1 Corintios 13 - Xochapa Mixteco

Ná kuꞌvi ni ini yo kuni taꞌan yo, chi ya yóꞌó ka kua ndee ni ndáa yaꞌvi

¹ Tá tu xíni ni i kaꞌan i kuaꞌa ni nuu tuꞌun ya káꞌan na ñuu ivi yóꞌó, án xíni ni i kaꞌan i nda tuꞌun ya káꞌan na tatun Ndioxi, sundi tá köo ya kúꞌvi ini vaxi nuu Ndioxi íyo nima i, ya kuꞌvi ini i kuni i inka naꞌa, ta tá káa kàà ya ndee ni káxan va saa káa i, án tá káa iin kàà ya ndee ni ndáꞌi va, saa káa i.

² Tá tu vaꞌa ni káꞌan i tuꞌun yuꞌu Ndioxi, ni vaꞌa ni kúndaa tu ini i xiꞌin ndiꞌi ni kúu ya íyo sěꞌe, ni ndíchi ni káa i, ni kándixa ni i Ndioxi ya kuni soꞌo ra kaꞌan i xiꞌin ra ndinama ra iku kuꞌun ya inka ñaꞌñu, sundi tá tu köo ya kúꞌvi ini táxi Ndioxi íyo nima i, ya kuꞌvi ini i kuni i inka naꞌa, ta ni köo ndáa yaꞌvi mií vi i.

³ Ni ná nditaꞌvi ndiꞌi i ñaꞌa ya kúu mií i taxi i kuxi na ndaꞌvi, ni ná nditaxi i mií i koko ikin kuñu i xaꞌa na, tá tu köo ya kúꞌvi ini táxi Ndioxi íyo nima i ya kuꞌvi ini i kuni i inka na, ta ni köo ndáa yaꞌvi mií vi i.

⁴ Naꞌa, na íyo ya kúꞌvi ini táxi Ndioxi nima na, ta kaꞌnu ni va ini na, vií ni ini na, köo uní ini na, köo kútai ni ini na, ni köo xáa kaꞌnu na mií na,

⁵ Naꞌa, na ndee ni íyo ya kúꞌvi ini táxi Ndioxi ndaꞌa na ta tǒꞌo ni na, ni köo ndíꞌi ini na ndisaa xaꞌa mií na, ni köo sáa kama na, ni köo kíꞌin na kuenta xaꞌa ya väꞌa íkan inka naꞌa xiꞌin na,

⁶ ta ni köo kúsini na xíni na ya väꞌa íkan naꞌa xiꞌin taꞌan na, nina ya vaꞌa, ya ndǎku kútoo na.

⁷ Naꞌa, na íyo ni ya kúꞌvi ini táxi Ndioxi ndaꞌa na, ta xáꞌa ndee ndiꞌi ini na xiꞌin ndá ka ñaꞌa ndóꞌo na, ta ndee ni kándixa na ya sixinu Ndioxi ya ndi̱kaꞌan ra, saa ndee ni ndátun na ya ndikuiin Ndioxi yuꞌu na. Saa xáꞌa ndee ndiꞌi ini na xiꞌin ya väꞌa ndóꞌo na.

⁸ Chi ya kúꞌvi ini táxi Ndioxi ndaꞌa yo kuꞌvi ini yo kuni yo inka naꞌa, ta ndiꞌi saa tiempo koo ya. Sundi naꞌa, na káꞌan tuꞌun yuꞌu Ndioxi ta vaxi tiempo küchiñu ka na kaꞌan na tuꞌun yuꞌu ra. Ni na káꞌan ndá ka nuu tuꞌun ya köo xíni na ta köo ka na kaꞌan ya, ni ya ndíchi ni kundaa ini yo xaꞌa ya ndi̱xiyo sěꞌe, ta ndiꞌi xaꞌa ya.

⁹ Saa chi vitin ta köo kúndaa ndiꞌi ini yo xiꞌin ya ndaa xaꞌa Ndioxi, ta saa tu ya káꞌan ndoso yo tuꞌun yuꞌu ra, ndisaa iin ñaꞌñu va kúndaa ini yo xiꞌin ya.

¹⁰ Sundi tá ná tindaa kivi ya xinu mií ya ndixa ni ndinuꞌu ndaa, ya ndǎku ni, ta nda loꞌo ka ñaꞌa köo kúmani xiꞌin ya, saa kua ndiꞌi xaꞌa ya xíni yo iin ñaꞌñu loꞌo.

¹¹ Ta vaꞌa kundaa ini ndo, chi tá ndi̱xiyo loꞌo i ta ndi̱kaꞌan i tá kuꞌva káꞌan na vali, ndi̱kani ini i tá kuꞌva ndíkani ini na vali, ki̱ꞌin xi̱ní i tá kuꞌva kíꞌin xi̱ní na vali. Sundi tá ndi̱xinu i ndu̱u i taa, ta saa si̱ndikoo i ya íkan i tá kuꞌva íkan na vali.

¹² Kuꞌva saa íyo ya ndóꞌo yo vitin, tá ndóꞌo naꞌa, na xíto nuu yu̱ú tatan, ya kuaꞌan kúxana nuu va, saa íyo ya ndóꞌo yo. Sundi vaxi kivi ta saa kua kundaa teꞌe ini yo xaꞌa ndiꞌi ya, chi saa kua kuni xiꞌin nuu yo Ndioxi. Loꞌo ni va kúndaa ini yo xaꞌa ra vitin, ta vaxi kivi saa kua kundaa teꞌe ini yo xaꞌa ndiꞌi kúu ñaꞌa. Ta saa kua kuni vaꞌa yo Ndioxi tá kuꞌva káa ra, tá kuꞌva xíni ra yoo.

¹³ Tá kuꞌva káꞌan i saa íyo va ya, sundi uni nuu ya yóꞌó ku mií ya ndïꞌi xaꞌa: ya ndee ni ndáa ini yo xíni yo Ndioxi, xiꞌin ya kándixa yo ya sixinu Ndioxi ya ndi̱kaꞌan ra taxi ra ndaꞌa yo, saa tu ya kúꞌvi ni ini ta̱xi ra ndaꞌa yo. Sundi ya ndee ni ka ndee ndáa yaꞌvi nuu uni ya yóꞌó kúu ya, kúꞌvi ni ini ta̱xi Ndioxi ndaꞌa yo kuꞌvi ini yo kuni yo inka naꞌa.