1 Corintios 1 - Xochapa Mixteco

Káꞌan ndioxi ra Pablo xiꞌin na ndóo ñuu Corinto

¹ Yeꞌe Pablo xiꞌin ra ñani yo ra Sóstenes, uvi saa nde táa tutu yóꞌó xaa ya nuu ndo. Ta yeꞌe kúu i apóstol, ra ka̱na Tata yo Jesucristo xáa chiñu nuu ra, chi xa saa chi̱tuni mií Ndioxi ikan ra xiꞌin i.

² Saa tíꞌvi nde tutu yóꞌó xaa ya ndaꞌa ndóꞌo̱, ñani yo, ndóo ñuu Corinto. Saa chi ndóꞌo̱ ku ndo ka̱na Ndioxi ta xa xa̱a i̱í ra ndóꞌo̱ tixin Tata yo Jesucristo. Ta iin káchi saa xa̱a i̱í tu ra ndiꞌi ka na ndóo ndiꞌi saa kúu ñuu nuu xáa kaꞌnu na kivi Tata yo Jesucristo, chi saa tu na ikán va, Tata tu na ikán va ku ra.

³ Ta ndiꞌi saa kivi ná taxi ni ra ya vaꞌa ndaꞌa ndo, koo vaꞌa ni ndo xiꞌin ya vaꞌa, ya ndi̱niꞌi uun ndo nuu Iva yo Ndioxi xiꞌin Tata yo Jesucristo, kúꞌvi ni ini ra xíni ra ndóꞌo̱.

Táxi ni ra Pablo tixaꞌvi ndaꞌa Ndioxi

⁴ Ndiꞌi saa kivi táxi ni i tixaꞌvi xaꞌa ndo ndaꞌa Ndioxi, ra kándixa i, chi vaꞌa ni ra si̱niꞌi uun ra ya vaꞌa nuu ndo xaꞌa ya ti̱ꞌvi ra Tata yo Jesucristo ki̱xi ra ñuu ivi sikaku ra ndóꞌo̱.

⁵ Saa chi tixin Jesucristo kua ta̱xi ni Ndioxi ya vaꞌa ndaꞌa ndo ya kuchiñu ndo ndituꞌun ndo ya vaꞌa xiꞌin na ivi, saa ta̱xi ra ya ndíchi ni ndaꞌa ndo.

⁶ Ta ya yóꞌó ku ya vaꞌa ni káꞌan xaꞌa ndo, chi ndee ni vaꞌa ku̱ndaa teꞌe ini ndo xiꞌin tuꞌun ya ndi̱kaꞌan nde xiꞌin ndo xaꞌa Tata yo Jesucristo.

⁷ Xaꞌa ya ikán kua nda iin ñaꞌa vaꞌa köo kümani ka nuu ndo, nani tá ndátun ndo iin saa nda kivi tá ná ndiko koo Tata yo Jesucristo kixi tuku ra ñuu ivi yóꞌó.

⁸ Chi suvi mií Ndioxi ku ra xáꞌa ni ndee xiꞌin ndo, nda kivi tá ná ndiko koo Tata yo Jesucristo, ta nditaꞌan ra ndóꞌo̱ ya köo nda iin kuachi kúu mií ndo.

⁹ Vaꞌa ni Ndioxi xiꞌin yo, chi ndee ni vaꞌa síxinu ra ya káꞌan ra xiꞌin yo. Xaꞌa ya ñaa kua ka̱na mií ra ndóꞌo̱ ya iin ndi̱kutaꞌan ndo xiꞌin Seꞌe ra, ra kúu Tata yo Jesucristo.

Väꞌa taꞌvi taꞌan naꞌa, na kándixa Jesucristo

¹⁰ Saa káꞌan i xiꞌin ndóꞌo̱ ñani yo tin kuꞌva yo, xíkan ni i ya mani nuu ndo, tixin ndee Tata yo Jesucristo káꞌan i xiꞌin ndo, ya ná ndikitaꞌan vaꞌa ni ndo koo ndo xiꞌin taꞌan ndo, ta iin yuꞌu ná koo ndo, täꞌvi taꞌan ndo, vívií koo ndo xiꞌin taꞌan ndo, iin káchi ndikani xi̱ní ndiꞌi ndo.

¹¹ Káꞌan i saa xiꞌin ndo ñani mií yo, chi ku̱ndaa ini i xaꞌa ndo ya káni taꞌan ndo xiꞌin taꞌan ndo, káchi sava na veꞌe ra Cloé ndítuꞌun na xaꞌa ndo xiꞌin i.

¹² Ta ya káꞌan i xiꞌin ndo ku ya yóꞌó, chi väꞌa íkan sava ndo chi káꞌan ndo soꞌva: “Yeꞌe, ta ra Pablo ndíkun i”, káchi ndo. Ta sava tuku ndo káꞌan “Yeꞌe ta ra Apolos ndíkun i”, káchi ndo. Ta sava tuku ndo káꞌan: “Yeꞌe, ta ra Pedro ndíkun i”, káchi ndo. Ta sava tuku ndo káꞌan “Yeꞌe ta Cristo ku ra ndíkun i”, káchi ndo.

¹³ Ta ¿án ndi̱taꞌvi taꞌan va Cristo kua? ¿Án ra Pablo va ku ra ndi̱xiꞌi nuu cruzin xaꞌa kuachi ndo kua? Ta ¿án tixin kivi ra ikán va kua chi̱chi ndo kua?

¹⁴ Táxi ni i tixaꞌvi ndaꞌa Ndioxi, chi nda iin ndo köo ndi̱sikúchi i, iindaa ra Crispo xiꞌin ra Gayo ku nda si̱kuchi i.

¹⁵ Xaꞌa ya ñaa kua nda iin ndo küvi kaꞌan xaꞌa i ya si̱kuchi i ndóꞌo̱ tixin ndee kivi mií i.

¹⁶ Iindaa na veꞌe ra Estéfanas ku na si̱kuchi i, ta köo ñúꞌu ini i án ndá ka naꞌa si̱kuchi i.

¹⁷ Ta vaꞌa ná kundaa ini ndo chi Cristo ta köo ndi̱tiꞌvi ra yeꞌe ya sikuchi i naꞌa. Sundi ti̱ꞌvi ra yeꞌe ya kaꞌan ndoso i tuꞌun vaꞌa xaꞌa ra xiꞌin na ivi, ya kuchiñu na kaku na. Ta köo ndíkaꞌan i xiꞌin na xiꞌin tuꞌun ndíchi ni, ya ná sïndiꞌi xaꞌa i ndee, ya ná chïkaa ni̱nu̱ ni i ya ndi̱xiꞌi Cristo ndaꞌa cruzin.

Jesucristo ku ra si̱naꞌa ndee Ndioxi nuu yo xiꞌin ya ndíchi kúu mií Ndioxi

¹⁸ Tá ndíkani i tuꞌun xaꞌa Cristo ya ndi̱xiꞌi ra nuu cruzin, ta tá káa tuꞌun kíꞌvi saa káa ya káꞌan i nuu naꞌa, na ku̱aꞌan ichí nuu ndiꞌi xaꞌa na. Sundi mií yo síkaku Ndioxi, ta xíni yo tuꞌun yóꞌó ta ndee ni ndee kúu mií ya xaꞌa ya kúu ya tuꞌun Ndioxi.

¹⁹ Tá íyo tuꞌun Ndioxi ya ta̱a na xinaꞌa, káchi ya saa: “Vaxi kivi ta sindiꞌi xaꞌa i ya ndíchi xi̱ní kúu mií na ñuu ivi yóꞌó, Ta saa sindiꞌi xaꞌa i ya xínituni na, ya vaꞌa na, ya káꞌan na ndíchi ni xi̱ní na, túvi mií na”.

²⁰ Ta ná kundaa ini yo, chi na ndíchi ni xiꞌin naꞌa, na ndee ni si̱kuaꞌa vaꞌa, xiꞌin na ndee ni vaꞌa xíni xaꞌa ñaꞌa ya íyo ñuu ivi yóꞌó, ta ni köo iin káchi íin ya ndíchi kúu mií na yóꞌó nuu ya ndee ni ndíchi kúu mií Ndioxi. Ta ya ndíchi kúu mií na ñuu ivi yóꞌó, tá káa ñaꞌa ya köo ndáa yaꞌvi va saa káa ya nuu Ndioxi.

²¹ Xaꞌa ya ndíchi ni xi̱ní mií na ñuu ivi yóꞌó túvi na, yakan kua köo ndi̱xiin na kandixa na Ndioxi. Xaꞌa ya ikán kua vaꞌa ka si̱kaku Ndioxi naꞌa, na kándixa tuꞌun ya ndi̱tuꞌun nde xaꞌa Jesucristo xiꞌin na. Vani kuaꞌa ni naꞌa ndíkani ini xaꞌa tuꞌun ya ndi̱kaꞌan nde xiꞌin na, tuꞌun kíꞌvi va kua túvi na.

²² Na judío ta xiꞌna kúni na kuni na yatúꞌun Ndioxi, saa kandixa na, ta na griego ta ya ndee ni kúni na kuni soꞌo na ku tuꞌun ya ndíchi ni, saa kandixa na.

²³ Sundi ndeꞌe, ta xaꞌa Jesucristo, ra ndi̱xiꞌi nuu cruzin xaꞌa kuachi va yo kua káꞌan ndoso nde xiꞌin na. Ta tuꞌun yóꞌó nda tá káa yu̱ú nuu káchiꞌi xaꞌa na kóyo na, saa káa ya nuu na judío. Ta na griego ndíkani ini na, tá káa ya kíꞌvi va, saa káa ya nuu na.

²⁴ Sundi nuu naꞌa, na ka̱na Ndioxi kundikun ra, án na judío ku na, án süvi na judío ku na, ta tuꞌun yóꞌó kuu Cristo, ta ndixa ni va ndee kúu mií ya nuu na, ta saa ndíchi ni va ya chi nuu Ndioxi ke̱e ya vaxi ya, káchi na.

²⁵ Saa chi tuꞌun Ndioxi ya köo ndáa yaꞌvi nuu naꞌa, na ndíchi ni túvi mií na ñuu ivi yóꞌó, ya ikán ka ku ya ndáa yaꞌvi ni nuu ya xínituni mií na. Ta ya ndíkani ini naꞌa, káꞌan na xaꞌa tuꞌun Ndioxi, ni köo ndee ya, vita ni ya káchi na. Ta ya ikán ka ku ya yáꞌa ni ka ndee, nuu ndee ya kúu mií na ñuu ivi yóꞌó.

²⁶ Ta xa xíni ndo ñani yo xiꞌin kuꞌva yo, ndikani ini ndo ndá kuꞌva ndi̱xiyo ndo tá täꞌan ka kana Ndioxi ndóꞌo̱. Süvi ndiꞌi ndo ndíchi ni ndi̱xiyo, ta ni köo ndi̱xinuu vaꞌa ni tuꞌun ndo ñuu ndo, ni köo ndi̱xiyo tu ndo seꞌe naꞌa, na ndee ni, ni saa va ta ka̱na Ndioxi ndóꞌo̱.

²⁷ Ta ndi̱kaxin Ndioxi na kíꞌvi ñuu ivi yóꞌó ya ná sikaꞌán ra nuu na ndíchi, saa ndi̱kaxin ra na vita ini ya ná sikaꞌán ra nuu na ndaku, na ndee ni xáꞌnda chiñu ñuu ivi yóꞌó.

²⁸ I̱kan Ndioxi saa xiꞌin ndo ndi̱kaxin ra ndóꞌo̱ na vita ini, ndóꞌo̱ köo ndáa yaꞌvi nuu na ñuu ivi yóꞌó. I̱kan ra saa xiꞌin ndóꞌo̱ ya ná kundaa ini na ya kúndasi ni nuu ra ndiꞌi ñaꞌa ya ndee ni ndáa yaꞌvi nuu mií na.

²⁹ I̱kan Ndioxi saa, ya ná käꞌan vaꞌa nda iin naꞌa xaꞌa mií na nuu ra.

³⁰ Ta Ndioxi i̱kan ra saa, si̱kitaꞌan ra ndóꞌo̱ xiꞌin Tata yo Jesucristo. Ta mií Tata yo Jesucristo ku ra táxi ya ndíchi ndaꞌa yo, saa ndása tu ra yoo ndúu yo naꞌa, na köo ka kuachi kúu mií nuu ra, ta ndása i̱í ra yoo, saa ndáxin ra yoo ndaꞌa kuachi nuu núꞌni yo.

³¹ Soꞌva ku̱u, tá kuꞌva káꞌan tuꞌun Ndioxi, ya ta̱a na xinaꞌa, káchi ya saa: “Köo ndá yáꞌvi ya xaa kaꞌnu ni naꞌa xiꞌin mií na, ta vaꞌa ka ná xaa kaꞌnu na Ndioxi xaꞌa ya vaꞌa íkan ra xiꞌin na”.