1 Juan 2 - Xochapa Mixteco

Cristo ku ra ndíchi ndíkuiin xaꞌa yo nuu Ndioxi

¹ Ndóꞌo̱ ndíkun Jesucristo, tá íin seꞌe i saa íin ndo, yakan táa i tutu yóꞌó xaa ya nuu ndo ya ná ïkan ndo ya väꞌa. Sundi tá ndá ndóꞌo̱ ndíkava nuu kuachi ta vaꞌa ná kundaa ini ndo chi Tata yo Jesucristo ku ra ndaa ni ini, ta ra ikán ku ra ndíchi ndíkuiin xaꞌa yo nuu Iva yo Ndioxi.

² Chi Jesucristo ku ra ndi̱soko mií, ndi̱xiꞌi ra xaꞌa kuachi ndiꞌi yo yakan vaꞌa xa̱a kaꞌnu ini Ndioxi xaꞌa yo. Ta süvi iindaa xaꞌa kuachi yoo ndi̱xiꞌi ra. Ndi̱xiꞌi ra xaꞌa kuachi ndiꞌi ni kúu na ñuu ivi.

³ Tá tu xáa súvi yo ya xáꞌnda chiñu Ndioxi nuu yo, ta saa kua kúndaa ini yo ya ndixa kua xíni yo ini ra.

⁴ Ndiꞌi na káꞌan: “Xíni i ini Ndioxi”, káchi na, ta köo xáa súvi na ya xáꞌnda chiñu ra nuu na, na ñaa, ta na vata va ku na, köo ya ndaa íyo ini na.

⁵ Sundi tá xáa súvi yo ya xáꞌnda chiñu Ndioxi nuu yo, ta saa kua kúndaa ini yo ya ndixa ndinuꞌu ni kua kúꞌvi ini yo xíni yo ra. Tixin ya yóꞌó kua kúndaa ini yo íyo yo xiꞌin ra.

⁶ Ndiꞌi na káꞌan, ítaꞌan vaꞌa na xiꞌin Jesucristo káchi na, ta xíniñuꞌu na koo na tá kuꞌva ndi̱xiyo mií Jesucristo ñuu ivi yóꞌó.

Xíniñuꞌu yo kuꞌvi ini yo kuni taꞌan yo

⁷ Ñani yo xiꞌin kuꞌva yo, ya xáꞌnda chiñu i nuu ndo vitin, ta süvi iin ya xa̱á kua, chi suvi tuꞌun ya xa xi̱ni soꞌo ndo tá kivi sikan ka̱ndixa ndo Tata yo Jesucristo ku ya. Taꞌan tuꞌun ikán kua táa i nuu tutu yóꞌó xaa ndaꞌa ndo. Tuꞌun yata, ya xa xi̱ni soꞌo ndo yachi tá núnu̱ú vi kua káꞌan i xiꞌin ndo.

⁸ Sundi tá káa ya xa̱á káa tuꞌun yóꞌó. Ta kúndaa ini yo ya ndixa ku ya, saa chi Jesucristo ku ra xa̱a súvi ya. Ta saa tu ndóꞌo̱ ndíkun sata va ra xáa ndo lucha síxinu ndo ya. Chi ya naá, ya väꞌa ta yáꞌa ya kuaꞌan ya, ta xa vaxi ndíyeꞌe ya ndaa.

⁹ Tá ndá na káꞌan xíka na ichí Jesucristo, káchi na, ta kúndasi nuu na xíni na taꞌan na, ta kúni kachi ya köo xíka na nuu yéꞌe̱. Nuu naá va xíka na.

¹⁰ Sundi iin na kúꞌvi ni ini xíni taꞌan, ta kúni kachi ya xíka na nuu yéꞌe̱. Nda iin ñaꞌa küchiñu sindikava na ya ikan na ya väꞌa.

¹¹ Sundi naꞌa, na kúndasi nuu xíni taꞌan, ta íyo na nuu naá, saa xíka na nuu naá, ta köo xíni na nuu xíka na chi küvi koto na, tá íin na kuáa̱ saa ndu̱u na xiꞌin ya naá.

¹² Ndóꞌo̱, na kándixa Jesucristo ta tá íin seꞌe i saa íin ndo, ta vitin táa i tutu yóꞌó xaa ya nuu ndo ya káꞌan i xiꞌin ndo. Ndioxi ta xáa kaꞌnu ini ra xaꞌa kuachi yo, xaꞌa ya i̱kan Tata yo Jesucristo xaꞌa yo.

¹³ Na taꞌan yo, ndóꞌo̱ iva siꞌí, táa i tutu yóꞌó xaa ya nuu ndo, chi xíni ndo Tata yo Jesucristo, ra xa íyo tá täꞌan xikoo xaꞌa ñuu ivi yóꞌó. Saa táa tu i nuu ndóꞌo̱ na kuâán va, saa chi xa ku̱chiñu ndo nuu kiti nǎꞌa. Saa táa tu i ya xaa ya nuu ndóꞌo̱ na vali, na íin tá íyo seꞌe i, saa chi xa xíni vaꞌa ndo Iva yo Ndioxi.

¹⁴ Táa i nuu ndóꞌo̱ iva siꞌí saa chi xa xíni ndo Tata yo Jesucristo, ra xa íyo tá täꞌan xikoo ñuu ivi yóꞌó. Saa táa tu i nuu ndóꞌo̱ kuâán, saa chi ndee ni ndo ta xa ndi̱tiin tuꞌun Ndioxi nima ndo, ku̱chiñu ndo nuu kiti nǎꞌa.

¹⁵ Ta kütoo ndo koo ndo tá íyo na ñuu ivi yóꞌó, ni ñaꞌa íyo ñuu ivi yóꞌó kütoo ndo ya, saa chi ndá ndóꞌo̱ kútoo ka ndo koo ndo tá kuꞌva íyo na ñuu ivi yóꞌó, ta kúni kachi ya köo kúꞌvi ini ndo xíni ndo Iva yo Ndioxi.

¹⁶ Saa chi kuꞌva íyo na ñuu ivi yóꞌó ta süvi tá kuꞌva kúni Ndioxi kua, kuꞌva kúni mií va na kua, tá kúu xíni yo sava ná síꞌi ta ndikun ndíkani väꞌa ini yo xiꞌin ná, saa tu ya kúni yo ndiꞌi ñaꞌa ya luvi ni náꞌa íyo ñuu ivi yóꞌó, ta saa tu ya kútai ni ini yo xiꞌin ñaꞌa yo, ndiꞌi ya yóꞌó ta süvi ndaꞌa Ndioxi vaxi ya. Ñaꞌa íyo ivi yóꞌó va kua.

¹⁷ Ta ñuu ivi yóꞌó xiꞌin ndiꞌi ñaꞌa kúu mií ya síkutoo ya yoo, vaxi kivi ta ndiꞌi xaꞌa ndiꞌi ya. Sundi na xáa súvi ya kúni Ndioxi ta nda iin kivi ndïꞌi xaꞌa na, kutaku na xiꞌin ra ndiꞌi saa tiempo.

Kündikun ndo na sáa ini xíni Tata yo Jesucristo

¹⁸ Ndóꞌo̱ kándixa Tata yo Jesucristo ta tá íin seꞌe i saa íin ndo. Xaꞌa ya ñaa kua káꞌan i xiꞌin ndo, xa kuaꞌan kúyati ni ndiꞌi xaꞌa ñuu ivi yóꞌó. Ta xa xi̱ni soꞌo ndo vaxi iin ra sáa ini xíni Tata yo Jesucristo. Saa ni xa íyo kuaꞌa ni naꞌa, na íkan saa. Ta xaꞌa ya ñaa kua kúndaa ini yo xa kuaꞌan kúyati ni ndiꞌi xaꞌa ñuu ivi.

¹⁹ Ta na sáa ini xíni Tata yo Jesucristo ku na xi̱ñuꞌu xiꞌin yo ta ka̱na koo na kuaꞌan na, chi süvi taꞌan yo ku na, chi tá tu na taꞌan yo ndi̱xiyo na ta kuñuꞌu na xiꞌin yo, ndikuu. Ta na ñaa ta ka̱na koo na tañu yo kuaꞌan na, ya ñaa sínaꞌa yoo süvi ndiꞌi na ndixa ndíkun sata ra.

²⁰ Sundi ndóꞌo̱ ta ta̱xi Tata yo Jesucristo Tachi I̱í ra ndaꞌa ndo, ta xa xíni ndiꞌi ndo ya ndaa.

²¹ Táa i tutu yóꞌó xaa ya ndaꞌa ndo, chi xa xíni ndo ya ndaa ta süvi ndo täꞌan kundaa ini xiꞌin ya ndaa ku ndo. Chi ndóꞌo̱ ta xa kúndaa vaꞌa ini ndo xiꞌin ya ndaa, saa chi nuu íyo ya ndaa, ta köo ka ya vata íyo.

²² Ta ¿án xíni ndo unku na vata? Vaꞌa ná kundaa ini ndo xaꞌa na, na káꞌan ya köo kúu Tata yo Jesucristo taa ra ti̱ꞌvi Iva yo Ndioxi ki̱xi sikaku yo ñuu ivi ku na vata. Na ikán ku na kánitaꞌan xiꞌin ra, ta ndíkuaa na Iva yo Ndioxi xiꞌin Tata yo Jesucristo ra kúu Seꞌe ra.

²³ Ta ndiꞌi na ndíkuaa Jesús, ra kúu Seꞌe Ndioxi, ta kúni kachi ya ndíkuaa tu na Ndioxi va. Ta ndiꞌi na ndíkuni Jesús ya kúu ra Seꞌe Ndioxi ta ndíkuni tu na Iva yo Ndioxi va.

²⁴ Xaꞌa ya ñaa kua chivaꞌa ni ndo tuꞌun ra ya xi̱ni soꞌo ndo tá núnu̱ú, chivaꞌa ndo ya ná koo ya nima ndo. Tá tu íkan ndo saa chívaꞌa ndo tuꞌun ra nima ndo ya xi̱ni soꞌo ndo tá núnu̱ú, ta saa tu ndóꞌo̱ va koo ndo xiꞌin ra kúu Seꞌe Ndioxi tin Iva ra.

²⁵ Saa chi Tata yo Jesucristo ki̱ndoo ra taxi ra ya ndi̱kaꞌan ra taxi ra ndaꞌa yo, ta ya ikán kua yóꞌó: taxi ra koo yo xiꞌin ra ndiꞌi saa tiempo.

²⁶ Táa i ya yóꞌó xaa nuu ndo ya ná kiꞌin ni ndo kuenta xiꞌin naꞌa, na kúni sindaꞌvi ndóꞌo̱.

²⁷ Sundi ndóꞌo̱ ta xa kúu mií ndo Tachi I̱í Ndioxi ya ta̱xi Tata yo Jesucristo ndaꞌa ndo. Ta köo xíniñuꞌu sinaꞌa inka naꞌa ndóꞌo̱, chi Tachi I̱í mií Ndioxi sínaꞌa ndóꞌo̱ xaꞌa ndiꞌi ni kúu ñaꞌa. Ta ya sínaꞌa Tachi ra ku ya ndaa, süvi ya vata kua káꞌan Tachi ra xiꞌin ndo. Ta ndinuꞌu ni ini ndo kundikun vaꞌa ka ndo Tata yo Jesucristo tá kuꞌva sínaꞌa Tachi I̱í Ndioxi ndóꞌo̱.

²⁸ Ta káꞌan tuku i xiꞌin ndo ñani yo, ndóꞌo̱ ta tá íin seꞌe i na kúꞌvi ni ini i xíni i, saa íin ndo. Ta kutaꞌan vaꞌa ni ndo xiꞌin Tata yo Jesucristo ta saa tá ná ndiko koo ra ñuu ivi yóꞌó ta vaꞌa ni kuni ndo kuyati ndo nuu ra, kükaꞌan nuu ndo kuni ndo ra.

²⁹ Xa xíni yo Tata yo Jesucristo ku ra vaꞌa ni, ra ndaa ni ini, yakan ndiꞌi naꞌa, na íkan ya ndaa, ta na ñaa ku na kúu seꞌe Ndioxi.