1 Corintios 9 - Xochapa Mixteco

Ichí kúu mií ra Pablo xaꞌa ya kúu ra taa ra ka̱na Tata yo Jesucristo xáa chiñu ra nuu ra

¹ ¿Án köo xíni ndo ya kúu i ra ka̱na Tata yo Jesucristo xáa chiñu i nuu ra? Ta íyo ichí i ikan i tá kuꞌva íkan inka nda xáa chiñu nuu ra. Chi yeꞌe ta xi̱ni xiꞌin nuu i ra. Ta ndóꞌo̱ ku ndo íin tá íin chiñu vaꞌa ni íkan i xáa chiñu i, chi tá ndi̱tuꞌun i tuꞌun vaꞌa xaꞌa Tata yo Jesucristo xiꞌin ndo kua ka̱ndixa ndo ra.

² Vani köo xíin sava na ndikuni na yeꞌe, ya xíka i chiñu nuu Tata yo Jesucristo, sundi ndóꞌo̱ ta ndíkuni va ndo yeꞌe ya xáa chiñu i nuu ra. Chi ndóꞌo̱ ta tá káa sello ya xáni tutu, saa íin ndo, chi xa kándixa ndo Tata yo Jesucristo vitin. Yakan ndóꞌo̱ ku ndo ndíkuiin xaꞌa i ya xíka i chiñu nuu ra.

³ Ta soꞌva kua káꞌan i xiꞌin naꞌa, na kánaꞌa xaꞌa i:

⁴ Chi ya ndixa kua íyo ichí va i ya taxi ndo ñaꞌa kuxi nde tin nduta koꞌo nde, xaꞌa chiñu ya íkan nde xiꞌin ndo.

⁵ Ta kúu tu mií nde ichí ya ndikiꞌin nde iin yá kuꞌva yo koo yá síꞌi nde, ta kuꞌun yá xiꞌin nde ndá ka nuu kuaꞌan nde, tá kuꞌva íkan sava nda taꞌan yo tá kúu ra Pedro xiꞌin nda ñani mií Tata yo Jesucristo. Sundi ndeꞌe ta köo íkan nde saa.

⁶ ¿Án iindaa ra Bernabé xiꞌin yeꞌe vi ku nde xíniñuꞌu koo inka chiñu ikan nde, saa vi kuxi nde? Ta ¿án köo ta ichí nde ya taxi loꞌo ndo ñaꞌa kuxi nde?

⁷ Xa xíni mií va ndo, nda iin nda lapa xáa chiñu nuu na chiñu, ta köo cháꞌvi nda mií nda. Ni na chíꞌi kiti uva ta kúu mií na ichí yáxi na ri. Saa tu na ndáa tixuꞌu va, kúu mií na ichí kóꞌni na leche ri xíꞌi na.

⁸ Ta süvi mií i ku i káꞌan ya yóꞌó, nda mií tuꞌun Ndioxi ya ta̱a ra Moisés xinaꞌa, ta saa káꞌan ya:

⁹ “Chïkaa ndo ñunu yuꞌu kiti sindiki sana ndo tá xíka ri xáa chiñu ri síkoyo ri siꞌva trigo”, káchi ya. Ta süvi ndisaa xaꞌa sindiki ndíꞌi ini Ndioxi ya káꞌan ra saa.

¹⁰ Xaꞌa yoo va kua káꞌan ra, káchi ra saa. Chi ley Ndioxi ta xaꞌa yoo kua ta̱a na ya. Saa chi ni na táꞌvi ñuꞌú ku na án na chíꞌi trigo ku na, ta ndátun na kana ñaꞌa kaxi na xiꞌin chiñu íkan na.

¹¹ Ta saa íyo tu ya íkan ndeꞌe va xiꞌin ndo, saa chi ndeꞌe ku nde chi̱ꞌi tuꞌun Ndioxi nima ndo. Ta ¿án väꞌa náꞌa ya ná niꞌi loꞌo nde ñaꞌa nuu ndo xaꞌa chiñu ya íkan nde xiꞌin ndo?

¹² Chi ndóꞌo̱ ta vaꞌa va chíndee taꞌan ndo xiꞌin sava nda xáa chiñu nuu Tata yo Jesucristo. Tá tu saa íkan ndo xiꞌin nda ikán, ta ndeꞌe ka va ku nde kúu ni mií ichí ya chindee taꞌan ndo xiꞌin nde, xaꞌa ñaꞌa ya xíniñuꞌu nde, ndikuu. Ta köo ndi̱kan nde saa xiꞌin ndo, ndi̱xaꞌa ndee ndiꞌi va ini nde, chi köo kúni nde kasi nde nuu ya káꞌan ndoso nde tuꞌun vaꞌa xaꞌa Tata yo Jesucristo.

¹³ Xa xíni mií ndo, naꞌa, na xáa chiñu veꞌe ñuꞌu kaꞌnu nuu na judío, ta ikán kána ñaꞌa xíxi na. Ta saa tu na xáa chiñu nuu nama i̱í, ikán xíxi tu na ikán va ñaꞌa ya sóko naꞌa nuu Ndioxi.

¹⁴ Ta iin kuꞌva saa xáꞌnda chiñu Tata yo Jesucristo nuu naꞌa, na ndíso chiñu xiꞌin naꞌa, na káꞌan ndoso tuꞌun vaꞌa xaꞌa ra, na ikán kúu mií na ichí niꞌi na ñaꞌa kuxi na xaꞌa chiñu íkan na.

¹⁵ Ta yeꞌe, ta nda iin kivi köo ndítaxi i ya chaꞌvi ndo yeꞌe xaꞌa ya xáa chiñu i nuu Tata yo Jesucristo. Ya táa i soꞌva nuu ndo káꞌan i xiꞌin ndo ta süvi ya kúni i taxi ndo ñaꞌa ndaꞌa i kua. ¡Vaꞌa ka ná kuvi i ta kïꞌin i xuꞌun ndaꞌa ndo, xaꞌa ya káꞌan ndoso i tuꞌun Ndioxi xiꞌin ndo, chi yeꞌe, ta vaꞌa ni kúni i ya íkan i chiñu yóꞌó!

¹⁶ Ta saa ni ya káꞌan ndoso i tuꞌun vaꞌa xaꞌa Tata yo Jesucristo, ta süvi xaꞌa ya xaa kaꞌnu xiꞌin mií i ku ya. Saa chi iin chiñu ya xa ndi̱taꞌnda nuu i xaa súvi va i ku ya. Ndaꞌvi ni mií va i tá tu köo xáa súvi i chiñu yóꞌó.

¹⁷ Sundi tá xaꞌa ya kúni mií i íkan i ku chiñu yóꞌó nuu Jesucristo, ta nda naꞌa ta chaꞌvi va na yeꞌe. Ta süvi saa íyo ya, süvi mií i ndínduku chiñu yóꞌó, chi mií Ndioxi ku ra ka̱na yeꞌe ta xa̱ꞌnda ra chiñu nuu i ya kaꞌan ndoso i tuꞌun vaꞌa xaꞌa Tata yo Jesucristo xiꞌin naꞌa.

¹⁸ Ta yaꞌvi i ya ndíkiꞌin i kua yóꞌó, chi yeꞌe ta kúsini ni i ya káꞌan ndoso i tuꞌun vaꞌa xaꞌa ra xiꞌin ndo, ta köo kíꞌin i xuꞌun ndaꞌa ndo ya íkan i saa. Vani íyo ichí i ya chaꞌvi ndo yeꞌe xaꞌa ya káꞌan ndoso i tuꞌun vaꞌa xaꞌa Tata yo Jesucristo xiꞌin ndo ya kaku ndo, ta köo káꞌan i xiꞌin ndo chaꞌvi ndo yeꞌe xaꞌa chiñu íkan i.

¹⁹ Vani xa kúu mií i ichí ikan i ndiꞌi ñaꞌa ya kúni mií i, sundi tá káa ra sa̱ta na xáa chiñu nuu ndiꞌi na, saa nda̱sa i mií i, xaꞌa ya kúni i ná kuchiñu i chindee taꞌan i xiꞌin kuaꞌa ni ka naꞌa ya ná kandixa na Tata yo Jesucristo.

²⁰ Xaꞌa ya ikán kua, tá íyo i xiꞌin na ñuu i na judío, ta tá íin na ikán saa íkan i ya kuchiñu i chindee taꞌan i xiꞌin na, kandixa na Tata yo Jesucristo. Tá íyo i xiꞌin na taꞌan i na ndíkun ley ra Moisés, ta saa íkan i, vani köo kándixa ka i tá kuꞌva kándixa mií na. Ta íkan i saa ya ná kuchiñu chindee taꞌan i xiꞌin na kaku na.

²¹ Tá íyo i xiꞌin naꞌa, na köo ndíkun ley Ndioxi ya si̱ndoo ra Moisés, ta ndúu i tá íin na ikán, ya kuchiñu chindee taꞌan i xiꞌin na kaku na, saa chi chiñu ya xáꞌnda chiñu mií Ndioxi kua xáa súvi i xaꞌa ya ndíkun i ley mií Cristo.

²² Tá íyo i xiꞌin naꞌa, na vita ni ini, na sikan kándixa Tata yo Jesucristo, ta tá íin na ikán saa ndúu i, ya kuchiñu chindee taꞌan i xiꞌin na, ná kachi yo. Yakan tá kuꞌva íin ndá ka mií naꞌa, kuꞌva saa ndúu i nuu na ya kuchiñu chindee taꞌan i xiꞌin sava na kaku na.

²³ Ndiꞌi ya yóꞌó íkan i xaꞌa ya kúni i ná kuita niꞌnu tuꞌun vaꞌa xaꞌa Tata yo Jesucristo, soꞌva xáa chiñu i nuu ra ya ná chindee taꞌan i xiꞌin naꞌa ya kundaa ini na xaꞌa ra.

²⁴ Ta xa kúndaa vaꞌa ini ndo, naꞌa na xínu nuu kéꞌe taꞌan na, ta kuaꞌa ni va ku na xínu, ta süvi ndiꞌi na níꞌi ñaꞌa, iindaa va ku na kúchiñu níꞌi ya. Ta saa ndóꞌo̱, ndinuꞌu ni ini ndo xaa súvi ndo ya kúni Ndioxi, tá kuꞌva íkan na kéꞌe taꞌan saa ikan ndo ndakua ná ndikiꞌin ndo ñaꞌa ya niꞌi ndo nuu Ndioxi.

²⁵ Tá kúu ndiꞌi naꞌa, na xínu, xíka na xínu na ya síkuaꞌa na keꞌe taꞌan na xiꞌin inka naꞌa, ta xáꞌnu ini na xiꞌin ñaꞌa ya köo chíndee taꞌan xiꞌin na. Íkan na saa xaꞌa ya kúni na niꞌi na ñaꞌa, sundi ya ikán na ta ya ndíꞌi xaꞌa va ku ya. Ta ñaꞌa ya niꞌi yoo, ta nda iin kivi köo ndíꞌi xaꞌa ya.

²⁶ Yakan yeꞌe, ta tá káa ra xínu ni án tá káa ra ndee ni káni taꞌan nuu kéꞌe taꞌan na kúun na ikin nuu taꞌan na, saa káa i, ndee ni va ndíꞌi ini i xáa súvi i chiñu Ndioxi ta köo xínu kíꞌvi i, ni köo káni taꞌan i tá kuꞌva íkan naꞌa, na kúun ikin nuu tachi kuiti.

²⁷ Sundi yeꞌe, ta síndoꞌo ni va i ikin kuñu i, saa xáa nduxa i xiꞌin ya ná kandixa ya yeꞌe. Saa xáꞌa ni i ndee xiꞌin mií i ya xaa súvi ni i ya kúni ra, koto ka ndïkiꞌin i ya vaꞌa taxi Ndioxi ndaꞌa i nuu ndivi, vani ra ndi̱kaꞌan ndoso tuꞌun ra ndi̱xiyo i.