1 Corintios 5 - Xochapa Mixteco

Káꞌan ra Pablo xaꞌa iin ra veꞌe ñuꞌu ya ná taxin na ra

¹ Xa ndiꞌi naꞌa xíni xaꞌa ya íkan iin ra ndíkaa xiꞌin ndo veꞌe ñuꞌu. Xíni na ya kini ni íkan ra, chi ndi̱kiꞌin ra siꞌí ndáꞌvi ra ndu̱u yá síꞌi ra. Nda naꞌa, na köo xíni tuꞌun Ndioxi ta köo na íkan saa.

² ¡Ta ndóꞌo̱, ta ndo kútai ini va ku ndo xaꞌa ya väꞌa íkan ra ñaa nuu ndo! ¡Ndóꞌo̱ kuchiꞌña ini vi ku ndo, ndikuu, ta köo íkan ndo saa! Ta ra íkan saa, ta vaꞌa tava ndo ra, ná keta ra veꞌe ñuꞌu, täxi ka ndo ndikaa ra xiꞌin ndo.

³ Vani köo íyo táku i xiꞌin ndo vitin, sundi tá káa ra íyo xiꞌin ndo saa káa i. Ni xíka ni íyo i nuu ndo ta tá káa ra íyo yati xiꞌin ndo saa káa i, yakan xa ndi̱kani xi̱ní i xiꞌin ra ñaa ndá kuꞌva koo ra.

⁴ Vaꞌa ndikitaꞌan ndiꞌi ndo tixin kivi Tata yo Jesucristo, ta saa tu yeꞌe va, nda tá káa ra íyo xiꞌin ndo saa káa i. Saa íyo tu ndee Jesucristo va xiꞌin ndo nuu ndíkitaꞌan ndo.

⁵ Ta ñaa nditaxi ndo ra ndaꞌa kiti nǎꞌa ya ná ndiꞌi xaꞌa ikin kuñu ra xaꞌa ya väꞌa íkan ra, ta saa kuchiñu kaku ya vaꞌa ra kivi tá ná ndiko koo Tata yo Jesucristo kixi ra.

⁶ Ta kütai ni ini ndo xiꞌin ya väꞌa íkan ra ñaa. Xa xíni ndo unkua káꞌan tuꞌun ndíchi ya káꞌan soꞌva: “Loꞌo paꞌa tíin uxan iya kuakee xiꞌin uxan xita vaꞌa ta ndee ni sínañu ñaꞌa ya”, káchi ya.

⁷ Xaꞌa ya ñaa kua vaꞌa ka ná tava ndo uxan iya yata ya sítivi ndóꞌo̱. Ta vaꞌa nduu ndo tá káa uxan xita vaꞌa ya xa̱á. Saa chi ndóꞌo̱ ta tá íin xita vaꞌa ya xíniñuꞌu na viko pascua saa íin ndo, chi ya ikán ta köo uxan iya kúu mií ya. Chi Jesucristo ku ra káa tá káa levo kiti sóko na xaꞌa kuachi na viko pascua, chi xa ndi̱soko ra mií ra ndi̱xiꞌi ra xaꞌa kuachi yo.

⁸ Yakan kua xíniñuꞌu yo sindoo yo ndiꞌi ya väꞌa ikán yo, saa koo yo tá kuꞌva kúni mií Ndioxi, nduu yo tá íin naꞌa, na ndixa ni ndaa ini, na ndǎku ini. Tá ná ikan yo saa kua nduu yo tá íin naꞌa, na táva viko pascua nuu xíxi na xita vaꞌa ya köo uxan iya yata xiꞌin, chi uxan iya yata kua káa tá káa ndiꞌi nuu kuachi ya kini ni káa.

⁹ Xa yachi ta̱a i tutu xaa nuu ndo yá ná kütaꞌan ndo xiꞌin nda iin naꞌa, na xíka sii xiꞌin taꞌan.

¹⁰ Sundi köo ndi̱kaꞌan i xiꞌin ndo xaꞌa na ñuu ivi yóꞌó tá kúu na xíka sii xiꞌin taꞌan, xiꞌin na kútoo ni ya kuika xiꞌin na kuiꞌna xiꞌin na káñuꞌu ndioxi ya ndíi. Chi tá ndíkaꞌan i xiꞌin ndo xaꞌa ndiꞌi na yóꞌó ta xíniñuꞌu ndo kee vaꞌa vi ndo ñuu ivi yóꞌó, ndikuu.

¹¹ Ya ndi̱kaꞌan i xiꞌin ndo kua ná kütaꞌan ndo xiꞌin naꞌa, na káꞌan ndíkun na Jesucristo, ta kútoo na kaka sii na xiꞌin taꞌan na, án síkuiꞌna na, án xáa káꞌnu na ndioxi ndíi án kánaꞌa kini na xaꞌa inka naꞌa, án na xíꞌi ku na, án na síndaꞌvi naꞌa ku na. Ndiꞌi naꞌa, na íkan saa ta ni kütaꞌan ndo xiꞌin na, ni küxi ndo xiꞌin na.

¹² Ta yeꞌe, ta süvi chiñu nuu i kua xaa nani i kuachi xiꞌin na ñuu ivi yóꞌó. Ta saa ndóꞌo̱, ndo ndíkun ichí Jesucristo ku ndo, ta kúu mií ndo ichí i ya xaa nani ndo kuachi xiꞌin na veꞌe ñuꞌu, na ítaꞌan xiꞌin ndo.

¹³ Mií Ndioxi ku ra xaa nani kuachi xiꞌin naꞌa, na köo xíni tuꞌun ra. Xaꞌa ya ñaa kua vaꞌa ka tava ndo ra ndíkaa xiꞌin ndo veꞌe ñuꞌu xaꞌa ya väꞌa kéꞌe ra.