1 Corintios 12 - Xochapa Mixteco

Ndioxi si̱niꞌi ra ndee vaꞌa ni ya ke̱e nuu ndivi nuu yo

¹ Ñani yo, kúni i ná kundaa ini ndo ndá kuꞌva kua íyo xaꞌa ndee vaꞌa ni, ya ke̱e nuu ndivi si̱niꞌi Ndioxi yoo.

² Ta xa kúndaa ini ndo ndá kuꞌva ndi̱xiyo ndo yachi tá täꞌan kandixa ndo Tata yo Jesucristo, ta̱xi ndo xa̱ꞌnda chiñu naꞌna ndioxi ya ndíi, ya meꞌme nuu ndo.

³ Xaꞌa ya ñaa kua káꞌan i xiꞌin ndo, nda iin naꞌa, küvi tavi chiꞌña na Jesús tá tu kúu mií na Tachi I̱í Ndioxi. Ta saa tu nda iin na küvi kaꞌan: “Jesús kúu Tata nde ra chee ni nuu nde”, kachi na, tá tu köo Tachi I̱í Ndioxi kúu mií na.

⁴ Ta kúni i ná kundaa ini ndo ya íyo kuaꞌa ni nuu ndee vaꞌa ya síniꞌi Tachi I̱í Ndioxi nuu naꞌa, na kándixa Jesucristo, sundi suvi iin mií Tachi ra kua síniꞌi ndiꞌi va ya.

⁵ Ta kuaꞌa ni ku nuu kuꞌva ya táxi Tata yo ikan iin iin yo, sundi mií ra, ta iindaa va ku ra.

⁶ Saa íyo kuaꞌa ni kuꞌva ya xáa chiñu yo nuu Ndioxi, ta suvi xiꞌin ndee iindaa mií ra kua táxi ra íkan iin iin yo saa.

⁷ Ta ndee vaꞌa ya táxi Tachi I̱í Ndioxi ndaꞌa iin iin yo ya kuchiñu yo ikan yo ndá ka chiñu, ta ya chindee taꞌan yo xiꞌin na taꞌan yo kua.

⁸ Saa chi táxi Tachi I̱í Ndioxi ya vaꞌa ndaꞌa sava na, ya kúchiñu na kúndaa ini na xiꞌin tuꞌun ya ndee ni ndíchi, ta sava tuku na ndee ni íyo ya xínituni na, ndíchi ka vi íyo ya káꞌan na.

⁹ Sava tuku na si̱niꞌi Tachi Ií Ndioxi ndee vaꞌa ni nuu na, ya ndee ni kándixa na ra, sava tuku na ndi̱niꞌi ndee vaꞌa ni nuu ra ya síndaꞌa na naꞌa, na kúꞌvi, ta suvi mií Tachi I̱í ra kua íkan saa.

¹⁰ Sava tuku na níꞌi ndee vaꞌa ni nuu Tachi I̱í Ndioxi ya ikan na yatuꞌun Ndioxi. Sava tuku na níꞌi ndee vaꞌa ni ya kaꞌan ndoso na tuꞌun yuꞌu Ndioxi. Sava tuku na níꞌi ndee vaꞌa ni ya ndíkuni na tá káꞌan Tachi I̱í Ndioxi, ta ndíkuni tu na tá káꞌan tachi nduvaꞌa, ya nǎꞌa. Sava tuku na níꞌi ndee vaꞌa ni ya káꞌan na kuaꞌa ni nuu tuꞌun. Sava tuku na níꞌi ndee vaꞌa ni ya síndiko koo na tuꞌun ya káꞌan inka naꞌa.

¹¹ Ta iindaa mií Tachi I̱í Ndioxi ku ya íkan ndiꞌi ya yóꞌó xiꞌin ndee ku mií ya, chi iindaa mií ya kú ya xíni ndá kuꞌva kúni mií ya siniꞌi ya nuu iin iin naꞌa.

¹² Ta xa xíni mií yo ya kuaꞌa ni nuu ku ñaꞌñu ya kúu mií ikin kuñu yo, sundi iindaa va ku yo. Ta saa iin káchi íin yo xiꞌin Tata yo Jesucristo. Saa chi vani kuaꞌa ni ku yo ndíkun ra, sundi iin va ku yo xiꞌin ra.

¹³ Saa chi tixin iin mií Tachi I̱í ra kua chi̱chi ndiꞌi yo yakan iin ndu̱u ndiꞌi yo xiꞌin ra. Án yo judío ku yo, án süvi yo judío ku yo, án yo sa̱ta na xáa chiñu xiꞌin ya nduxa ku yo, án yo íyo ndika ku yo, ta iin káchi ndi̱kuiso ra ndiꞌi yo. Ta tá íin nduta xíꞌi yo saa káa Tachi ra ya ndi̱niꞌi yo nuu ra, íyo ya xiꞌin yo.

¹⁴ Ta süvi iindaa ñaꞌñu kua kúu mií ikin kuñu yo, kuaꞌa ni nuu ku ya.

¹⁵ Tá ná kaꞌan xaꞌa yo xiꞌin ndaꞌa yo: “Köo ndíkun ndaa i xiꞌin un ikin kuñu saa chi süvi ndaꞌa ku i”, ná kachi ya. Ni saa va, ta ikin kuñu yo ndíkun ndaa va ya.

¹⁶ Tá ná kaꞌan soꞌo yo xiꞌin nduchi nuu yo: “Köo ndíkun ndaa i ikin kuñu, saa chi süvi nduchi nuu ku i”, ná kachi ya. Ni saa va, ta xa ikin kuñu yo ndíkun ndaa va ya.

¹⁷ Tá tu nina nduchi nuu ná koo ndiꞌi ikin kuñu yo ta küchiñu yo kuni soꞌo yo. Tá tu nina soꞌo yo ná koo ndiꞌi ikin kuñu yo, ta küchiñu yo taꞌmi yo xiko, ndikuu.

¹⁸ Sundi Ndioxi, ta xa xíni vaꞌa va ra nuu toso ra tá iin, tá iin ñaꞌñu ya xíniñuꞌu ikin kuñu yo, tá kuꞌva kúni mií ra saa íyo ya i̱kán ra xiꞌin yo.

¹⁹ Saa chi tá iin nuu ndi̱xiyo ndiꞌi ikin kuñu yo, ta küvi koo yo iin naꞌa, ndíkuu.

²⁰ Yakan kua kuaꞌa ni va nuu ku ikin kuñu yo, ta iindaa va ku mií yo.

²¹ Xaꞌa ya ikán kua küvi kaꞌan nduchi nuu yo xiꞌin ndaꞌa yo, kachi ya saa: “Köo xíniñuꞌu i yóꞌo̱”, kachi ya. Ni xi̱ní yo küvi kaꞌan ya xiꞌin xaꞌa yo: “Köo xíniñuꞌu i ndóꞌo̱”, kachi ya.

²² Xa xíni mií yo, ñaꞌñu ikin kuñu yo ya vita ni kúni túvi yo, ya ikán ka kua ndee ni xíniñuꞌu yo.

²³ Ñaꞌñu ya köo ndáa yaꞌvi ni túvi yo, ya ikán ka kua ndee ni vií síkundixi yo. Saa íkan tu yo xiꞌin sava ñaꞌñu ikin kuñu yo, ya íyo sěꞌe, ndee ni ka vií ndíkasi yo ya ikán.

²⁴ Ta vaꞌa ná kundaa ini ndo, chi ñaꞌñu ya luvi ni náꞌa, ta köo xíniñuꞌu ndo kundaa ni ndo ya, mií ra ku ra chi̱taꞌan ndiꞌi ya xiꞌin taꞌan ya, ñaꞌñu ya köo ndaa yaꞌvi ni túvi ndo, ya ñaa ka kua ndee ni ndáa yaꞌvi nuu mií ra, yakan ná kundaa ni yo ñaꞌñu ñaa.

²⁵ Saa i̱kan Ndioxi xiꞌin ikin kuñu yo, ya ná täꞌvi taꞌan ya, saa kua vaꞌa kundiꞌi ini ya xiꞌin taꞌan ya ta chindee taꞌan ya xiꞌin taꞌan ya.

²⁶ Xaꞌa ya ikán kua, tá kúꞌvi iin ñaꞌñu ikin kuñu yo, ta iin kúꞌvi ndiꞌi ikin kuñu yo. Ta saa tu tá iin ñaꞌñu ikin kuñu yo kée vaꞌa ni, ta ndiꞌi ya vaꞌa ni kúni.

²⁷ Tá kúu ndiꞌi ndo ta tá káa iin ñaꞌñu ikin kuñu Cristo saa íin ndo, ta xa síin nuu chiñu íkan iin iin ndo.

²⁸ Ta xa xíni yo mií Ndioxi ku ra to̱so yo veꞌe ñuꞌu ya xaa chiñu yo. Chiñu núnu̱ú ta̱xi ra ndaꞌa sava yo ku ya kúu yo apóstol, ta sava yo ku profeta, nda káꞌan tuꞌun yuꞌu Ndioxi, sava tu yo ku yo sínaꞌa tuꞌun Ndioxi, sava tu yo ta̱xi ra ichí ndaꞌa yo ya ikan yo yatuꞌun Ndioxi, sava yo ta̱xi ra ichí ndaꞌa yo ya sindaꞌa yo na kúꞌvi, sava tuku yo ta̱xi ra ichí ndaꞌa yo ya chindee taꞌan yo xiꞌin naꞌa, sava tuku yo ta̱xi ra ichí ndaꞌa yo ya kaꞌnda chiñu yo nuu na veꞌe ñuꞌu, sava tuku yo ta̱xi ra ichí ndaꞌa yo ya kaꞌan yo inka nuu tuꞌun ya köo ndi̱sikuaꞌa yo.

²⁹ Ta süvi ndiꞌi yo ku apóstol nda xáa chiñu nuu Jesucristo, ni süvi ndiꞌi tuku yo kúu profeta nda káꞌan tuꞌun yuꞌu Ndioxi, ni süvi ndiꞌi tuku yo kúu yo sínaꞌa tuꞌun Ndioxi, ta ni süvi ndiꞌi tuku yo íkan yatuꞌun Ndioxi.

³⁰ Ta ni süvi ndiꞌi tuku yo kúu mií ichí ya sindaꞌa yo naꞌa, na kúꞌvi. Saa ni süvi ndiꞌi tuku yo vaꞌa káꞌan inka nuu tuꞌun ya köo xíni yo. Ta saa ni süvi ndiꞌi tuku yo kúchiñu síndiko koo inka nuu tuꞌun.

³¹ Ta xíniñuꞌu ni ndo nduku ndo ndee ya vaꞌa ni nuu Ndioxi, ya ná taxi ra ya ndaꞌa ndo. Sundi sínaꞌa i ndóꞌo̱ ichí ya vaꞌa ni ka nuu xíniñuꞌu ni ndo kundikun ndo.