1 Corintios 14 - Xochapa Mixteco

Xíniñuꞌu ni yo nduku yo ya kaꞌan ndoso yo tuꞌun yuꞌu Ndioxi

¹ Chikaa ni ndo ndee ya kuꞌvi ni ini ndo kuni taꞌan ndo. Ta saa kaꞌan ni ndo xiꞌin Ndioxi ná taxi ra ya vaꞌa, ya ke̱e nuu ndivi ndaꞌa ndo, ta ya ndee ni ka ku ya kaꞌan ndoso ndo tuꞌun yuꞌu Ndioxi ya táxi ra ndaꞌa ndo kaꞌan ndo.

² Saa chi ndiꞌi naꞌa, na káꞌan tuꞌun ya köo kúndaa ini na xiꞌin, ta köo káꞌan na xiꞌin na ivi yóꞌó, xiꞌin Ndioxi va káꞌan na, chi nda iin naꞌa kündaa ini xiꞌin tuꞌun ya káꞌan na. Tuꞌun ya íyo sěꞌe ku ya táxi Tachi I̱í Ndioxi ndaꞌa na kaꞌan na.

³ Sundi naꞌa, na káꞌan ndoso tuꞌun yuꞌu Ndioxi ta káꞌan na saa xiꞌin taꞌan na ya táxi na ndee ndaꞌa taꞌan na ya ná kuaꞌnu ka na xiꞌin tuꞌun Ndioxi, saa síndiko na ini taꞌan na.

⁴ Ta na ivi, na táxi Ndioxi kaꞌan tuꞌun vaꞌa ikán ya köo kúndaa ini na xiꞌin ya ke̱e nuu ndivi, tá káꞌan na tuꞌun ikán ta xáꞌa ni ya ndee xiꞌin mií na. Sundi naꞌa, na káꞌan ndoso tuꞌun yuꞌu Ndioxi, tá káꞌan ndoso na tuꞌun ra ta xáꞌa ni na ikán ndee xiꞌin ndiꞌi na veꞌe ñuꞌu ya ná kuaꞌnu ka na xiꞌin tuꞌun Ndioxi.

⁵ Chi yeꞌe, ta kúni ni i ya ná kaꞌan ndiꞌi ndo inka nuu tuꞌun ya köo kúndaa ini ndo xiꞌin ya ke̱e nuu ndivi. Sundi ya kúni ni ka i kua ná kuchiñu ndiꞌi ndo kaꞌan ndoso ndo tuꞌun yuꞌu Ndioxi. Saa chi naꞌa, na káꞌan ndoso ta ndee ni ka ndáa yaꞌvi ya íkan na ikán nuu naꞌa, na káꞌan tuꞌun ya köo xíni na. Vaꞌa va kaꞌan na tá tu íyo inka naꞌa, na síndiko koo tuꞌun ya káꞌan na, tá tu ná ikan na saa, ta saa kua vaꞌa xaꞌa ni na ndee xiꞌin na veꞌe ñuꞌu.

⁶ Ñani yo, tá ná xaa i koto i ndóꞌo̱ ta ná kaꞌan i xiꞌin ndo tuꞌun ya köo kúndaa ini yo xiꞌin, ya ke̱e nuu ndivi, ná kachi yo. Ta ya uun kuiti va ku ya kaꞌan i xiꞌin ndo, chi kündaa ini ndo xiꞌin ya kaꞌan i xiꞌin ndo. Sundi ya vaꞌa ni kaꞌan i xiꞌin ndo ku tuꞌun ya si̱naꞌa Tachi I̱í Ndioxi nuu i kaꞌan i xiꞌin ndo, xiꞌin ya kaꞌan i xiꞌin ndo xaꞌa ya ndíchi ni kúu mií Ndioxi, án ya ndikani i nuu ndo kundaa ini ndo xaꞌa ya kaꞌan ndoso ndo tuꞌun vaxi yuꞌu Ndioxi, án ya sinaꞌa i ndóꞌo̱ xaꞌa tuꞌun ra ya vaꞌa kundaa ini ndo xiꞌin.

⁷ Ta kuꞌva saa ndóꞌo̱ tu yo xiꞌin itun síkaꞌa va na, tá kúu na xíta xiꞌin itun tilali, án na síkaꞌa itun arpa. Tá tu köo téꞌe xíta na xiꞌin nu, án köo teꞌe tívi na nu, ta nda iin naꞌa kündaa ini ndá yaa kua síkaꞌa na án ndá yaa kua xíta na.

⁸ Saa tu tá väꞌa tívi na itun trompeta nuu ndikitaꞌan nda lapa kuꞌun nda nuu kuachi, ta kündaa ini nda ya koo ndúvi nda kuꞌun nda nuu kuachi.

⁹ Ta mií saa ndaa kua ndóꞌo tu ndóꞌo̱ va, tá tu ná kaꞌan ndo inka tuꞌun ya köo kúndaa ini ndo xiꞌin, ta nda iin naꞌa kündaa ini xiꞌin ya káꞌan ndo xiꞌin na nuu ndíkitaꞌan ndo veꞌe ñuꞌu. Tá íin na káꞌan mií va, saa íin ndo, tá ná ikan ndo saa.

¹⁰ Ya ndaa kua xa xíni mií ndo kuaꞌa ni nuu tuꞌun íyo ñuu ivi yoꞌó, ta téꞌe ni va káꞌan ya nuu mií na xíni kaꞌan ya.

¹¹ Sundi tá köo kúndaa ini i xiꞌin tuꞌun ya káꞌan ndá ka naꞌa xiꞌin i, ta tá káa yeꞌe inka ñuu va saa káa i nuu na, ni mií na káꞌan xiꞌin i ta tá íin na inka ñuu va saa íyo na nuu i.

¹² Ta saa tu ndóꞌo va, chi ndúku ni ndo kuꞌva ya niꞌi ndo ya vaꞌa ke̱e nuu ndivi. Ta vaꞌa nduku ni ndo taꞌan ya vaꞌa ya chíndee taꞌan ni xiꞌin na veꞌe ñuꞌu ya ná kuaꞌnu ka na xiꞌin tuꞌun Ndioxi.

¹³ Xaꞌa ya ñaa kua xíniñuꞌu ni naꞌa, na káꞌan tuꞌun ya köo xíni na ya ke̱e nuu ndivi, ya ná kaꞌan ni na xiꞌin Ndioxi, ya ná kuchiñu na sindiko niꞌi na tuꞌun ya káꞌan na.

¹⁴ Saa chi tá tu ná kaꞌan i xiꞌin Ndioxi xiꞌin inka nuu tuꞌun ya köo xíni i, ta ya vaꞌa va i ku ya káꞌan xiꞌin ra, sundi köo kúndaa ini ya xínituni i unkua káꞌan i xiꞌin ra.

¹⁵ Tá tu saa ra ta ¿unkua vaꞌa ikan i? Ya vaꞌa ikan i kua kaꞌan i xiꞌin Ndioxi xiꞌin ya vaꞌa i, ta saa kaꞌan tu i xiꞌin ra xiꞌin tuꞌun ya kúndaa ini i xiꞌin. Saa kata tu i nuu ra xiꞌin yaa ya kúndaa ini ya vaꞌa i xiꞌin, ta nda mií i ta kundaa ini i xiꞌin ya kata i nuu ra.

¹⁶ Saa chi tá tu xáa kaꞌnu ndo Ndioxi xiꞌin tuꞌun ya köo kúndaa ini yo xiꞌin ya ke̱e nuu ndivi, ta saa ná xaa inka naꞌa, na köo xíka veꞌe ñuꞌu xiꞌin ndo, ta unkua ikan na kundaa ini na taxi na tixaꞌvi ndaꞌa Ndioxi, ta ni köo kúndaa ini na xiꞌin tuꞌun ya káꞌan ndo.

¹⁷ Saa chi ndóꞌo̱, ni vaꞌa ni va táxi ndo tixaꞌvi ndaꞌa Ndioxi sundi naꞌa, na köo kúndaa ini xiꞌin tuꞌun ya káꞌan ndo, ta köo chíndee taꞌan ya xiꞌin na.

¹⁸ Ta yeꞌe, ra táxi ní va i tixaꞌvi ndaꞌa Ndioxi saa chi ndee ni vaꞌa káꞌan i inka nuu tuꞌun ya ke̱e nuu ndivi, káꞌan ni ka va yeꞌe nuu ndiꞌi ndo.

¹⁹ Sundi tá káꞌan i xiꞌin na ñani yo, na veꞌe ñuꞌu, ta kúni i ná kundaa ini na xiꞌin tuꞌun ya káꞌan i xiꞌin na. Yakan vaꞌa ka káꞌan i xiꞌin na u̱ꞌu̱n nuu tuꞌun ya kúndaa ini na xiꞌin. Süvi ka vi ya kaꞌan i xiꞌin na uxi mil nuu tuꞌun ya köo xíni na, ta nda iin na kündaa ini xiꞌin ya káꞌan i.

²⁰ Ñani yo, vaꞌa ndikani ini ndo tá kuꞌva ndíkani ini naꞌa, na xa xuxa ini, ta ndïkani ini ndo tá kuꞌva ndíkani ini na vali xaꞌa ñaꞌa ya káꞌan i xiꞌin ndo. Ndisaa nuu ya väꞌa ná koo naá ni ini ndo tá kuꞌva naá ni nuu na vali nuu ya väꞌa, saa ná koo ndo.

²¹ Ta soꞌva kua káꞌan tuꞌun Ndioxi iin ñaꞌñu nuu ta̱a na xinaꞌa, káchi ya saa: “Kuniñuꞌu i naꞌa, na káꞌan inka nuu tuꞌun, na ke̱e ñuu xíka ni ya kaꞌan i xiꞌin na ñuu ivi yóꞌó, ta saa ni küaꞌa na kuni soꞌo na ya kaꞌan i xiꞌin na”, káchi tuꞌun Tata yo.

²² Ta xiꞌin ya yóꞌó kua kúndaa ini yo, chi naꞌa, na ta̱xi Ndioxi ya vaꞌa ndaꞌa kaꞌan na tuꞌun ya köo xíni na, ta seña ya táxi kundaa ini naꞌa, na köo kándixa tuꞌun ra kua. Ta na káꞌan ndoso tuꞌun vaxi yuꞌu Ndioxi ya táxi ra ndaꞌa na kaꞌan na, ta xiꞌin na xa kándixa Ndioxi va kua káꞌan na ikán, süvi xiꞌin na köo xíni tuꞌun Ndioxi kua káꞌan na.

²³ Saa tá ná ndikitaꞌan ndiꞌi ndo na veꞌe nuꞌu, ta ñaa ná xáa ndiꞌi ndo kaꞌan ndo tuꞌun ya köo xíni ndo, ya ke̱e nuu ndivi, ta saa ná kiꞌvi naꞌa, na köo kúndaa ini xiꞌin tuꞌun ya káꞌan ndo, ná kachi yo, án na köo kándixa tuꞌun Ndioxi, ta ¿án käꞌan na xaꞌa ndo ya ndu̱kiꞌvi ndo, túvi ndo?

²⁴ Saa tá ná ndikitaꞌan ndiꞌi ndo ta xáa ndiꞌi ndo kaꞌan ndoso ndo tuꞌun yuꞌu Ndioxi xiꞌin tuꞌun ya kúndaa ini naꞌa xiꞌin, ñaa ná kiꞌvi iin naꞌa, na köo kándixa tuꞌun Ndioxi án na köo xíni ya, ta na ikán, ta kuchiñu sixinu tuꞌun ya káꞌan ndo ini na, saa ndikuni na kuachi na, ñaa ndikani ini na ya väꞌa íkan na, xaꞌa ya kuni soꞌo na tuꞌun ya káꞌan ndo.

²⁵ Saa ndituvi ndiꞌi ya íyo sěꞌe nima na. Ñaa ndi̱kuita ndee na sikusiti na, ta xáa na xaa kaꞌnu na Ndioxi. Saa kaꞌan na ya ndaa ni kua íyo Ndioxi xiꞌin ndo.

Vívií xíniñuꞌu ndo xaa súvi ndo tá ndíkitaꞌan ndo veꞌe ñuꞌu

²⁶ Ñani yo, ná koto ndo unkua vaꞌa xíniñuꞌu ndo ikan ndo tá ndíkitaꞌan ndo veꞌe ñuꞌu: Ta vaꞌa kata sava ndo yaa nuu Ndioxi, ta sava ndo sinaꞌa, ta sava ndo kaꞌan xaꞌa tuꞌun ya sítuvi Ndioxi nuu ndo, ta vaꞌa kaꞌan sava ndo tuꞌun ya ke̱e nuu ndivi, ya köo xíni ndo, ta ná koo naꞌa sindiko niꞌi tuꞌun ya káꞌan ndo. Saa ikan ndo ya vaꞌa chindee taꞌan ndo xiꞌin na veꞌe ñuꞌu ya taxi ndo ndee ndaꞌa na.

²⁷ Tá sava ndo káꞌan tuꞌun ya köo xíni ndo, ya ke̱e nuu ndivi, ta vaꞌa ná kaꞌan uvi ndo án uni va ndo. Kundatun ndo ná sindiꞌi kaꞌan iin ndo, saa kaꞌan inka ndo, ta ná koo naꞌa sindiko niꞌi tuꞌun ya káꞌan iin iin ndo.

²⁸ Tá tu köo naꞌa síndiko niꞌi tuꞌun ya káꞌan ndo, ta vaꞌa käꞌan ndo nuu ndiꞌi na veꞌe ñuꞌu, vaꞌa kaꞌan yàá mií ndo xiꞌin Ndioxi. Chi tá íkan ndo saa ta ndisaa mií ndo xiꞌin Ndioxi ku ra kúndaa ini xiꞌin ya káꞌan ndo.

²⁹ Tá xáa na káꞌan ndoso tuꞌun yuꞌu Ndioxi káꞌan na, ta vaꞌa ná kaꞌan uvi na án uni na. Ta ndiꞌi ka ndo, taa ni soꞌo ndo ya káꞌan na, án ndixa tuꞌun Ndioxi kua káꞌan na án süvi ya.

³⁰ Tá mií tiempo káꞌan iin na, saa sínaꞌa Ndioxi nuu inka na índuꞌu ya xíniñuꞌu na kaꞌan ndoso na, ta vaꞌa ná kutaxi yuꞌu na xa káꞌan, ta ná taxi na kaꞌan inka naꞌa, na sikan xáa káꞌan.

³¹ Saa chi vaꞌa kaꞌan ndoso ndiꞌi va ndo tuꞌun yuꞌu Ndioxi, tá iin, tá iin ndo vaꞌa kaꞌan, saa kua vaꞌa sikuaꞌa ndiꞌi ndo xaꞌa ya xíni soꞌo ndo, ta saa niꞌi ndiꞌi ndo ndee.

³² Ta naꞌa, na káꞌan ndoso tuꞌun yuꞌu Ndioxi, ta kúu mií na ndee ya kaꞌnu na mií na, kutaxin yuꞌu na.

³³ Saa chi Ndioxi ta köo kútoo ra ya iin ndá síso kaꞌan ndiꞌi yo, chi ya kúni ra kua vívií ná koo ndiꞌi yo, tá kuꞌva íyo ndiꞌi na ñani yo, na veꞌe ñuꞌu, saa ná koo yo.

³⁴ Tá ndíkitaꞌan ndo xáa kaꞌnu ndo Ndioxi veꞌe ñuꞌu, ta vaꞌa ná koo táxin yuꞌu ná síꞌi ndo, chi köo ichí ya kaꞌan ná, chi ya xíniñuꞌu ikan ná kua xaa toꞌo ná ndóꞌo̱, tá kuꞌva káꞌan mií ley Ndioxi.

³⁵ Tá ndá ñaꞌa kúni ná síꞌi ndo kundaa ini ná, ta vaꞌa ná ndakan tuꞌun ná ndóꞌo̱ veꞌe ndo. Saa chi väꞌa náꞌa ya, ya kaꞌa̱n nuu va ku ya tá ná ndikuiin ná síꞌi ndo kaꞌan ná nuu ndíkitaꞌan ndo.

³⁶ Ta ndikaꞌán ini ndo chi süvi ndóꞌo̱ ku ndo núnu̱ú ndíkiꞌin tuꞌun Ndioxi, ta ni süvi ndisaa ndóꞌo̱ ku ndo ta̱xi Ndioxi tuꞌun ra ndaꞌa.

³⁷ Tá ndá na taꞌan yo ndíkani ini ya káꞌan na tuꞌun yuꞌu Ndioxi, án ndee ni vaꞌa íyo Tachi I̱í ra xiꞌin na, ta vaꞌa ná kundaa ini na xiꞌin tuꞌun yóꞌó ya kúu ya xáꞌnda chiñu mií Tata yo Jesucristo.

³⁸ Tá tu ndá na köo xíin kuni soꞌo ya káꞌan i, ta saa küni soꞌo tu ndóꞌo̱ va ya káꞌan na ikán.

³⁹ Ta saa va ñani yo tin kuꞌva yo, vaꞌa kutoo ndo kaꞌan ndo tuꞌun yuꞌu Ndioxi, ta käsi ndo nuu nda iin naꞌa, na kúni kaꞌan tuꞌun ya köo xíni na, ya ke̱e nuu Ndioxi. Taxi ndo ná kaꞌan na ya.

⁴⁰ Sundi vívií ikan ndo ndiꞌi ya.