1 Corintios 8 - Xochapa Mixteco

¿Án vaꞌa kuxi yo ñaꞌa xíxi ya sóko naꞌa nuu ndioxi ya ndíi?

¹ Ta vitin káꞌan i xiꞌin ndo xaꞌa ñaꞌa ya ndi̱ndakan tuꞌun ndo yeꞌe xaꞌa, án vaꞌa kuxi ndo ya, án küvi kuxi ndo ñaꞌa ya sóko naꞌa nuu naꞌna ndioxi ya ndíi. Ta vaꞌa ná kaꞌan i xiꞌin ndo ya ndixa kua xíni ni ndiꞌi yo. Sundi tá ndíkani ini yo ya ndee ni xíni yo nuu inka naꞌa kua ndúu yo naꞌa, na kútaa ni ini. Ta ya ndixa ni ka ndáa yaꞌvi ku ya kúꞌvi ni ini yo xíni yo inka naꞌa, chi xiꞌin ya kúꞌvi ini yo xíni yo na, ta táxi yo ndee ndaꞌa na ya kundikun ni ka na ichí Ndioxi.

² Tá ndíkani ini sava naꞌa ya xíni ni na túvi na, ta ni köo xíni na tá kuꞌva xíniñuꞌu na kundaa vaꞌa ka ini na.

³ Sundi ndá naꞌa kúꞌvi ni ini xíni Ndioxi, ta saa tu mií va ra xíni vaꞌa ra ini na.

⁴ Ta soꞌva káꞌan i xiꞌin ndo, xaꞌa ñaꞌa ya ndákan tuꞌun ndo yeꞌe án vaꞌa kuxi yo ñaꞌa ya sóko naꞌa nuu naꞌna ndioxi ya ndíi, án väꞌa kuxi yo ya. Chi ni köo táku naꞌna ndioxi na, ta ni köo ndee kúu mií ya, ta xa xíni va yo ndioxi na yóꞌó ta ni köo ndáa yaꞌvi ya, saa chi iindaa mituꞌun va ku mií Ndioxi ra ndaa ni.

⁵ Ta sava naꞌa ndíkani ini, ñaꞌa ya íyo ndivi xiꞌin ya íyo ñuu ivi yóꞌó ku ndioxi, káchi na. Ta ndixa kua kuaꞌa ni nuu ku ñaꞌa ya káꞌan naꞌa xiꞌin kúu ndioxi na, ta saa kuaꞌa ni nuu ku tu ñaꞌa ya káꞌan na xiꞌin kúu ya naꞌnu nuu va na.

⁶ Sundi nuu mií yo, ta iindaa mituꞌun va ku Iva yo Ndioxi mií ra ndaa ni, ta ndaꞌa mií ra kua vaxi ndiꞌi ñaꞌa ya xíniñuꞌu yo, xaꞌa mií ra kua táku yo. Ta saa íyo iindaa Tata yo Jesucristo ta tixin mií ra kua ndi̱kuaꞌa ndiꞌi ñaꞌa, ta si̱kuaꞌa tu ra mií va yo.

⁷ Ta süvi ndiꞌi yo ndíkun Tata yo Jesucristo ku yo xíni xaꞌa ya yóꞌó. Chi sava na ka̱ñuꞌu naꞌna ndioxi ndíi ta xíka uvi ka va ini na tá xíxi na kuñu. Ta ndíkani ini na xiꞌin ya án sana ya ndi̱soko naꞌa nuu naꞌna ndioxi ya ndíi kua káꞌán na. Xaꞌa ya xíka uvi ini na tá xíxi na ya, saa ndúu na tá íin naꞌa, na yáꞌa nuu Ndioxi, túvi na.

⁸ Süvi xaꞌa ñaꞌa ya xíxi yo kua kúyati ka yoo nuu Ndioxi, tá ná kuxi yo ta köo ndúu i̱í ka yo nuu ra, ni tá ná küxi yo ta köo ndúkini ka yo nuu ra.

⁹ Ta ndóꞌo̱ ta xa íyo va ichí ndo kuxi ndo ndiꞌi kúu ñaꞌa, sundi kuenta ni koo ndo, chi íyo na ñani yo, na vita ni ini, ta ìyo ni koyo na nuu kuachi xaꞌa ñaꞌa ya xíxi ndo.

¹⁰ Saa chi tá ná kuni iin ñani yo, ra vita ini, ya ndóo ndo nuu mesa xíxi ndo nuu xáa kaꞌnu na naꞌna ndioxi ya ndíi, ta ìyo ni xi̱nu ini ra ikán kuxi ra ñaꞌa ya sóko naꞌa nuu naꞌna ndioxi ya ndíi, vani ndíkani uvi ini ra xaꞌa ya íkan ra saa.

¹¹ Ta ìyo ni ndiꞌi xaꞌa ra xaꞌa kuachi ndóꞌo̱, chi ndóꞌo̱, ta xa xíni vaꞌa ndo ya köo kuachi xaꞌa ya ikán. Sundi ìyo ni ndiꞌi xaꞌa iin taa ra ndi̱xiꞌi Tata yo Jesucristo xaꞌa.

¹² Yakan kuenta ni koo ndo saa chi ìyo ni sindikava ndo ñani ndo nuu kuachi xaꞌa ya täꞌan ndundee vaꞌa tuꞌun Ndioxi nima ra. Chi tá ná kuni ra ya íkan ndo, ta ku̱ni̱ ra ikan ra saa, vani ndíkani ini ra ya väꞌa kua íkan ra. Ta xaꞌa ya íkan ndo saa xiꞌin ñani ndo, ta sítikueꞌe ndo ra, ta nda Cristo ku ra sítikueꞌe ndo.

¹³ Yakan tá xaꞌa ya xíxi yo kuñu kua síndikava yo na taꞌan yo nuu kuachi, ta vaꞌa ka kua ná küxi ka yo kuñu nda iin ichí, ya ná täxi yo koyo na taꞌan yo nuu kuachi.