1 Corintios 11 - Xochapa Mixteco

Vívií ná kundixi ná síꞌi, ná ndíkun Tata yo Jesucristo

¹ Vaꞌa ikan ndo tá kuꞌva íkan yeꞌe, chi yeꞌe ta vaꞌa ni ndíkun i Tata yo Jesucristo.

² Ñani yo tin kuꞌva yo, chínuu vaꞌa ni i tuꞌun ndo, saa chi ndíkaꞌán ni ini ndo xaꞌa i. Ta köo síndoo ndo ichí ya si̱naꞌa i ndóꞌo̱.

³ Saa kúni i ná kundaa ini ndo, chi Cristo ku xi̱ní xiꞌin nda taa, ta nda taa ku xi̱ní xiꞌin ná síꞌi nda, ta Ndioxi ku xi̱ní xiꞌin Cristo.

⁴ Ndiꞌi nda taa tá ndíkasi nda xi̱ní nda tá káꞌan nda xiꞌin Ndioxi án tá káꞌan nda tuꞌun yuꞌu Ndioxi xiꞌin na veꞌe ñuꞌu. Tá íkan nda saa, ta köo xáa toꞌo nda Ndioxi xaꞌa ya íkan nda saa.

⁵ Ta saa ndiꞌi ná síꞌi, tá tu köo ndíkasi ná xi̱ní ná tá káꞌan ná xiꞌin Ndioxi án tá káꞌan ná tuꞌun yuꞌu Ndioxi, ta köo xáa toꞌo ná ra kúu xi̱ní xiꞌin ná. Xaꞌa ya íkan ná saa, ta vaꞌa ka ná ndixata ndiꞌi va ná ixí xi̱ní ná.

⁶ Chi tá köo ndíkasi ná síꞌi xi̱ní ná, ta vaꞌa ka ná kaꞌnda ndiꞌi va ná ixí xi̱ní ná. Tá tu kúkaꞌán nuu ná kaꞌnda ná ixí xi̱ní ná án ndixata lúu ná ya, ta vaꞌa ka ná ndikasi va ná xi̱ní ná.

⁷ Sundi nda taa ta küvi ndikasi nda xi̱ní nda, chi tá kuꞌva káa mií Ndioxi saa íin nda, saa sínaꞌa nda ya luvi ni kúu mií Ndioxi. Saa ná síꞌi sínaꞌa ná ya luvi ni kúu mií ná nuu nda taa.

⁸ Saa chi tá si̱kuaꞌa Ndioxi ra taa, ta süvi xiꞌin leke kandika yá ñaꞌa kua i̱kan Ndioxi ra, chi xiꞌin leke kandika taa va kua si̱kuaꞌa ra yá.

⁹ Ta köo ndi̱kuaꞌa ra taa xaꞌa yá ñaꞌa, yá ñaꞌa va ku yá ndi̱kuaꞌa xaꞌa ra taa.

¹⁰ Xaꞌa ya yóꞌó kua xíniñuꞌu ná síꞌi kundasi xi̱ní ná ta ya yóꞌó ku seña nuu na tatun Ndioxi ya xáꞌnda chiñu ií ná nuu ná.

¹¹ Sundi nuu yoo kándixa Tata yo Jesucristo, ta xíniñuꞌu taꞌan uvi saa yo chi küvi koo nda taa tá tu köo ná síꞌi, ni ná síꞌi ta küvi koo ná tá tu köo nda taa.

¹² Ya ndixa kua ndi̱kuaꞌa ná ñaꞌa xiꞌin leke kandika taa, ta saa tu nda taa va káku nda tixin ná síꞌi. Ta ndiꞌi ya yóꞌó ta nuu Ndioxi vaxi ndiꞌi ya.

¹³ Ta ¿án vaꞌa náꞌa ya kaꞌan ná síꞌi xiꞌin Ndioxi, ta kündasi xi̱ní ná, túvi ndo?

¹⁴ Nda ni mií yo ta xíni yo, tá íyo iin taa ta táxi ra nána nâni ni ixí xi̱ní ra, ta köo vaꞌa náꞌa ya íkan ra saa.

¹⁵ Sundi ya nâni ixí xi̱ní ná síꞌi, ta ya káꞌan vaꞌa xaꞌa va ná kúu ya. Saa chi Ndioxi ku ra ta̱xi koo nâni ixí xi̱ní ná, ya kundasi ya xi̱ní ná.

¹⁶ Tá ndá na kúni sikuaꞌa kuachi xaꞌa ya yóꞌó, ta xíniñuꞌu na kundaa ini na ya ñaa kua sínaꞌa i naꞌa ndiꞌi ni kúu veꞌe ñuꞌu, ta kuꞌva saa kua kándixa ndiꞌi va na.

Xaa toꞌo ndo tá kivi ndíkitaꞌan ndo xíxi xíní ndo nuu ndíkaꞌán ini ndo xaꞌa Tata yo

¹⁷ Ta vitin kaꞌan ka i xiꞌin ndo, ta küvi kaꞌan i xiꞌin ndo ya vaꞌa ni íkan ndo, chi ndóꞌo̱, tá ndíkitaꞌan ndo veꞌe ñuꞌu, ta süvi ya vaꞌa vi íkan ndo xiꞌin taꞌan ndo, ya väꞌa va íkan ndo xiꞌin taꞌan ndo.

¹⁸ Saa chi xi̱ni soꞌo i xaꞌa ndo, tá ndíkitaꞌan ndo xáa kaꞌnu ndo Ndioxi veꞌe ñuꞌu, ta ndóꞌo̱ ndítaꞌvi taꞌan va ku ndo, káchi na xaꞌa ndo. Ta ndíkani ini i va saa ndixa va kua íkan ndo, túvi i.

¹⁹ Ta ¿án xaꞌa ya íkan ndo saa kua kúni ndo sinaꞌa ndo mií ndo unku ndo ndixa ndaa ni ndíkun Tata yo Jesucristo, túvi ndo? ¡Ta süvi saa íyo ya!

²⁰ Sundi tá ndíkitaꞌan ndo xíxi xíní ndo xita vaꞌa, saa xíꞌi ndo vino, ya ndíkaꞌán ini ndo ndi̱xiꞌi Tata yo xaꞌa ndo, ta väꞌa íkan ndo, chi köo íyo yuꞌu ndo xiꞌin taꞌan ndo tá íkan ndo saa.

²¹ Saa chi tá xa ti̱ndaa hora ya kuxi ndo xiꞌin taꞌan ndo, ta ni köo ndátun taꞌan ndo, sava tuku ndo xa xáa kama ndíkundoo ndo xíxi ndo, ta köo xíxi vaꞌa ndo chi káꞌun ka ini sava ndo. Sava tuku ndo xa ndee ni xíꞌi, ndakua xíni vaꞌa ndo.

²² ¿Án köo veꞌe ndo ná kundoo ndo kuxi ndo tin koꞌo ndo? Chi väꞌa íkan ndo síndikava ndo ini na veꞌe ñuꞌu, saa síkaꞌán ndo nuu na taꞌan yo, na köo ñaꞌa nuu kuxi.

Soꞌva kua xíniñuꞌu yo kuxi xíní yo nuu Tata yo

²³ Ta ya sínaꞌa i ndóꞌo̱ vitin ta mií Tata yo Jesucristo ku ra si̱naꞌa yeꞌe, ta saa íkan i xiꞌin ndo. Mí ñûu tá ndi̱xiko vata ñaꞌa ra Judas Tata yo Jesús, saa ti̱in ra xita vaꞌa,

²⁴ ñaa ta̱xi ra tixaꞌvi ndaꞌa Ndioxi xaꞌa ya, saa ta̱ꞌvi ra ya, káchi ra saa: “Kuxi ndo xita vaꞌa yóꞌó, chi ya yóꞌó ku kuñu i ya táxi i xaꞌa ndo. Vaꞌa ikan ndo saa, ya ndíkaꞌán ini ndo xaꞌa i”, káchi ra.

²⁵ Saa tá ndi̱ꞌi xi̱xi xíní na, ñaa ti̱in Jesús copa nuu ñúꞌu nduta vino, saa ndi̱kaꞌan ra, káchi ra saa: “Nduta vino yóꞌó ku nií i, nduta kuita xaꞌa ndo, ta xiꞌin rá yóꞌó kua kíndoo Ndioxi ya xa̱á xiꞌin ndo. Ta ndiꞌi saa ichí tá xíꞌi ndo nduta yóꞌó kua ndíkaꞌán ndo yeꞌe”, ka̱chi Jesús xiꞌin nda xi̱taꞌan xiꞌin ra.

²⁶ Yakan ndiꞌi saa ichí tá xíxi ndo xita vaꞌa yóꞌó tin xíꞌi ndo nduta vino, ta xaꞌa Tata yo Jesucristo kua ndítuꞌun ndo ya ndi̱xiꞌi ra xaꞌa yo. Saa ikan ndo nda kivi tá ná ndiko koo ra.

Vívií ikan ndo tá xíxi xíní ndo ndíkaꞌán ini ndo xaꞌa Tata yo

²⁷ Xaꞌa ya ñaa kua kuenta ni koo ndo tá xíxi ndo xita vaꞌa tin xíꞌi ndo vino, nuu xíxí xíní ndo ndíkaꞌán ini ndo xaꞌa Tata yo. Chi sava na taꞌan yo ta köo xáa toꞌo na, xáa iku na, saa káa xíxi na tin xíꞌi na. Ta naꞌa, na íkan saa ta kuakiꞌvi na kuachi xiꞌin ikin kuñu Tata yo Jesucristo saa tu nií va ra.

²⁸ Yakan kuenta ni koo ndo xiꞌin mií ndo, xiꞌna koto ndoso ndo mií ndo, án vaꞌa íyo ndo nuu Tata yo, ta saa kuxi ndo tin koꞌo ndo vino.

²⁹ Saa chi ndiꞌi naꞌa, na köo xáa toꞌo ta ni köo kíꞌin na kuenta xaꞌa ikin kuñu Tata yo Jesucristo, iin saa káa xíxi na tin xíꞌi na vino, ndiꞌi na íkan saa ta ndoꞌo ni va na ikan Ndioxi.

³⁰ Xaꞌa ya ñaa kua íyo kuaꞌa ni na kúꞌvi tañu ndo, ta sava na vita ni kúni na, ta sava tuku na xa ndi̱xiꞌi va.

³¹ Saa chi tá tu xiꞌna ná koto ndoso vaꞌa yo mií yo án vaꞌa íkan yo nuu Tata yo, ta köo xíniñuꞌu ra sitixuꞌvi ra yoo.

³² Sundi tá xáa nduvaꞌa Tata yo xiꞌin yo, ta sínaꞌa ra yoo kuꞌun yo ichí ndaku ya ná sïndoꞌo ra yoo, tá kuꞌva kundoꞌo na ñuu ivi yóꞌó.

³³ Xaꞌa ya ñaa kua káꞌan i xiꞌin ndo vitin ñani yo tin kuꞌva yo, tá ndíkitaꞌan ndo kuxi ndo, ta kundatun taꞌan ndo saa iin kachi kuxi ndiꞌi ndo xiꞌin taꞌan ndo.

³⁴ Tá ndá ndóꞌo̱ káꞌun ni ini, ta vaꞌa kuxi ndo veꞌe ndo, ya ná sïndoꞌo Ndioxi ndóꞌo̱. Tá ná xaa i koto i ndóꞌo̱ ta saa ndituꞌun ka yo xaꞌa inka tindiꞌi ini ya ndóꞌo ndo.