1 Juan 3 - Xochapa Mixteco

Soꞌva íkan na kúu seꞌe Ndioxi

¹ ¡Koto ndo vii! Iva yo Ndioxi ta yáꞌa ni kúꞌvi ini ra xíni ra yoo, yakan táxi ra kunani yo seꞌe ra ta ya ndaa kua kúu yo seꞌe ra. Xaꞌa ya kúu yo seꞌe ra yakan köo kúni na ñuu ivi yóꞌó kuni na mií yo. Saa chi ni mií ra ta köo ndi̱xiin na kuni ñaꞌa na.

² Ñani mani, vitin ta xa seꞌe Ndioxi kúu yoo, ta köo xíni yo ndá kuꞌva nduu yo kivi ná ndiko koo tuku Tata yo Jesucristo ñuu ivi yóꞌó. Sundi yoo ta kúndaa ini yo, kivi ná ndiko koo ra ta nduu yo tá kuꞌva káa mií ra, saa chi kivi ikán ta kuni xiꞌin nuu yo ra tá kuꞌva káa ra.

³ Ta ndiꞌi na ndinuu ni ndátun ya ndiko koo ra ndisama ra na, ta ndíkundee ni na xinu koo na nduu na tá kuꞌva íyo mií ra, saa chi ra i̱í ku ra.

⁴ Ta ndiꞌi na íkan ya väꞌa ta yáꞌa tu na ikán va nuu ley Ndioxi. Chi na kuakiꞌvi kuachi xiꞌin ra ta yáꞌa na nuu ley ra.

⁵ Ta ndóꞌo̱ xa xíni ndo ya ki̱xi Tata yo Jesucristo ñuu ivi yóꞌó ki̱ndaa ra kuachi yo. Chi mií ra ta nda iin kuachi ra köo.

⁶ Yakan ndiꞌi na ítaꞌan vaꞌa xiꞌin Tata yo Jesucristo ta köo íkan ka na ya väꞌa, tá kúu ndiꞌi na íkan ya väꞌa ta kúni kachi ya: Köo xíni na ra, ta ni täꞌan kuni na ra.

⁷ Na taꞌan yo, tá íin seꞌe i saa íin ndo, ta káꞌan i xiꞌin ndo täxi ndo sindaꞌvi naꞌa ndóꞌo̱. Chi na íkan ya ndaa ta na vaꞌa ku na, tá káa mií Tata yo Jesucristo ra vaꞌa ku ra.

⁸ Na köo xíin sindoo ya väꞌa, na ikan ku seꞌe kiti nǎꞌa, chi kiti nǎꞌa nda kivi xaꞌa vi i̱kan ri ya väꞌa yakan kua ki̱xi Seꞌe Ndioxi si̱ndiꞌi xaꞌa ra ya íkan ri.

⁹ Ndiꞌi na kúu seꞌe Ndioxi ta köo íkan ka na ya väꞌa, chi Ndioxi ta xa íyo ra nima na, yakan küvi ka ikan na ya väꞌa, chi na xa ndi̱kaku uvi ku na i̱kan ra, ndu̱u na seꞌe ra.

¹⁰ Soꞌva ku nuu kúndaa ini yo xiꞌin na kúu seꞌe Ndioxi tin na kúu seꞌe kiti nǎꞌa. Ndiꞌi na köo íkan ya ndaa xiꞌin na köo kúꞌvi ini xíni taꞌan, ta süvi seꞌe Ndioxi ku na.

Ná kuꞌvi ini yo kuni taꞌan yo

¹¹ Ya yóꞌó ku tuꞌun Ndioxi ya xi̱ni soꞌo yo tá núnu̱ú vaꞌa: Ya ná kuꞌvi ni ini yo kuni taꞌan yo.

¹² Ná ïkan yo tá i̱kan ra Caín xinaꞌa, xa̱a súvi ra ya kúni kiti nǎꞌa chi xa̱ꞌni ra ñani ra. Xaꞌa ya väꞌa íyo ini ra yakan i̱kan ra saa, ta ya i̱kan ñani ra ta ya vaꞌa i̱kan ra.

¹³ Ñani yo xiꞌin kuꞌva yo, ndïkanda ini ndo tá tu kúndasi nuu na ñuu ivi yóꞌó xíni na ndóꞌo̱.

¹⁴ Saa chi yoo ta xaꞌa ya kúꞌvi ini yo xíni taꞌan yo yakan kúndaa ini yo tá íin yo xa ndíi ndi̱xiyo yo ta ndi̱taku yo. Chi na köo kúꞌvi ini xíni taꞌan tá íin na ndíi saa íin na nuu Ndioxi.

¹⁵ Ndiꞌi na kúndasi nuu xíni taꞌan ta tá íin na xáꞌni ndìì saa íin na. Ta ndóꞌo̱ xa xíni ndo ndiꞌi na xáꞌni ndìì ta küchiñu na kutaku na xiꞌin Ndioxi nda iin tiempo.

¹⁶ Jesucristo si̱naꞌa ra yoo ndá kuꞌva kúꞌvi ini ra xíni ra yoo chi ta̱xi ra mií ra xaꞌa yo, ndi̱xiꞌi ra xaꞌa yo. Ta saa tu yoo va xíniñuꞌu yo taxi yo mií yo xaꞌa na ñani taꞌan yo.

¹⁷ Tá ndá yo íyo ñaꞌa nuu, ta xíto yo na taꞌan yo köo ñaꞌa na, saa ndíkasi yo nima yo nuu na, köo xíin yo chindee yo na, ta ya yóꞌó kúni kachi ya: Köo kúꞌvi ini yo xíni yo Ndioxi.

¹⁸ Ndóꞌo̱ ñani yo xiꞌin kuꞌva yo, tá íin seꞌe i saa íin ndo, ta káꞌan i xiꞌin ndo: Käꞌan ndo ndisaa tuꞌun mií xiꞌin taꞌan ndo, sundi ikan ndo ya vaꞌa xiꞌin ya ndaa nuu sínaꞌa ya ndixa kúꞌvi ini ndo xíni taꞌan ndo.

¹⁹ Ta xaꞌa ya kúꞌvi ini yo xíni taꞌan yo kua ndínaꞌa yo mií yo ya kúu yo kuenta ya ndaa, ta ndikundee ini yo xiꞌin ndee ya táxi Ndioxi ndaꞌa yo.

²⁰ Tá táxi nima yo kuachi xaꞌa yo nuu Ndioxi, ta ná kundaa ini yo chi kaꞌnu ni ini mií ra ya xaa kaꞌnu ini ra xaꞌa yo, saa chi xa xíni ndiꞌi va mií ra ya íyo ini yo.

²¹ Ñani yo xiꞌin kuꞌva yo, tá tu köo táxi nima yo kuachi xaꞌa yo nuu Ndioxi, ta vaꞌa ndinuu ni ini yo ná kuyati yo nuu ra.

²² Ta saa ndá ñaꞌa ndúku yo nuu ra ta taxi ra ya ndaꞌa yo, saa chi xáa súvi yo ya káꞌan ra xiꞌin yo. Ta íkan yo ya vaꞌa nuu ra tá kuꞌva kúni mií ra.

²³ Ta ya yóꞌó kua xáꞌnda chiñu Ndioxi nuu yo: Ná kandixa yo Seꞌe ra, ra kúu Jesucristo, ta ná kuꞌvi ini yo kuni taꞌan yo, tá kuꞌva xáꞌnda chiñu ra nuu yo.

²⁴ Ta ndiꞌi na xáa súvi ya xáꞌnda chiñu ra, ta ítaꞌan na xiꞌin ra, saa ítaꞌan ra xiꞌin na. Xíni yo íyo ra xiꞌin yo chi ta̱xi ra Tachi ra íyo ya xiꞌin yo.