1 Corintios 15 - Xochapa Mixteco

Vaxi kivi ta sitaku Ndioxi ndiꞌi na ndíi, na xa ndi̱xiꞌi

¹ Ñani yo tin kuꞌva yo, kúni i ná ndikaꞌán ini ndo xaꞌa tuꞌun vaꞌa xaꞌa Tata yo Jesucristo ya xa ndi̱kaꞌan ndoso i xiꞌin ndo. Ta ya yóꞌó ku ya xa ku̱ndaa ini ndo xaꞌa ta nda vitin tuun ni kándixa ndo ya.

² Tuꞌun ya ndi̱kaꞌan i xiꞌin ndo ku ya síkaku ndóꞌo̱, tá tu ndinuꞌu ni ini ndo kándixa ndo ya xa ndi̱kaꞌan i xiꞌin ndo, tá tu köo ndi̱chikaa uvi ini ndo xiꞌin ya xa xi̱ni soꞌo ndo ndi̱kaꞌan i.

³ Ta vaꞌa chi tuꞌun ya núnu̱ú xa si̱naꞌa i ndóꞌo̱ kua si̱naꞌa mií Tata yo Jesucristo yeꞌe, ta ndee ni ndáa yaꞌvi ya káꞌan i xiꞌin ndo, chi xaꞌa kuachi yoo kua ndi̱xiꞌi Tata yo Jesucristo, tá kuꞌva káꞌan mií tuꞌun Ndioxi ya ta̱a na xinaꞌa.

⁴ Ta si̱nduxin na ra, saa ndi̱taku ra kivi uni, tá kuꞌva káꞌan tuꞌun Ndioxi xaꞌa ra ya ta̱a na xinaꞌa, saa ndo̱ꞌo ra.

⁵ Ta xiꞌna nuu ra Pedro ndi̱tuvi ra, saa ndi̱tuvi ra nuu uxi uvi saa nda xi̱taꞌan xiꞌin ra.

⁶ Tá sindiꞌi, saa ndi̱tuvi tu ra nuu nda ñani yo, nda xi̱taꞌan xiꞌin ra, yáꞌa ka uꞌun ciento ku nda ndi̱tuvi ra nuu. Ta sava nda ikán ta táku ka nda vitin, sava nda ta xa ndi̱xiꞌi va nda.

⁷ Ta si̱ndiꞌi saa ndi̱tuvi ra nuu ra Jacobo, saa ndi̱tuvi tu ra nuu ndiꞌi nda apóstol xáa chiñu nuu va ra.

⁸ Tá ndi̱ꞌi ndi̱tuvi ra nuu ndiꞌi na, ta nda si̱ndiꞌi, saa ndi̱tuvi tu ra nuu yeꞌe va. Yakan yeꞌe, tá íyo na vali, na ndi̱yaꞌa kivi ka̱ku saa va ndi̱xiyo i.

⁹ Chi yeꞌe, ta ra ni̱nu̱ ni kuu i nuu ndiꞌi nda taꞌan i, ni köo ichí i kaꞌan naꞌa xiꞌin i apóstol, saa chi ra xa̱a ndu̱vaꞌa ni xiꞌin naꞌa, na kúu veꞌe ñuꞌu Ndioxi, ndi̱xiyo i.

¹⁰ Ta xaꞌa ya vaꞌa ni Ndioxi xiꞌin i kua kúu i apóstol tá kuꞌva íyo i vitin, saa ni xaꞌa ya vaꞌa ni ra xiꞌin i kua chíndee ra yeꞌe vaꞌa xáa súvi i chiñu nuu ra. Ta yeꞌe, ndee ni ka xáa chiñu i nuu tá kúu ndiꞌi nda taꞌan i, nda xáa chiñu nuu ra. Ta süvi xiꞌin ndee mií i kua xáa chiñu i, chi mií Ndioxi va ku ra chíndee taꞌan xiꞌin i xáa súvi i ya xaꞌa ya kúndaꞌvi ni ini ra xíni ra yeꞌe.

¹¹ Ta saa ni, án yeꞌe ku i káꞌan ndoso xiꞌin ndo, án nda taꞌan i xáa chiñu nuu Tata yo ku nda káꞌan ndoso xiꞌin ndo, ta vaꞌa chi iin káchi káꞌan ndoso ndiꞌi vaꞌa nde xaꞌa tuꞌun vaꞌa ya síkaku naꞌa, ta ya yóꞌó kua ndíkundikun ndiꞌi va ndo.

¹² Ta ndeꞌe káꞌan ndoso nde xaꞌa Tata yo Jesucristo ya ndi̱taku ra, ta ¿ndachu káꞌan sava ndóꞌo̱ xaꞌa naꞌa, na xíꞌi, ya köo ndítaku ka na, káchi ndo?

¹³ Chi tá tu köo ndítaku na ndíi, tá kuꞌva káꞌan ndóꞌo̱ ta ni Tata yo Jesucristo ta ndïtaku vi ra, ndíkuu.

¹⁴ Tá tu köo ndítaku Tata yo Jesucristo, ndikuu, ta ni tuꞌun ya káꞌan ndoso ndeꞌe xiꞌin ndo, ta ni köo ndáa yaꞌvi mií ya ndíkuu, ta ni ya kándixa ndo ra ta köo ndáa yaꞌvi ya, ndíkuu.

¹⁵ Chi tá tu süvi ya ndixa kua ndítaku na ndíi, ta nda ndeꞌe, tá íin nde vata va saa íin nde nuu ndo, chi síndaꞌvi nde ndóꞌo̱ ta köo káꞌan teꞌe nde xaꞌa Ndioxi xiꞌin ndo ya si̱taku ra Tata yo Jesucristo, ta ni süvi ya ndaa kua ndi̱sitaku ñaꞌa ra, ndíkuu.

¹⁶ Saa chi tá tu ya ndixa kua köo ndítaku na ndíi, ta ni Tata yo Jesucristo ta ndïtaku vi ra, ndíkuu.

¹⁷ Chi tá tu köo ndi̱taku Tata yo Jesucristo, ta ya mani uun va kua kándixa ndo ra, ta nda vitin ta íyo yaa va kuachi ndo nuu ra, ndíkuu.

¹⁸ Ni naꞌa, na ka̱ndixa ñaꞌa, na xa ndi̱xiꞌi ta xa saa íyo yaa tu kuachi na ikán va, ta xa ndi̱ꞌi xaꞌa va na, ndíkuu.

¹⁹ Tá tu ndisaa ya táku yo ñuu ivi yóꞌó va kua ndáa yaꞌvi ni ya kándixa yo Tata yo Jesucristo, ta nda loꞌo köo ndátun yo ya nditaku yo xiꞌin Ndioxi nuu ndivi, ta ndáꞌvi ni ka va yoo nuu ndiꞌi ni kuu naꞌa, ndíkuu.

²⁰ Sundi vaꞌa ná kundaa ini ndo, chi ya ndaa ni ndixa kua ndi̱taku Tata yo Jesucristo tañu na ndíi. Chi ra ikán ta tá káa ñaꞌa ya núnu̱ú ya síkee naꞌa nuu chíꞌi na, saa káa ra xaꞌa ya kúu ra ra núnu̱ú ndi̱taku tañu ndiꞌi na ndíi, na xa ndi̱xiꞌi.

²¹ Saa chi xaꞌa ñaꞌa i̱kan iin taa kua ndi̱kiꞌvi ndee ya xáꞌni naꞌa ñuu ivi yóꞌó, ta saa tu xaꞌa ñaꞌa ya i̱kan inka taa kua ndi̱niꞌi naꞌa ya nditaku na tañu na ndíi.

²² Saa chi xaꞌa ya väꞌa i̱kan ra Adán kua xa̱á xíꞌi ndiꞌi naꞌa, na kúu seꞌe sikua ra, ta xaꞌa ya vaꞌa i̱kan Cristo kua ndi̱niꞌi ndiꞌi naꞌa, na kúu kuenta ra ya kutaku na xiꞌin ra.

²³ Ta vívií koo ndiꞌi ñaꞌa tá íyo ya chi̱tuni mií Ndioxi saa koo ya. Ra núnuu ndi̱taku ku Tata yo Jesucristo, tá ná ndiko koo ra, saa nditaku naꞌa, na xi̱ndikun ñaꞌa.

²⁴ Tá si̱ndiꞌi si̱taku ra naꞌa ikán, saa sindiꞌi xaꞌa ra ndiꞌi ndee ya xáꞌnda chiñu nuu na ñuu ivi yóꞌó, xiꞌin ndiꞌi ndee ya kúu mií na kúnaꞌnu xáꞌnda chiñu, xiꞌin ndiꞌi ñaꞌa ya xáꞌnda chiñu nuu ndivi. Saa nditaxi ra ichí ya kúu mií ra ndaꞌa Iva yo Ndioxi.

²⁵ Saa koo chi xíniñuꞌu Jesucristo ndikunduꞌu ra kaꞌnda chiñu ra nuu naꞌa, xiꞌin ndiꞌi nuu ñaꞌa ya ndi̱kuaꞌa, ta kuchiñu ra nuu ndiꞌi ndee ya sáa ini xíni ra, ta̱an ra ya tixin xaꞌa ra.

²⁶ Saa sindiꞌi xaꞌa tu ra ya xáꞌni ndìì, ya sáa ini xíni yoo, nda nuu sindiꞌi kua ikan ra saa, sindiꞌi xaꞌa ra ya ikán.

²⁷ Tá káchi tuꞌun Ndioxi ya ta̱a na xinaꞌa, káchi ya saa: “Ndiꞌi ni kúu ñaꞌa, ta mií Jesucristo ku ra ndi̱kuiso chiñu xiꞌin ndiꞌi ya”. Xaꞌa ya káꞌan tuꞌun Ndioxi saa, ta köo kúni kachi ya nda mií Ndioxi ku ra ndi̱kuiso chiñu Jesucristo xiꞌin, chi mií va Ndioxi ku ra ta̱xi ndee ndaꞌa Jesucristo ndi̱kuiso chiñu ra xiꞌin ndiꞌi ni kúu ñaꞌa.

²⁸ Tá xa ku̱chiñu ra nuu tá kúu ndiꞌi ñaꞌa, ta ya kúu ra Seꞌe Ndioxi, ta nditaxi ndiꞌi ra mií ra ndaꞌa Iva yo Ndioxi, chi mií Iva yo ku ra ta̱xi ndee ndaꞌa ra, ta vitin nditaxi yaa ra ya ndaꞌa Iva yo ya ná kaꞌnda chiñu ra nuu tá kúu ndiꞌi ni kúu ñaꞌa.

²⁹ Tá tu saa va íyo ya, ta unkua ikan naꞌa, na chíchi nuu ndíkiꞌin na nuu na taꞌan na, na xa ndi̱xiꞌi. Chi ndíkani ini na saa kua kuchiñu na chindee ñaꞌa na, káꞌán na. Tá tu köo ndítaku na xa ndi̱xiꞌi, ta ¿ndá xaꞌa kua chíchi na ikán xaꞌa na taꞌan na?

³⁰ ¿Tá tu ndïtaku yo tá ná kuvi yo, ndikuu, ta ndá xaꞌa kua xáꞌni ndeꞌe mií nde xíka nde káꞌan ndoso nde tuꞌun vaꞌa xaꞌa Jesucristo xiꞌin naꞌa, nda ìyo kuvi nde xíka nde?

³¹ Ta ya ndixa kua káꞌan i xiꞌin ndo ñani yo, kuꞌva yo, iin iin kivi táku i xíka i, ta ìyo ka vi kuvi i xíka i. Ta ya ndaa ni va ku ya káꞌan i xiꞌin ndo, saa kútai ni ini i xíni i ndóꞌo̱ xaꞌa ya kándixa ndo Tata yo Jesucristo.

³² Ná ndituꞌun i xiꞌin ndo chi yeꞌe ta ndee ni ti̱xuꞌvi i ñuu Éfeso yóꞌó, ka̱nitaꞌan ni naꞌa xiꞌin i. Tá íyo kiti kueꞌe íyo iku saa íin naꞌa, na ka̱nitaꞌan xiꞌin i. Ta ni köo ndáa yaꞌvi vi ya kanitaꞌan i xiꞌin na tá tu ya ndixa kua köo ndítaku na ndíi. Ta án vaꞌa ka ikan yo tá káchi sava naꞌa káꞌan na: “Vaꞌa ná koꞌo yo ta ná kuxi va yo, saa chi taan isa ta kuvi va yo”, káchi na. Ta süvi saa íyo ya, chi ya ndixa va kua ndítaku na ndíi.

³³ Ta ndóꞌo̱, ¡täxi ndo sindaꞌvi naꞌa ndóꞌo̱! Tá káchi na káꞌan: “Tá ítaꞌan vaꞌa ni yo xiꞌin naꞌa, na íkan ya väꞌa, ta ìyo ni sixinu na ini yo ikan yo ya väꞌa, tá kuꞌva íkan mií na”.

³⁴ Ndikani vaꞌa ini ndo xaꞌa ñaꞌa íkan ndo, ta ndiko koo ini ndo xaꞌa ya väꞌa íkan ndo, saa ndikundikun ndo ichí vaꞌa. Saa chi sava ndo, vani xa ndíkun va ndo ichí Ndioxi, sundi täꞌan kuni taꞌan ndo xiꞌin ra. Xaꞌa ya ñaa kua káꞌan i xiꞌin ndo ya ná kukaꞌan nuu ndo. Ndá kuꞌva kua koo ikin kuñu yo tá ná nditaku yo

³⁵ Án sana íyo sava ndo káꞌan xiꞌin nde, káchi ndo saa: “¿Án ya ndixa kua ndítaku na ndíi? Ta ¿ndá kuꞌva koo ikin kuñu na tá ná nditaku na?” káchi ndo xiꞌin nde.

³⁶ ¡Ta ya káꞌan ndo saa ta väꞌa vi íyo ya káꞌan ndo, chi xa xíni mií va ndo ndá kuꞌva ndóꞌo siꞌva tàtà chíꞌi yo! ¿Án süvi xiꞌna chíꞌi yo ri, ta táꞌi ri tixin ñuꞌú, saa ndúta tuku ri?

³⁷ Ta tàtà chíꞌi yo ta köo iin káchi íin ri xiꞌin mií itun trigo tá ndúta ya, chi täꞌan kuaꞌnu ya koo ya tá kuꞌva xíniñuꞌu ya koo ya. Tá ná kuaꞌnu ya, saa kua kúndaa ini yo xiꞌin ya ndá kuꞌva koo ya. Ndiꞌi nuu siꞌva, ta saa ndóꞌo ndiꞌi va ri.

³⁸ Saa chi̱nduꞌu Ndioxi ya ndiꞌi siꞌva tàtà chíꞌi yo ta kuaꞌa ni nuu ku ri, tá kuꞌva kúni mií ra ikan ra xiꞌin iin iin nuu siꞌva ikán, saa íkan ra xiꞌin ri.

³⁹ Süvi iin káchi íyo ndiꞌi ikin kuñu yo. Xaa síin íin ikin kuñu yo ivi yóꞌó, ta xa síin íin tu ikin kuñu kiti va, saa tu kiti sàà, ta saa tu kiti tiaka va. Xa síin íin tu ri ikán va.

⁴⁰ Saa íyo kuaꞌa ni tu nuu ñaꞌa nuu ndivi va, saa tu ñuu ivi yóꞌó va, kuaꞌa ni nuu ku ikin kuñu íyo, ta xa síin íyo iin iin nuu ndiꞌi ya. Sundi ñaꞌa ya íyo nuu ndivi ta ndee ni luvi íin ya, ta xa síin va tu luvi ni íin ñaꞌa ya íyo ñuu ivi yóꞌó.

⁴¹ Tá kúu ñu̱ꞌù ta xa síin ndíyeꞌe ya ikán, luvi ni va ndíyeꞌe ya, saa tu kiti yo̱ó va, xa síin ndíyeꞌe tu ri ikán va. Saa tu kiti kimi va, xa síin xa síin ndíyeꞌe tu iin iin rí ikán va.

⁴² Yakan saa tu ikin kuñu na ndíi va: chi tá ndi̱xiꞌi yo sínduxi na ikin kuñu yo tixin ñuꞌú, táꞌi ya. Sundi tá ná nditaku yo ta nda iin ka kivi ndïꞌi xaꞌa ikin kuñu yo.

⁴³ Chi ikin kuñu ya ndúxin ta ni köo ka saví kúu mií ya, sundi tá ná nditaku ikin kuñu yo ta ndee ni luvi nduu ya. Vita ni kúni ya tá sínduxin na ya, ta ná nditaku ya ta ndee ni ndee nduu ya.

⁴⁴ Ikin kuñu yo, ya ndúxin ta ya ñuu ivi yóꞌó ku ya, sundi tá ná nditaku yo ta taꞌan ikin kuñu ya íyo nuu ndivi nduu ya. Saa chi tá íyo ikin kuñu ya kúu mií yo ñuu ivi yóꞌó, ta saa tu nuu ndivi va kuu mií yo inka ikin kuñu yo.

⁴⁵ Tá káchi mií tuꞌun Ndioxi ya ta̱a na xinaꞌa: “Taa ra núnu̱ú xi̱nani Adán ku ra ta̱xi Ndioxi xi̱taku”, káchi ya. Sundi Cristo, ra káa tá káa ra Adán, ra ki̱xi si̱ndiꞌi, ra ke̱e nuu ndivi, ta táxi ra kutaku ya vaꞌa yo.

⁴⁶ Xaꞌa ya ñaa kua kúndaa ini yo süvi xiꞌna ra íyo ndivi ku ra ki̱xi ñuu ivi yóꞌó, chi xiꞌna ra ivi yóꞌó va ku ra ki̱xi, ta si̱ndiꞌi saa ki̱xi ra íyo ndivi.

⁴⁷ Chi taa ra núnu̱ú, ta xiꞌin ñuꞌú ndi̱kuaꞌa ra, ta ra ivi yóꞌó ku ra, sundi taa ra uvi, ra ku Tata yo Jesucristo, ta ra ke̱e nuu ndivi ku ra ikán.

⁴⁸ Ta saa ndiꞌi yo ndóo ñuu ivi yóꞌó, tá káa ikin kuñu taa ra núnu̱ú, ra ndi̱kuaꞌa xiꞌin ñuꞌú, saa íin ikin kuñu yo. Sundi yo koo nuu ndivi, ta tá káa ikin kuñu Tata yo Jesucristo, ra íyo nuu ndivi, saa koo ikin kuñu yo.

⁴⁹ Ta vitin kúu mií yo ikin kuñu yo tá ndi̱xiyo ikin kuñu taa ra núnu̱ú, ra ndi̱kuaꞌa xiꞌin ñuꞌú. Sundi sindiꞌi kuu mií yo ikin kuñu yo taꞌan ikin kuñu taa ra ke̱e nuu ndivi.

⁵⁰ Vaꞌa ná kundaa ini ndo ñani yo: Chi nda iin yo ta küchiñu yo koo yo xiꞌin Ndioxi nuu xáꞌnda chiñu ra, tá ná kuu mií yo ikin kuñu yo taꞌan ya kúu mií yo táku yo ñuu ivi yóꞌó vitin. Chi ñaꞌa ya táꞌi ta küchiñu ya koo ya xiꞌin ñaꞌa ya nda loꞌo köo táꞌi.

⁵¹ Sundi yeꞌe, ta kúni i ná kundaa ini ndo xaꞌa ñaꞌa ya chi̱tuni mií Ndioxi íyo sěꞌe: Süvi ndiꞌi yo kuvi. Sundi kivi ikán ta iin káchi ndisama ndiꞌi ra ikin kuñu iin iin yo, ndisama ra ya nduu ya ikin kuñu xa̱á.

⁵² Iin kuu soꞌva tá ná kuu saa, tá íkan yo tá ndíkuani yo saa kuu nuu nduxaa yo. Ta saa kua kuni soꞌo yo ndaꞌi itun trompeta, itun ndaꞌi sindiꞌi, ta ndee ni ndee ndaꞌi nu ikán, saa nditaku ndiꞌi naꞌa, na xa ndi̱xiꞌi, ta küvi ka na, chi küu ka mií na ikin kuñu na táꞌan ya táꞌi, ta iin nduxaa ikin kuñu ndiꞌi yo.

⁵³ Ta ikin kuñu yo ya kúu mií yo ñuu ivi yóꞌó ta ya táꞌi ku ya, ya ndíꞌi xaꞌa ku ya, ta xíniñuꞌu ya ndu xa̱á ya, nduu ya tá íin toto xa̱á ndíkundixi naꞌa, saa nduu ya, ta nda iin ichí täꞌi ka ya, ni ndïꞌi ka xaꞌa ya.

⁵⁴ Yakan tá ná kuu saa xiꞌin ikin kuñu yo ya ndíꞌi xaꞌa, ta saa kua xinu tuꞌun Ndioxi ya ta̱a na xinaꞌa, káchi ya saa: “Xa ndi̱ꞌi xaꞌa ndee ya xáꞌni naꞌa, chi Ndioxi ta ku̱ndee ra nuu ndee ikán.

⁵⁵ Yóꞌo̱, ndìì ya xáꞌni naꞌa, ¿míí chí kuaꞌan ndee un ya xáꞌni un naꞌa? Köo ka ndee kúu míí un ya kaꞌni ka un naꞌa”, káchi tuꞌun Ndioxi.

⁵⁶ Ta kuachi íkan yo kua ta̱xi ndee ndaꞌa ndìì, ya kaꞌni ya yoo. Ta saa tu ley ra Moisés ya ndi̱ndoo ndaꞌa yo, ta̱xi ya ndee ndaꞌa kuachi yo ya kaꞌni ya yoo.

⁵⁷ ¡Sundi ndixaꞌvi ni Ndioxi chi ku̱chiñu yo nuu kuachi ya xáꞌni yoo xaꞌa ya i̱kan Tata yo Jesucristo!

⁵⁸ Ñani mani, xaꞌa ya ñaa kua xíniñuꞌu ndo ndee ni ndee kundikun ndo ichí Ndioxi, xaꞌa ni ndo ndee ta ndïko koo ini ndo ya íkan ndo saa, iin tuun saa chikaa ini ndo xaa chiñu ni ndo xaꞌa Tata yo, saa chi chiñu íkan ndo nuu ra, ta süvi ya uun ku ya.