1 Juan 1 - Xochapa Mixteco

Jesucristo ku ra táxi ya kutaku yo xiꞌin ya ndinuꞌu

¹ Na taꞌan yo, vitin káꞌan nde xiꞌin ndo xaꞌa iin taa ra xa íyo xinaꞌa tá täꞌan xáa xaꞌa ñuu ivi. Chi ndeꞌe ta xi̱ni xiꞌin nuu nde ra, saa xi̱ni soꞌo nde tuꞌun ya ndi̱kaꞌan ra, ta ti̱in ndaa nde ra xiꞌin ndaꞌa nde. Yakan ndítuꞌun nde xiꞌin ndo xaꞌa ra, chi ra ikán ku tuꞌun Ndioxi ra táxi kutaku yo.

² Ta ndu̱u ra, ra ivi tá íin mií yo ivi yóꞌó. Saa ki̱xi ra ñuu ivi yóꞌó ta xi̱ni xiꞌin nuu nde ra yakan kua ndíkuiin nde xaꞌa ra tin káꞌan nde xaꞌa ra xiꞌin ndo. Chi ra ikán ku ra táxi kutaku yo xiꞌin Ndioxi ndiꞌi saa kivi, ta xiꞌin Iva yo Ndioxi ndi̱xiyo ra, ta vitin ndi̱tuvi ra nuu yo.

³ Ya xi̱ni nde xiꞌin ya xi̱ni soꞌo nde ndi̱kaꞌan ra, ya yóꞌó kua káꞌan nde xiꞌin ndo ya ná ndikitaꞌan ndo xiꞌin nde ya koo ndiꞌi yo iin yuꞌu. Ta saa ndixa iin yuꞌu ná koo ndiꞌi yo xiꞌin taꞌan yo. Chi ndeꞌe ta ndixa iin yuꞌu íyo nde xiꞌin Iva yo Ndioxi tin Jesucristo ra kúu Seꞌe ra.

⁴ Ta ya táa nde tutu yóꞌó xaa ya ndaꞌa ndo, ta ya vaꞌa ná kusini ni ka va ndo kua.

Iva yo Ndioxi ku ra kúu ñu̱ꞌu̱ yéꞌe̱

⁵ Ya yóꞌó ku tuꞌun ya xi̱ni soꞌo nde ndi̱kaꞌan ndoso Tata yo Jesucristo, ta ya yóꞌó kua káꞌan nde xiꞌin ndo: Ndioxi ku ñu̱ꞌu̱ yéꞌe̱ ta nda loꞌo páꞌa ya naá köo nuu íyo ra.

⁶ Tá tu káꞌan yo iin yuꞌu ku yo xiꞌin ra, káchi yo, ta íkan yo ñaꞌa väꞌa, ta kúni kachi ya: yo vata ku yo. Ta tá káa yo xíka nuu naá saa íin yo, ta köo íkan yo ya ndaa.

⁷ Sundi tá tu xíka yo nuu yéꞌe̱ tá kuꞌva íyo Ndioxi nuu yéꞌe̱, ta saa íyo yo iin yuꞌu xiꞌin taꞌan yo. Ta ni̱í Jesucristo Seꞌe Ndioxi ku rá ndíkata ndiꞌi kuachi yo, ndúvaꞌa yo nuu Iva yo Ndioxi.

⁸ Tá tu káꞌan yo köo kuachi yo, káchi yo, ta síndaꞌvi yo mií va yo, ta köo ya ndaa íyo ini yo.

⁹ Sundi tá tu náꞌma yo kuachi yo nuu Ndioxi ta xáa kaꞌnu ini ra xaꞌa yo, ndíkata ra ndiꞌi kuachi yo, saa ndása vaꞌa ra yoo, saa chi vaꞌa ni mií ra, ndaa ni ini ra ta síxinu ndiꞌi ra ya káꞌan ra.

¹⁰ Tá tu káꞌan yo köo íkan yo ya väꞌa, ta tá káa ra vata saa ndása yo Iva yo Ndioxi, ta ni tuꞌun ra ya ndaa ta köo ya íyo ini yo.