1 Corintios 7 - Xochapa Mixteco

Káꞌan ra Pablo ndá kuꞌva koo naꞌa, na xa ti̱ndaꞌa

¹ Ta vitin ndítuꞌun i xiꞌin ndo xaꞌa ya ndi̱ndakan tuꞌun ndo yeꞌe nuu tutu ya ti̱ꞌvi ndo vaxi nuu i: “án vaꞌa ni ka kua ná tïndaa taa ná síꞌi”, káchi ndo. Ta yeꞌe káꞌan i xiꞌin ndo ya vaꞌa ni ka kua ná ïkan nda saa, káchi i.

² Sundi xaꞌa ya ìyo ni kiꞌvi nda taa xiꞌin ndá ka mií ná síꞌi, yakan vaꞌa ka kua ná tindaꞌa va ndo, ta ná koo yá síꞌi ndo, ta saa tu ná ñaꞌa va, ná tindaꞌa ná koo ií ná.

³ Ta ra taa, ra íyo yá síꞌi ta xíniñuꞌu ra taxi ra mií ra ndaꞌa yá síꞌi ra, ta saa tu mií yá síꞌi va ra, xíniñuꞌu yá taxi yá mií yá ndaꞌa ií yá.

⁴ Saa chi ñaꞌá yá íyo ií, ta köo xáꞌnda chiñu ka yá nuu ikin kuñu yá, ií yá ku ra xáꞌnda chiñu nuu ikin kuñu yá. Ta ni ií yá ta köo xáꞌnda chiñu ra nuu ikin kuñu ra, yá síꞌi ra ku yá xáꞌnda chiñu nuu ikin kuñu ra.

⁵ Xaꞌa ya ñaa kua küxiꞌnda ndo mií ndo nuu taꞌan ndo, sundi tá tu xa ndi̱kani ini ndo ya tïndaa taꞌan ndo uvi ndaa kivi, xaꞌa ya kúni ndo kaꞌan ndo xiꞌin Ndioxi, ta vaꞌa chitaꞌan tuꞌun ndo xaꞌa ya. Tá xa ndi̱xinu ichí ndi̱kaꞌan ndo xiꞌin Ndioxi ta saa vaꞌa tindaa taꞌan tuku ndo. Saa chi tá tu ná tïndaa taꞌan tuku ndo, ta ìyo ni sindaꞌvi kiti nǎꞌa ndóꞌo̱, ta koyo ndo nuu kuachi.

⁶ Ya káꞌan i tuꞌun yóꞌó xiꞌin ndo ta süvi yeꞌe xáꞌnda chiñu ku i nuu ndo ya ikan ndo saa, yeꞌe ndíkani va ku i nuu ndo.

⁷ Ya vaꞌa ni va kua ná kindoo kuâán ndiꞌi ndóꞌo̱ nda taa, ná tïndaꞌa ndo, tá kuꞌva káa yeꞌe, íyo kuâán i. Sundi süvi ndiꞌi yo ndi̱niꞌi taꞌvi kindoo kuâán yo. Süvi iin káchi íyo ndiꞌi yo.

⁸ Ta ya yóꞌó ku ya ndítuꞌun i xiꞌin ndóꞌo̱ kuâán täꞌan tindaꞌa, saa tu ná kuâán ndi̱xiꞌi ndaa: ya vaꞌa ni ka kua ná tïndaꞌa ndo, kindoo kuâán ndo tá kuꞌva íyo yeꞌe.

⁹ Sundi tá köo kúchiñu ndo kaꞌnda ndo nuu ikin kuñu ndo, ta vaꞌa ka kua ná tindaꞌa va ndo, süvi ka vi ya ndíkani ini ndo ndee ni kútoo ndo xíni taꞌan ndo.

¹⁰ Saa xáꞌnda chiñu i nuu na xa ti̱ndaꞌa, süvi mií i káꞌan xiꞌin ndo, Tata yo Jesucristo ku ra xáꞌnda chiñu nuu ndo: “Ná síꞌi, ta ná sïndikoo ná ií ná”.

¹¹ Sundi tá ná sindikoo ná ií ná, ta ná tïndaꞌa ka ná, án vaꞌa ka ná ndiko koo tuku ná xiꞌin ií ná. Saa tu nda taa va, ná käꞌnda nda tutu xiꞌin ná síꞌi nda.

¹² Ta ya yóꞌó ku ya ndítuꞌun i xiꞌin ndiꞌi ndo. Yeꞌe ku i káꞌan xiꞌin ndo, süvi ya káꞌan Tata yo ku ya: Tá ndá iin ñani yo íyo yá síꞌi ra ta täꞌan kandixa yá síꞌi ra tuꞌun Tata yo Jesucristo, ta kúni va yá koo yá xiꞌin ra, ta saa ná koo ra xiꞌin va yá, ná käꞌnda ra tutu xiꞌin yá.

¹³ Ta saa tu tá íyo iin yá kuꞌva yo, ta täꞌan kandixa ií yá tuꞌun Tata yo Jesucristo, sundi kúni ra koo ra xiꞌin yá, ta vaꞌa ná koo ra xiꞌin va yá, ná käꞌnda yá tutu xiꞌin ra.

¹⁴ Saa chi iin taa, ra täꞌan kandixa Tata yo Jesucristo ta ndúu i̱í ra nuu Ndioxi xaꞌa ya kándixa mií yá síꞌi ra. Ta saa tu yá síꞌi iin ñani yo, tá täꞌan kandixa yá Tata yo, ta saa ndúu i̱í tu yá ikán va, xaꞌa ya kándixa mií ra tuꞌun Tata yo Jesucristo. Tá tu süvi saa íyo ya ta nda na vali seꞌe va na íyo kuachi, taꞌan kuachi seꞌe naꞌa, na köo xíni Ndioxi, ndikuu. Sundi vitin ta nda na vali seꞌe va na ndu̱u i̱í nuu Ndioxi.

¹⁵ Sundi tá kúni iin taa ra köo kándixa tuꞌun Tata yo, sindikoo ra yá síꞌi ra, ta vaꞌa ná sindikoo va ra yá. Ta saa tu ñaꞌa yá köo kándixa tuꞌun Tata yo Jesucristo, tá kúni yá sindikoo yá ií yá, ta vaꞌa ná sindikoo va yá ra. Saa chi Ndioxi ta ka̱na ra yoo ya koo vívií yo xiꞌin taꞌan yo, köo ndi̱kana ra yoo ya koo yo kanitaꞌan yo.

¹⁶ Saa chi yóꞌo̱, íyo ií, ta ni köo xíni un án sikaku un ií un xaꞌa ndiꞌi ñaꞌa íkan un tá ná koo ra xiꞌin un. Ta saa tu yóꞌo̱, íyo yá síꞌi, ni köo xíni un án kuchiñu un sikaku un yá síꞌi un xaꞌa ndiꞌi ñaꞌa íkan un, tá ná koo yá xiꞌin un.

¹⁷ Ta vaꞌa koo ndo tá kuꞌva chi̱tuni mií Tata yo ta̱xi ra ndaꞌa ndo. Taꞌan ya káꞌan i xiꞌin ndo ku ya káꞌan i xiꞌin tá kúu ndiꞌi ni kúu naꞌa, na veꞌe ñuꞌu.

¹⁸ Saa tu ndá sava nda ñani yo, ta xa kúu mií nda tuni Ndioxi tá ka̱na ra nda, ta vaꞌa saa ná koo va nda. Tá ndá sava tu nda ñani yo köo tuni Ndioxi kúu mií nda, ta vaꞌa saa ná koo va nda.

¹⁹ Chi köo ndáa yaꞌvi ya án íyo tuni Ndioxi nda án köo ya kúu mií nda. Ya ndee ni ndáa yaꞌvi ka kua ná xaa súvi yo ya xáꞌnda chiñu Ndioxi nuu yo.

²⁰ Xaꞌa ya ñaa kua ná koo ndo tá kuꞌva ndi̱xiyo ndo kivi ka̱na Iva yo Ndioxi ndóꞌo̱.

²¹ Án sana tá kivi ka̱na Ndioxi ndóꞌo̱ ya kundikun ndo ra, ta na sa̱ta naꞌa xáa chiñu nuu na ku ndo, ta kündiꞌi ini ndo. Tá tu kúchiñu ndo ta vaꞌa nduku ndo kuꞌva ya ná saña na ndóꞌo̱ kindoo ndíka ndo.

²² Saa chi tá ra sa̱ta naꞌa xáa chiñu nuu na kúu un tá kivi ka̱na Tata yo yóꞌo̱. Ta vitin xa ndi̱sa̱ña ndika un i̱kan Tata yo. Ta saa tu naꞌa, na ndóo ndika tá kivi ka̱na Tata yo na, ya kundikun na ra, ndu̱u na tá íin naꞌa, na sa̱ta ra ndíkun ñaꞌa na.

²³ Ndee ni yaꞌvi cha̱ꞌvi Ndioxi xaꞌa ndo ya ndu̱u ndo naꞌa, na sa̱ta Jesucristo, yakan täxi ndo nduu ndo naꞌa, na íin tá íin naꞌa, na núꞌni ndaꞌa kuachi ñuu ivi yóꞌo̱.

²⁴ Ñani yo xiꞌin kuꞌva yo, tá íyo ndo tá kivi ka̱na Ndioxi ndóꞌo̱, saa koo ndo nda kivi vitin ya kundikun ndo ra.

²⁵ Ta xaꞌa nda kuâán xiꞌin ná kuâán taki ná täꞌan tindaꞌa, ta köo ñaꞌa ndíxaꞌnda chiñu Tata yo nuu i xaꞌa na. Sundi vaꞌa va kaꞌan i xiꞌin ndo ndá kuꞌva ku ya ndíkani ini i, saa chi ta̱xi Tata yo ya xínituni i ndaꞌa i xaꞌa ya kúndaꞌvi ni ini ra xíni ra yeꞌe.

²⁶ Ya ndíkani ini yeꞌe, ta vaꞌa ni kua ná tïndaꞌa nda taa, vaꞌa ni ka kua ná kindoo kuâán nda xaꞌa ya uꞌvi ni tiempo ndóo yo vitin.

²⁷ Ndóꞌo̱ ñani yo, tá tu íyo yá síꞌi ndo, ta sïndikoo ndo yá. Ta nda ñani yo nda köo ná síꞌi, ta vaꞌa ná tïndaꞌa nda.

²⁸ Tá tu kúni tu nda ñani yo nda kuâán tindaꞌa nda, ta vaꞌa ná tindaꞌa va nda, köo kuachi xaꞌa ya. Tá tu kúni tindaꞌa tu ná kuâán taki, ta vaꞌa ná tindaꞌa va ná, köo kuachi íyo xaꞌa ya. Sundi tá ná tindaꞌa ná vitin ta ndoꞌo va ná, xaꞌa ya köo kúni i ndoꞌo ná yakan káꞌan i saa xiꞌin ná.

²⁹ Ta yeꞌe kúni i kaꞌan i ya yóꞌó xiꞌin ndo: Xa kama ni va kuaꞌan ndíꞌi tiempo ya ndóo yo, yakan tá kúu ndóꞌo̱ taa ta kündiꞌi ini ndo xaꞌa ná síꞌi ndo, kundiꞌi ni ka ini ndo xaa chiñu ndo xaꞌa Tata yo Jesucristo, chi xa kama ni ndiko koo ra.

³⁰ Saa tu ndóꞌo̱ kúsuchi ni ini, tá íyo naꞌa, na kúsini ni saa koo ndo. Ta ndóꞌo̱ kúsini ni, ta tá íyo na kúsuchi ni ini, saa koo ndo. Ta ndóꞌo̱ sáta, ta tá íin na köo ndi̱sata nda iin ñaꞌa, saa koo ndo.

³¹ Ta ndóꞌo̱ kée vaꞌa xiꞌin ñaꞌa ya íyo ñuu ivi yóꞌó, tá íyo naꞌa, na köo vaꞌa ñaꞌa saa koo ndo. Saa chi ñuu ivi yóꞌó xiꞌin ndiꞌi ñaꞌa kúu mií ya, ta kama ni va ndiꞌi xaꞌa ya.

³² Káꞌan i saa xiꞌin ndo ya ná kündiꞌi ni ini ndo. Saa chi nda kuâán ta xaꞌa chiñu Ndioxi va ku ya ndíꞌi ni ini nda, saa ndíꞌi ni tu ini nda ndá kuꞌva kua xaa sií nda ini va ra.

³³ Sundi taa nda xa íyo yá síꞌi, ta ya ndíꞌi ni ini nda xaꞌa ku ñaꞌa ya íyo ñuu ivi yóꞌó, saa ndíꞌi ni ini nda ndá kuꞌva xaa sií nda ini yá síꞌi nda.

³⁴ Saa íkan tu ná síꞌi va, chi ná síꞌi kuâán ná köo ií, ta ndíꞌi ni ini ná ndá kuꞌva koo ndu i̱í ka ya vaꞌa ná xiꞌin ikin kuñu ná nuu Ndioxi. Ta ná síꞌi íyo ií ta ndíꞌi ni ini ná ikán xaꞌa ñaꞌa ya íyo ñuu ivi yóꞌó, chi kúni ná xaa sií ná ini ií ná.

³⁵ Ta ya káꞌan i ya yóꞌó xiꞌin ndo, ta ya kúni i ná koo vaꞌa ndo ku ya, ta köo sási i nuu ndo, chi yeꞌe ta kúni i ná koo vaꞌa ndo. Ta saa ná nditaxi ndiꞌi ndo mií ndo ndaꞌa Ndioxi, nda iin ñaꞌa ná käsi nuu ndo.

³⁶ Ta sava tu nda ndíkani ini vaꞌa ka kua ná tindaꞌa nda xiꞌin yá xa íyo yuꞌu nda xiꞌin, chi xa kuaꞌan yáꞌa kuiya yá ya tindaꞌa yá káchi na, ta vaꞌa ná ndikiꞌin taꞌan na, ná tindaꞌa na xiꞌin taꞌan na, süvi kuachi ku ya nuu Ndioxi.

³⁷ Sundi sava nda xa chi̱kaa vaꞌa ini ya tïndaꞌa nda, vaꞌa va chi íyo ndika nda ikan nda ya kúni mií nda. Vaꞌa ni va íkan nda tá tu köo kúni nda tindaꞌa nda.

³⁸ Yakan kua vaꞌa ni va íkan naꞌa, na tíndaꞌa. Ta na xïin tindaꞌa, ta vaꞌa ni ka va tu íkan na ikán.

³⁹ Ta ñaꞌá yá íyo ií, ta xíniñuꞌu yá koo yá xiꞌin ra ndiꞌi saa kivi ya táku ra. Sundi tá tu ndi̱xiꞌi ií yá ta saa kua vaꞌa tindaꞌa tuku yá xiꞌin inka taa ra kúni mií yá. Ta ra kándixa Jesucristo ku ra xíniñuꞌu yá tindaꞌa yá xiꞌin.

⁴⁰ Sundi, vaꞌa ni ka va koo yá tá tu ná tïndaꞌa tuku yá. Soꞌva ndíkani ini yeꞌe, chi mií Tachi I̱í Ndioxi ku ya táxi ya ndíchi ndaꞌa i ndíkani ini i saa.