1 Corintios 16 - Xochapa Mixteco

Xuꞌun ya ndíkaya na kuaꞌan ndaꞌa na kándixa Jesús ndóo ñuu Jerusalén

¹ Ta vitin kúni i ndituꞌun i xiꞌin ndo xaꞌa xuꞌun ya ndíkaya nde kuaꞌan ndaꞌa na ndaꞌvi kándixa Jesús ndóo ñuu Jerusalén. Ta vaꞌa ikan ndo tá kuꞌva íkan na veꞌe ñuꞌu ndóo estado Galacia, chi na ikán tá kuꞌva ndi̱kaꞌan i xiꞌin na saa íyo ya íkan na.

² Ta kivi núnu̱ú xaꞌa semana ta vaꞌa tava síin iin iin ndo loꞌo xuꞌun tañu ya kíꞌin ndo xáa chiñu ndo, tá kuꞌva síkaꞌán mií Ndioxi ini iin iin ndo chindee ndo na, kuꞌva saa koo ya taxi ndo, ta ná koo tuꞌva ya tá ná xaa i ta ndïkaya ka ndo ya.

³ Tá ná xaa i koto i ndóꞌo̱, saa tiꞌvi i naꞌa, na ndikaxin mií ndo kundiso xuꞌun ñaa kuꞌun xiꞌin na ndaka na ya ñuu Jerusalén. Ta kuaꞌa tutu ya ndíkuiin xaꞌa na kuꞌun ndaka xuꞌun ñaa.

⁴ Tá kúni ndo kuꞌun i xiꞌin na, ta vaꞌa kuꞌun na xiꞌin i.

Ndíkani ini ra Pablo kuꞌun ra koto ra naꞌa, na ndoo ñuu Corinto

⁵ Ndíkani ini i kuꞌun i koto i ndóꞌo̱ ñuu Corinto, ta xiꞌna chí estado Macedonia yaꞌa i saa xaa i nuu ndo.

⁶ Tá tu vaꞌa ta kuachi loꞌo i xiꞌin ndo uvi ndaa kivi án sana koo i xiꞌin ndo nda ná tindaa yoo vixin. Ta saa kuchiñu chindee loꞌo ndo yeꞌe xiꞌin ñaꞌa ya xíniñuꞌu nuu i ya kuchiñu kuꞌun i ndá ka nuu xíniñuꞌu i kuꞌun i.

⁷ Ta köo kúni i yaꞌa xaa i nuu ndo vitin, yakan tá ná kunaꞌa i saa xaa i koto i ndóꞌo̱, chi kúni i kuachi loꞌo i xiꞌin ndo, tá Ndioxi ná kachi.

⁸ Sundi vitin ta ndoo i koo i ñuu Éfeso yóꞌó nda ná tindaa kivi kana viko Pentecostés.

⁹ Saa chi vaꞌa ni va ndi̱xuna yeꞌe nuu i, ya kaꞌan ndoso i tuꞌun vaꞌa xaꞌa Jesucristo xiꞌin naꞌa ya kuchiñu na kaku na, vani íyo kuaꞌa ni naꞌa, na sáa ni ini xíni yeꞌe.

¹⁰ Tá ná xaa ra Timoteo ñani yo nuu ndo, ta vaꞌa ndikiꞌin vií ni ndo ra, saa kusini ra koo ra xiꞌin ndo. Saa chi ra ikán, ta tá xáa chiñu yeꞌe nuu Iva yo Ndioxi, saa xáa chiñu ra.

¹¹ Xaꞌa ya ñaa kua kündasi nuu nda iin ndo kuni ndo ra, vívií koo ndo xiꞌin ra, chindee taꞌan ndo xiꞌin ra ná ndiko koo ra xiꞌin ya vaꞌa nuu íyo i. Saa chi yeꞌe xiꞌin nda ñani yo, nda íyo xiꞌin i, ndátun nde ra ndiko koo ra.

¹² Ta ra ñani yo, ra Apolos, ta ndi̱kaꞌan ni i xiꞌin ra xaa ra xiꞌin nda ñani yo koto nda ndóꞌo̱, sundi köo ndi̱kuvi xaa ra nuu ndo vitin, ná koto ra saa xaa ra nuu ndo nda inka ichí.

Tuꞌun sindiꞌi káꞌan ra Pablo xiꞌin na ndíkun Jesús ndóo ñuu Corinto

¹³ Ñani yo xiꞌin kuꞌva yo, kuenta ni koo ndo, ta ndinuꞌu ni ini ndo kandixa ndo Tata yo Jesucristo. Kuu ïꞌvi ndo, ndaku koo nima ndo, ta tuun ni kundikun ndo Tata yo.

¹⁴ Ndiꞌi chiñu íkan ndo, ta ndinuꞌu ni ini ndo ikan ndo ya xiꞌin taꞌan ndo, xaꞌa ya kúꞌvi ni ini ndo xíni taꞌan ndo.

¹⁵ Ñani yo, xa kúndaa vaꞌa ini ndo xaꞌa na veꞌe ra ñani yo, ra Estéfanas, na ndóo chí estado Acaya. Na ikán ku na núnu̱ú xa̱á ndíkun Tata yo, ta xa̱á na xáa chiñu ni na chíndee taꞌan ni na xiꞌin ñani yo na ndíkun Tata yo Jesucristo.

¹⁶ Yakan xíkan ni i ya mani nuu ndo ya xaa súvi ni ndo ya káꞌan naꞌa, na íin tá íin na ñaa. Ta saa ikan ndo xiꞌin ndiꞌi naꞌa, na ndee ni ndee xáa chiñu nuu Tata yo.

¹⁷ Ta kúsini ni i xa̱a ra ñani yo, ra Estéfanas xiꞌin ra Fortunato tin ra Acaico, xa̱a nda koto nda yeꞌe. Tá íin ndóꞌo̱, saa íin nda yóꞌó xa̱a nda nuu i. Ta ndóꞌo̱ vani kúni ndo kixi ndo koto ndo yeꞌe, ta köo kúchiñu ndo kixi ndo.

¹⁸ Ta nda yóꞌó ta xáꞌa ni nda ndee xiꞌin i, saa íkan tu nda xiꞌin ndóꞌo̱ va. Yakan kañuꞌu ni ndo naꞌa, na íin tá íin nda yóꞌó.

¹⁹ Tíꞌvi ni na ñani yo, na veꞌe ñuꞌu, ya ndóꞌni chí estado Asia yóꞌó, tuꞌun mani xaa nuu ndo, saa tu ra Aquila, ñani yo, xiꞌin yá síꞌi ra, yá Priscila, saa tu na ñani yo, na ndíkitaꞌan veꞌe va na, tíꞌvi ni na tuꞌun mani xaa ya nuu ndo, xaꞌa ya iin káchi kándixa ndo Tata yo Jesucristo.

²⁰ Ndiꞌi na ñani yo tíꞌvi ni na tuꞌun mani xaa nuu ndo. Ta vaꞌa kaꞌan ndioxi ni ndo xiꞌin na taꞌan ndo, xiꞌin ya toꞌo.

²¹ Mií yeꞌe, Pablo, ku ra tíꞌvi tuꞌun mani yóꞌó xaa nuu ndo, ta xiꞌin ndaꞌa mií i táa i ya.

²² Tá ndá naꞌa köo kúꞌvi ini xíni Tata yo Jesucristo, ta vaꞌa ná nduu na, naꞌa na íyo chiꞌña xiꞌin. Chi xa kama ni va ndiko koo Tata yo Jesucristo.

²³ Ta mií Tata yo Jesucristo ná chikaa ni ya vaꞌa ndóꞌo̱.

²⁴ Ta ndee ni kúꞌvi ini i xíni i ndiꞌi ndo xaꞌa ya ndíkun ndo Tata yo Jesucristo. Saa ná koo.