ini yo xíni yo ra kua táva ndiꞌi mií ya síꞌvi yoo, saa kéta ya kuaꞌan ya. Ta na íꞌvi nuu Ndioxi ku na ndíkani ini xaa nduvaꞌa ra xiꞌin na. Ta na íꞌvi ku na täꞌan kuꞌvi ini kuni Ndioxi xiꞌin ndinuꞌu ini na.

¹⁹ Kúꞌvi ini yo xíni yo Ndioxi xiꞌin na taꞌan yo, saa chi xiꞌna mií ra ku ra xa̱á kúꞌvi ni ini xi̱ni yoo.

²⁰ Tá tu ndá na káꞌan: “Kúꞌvi ni ini i xíni i Ndioxi”, káchi na, ta kúndasi nuu na xíni na ñani taꞌan na, ta na ñaa ta na vata ku na. Saa chi tá tu köo kúꞌvi ini na xíni na ñani taꞌan na, na xíto na nuu, ta küvi kuꞌvi ini na kuni na Ndioxi, ra täꞌan kuni na.

²¹ Chi mií Jesucristo ta xa̱ꞌnda chiñu ra nuu yo, káchi ra saa: Ndiꞌi na kúꞌvi ini xíni Ndioxi, ta xíniñuꞌu na kuꞌvi ini na kuni na ñani taꞌan na.