1 Corintios 10 - Xochapa Mixteco

Káꞌan ra Pablo xiꞌin na ndíkun Jesús ya ná ïkan na tá kuꞌva väꞌa i̱kan na Israel

¹ Ñani yo, xiꞌin kuꞌva yo, ndítuꞌun i xiꞌin ndo ya ná ndïndoso ini ndo xaꞌa ya ndo̱ꞌo xii sikua yo xinaꞌa. Ndi̱xika na tixin viko Ndioxi, saa ndi̱yaꞌa ndiꞌi na maꞌñu nduta ñûꞌu, rá náni nduta ñûꞌu Kuáꞌa̱.

² Tá ndo̱ꞌo na saa, ndi̱xika na tixin viko tin ndi̱yaꞌa na maꞌñu nduta ñûꞌu, nduta Kuáꞌa̱. Ta nda tá íin na chi̱chi saa ndi̱xiyo na, xaꞌa ya ikán kua vaꞌa ndi̱kitaꞌan na xiꞌin ra Moisés, ndi̱kundikun na ra.

³ Ta iin káchi xi̱xi ndiꞌi na ikán ya vaꞌa, ya ke̱e nuu ndivi, ya ta̱xi Ndioxi ndaꞌa na.

⁴ Ta ndiꞌi na xii sikua yo, iin káchi xi̱ꞌi ndiꞌi na tikuii nduta ta̱xi Ndioxi ndaꞌa na. Nduta ka̱na koo tixin yu̱ú chee ni ya kuaꞌan xiꞌin na ku rá xi̱ꞌi na, chi yu̱ú kaꞌnu ikán ta tá káa Jesucristo saa ndi̱xiyo ya.

⁵ Sundi kuaꞌa ni na ikán köo ndi̱kusini Ndioxi xiꞌin na xaꞌa ya ikán kua ndi̱xiꞌi na ikú yuyu.

⁶ Xaꞌa ya ndo̱ꞌo xii yo saa kua, sínaꞌa Ndioxi yoo ya ná kütoo yo ikán yo ya väꞌa, tá kuꞌva i̱kan na ikán.

⁷ Ná xäa kaꞌnu yo naꞌna ndioxi ya ndíi, tá kuꞌva i̱kan sava xií sikua yo, tá káchi tuꞌun Ndioxi ndíkani ya: “Ndi̱kundoo na xi̱xi na tin xi̱ꞌi na, sindiꞌi saa ndi̱kuita na xa̱á na kúkueꞌe na xiꞌin taꞌan na, saa xáa kaꞌnu na ndioxi ndíi”, káchi ya.

⁸ Xaꞌa ya ikán kua ná kïꞌvi yo xiꞌin inka ná síꞌi án inka nda taa ya kukueꞌe yo xiꞌin taꞌan yo. Süvi ka vi ya kundoꞌo yo tá ndo̱ꞌo sava na xinaꞌa, xaꞌa ya i̱kan na saa, ta iin kivi ndi̱xiꞌi oko uni mil naꞌa.

⁹ Ta ná köto ndoso yo Tata yo Jesucristo ya sitixuꞌvi ra yoo xaꞌa ya väꞌa íkan yo tá kuꞌva xi̱to ndoso sava xii sikua yo ra xinaꞌa, yakan ti̱in kiti ko̱ó na ta ndi̱xiꞌi na.

¹⁰ Ni ná käꞌan kuachi yo nuu Ndioxi tá kuꞌva i̱kan xií sikua yo, xaꞌa ya ndi̱kaꞌan kuachi na ta ti̱ꞌvi Ndioxi tatun ra, ya xáꞌni ndìì, ta kuaꞌa ni naꞌa xa̱ꞌni ya.

¹¹ Ndiꞌi ya yóꞌó ku ya ndo̱ꞌo xií sikua yo, yakan ndi̱ndoo ya ndaꞌa yo, ndi̱kaꞌi ya nuu tutu Ndioxi ya ndítuꞌun ya xiꞌin yo ya ná ïkan yo saa, chi tiempo ya xa kuaꞌan ndíꞌi ku ya ndóo yo vitin.

¹² Xaꞌa ya ñaa kua, vií ná kundikun ndo ichí Tata yo Jesucristo, ndóꞌo̱ ndíkani ini ya tuun ni ndíkun ndo ra, ta kuenta ni koo ndo ya ná köyo ndo nuu kuachi.

¹³ Chi taꞌan tindoꞌo̱ ya ndóꞌo ndóꞌo̱ ku ya ndóꞌo ndiꞌi ni kúu va naꞌa. Sundi Ndioxi ta vaꞌa ni va ra chi síxinu ndiꞌi ra ya káꞌan ra, ta saa ikan ra xiꞌin ndo chindee ra ndóꞌo̱ yaꞌa ndo nuu ndiꞌi tindoꞌo ya ndee ni vaxi nuu ndo, ta täxi ra kixi tindoꞌo ndee ni nuu ndo ya küchiñu ndo xiꞌin, sinaꞌa ra ndóꞌo̱ ndá kuꞌva yaꞌa ndo nuu ndiꞌi ya.

¹⁴ Xaꞌa ya ñaa kua xíkan ni i ya mani nuu ndo, ñani mani, kuxika ndo nuu ñaꞌa ya káꞌan naꞌa xaꞌa kúu ndioxi na, ta xäa kaꞌnu ndo ya.

¹⁵ Ta ndóꞌo̱, ta ndo táku̱ ini ku ndo, yakan vaꞌa kúndaa ini ndo ya káꞌan i xiꞌin ndo. Vaꞌa koto ndoso ndo ya káꞌan i xiꞌin ndo án ya vaꞌa ku ya, án süvi ya vaꞌa ku ya.

¹⁶ Xa xíni ndo chi ya ndíkitaꞌan yo xiꞌin Cristo kua xíꞌi yo nduta vino, chi ndi̱xita nií ra xaꞌa yo yakan vaꞌa ndíkitaꞌan yo xiꞌin ra. Saa tu tá xíxi yo xita vaꞌa, chi ta̱xi ra ikin kuñu ra xaꞌa yo, yakan vaꞌa ndíkitaꞌan yo xiꞌin ra.

¹⁷ Vani kuaꞌa ni ku yo ta iindaa mituꞌun ku xita vaꞌa ya xíxi ndiꞌi yo, ya yóꞌó káꞌan xaꞌa yo tá xíxi yo xita vaꞌa ta iin ndúu ndiꞌi yo xiꞌin ikin kuñu Tata yo Jesucristo.

¹⁸ Ta ná kundaa ini ndo xaꞌa ya ndóꞌo na ñuu Israel: tá xíxi na kuñu ya sóko inka na nuu nama i̱í nuu Ndioxi, ta tá káa ya iin káchi xíxi na xiꞌin Ndioxi, saa káa ya, ta saa iin káchi íyo na xiꞌin taꞌan na, na ítaꞌan xiꞌin na.

¹⁹ Ya káꞌan i saa xiꞌin ndo, ta köo káꞌan i xiꞌin ndo ya táku naꞌna ndioxi na, ta ni köo kúni tu i kaꞌan i xiꞌin ndo ya íyo ndee mií kuñu ya sóko na nuu va ya.

²⁰ Ta kúni i ná kundaa ini ndo, chi tá sóko na ñaꞌa nuu ndioxi na, ta süvi nuu Ndioxi sóko na ya, nuu tachi nduvaꞌa va sóko na ya, yakan yeꞌe ta köo kúni i ya koo yuꞌu ndo xiꞌin tachi nduvaꞌa.

²¹ Saa chi küvi koꞌo ndo vino Tata yo Jesucristo, ta koꞌo tu ndo vino tachi nduvaꞌa. Ni küvi kundoo ndo kuxi ndo nuu mesa Tata yo Jesucristo ta kundoo tu ndo kuxi ndo nuu mesa tachi nduvaꞌa.

²² Ta án kúni ka ndo ndikundee ndo ikan ndo ya väꞌa ya sisaa ndo ini Tata yo Jesucristo. ¿Án ndee ka ndóꞌo̱ nuu Tata yo Jesucristo, túvi ndo?

Ndiꞌi ya íkan yo ta ná xaa kaꞌnu yo Ndioxi xiꞌin ya

²³ Ya ndaa kua saa káꞌan sava ndo: Ya vaꞌa ni ikan yo ku ndiꞌi va ya, káchi ndo, ta süvi ndiꞌi ya ku ya vaꞌa ikan yo. Ya ndaa kua íyo ndíka yo ikan yo ndiꞌi ya kúni mií yo, sundi süvi ndiꞌi ya kúchiñu chíndee taꞌan xiꞌin na taꞌan yo kuaꞌnu na xiꞌin tuꞌun Ndioxi.

²⁴ Xaꞌa ya ñaa kua köo xíniñuꞌu ndo kundiꞌi ini ndo ndisaa xaꞌa mií ndo, ya koo vaꞌa ndo. Xíniñuꞌu tu ndo kundiꞌi ini ndo xaꞌa inka na taꞌan yo ya koo vaꞌa na.

²⁵ Ya vaꞌa kuxi ndo ku ndiꞌi va kuñu ya kiaꞌvi nuu xíko na kuñu, ta ndäkan tuꞌun ndo mií ke̱e ya, ya ná ndïkani väꞌa ini ndo xiꞌin ya tá xíxi ndo ya.

²⁶ Saa chi ñuu ivi yóꞌó xiꞌin ndiꞌi ñaꞌa kúu mií ya, ta mií Ndioxi ku ra si̱kuaꞌa ndiꞌi ya, yakan kuenta mií ra ku ndiꞌi va ya.

²⁷ Tá ndá na köo kándixa Jesucristo kána ndóꞌo̱ kuꞌun ndo kuxi ndo xiꞌin na, tá tu kúni ndo kuꞌun ndo ta vaꞌa kuꞌun ndo kuxi ndo xiꞌin na. Ndá ka mií ñaꞌa táxi na kuxi ndo, ta vaꞌa kuxi ndo ya. Tá táxi na kuñu kuxi ndo ta vaꞌa kuxi ndo ya, ndäkan tuꞌun ndo mií ke̱e ya, ya ná ndïkani uvi ini ndo xiꞌin ya.

²⁸ Tá ndá sava na káꞌan xiꞌin ndo: “Kuñu yóꞌó ta ya ndi̱soko na nuu naꞌna ndioxi na kua”, káchi na xiꞌin ndo. Ta käxi ndo ya, xaꞌa ya ndíkani ini naꞌa, na ndi̱kaꞌan saa xiꞌin ndo, chi ndikani väꞌa ini na kuni na ndóꞌo̱. Saa chi ñuu ivi yóꞌó xiꞌin ndiꞌi ñaꞌa kúu mií ya, ta mií Iva yo Ndioxi ku ra si̱kuaꞌa ndiꞌi ya.

²⁹ Süvi xaꞌa ndóꞌo̱ káꞌan i ya ndikani väꞌa ini ndo, xaꞌa naꞌa, na xíto ya íkan ndo saa kua káꞌan i. Chi na ikán ta án sana ndikani ini na ya köo xíniñuꞌu ndo ikan ndo saa. Chi yeꞌe, vani xa íyo ndíka i ya kuxi i ndiꞌi va ñaꞌa, sundi yeꞌe, ta xáꞌnu va ini i xaꞌa ya ndíkani ini na taꞌan yo, na vita ini.

³⁰ Tá tu táxi i tixaꞌvi ndaꞌa Ndioxi xaꞌa ñaꞌa xíxi i, ta ¿Ndachu kánaꞌa naꞌa xaꞌa i ya xíxi i ya? káchi na, káꞌan na.

³¹ Sundi yeꞌe, ta ya káꞌan i xiꞌin ndo ku ya yóꞌó: Tá íkan ndo ndá ka mií ñaꞌa án ya xíxi ndo ku ya án ya xíꞌi ndo ku ya, ta xaa kaꞌnu ndo ra xaꞌa ndiꞌi va ya.

³² Ta küvi ikan ndo ñaꞌa xiꞌin na taꞌan yo, ya sindikava ndo ini na, án na judío ku na, án süvi na judío ku na, án na kándixa Tata yo Jesucristo ku na, ta küvi ikan ndo saa xiꞌin na.

³³ Vaꞌa ka ikan ndo tá kuꞌva íkan yeꞌe: ndiꞌi saa kivi xáꞌa i ndee xiꞌin na, síndiko i ini na. Nina xaꞌa inka na ndíkani ini i, ni köo ndíkani ka ini i ndisaa xaꞌa mií i, ya ná kuchiñu chindee taꞌan i xiꞌin na ya kuchiñu na kaku na.