1 Corintios 4 - Xochapa Mixteco

Chiñu ya íkan nda apóstol xíka chiñu nuu Tata yo Jesucristo

¹ Tá kivi ndíkani ini ndo xaꞌa yeꞌe xiꞌin ra Apolos, ta xíniñuꞌu ndo ndikani ini ndo ya kúu nde ndisaa moso kuiti nda xáa chiñu nuu Tata yo Jesucristo, ta ka̱na ra ndeꞌe xaꞌa ya ndáa ini ra xíni ra ndeꞌe sinaꞌa nde naꞌa xaꞌa chiñu ra ya íyo sěꞌe.

² Xa xíni yo, iin naꞌa, na ndíso chiñu xiꞌin ñaꞌa ya ta̱xi Ndioxi ndaꞌa na, ta xíniñuꞌu na kuu na naꞌa, na ndaa ini, na ndixa xáa súvi chiñu ndi̱kiꞌvi ndaꞌa na.

³ Ta yeꞌe, ni köo ndíꞌi ini i xaꞌa ya káꞌan ndo xaꞌa i ya xaa nani ndo kuachi i xiꞌin i, ni nda nuu na chiñu naꞌnu kuꞌun i tá ná kuꞌun ndo xiꞌin i, köo ndíꞌi ini i chi yeꞌe ta küvi xaa nani mií i kuachi i xaꞌa chiñu ya íkan i.

⁴ Sundi yeꞌe ta kúndaa teꞌe ini i ya köo ñaꞌa väꞌa ndi̱kan i túvi i, ta ni küvi kaꞌan tu i ya köo kuachi i, chi mií Ndioxi ku ra xíni vaꞌa xaꞌa i, ya xaa nani ra kuachi i.

⁵ Xaꞌa ya ñaa kua káꞌan i xiꞌin ndo, táxi i nuu ndo. Käꞌan kama ni ndo xaꞌa naꞌa ya xaa nani ndo kuachi xiꞌin na. Kundatun ndo nda ná xinu mií tiempo ya ndiko koo Tata yo Jesucristo, chi mií ra ku ra sindiyeꞌe ndiꞌi saa kúu. Ta saa kua ndituvi ndiꞌi ñaꞌa ya íyo sěꞌe vitin. Ta saa kua ndituvi nda ñaꞌa ya íyo sěꞌe nima naꞌa, ndá kuꞌva ku ya ndíkani ini na. Ta suvi mií tiempo ikán kua xaa kaꞌnu Ndioxi naꞌa, tá kuꞌva íyo ya i̱kan na, saa koo ya ikan ra xiꞌin na.

⁶ Ñani yo, soꞌva íyo ya ndítuꞌun i xiꞌin ndo xaꞌa ra Apolos ñani yo, xiꞌin yeꞌe. Ndítuꞌun i xiꞌin ndo chi kúni i ná sikuaꞌa vaꞌa ndo, yakan koto vaꞌa ndo ndá kuꞌva íkan nde xiꞌin ndo, ta saa ikan ndo, tá kuꞌva káꞌan tuꞌun Ndioxi, ya ta̱a na xinaꞌa káchi ya saa: “Vaꞌa ikan ndo ndisaa ya káꞌan tuꞌun Ndioxi, ta chïnuu ka ndo ya káꞌan ya”, ya ná käꞌan tái ni ndo xaꞌa iin nde, ta kundasi nuu ndo kuni ndo inka nde.

⁷ Ta ¿ndachu ndíkani ini ndo, vaꞌa ni ka mií ndo nuu inka naꞌa, túvi ndo? Ndiꞌi ñaꞌa ya kúu mií ndo ta Ndioxi ku ra ta̱xi ya ndaꞌa ndo. Süvi mií ndo ndínduku ya yakan kütai ni ini ndo xiꞌin ya.

⁸ Saa ndóꞌo̱ ndíkani ini ndo, xaa kúu mií ndo ndiꞌi ñaꞌa ya xíniñuꞌu ndo, ta xa ndu̱kuika ni ndo yakan ni köo xíniñuꞌu ka ndo ndeꞌe, túvi ndo. Ta vaꞌa ni va, tá tu xa ndu̱u ndo rey na xáꞌnda chiñu, ta nda ndeꞌe niꞌi loꞌo kaꞌnda chiñu nde xiꞌin va tu ndo.

⁹ Chi ndeꞌe xíka chiñu nuu Tata yo Jesús, ta tá íin naꞌa, na ndíkun nda sindiꞌi vaꞌa va, saa íin nde túvi yeꞌe. Chi tá íin naꞌa, na xa ndíta nuu xa kaꞌni ñaꞌa va na, saa íin nde. Xíto ni na ñuu ivi yóꞌó nuu nde xiꞌin na tatun Ndioxi, ndíkanda ni ini ndiꞌi na xíto na nuu nde, ya ndóꞌo nde saa.

¹⁰ Xaꞌa ya ndíkun nde Jesucristo, ta ni köo ndáa yaꞌvi nde nuu naꞌa, tá íin nde kíꞌvi va, saa íin nde nuu na. Ta ndóꞌo̱, ta xaꞌa ya ndíkun ndo Jesucristo ta tá íin naꞌa, na ndíchi ni va saa ndu̱u ndo. Ta ndeꞌe, ta vita ni va kúni nde ta mií ka va ndo ku ndo ndu̱ndee ni ka nuu nde, túvi ndo. Vaꞌa ni va káꞌan naꞌa xaꞌa ndo, xáa toꞌo ni na ndóꞌo̱, ta ndeꞌe, ta kúndasi nuu va na xíni na ndeꞌe.

¹¹ Ta nda kivi vitin ta ndee ni káꞌun ini nde kúni kuxi nde ta íchi tu nde tikuii va, ni köo tu toto kundixi va nde, saa xáa nduvaꞌa naꞌa xiꞌin nde, ta ni köo tu veꞌe va nde.

¹² Ta ndee ni ndee xáa chiñu nde, ndakua kúnaa nde xiꞌin chiñu. Tá távi chiꞌña na ndeꞌe, ta chíkaa nde ya vaꞌa na. Saa tá sítixuꞌvi ni na ndeꞌe, ta xáꞌa ndee ndiꞌi ini nde xaꞌa ya íkan na xiꞌin nde.

¹³ Ni tá kánaꞌa ni na xaꞌa nde, ta xiꞌin tuꞌun toꞌo ndíkuiin nde yuꞌu na. Tá íkan na xiꞌin taka ya íyo ñuu ivi yóꞌó va íkan na xiꞌin nde, tá íin ñaꞌa ya xa xáta na, saa íin nde nuu na, nda kivi vitin.

¹⁴ Ta süvi xaꞌa ya kúni i sikaꞌán i nuu ndo kua táa i tutu yóꞌó xaa ya nuu ndo. Sundi yeꞌe, ta kúni i kundaa yuꞌu i ndóꞌo̱, tá kuꞌva ndáa yuꞌu iin taa seꞌe ra, saa íkan i xiꞌin ndo xaꞌa ya kúꞌvi ni ini i xíni i ndóꞌo̱.

¹⁵ Vani nda uxi mil ná koo nda sínaꞌa ndóꞌo̱ xaꞌa Tata yo Jesucristo, sundi iindaa va ku iva ndo. Ta yeꞌe, tá káa iva ndo, saa káa i. Chi yeꞌe ku ra núnu̱ú ndi̱tuꞌun xiꞌin ndo tuꞌun vaꞌa xaꞌa Jesucristo, ta saa ndi̱kitaꞌan vaꞌa ndo xiꞌin ra.

¹⁶ Xaꞌa ya ñaa kua xíkan ni i ya mani nuu ndo, ikan ndo tá kuꞌva íkan yeꞌe.

¹⁷ Xaꞌa ya ñaa kua tíꞌvi i ra Timoteo ñani yo xaa ra nuu ndo, vaꞌa ni ítaꞌan ra xiꞌin i. Nda tá káa seꞌe i saa káa ra, kúꞌvi ni ini i xíni i ra xaꞌa ra ya ndíkun ra Tata yo Jesucristo. Ta ra ñaa ku ra ndituꞌun xiꞌin ndo, sindikaꞌán ra ini ndo ndá kuꞌva íyo i, ta kuꞌva saa sínaꞌa i naꞌa ndiꞌi ni kúu veꞌe ñuꞌu.

¹⁸ Ta sava tu ndo kútai ni ini, chi ndíkani ini ndo nda iin ichí ndïko koo ka i xaa i nuu ndo koto i ndóꞌo̱, káꞌan ndo.

¹⁹ Sundi tá Ndioxi ná kachi, ta kama ni va xaa i koto i ndóꞌo̱. Ta saa kundaa ini i xaꞌa nda taꞌan ndo, nda ndee ni kútai ini xíka sínaꞌa, tá tu ya ndixa kua nde ni íyo ndee Ndioxi xiꞌin nda, án sana xiꞌin tuꞌun mií ya kána koo xi̱ní mií va nda kua káꞌan nda.

²⁰ Saa chi köo ndáa yaꞌvi ni ya káꞌan na ivi tá ndisaa tuꞌun mií ndítuꞌun na xaꞌa nuu xáꞌnda chiñu Ndioxi, ya ndee ni ndáa yaꞌvi ku ndee Ndioxi íyo xiꞌin va na.

²¹ ¿Ta unkua kúni ndo ikan i xiꞌin ndo tá ná xaa i koto i ndóꞌo̱? ¿Án kúni ndo xaa i sitixuꞌvi i ndóꞌo̱? ¿Án vaꞌa ka xaa i koto i ndóꞌo̱ xiꞌin ya mani, ya kúꞌvi ini i xíni i ndóꞌo̱ xiꞌin ya kaꞌnu ini? Koto ndo unkua vaꞌa túvi míi va ndo.