तीतस 3 - कोन्छ्योककी सुङचुका ति टेङ्बु नोके तिराङ की 1 ओङ्ज्येन कितुपतिवा ताङ मी छ्येतिवी ओङला देनी तिवी खला ङ्येन्दुप ताङ लाका टेङ्बु कितुपला नाम्साङ तिङ माछे सिनी मीतिवाला टोङ्गु बिन। 2 तमा तिवा सी तेन्दोकला साङ मालङ्शी, खाँदा मिकिशी, सेम बोल्मु ताङ मी तेरीकी मुला कुसु ज्यम्बु वुङ गोकिवी सिनी तिवाला टेन्सो कि च्यी। 3 च्यिलासिसिन येशूला तेपा कितुप गोमाला ङ्यिराङ साङ हम्बा कितुप ताङ अम्बारङ्शिङ कितुप ताङ थङ्गी कितुप ताङ शम्डेन कितुप ताङ किर्मु तिराङ छोलुप ताङ ठतोक कितुप ताङ मीतिवी ङ्यिङ्मर क्यावु ताङ च्यिककी च्यिकला ङ्यिङ्मर कितुप वोतुप्जा। 4 यिने दिक्पा ने थर ज्यितुप कोन्छ्योककी कटिनकी जोसालेन्सिन 5 दाक्पुला थर च्यिसुङ। ती ति दाक्पी लाका टेङ्बु क्यावु तप्की मिन, खोला च्यम्बा वोतुप तप्की यिन। खोकी दाक्पुला चाङ्मा जोनी मिजी सम्बा नङ्गुप ताङ खोकी थु चाङ्मा नेसुर दाक्पुला सम्बा फोनी थर च्यितुप यिन। 6 ती थु चाङ्मा ति खोकी दिक्पा ने थर ज्यितुप येशू ख्रीष्ट नेसुर दाक्पुला ग्यक्चे क्यानी नाङ्सुङ। 7 तुक क्यानी खोकी कटिनकी दाक्पु टेङ्बु च्युङ्नी दाक्पुला नाम्साङ मिसिवु मिजी थोप छ्योवु रेवा नाङ्सुङ। 8 दी ताम्ङे ति टेङ्बु यिन, ख्यिराङ दी ताम्ङेला ङार की सिनी ङ नो कितिन। तुक क्यानी सी कोन्छ्योकला तेपा किवे, तिवी लाका ल्यामु कितुपला ङ्याम्ले किशी। तुक कितुप ति मीतिवी थोक्ला छासे ल्यामु ताङ ख्येप्साङ वोतुप यिन। 9 यिने ताम्ङे अम्बारङ्शिङ कितुप ताङ गिपाकी कोर्ला फेन मोथोवु ताम्ङे कितुप ताङ खाँदा कितुप ताङ ठिमकी कोर्ला थमु ग्यकुपतिवी नेसुर क्योक्से की, च्यिलासिसिन दी ताम्ङेतिवा ति ख्येप्साङ मेतुप ताङ तेर्मे यिन। 10 ख्ये बेतुप मीला ति थेङ्मा च्यिक चोयी ङ्यी चोयी टोङ्गु बिन, तमा तीकी मुला काङ साङ लिङ्गु तेङ्गु माकी। 11 ती मी ति दुक्टा ताङ दिक्छेन यिन्दुप ति हाक्कोवा की। तमा ती ति खुरुङ राङ क्येन फोकिवी। तिङ्मी टोङ्गु 12 अर्तिमास ताङ तुखिकसला ख्योरो ते तोङ्गुप पेला ख्युरुङ निकोपोलिसला ङे ते यिन्ज्यिक मिन्ज्यिक शोक। च्यिलासिसिन ङ गुन्बी ल ति तेराङ देतुप सिनी नासाम तङ्यिन। 13 वकील जेनास ताङ अपोल्लोस फार छुर कोरा ग्यकुप पेला ल्यामो क्यानी दाल्जा किसा! तिवाला काङ साङ ङ्युङ्मु मेङ्शी। 14 दाक्पी मीतिवी नरी लाका ल्यामु किशी, तमा कतुकारला ख्येलुपतिवाला दाल्जा कि थुप्नी ङोछाला मेख्येल्शी। 15 ङ ताङ मुला वोतुपतिवा तेरीकी ख्यिराङला टसी देलेक सिक्या वोतो। कोन्छ्योकला तेपा क्यानी ङ्यिराङला ङ्यिङ्ज्ये कितुपतिवाला साङ टसी देलेक सिनी लोपा। कोन्छ्योककी कटिन ति ख्यिराङ तेरीला वुङ्शिता। |
© 2014, Wycliffe Bible Translators, Inc. All rights reserved.
Wycliffe Bible Translators, Inc.