1 Corintios 6 - Xochapa Mixteco

Xaa nani ndo kuachi xiꞌin taꞌan mií ndo

¹ Ta ndóꞌo̱, tá kivi íyo ndo kuachi xiꞌin taꞌan ndo, ta ¿ndachu kuaꞌan ndo nuu na chiñu táxi ndo kuachi xaꞌa taꞌan ndo? ¿Án vaꞌa ka ná kuꞌun ndo nuu na chiñu veꞌe ñuꞌu ta na chiñu ikán ku na xaa nani kuachi xiꞌin ndo? Vaꞌa ka ná kaꞌan ndo xiꞌin na ñuu Ndioxi, na i̱í chindee taꞌan na xiꞌin ndo.

² ¿Án köo xíni ndo, na ñuu Ndioxi ku na xaa nani kuachi xiꞌin ndiꞌi ni kúu na ñuu ivi yoꞌó? Tá tu kúu mií ndo ichí ya xaa nani ndo kuachi ndiꞌi na ñuu ivi, ta ¿ndachu köo kúchiñu ndo xaa nani ndo kuachi vali xiꞌin taꞌan mií ndo?

³ ¿Án köo xíni ndo, vaxi kivi ta xaa nani yo kuachi xiꞌin na tatun Ndioxi? Tá tu saa ta ¿ndachu köo xáa nani mií ndo kuachi ivi yóꞌó xiꞌin taꞌan ndo?

⁴ Tá tu xíniñuꞌu ndo xaa nani ndo kuachi xiꞌin taꞌan ndo ta ¿ndachu kuaꞌan ndo nuu na chiñu, na köo xíni Ndioxi, ta köo xáꞌan ndo nuu na chiñu veꞌe ñuꞌu?

⁵ Soꞌva káꞌan i xiꞌin ndo ya ná kukaꞌan nuu ndo: ¿Án köo loꞌo vi na ndíchi tañu ndo ya kuchiñu na xaa nani na kuachi xiꞌin na taꞌan yo na veꞌe ñuꞌu ñaa?

⁶ ¿Án ndakua nuu na chiñu, na köo xíni Ndioxi vi xíniñuꞌu iin ñani yo kuꞌun ra taxi ra kuachi xaꞌa inka ñani yo ra íyo kuachi xiꞌin ra? ¿Ta ndachu kuaꞌan ndo nuu na chiñu ñaa xaa nani na kuachi xiꞌin ndo ta ni süvi na kándixa Jesucristo ku na?

⁷ Saa chi ya kánitaꞌan ndo xiꞌin taꞌan mií ndo ta ya kaꞌa̱n ni nuu ku ya. Chi vaꞌa ka kua ná ikan na ñani yo ya väꞌa xiꞌin ndo án sikuiꞌna na ñaꞌa ndo, ta xaꞌa ndee ini ndo xiꞌin na, ta küꞌun ndo taxi ndo kuachi xaꞌa na nuu na chiñu.

⁸ Ta ndóꞌo̱, ta väꞌa íkan ndo chi íkan ndo ya väꞌa xiꞌin taꞌan mií ndo. Síkuiꞌna ndo ñaꞌa taꞌan ndo ¡nda na ñani mií ndo na kándixa Tata yo Jesucristo íkan ndo saa xiꞌin!

⁹ ¿Án köo xíni ndo, naꞌa, na íkan ya väꞌa ta küchiñu na koo na xiꞌin Ndioxi nuu xáꞌnda chiñu ra? Sïndaꞌvi ndo mií ndo chi ni na xíka sií xiꞌin taꞌan küvi koo na xiꞌin Ndioxi, ni na káñuꞌu ndioxi ndíi, ni taa ra kuakiꞌvi xiꞌin inka ñaꞌa, ni ñaꞌa yá kuakiꞌvi xiꞌin inka taa, ni taa ra kíxi xiꞌin inka taa, ni taa ra ndúu síꞌi nuu inka taa,

¹⁰ ni na kuiꞌna, ni na kútoo ni ya kuika, ni na xíꞌi ni, ni na síndaꞌvi naꞌa, ni na kánaꞌa xiꞌin inka naꞌa, nda iin na yóꞌó küchiñu koo nuu xáꞌnda chiñu Ndioxi.

¹¹ Taꞌan ya väꞌa yóꞌó ku ya i̱kan sava ndo yachi. Sundi vitin ta xa ndo̱o kuachi ndo, xa ndu̱u ndo naꞌa, na i̱í, na köo ka kuachi kúu mií nuu Ndioxi. Ta xa ndi̱kuiso vaꞌa ra ndóꞌo̱ tixin ndee Tata yo Jesucristo, saa tu xiꞌin ndee Tachi I̱í mií Iva yo Ndioxi va.

Ná xaa kaꞌnu yo Ndioxi xiꞌin ikin kuñu yo, ta ná xäa kini yo xiꞌin ya

¹² Saa káꞌan sava ndo, káchi ndo saa: “Xaꞌa ya ndíkun yo ichí Tata yo Jesucristo ta ki̱ndoo ndíka yo ya ikan yo ndá ka ñaꞌa ya kúni mií yo”, káchi ndo. Ya ndaa kua ya vaꞌa ni ikan ndo ku ndiꞌi va ya, sundi süvi ndiꞌi ya íkan ndo ku ya vaꞌa nuu Ndioxi, yakan täxi ndo kaꞌnda chiñu ya kúni mií ndo nuu ndo.

¹³ Ta saa káꞌan tuku sava ndo: “Ñaꞌa xíxi yo ta tixin yo kuaꞌan ya, ta suvi ni mií Ndioxi ku ra si̱kuaꞌa tixin yo nuu kuaꞌan ñaꞌa xíxi yo”, káchi ndo. Ni saa va ta ya ndíꞌi xaꞌa ku uvi saa va ya. Sundi ikin kuñu yo, ta köo ndi̱sikuaꞌa ra ya, ya ikan yo ndisaa chiñu kíꞌvi xiꞌin ya. Xaꞌa ya xaa kaꞌnu yo Tata yo Jesucristo va kua si̱kuaꞌa ra ya, ta suvi ni mií ra ku ra xáꞌnda chiñu nuu ikin kuñu yo.

¹⁴ Tá kuꞌva si̱taku Ndioxi Tata yo Jesucristo, ta saa sitaku tu ra ikin kuñu yoo va xiꞌin ndee mií ra.

¹⁵ ¿Án köo kúndaa ini ndo, iin iin ñaꞌñu ikin kuñu yo ta kúu ya ikin kuñu Tata yo Jesucristo? Ta ¿án vaꞌa sikitaꞌan yo ikin kuñu Tata yo Jesucristo xiꞌin ikin kuñu iin ñaꞌa yá xíko mií nuu ndiꞌi taa? ¡Küvi ikan yo saa!

¹⁶ ¿Án köo xíni ndo, iin taa ra kíꞌvi xiꞌin iin ñaꞌa yá xíko mií, ta iin nuu ndúu ra xiꞌin yá? Tá kuꞌva káꞌan tuꞌun Ndioxi, ya ta̱a na xinaꞌa, káchi ya saa: “Iin taa xiꞌin iin ñaꞌa, ta iin nuu ndúu uvi saa na”, káchi ya.

¹⁷ Ta saa ndiꞌi yo ndíkitaꞌan xiꞌin Tata yo Jesucristo, ta iin nuu ndúu yo xiꞌin ra tixin tachi ra.

¹⁸ Xaꞌa ya ñaa kua käka sií ndo xiꞌin ikin kuñu ndo. Chi kuachi yóꞌó ka ku mií ya ndee ni xáa yakua ikin kuñu ndo nuu tá kúu ndiꞌi ka kuachi ya väꞌa íkan ndo, chi ndá ka ya väꞌa íkan ndo ta köo iin káchi íyo ya xiꞌin kuachi yóꞌó, chi ya yóꞌó ta síndiꞌi xaꞌa ya ikin kuñu ndo. Yakan vaꞌa ka kunu ndo nuu taꞌan kuachi yóꞌó.

¹⁹ ¿Án köo xíni ndo ya kúu ikin kuñu ndo veꞌe ñuꞌu Tachi I̱í Ndioxi, ya ta̱xi ra ndaꞌa ndo íyo ya xiꞌin ndo? ta mií ra ku ra xáꞌnda chiñu nuu ndo.

²⁰ Saa chi mií ra ku ra sa̱ta ndóꞌo̱ xiꞌin nií mií Tata yo Jesucristo, ta ndee ni yaꞌvi cha̱ꞌvi ra xaꞌa ndo. Xaꞌa ya ñaa kua xaa kaꞌnu ni ndo ra xiꞌin ikin kuñu ndo tin ya vaꞌa ndo, saa chi ñaꞌa mií ra ku uvi saa ya kúu mií ndo.