1 Corintios 3 - Xochapa Mixteco

Káꞌan ra Pablo ya íyo ra tá káa iin moso ra xáa chiñu nuu Ndioxi xiꞌin nda taꞌan ra, nda ítaꞌan xiꞌin ra

¹ Ñani yo xiꞌin kuꞌva yo, yachi, ta yeꞌe köo ndíkuvi ndituꞌun i xiꞌin ndo tá kuꞌva ndítuꞌun i xiꞌin naꞌa, na xa xuxa tuꞌun Ndioxi ini. Yakan ndi̱kaꞌan i xiꞌin ndo tá kuꞌva káꞌan yo xiꞌin naꞌa, na ndíkani ini ndisaa xaꞌa mií, chi ndóꞌo̱ ta tá íin na lee vali va saa íin ndo, xaꞌa ya sikan ndi̱kundikun ndo ichí Tata yo Jesucristo.

² Tuꞌun ya si̱naꞌa i ndóꞌo̱, ta ya köo ndíchi kundaa ini ndo xiꞌin ku ya. Tá íyo nduta leche chíchin na vali, saa íyo ya si̱naꞌa i ndóꞌo̱, xaꞌa ya íin ndo tá íin na vali, yakan täꞌan kuchiñu ndo kuxi ndo taꞌan ñaꞌa ya xíxi na xa xuxa ini. Ya ñaa kúni kachi ya nda vitin ta täꞌan ka kuchiñu vaꞌa ndo kundaa ini ndo xiꞌin tuꞌun Ndioxi.

³ Saa chi nina ya kúni mií ndo íkan ndo. Yakan kua kǔní ini ndo xíni taꞌan ndo, ta káni taꞌan ndo xiꞌin taꞌan ndo, saa nda taꞌvi taꞌan ndo xiꞌin taꞌan ndo. Ya yóꞌó ku ya káꞌan xaꞌa ndo ya täꞌan kuaꞌnu ndo xiꞌin tuꞌun Ndioxi, chi íkan ndo tá íkan naꞌa, na ñuu ivi na köo xíni tuꞌun Ndioxi.

⁴ Saa chi sava tuku ndo káꞌan: “Yeꞌe, ta ra Pablo ku ra ndíkun i”, káchi ndo, ta sava tuku ndo káꞌan: “Yeꞌe, ta ra Apolos ku ra ndíkun i”, káchi ndo. Xaꞌa ya káꞌan vali ni ndo, ta tá íin na ñuu ivi yóꞌó va, saa íin ndo.

⁵ Ndikani vaꞌa ini ndo, ¿án chee ni yeꞌe, Pablo, túvi ndo? ¿Án ra Apolos ku ra chee ni túvi ndo? Süvi saa íyo ya. Moso va ku nde xáa chiñu nde nuu Ndioxi, ta chíndee nde ndóꞌo̱ ya ná kandixa ni ndo Ndioxi va. Íkan iin iin nde chiñu ya ta̱xi Ndioxi ndaꞌa va nde.

⁶ Yeꞌe ra, tá íkan iin ra chíꞌi, saa i̱kan i xiꞌin ndo, chi̱ꞌi i tuꞌun Ndioxi nima ndo. Ta ra Apolos ku ra káa, tá káa ra kóso tuꞌun Ndioxi nima ndo. Sundi mií Ndioxi ku ra táxi xáꞌnu ya.

⁷ Yakan kua ni köo ndáa yaꞌvi ya unku nde chíꞌi ta unku nde kóso ya. Ya ndee ni ndáa yaꞌvi ku ya íkan Ndioxi, chi mií ra ku ra táxi xáꞌnu ñaꞌa chíꞌi nde.

⁸ Ta iin káchi íyo chiñu ya íkan uvi saa nde, yeꞌe chíꞌi xiꞌin ra kóso. Sundi mií Ndioxi ku ra chaꞌvi uvi saa nde, tá kuꞌva íyo mií chiñu i̱kan iin iin nde, saa koo ya chaꞌvi ra ndeꞌe.

⁹ Chi ndeꞌe, ta iin káchi ítaꞌan nde xáa chiñu nde xiꞌin taꞌan nde nuu Ndioxi. Ta ndóꞌo̱ ku ndo íin tá íin ñuꞌú ya xáa chiñu Ndioxi xiꞌin, án tá íin veꞌe ya síkuaꞌa Ndioxi, saa íin ndo nuu ra.

¹⁰ Ta yeꞌe, Ndioxi ku ra i̱kan ya mani xiꞌin i ta̱xi ra ichí ndaꞌa i ya koo i tá káa iin ra xíni, ra ndíso chiñu síkuaꞌa veꞌe, saa káa i, táva i yu̱ú xaꞌa ya, ta inka ku nda síkuaꞌa ya. Ta nda síkuaꞌa veꞌe nuu ta̱va i yu̱ú xaꞌa, ta ndee ni xíniñuꞌu nda kiꞌin vaꞌa nda kuenta ndá kuꞌva síkuaꞌa nda ya.

¹¹ Saa chi nda iin ka naꞌa küvi chinduꞌu inka xaꞌa veꞌe nuu xa ta̱va i yu̱ú xaꞌa ya. Chi yu̱ú xaꞌa ya ta̱va i ku Jesucristo.

¹² Ta sava naꞌa, na síkuaꞌa veꞌe ikán xíniñuꞌu na kàà ya oro, sava tu na xíniñu kàà ya plata, sava tuku na xíniñuꞌu yu̱ú ya luvi ni, sava na xíniñuꞌu itun, sava na xíniñuꞌu ita leko, saa tu sava na xíniñuꞌu itun tioo va.

¹³ Sundi tá ná tindaa kivi ya ndiꞌi xaꞌa ñuu ivi yóꞌó, ta saa kua ndituvi teꞌe ndiꞌi ya xaꞌa chiñu ya i̱kan iin iin naꞌa. Ta ndee ni koko ñu̱ꞌu̱, ta xiꞌin ya ikán kua kuchiñu koto ndoso Ndioxi chiñu iin iin na ndá kuꞌva vaꞌa xa̱a chiñu na.

¹⁴ Tá tu vaꞌa ni si̱kuaꞌa na veꞌe xiꞌin ñaꞌa ya köo ndíꞌi xaꞌa xiꞌin ñu̱ꞌu̱, ta kuꞌva saa kiꞌin na yaꞌvi na.

¹⁵ Sundi tá sava na si̱kuaꞌa veꞌe xiꞌin ñaꞌa ya xíxi, ta ndiꞌi xaꞌa chiñu na, ya uun va ku ya xa̱a chiñu na. Vani kuchiñu mií na kaku na nuu ñu̱ꞌu̱, tá ndóꞌo naꞌa, na siloꞌo koko xiꞌin ñu̱ꞌu̱, saa kundoꞌo na.

¹⁶ Ta saa ndóꞌo̱, ¿án köo kúndaa ini ndo ya íin ndo tá káa veꞌe ñuꞌu Ndioxi, ta íyo tu Tachi I̱í ra xiꞌin va ndo?

¹⁷ Tá ndá ka naꞌa síndiꞌi xaꞌa naꞌa, na kúu veꞌe ñuꞌu Ndioxi, ta saa sindiꞌi xaꞌa tu Ndioxi va na. Saa chi veꞌe ñuꞌu Ndioxi, ta ya i̱í ku ya, ta saa ndóꞌo̱, ndo i̱í ku ndo.

¹⁸ Sïndaꞌvi ndo mií ndo. Tá ndá ndóꞌo̱ ndíkani ini ya ndíchi ni ndo, chi xíni ni ndo xiꞌin ya ndíchi íyo ñuu ivi yóꞌó túvi ndo, ta vaꞌa xíniñuꞌu ndo ndasa ndo mií ndo tá kuꞌva íin naꞌa, na köo xíni, ta saa kua ndixa nduu ndo naꞌa, na ndee ni ndíchi.

¹⁹ Saa chi ñaꞌa ya ndee ni ndíchi nuu na ñuu ivi yóꞌó, tá káa iin ya kíꞌvi saa káa ya nuu Ndioxi. Saa káꞌan tuꞌun Ndioxi ya ta̱a na xinaꞌa, káchi ya soꞌva: “Na ndíchi ni túvi na, ta xiꞌin ya ndíchi kúu mií na kua koyo na ikán Ndioxi”, káchi ya.

²⁰ Saa káꞌan ka tuꞌun Ndioxi, káchi ya saa: “Tata Iva yo Ndioxi xíni vaꞌa va ra ya ndíkani ini na ndíchi, ta ni köo ndáa yaꞌvi ya ndíkani ini na nuu ra”, káchi tuꞌun Ndioxi.

²¹ Xaꞌa ya ñaa kua, kütai ini ndo xaꞌa ya ndíkun ndo ndá ka taa, chi nda taa taꞌan mií ndo ku nda, ta saa tu ndeꞌe, xaꞌa mií va ndo xáa chiñu nde, ya chindee taꞌan nde xiꞌin ndo.

²² Tá kúu yeꞌe Pablo xiꞌin ra Apolos, xiꞌin ra Pedro tin ñuu ivi yóꞌó, saa tu ya táku yo, xiꞌin ya xáꞌni yoo, saa tu tiempo ya ndóo yo vitin, xiꞌin ya kuu tiempo ya vaxi. Ndiꞌi ya yóꞌó ta xaꞌa mií ndo íyo ndiꞌi ya.

²³ Ta saa íyo tu ndóꞌo̱ va, kuenta Jesucristo ku ndo, ta mií Jesucristo ku kuenta Ndioxi.