रोमी 7 - कोन्छ्योककी सुङजेन्दीकी पे नेसुर ठिमकी कोर्ला ताम्ङे क्यावु 1 अच्युनुपतिवा, दी ताम्ङे ति ङ ठिमकी कोर्ला हाक्कोवुतिवाला सिरिन। मी ति सेन्बु वोता सेक ठिमकी ओङला लुकिवी सिरुप ति ख्यिराङला छ्या मे? 2 तीकी कोर्ला ङ ख्यिराङला पे यी शेतिन। पुम्पेजा मिरा च्यिककी जेन्दी क्यासिमा तीकी ख्योवा वोता सेक ख्योवी ओङला देकिवी। यिने तीकी ख्योवा शिसुङ सिसिन ती ति ख्योवी ओङ नेसुर थर्किवी। 3 तुक क्यानी ख्योवा माशि वोतुप पेला राङ तीकी मी यम्बी मुला जेन्दी क्यासिन तीकी शम्डेन क्यावु यिन, यिने ख्योवा शिसिमा मी यम्बी मुला जेन्दी क्यासिन ख्योवी ओङ नेसुर थरुप तप्की तीकी शम्डेन क्यावु मिन। 4 ती तप्की अच्युनुपतिवा, ख्यिराङ ख्रीष्ट ताङ मुला ठिमकी थोक्ला साङ शिसुङ। तुक क्यानी ख्यिराङ साङ ठिमकी ओङ नेसुर थर्नी शेप नेसुर ङोसु लावु ख्रीष्टकी मुला च्यिक्पा राङ च्युङ वे। तुक क्यानी ख्यिराङ डेलु गरुप दोके कोन्छ्योककी थोक्ला लाका ल्यामु कि गोकिवी। 5 तोङ्ला दाक्पु दिक्पी ओङला मिजी क्योङ्यिन वोतुप पेला ठिम नेसुर दाक्पुला लाका मेलोवा कितुप नासाम वानी तीकी दाक्पुला ज्युक्ला शि ज्यितुप दिक्पा कि च्यिसुङ। 6 यिने त याङ दाक्पु ठिमकी थोक्ला शिनी ठिमकी ओङ ने थर्नी वे। तुक क्यानी तन्दा दाक्पु ठिमकी थेप नाङ्ला टि वोतुप दोके किताङ नालु ङ्यिङ्बा मिन, कोन्छ्योककी थु चाङ्माकी सुङ्गुप किताङ नालु सम्बा क्यानी कोन्छ्योकला शब्ज्यी बुल्गिवी। मोशाकी ठिम नेसुर दिक्पा वावु 7 त ङ्यिराङ काङ सिरुप? काङ ठिम ति दिक्पा यिन रो? तुकै मिन। दोजो मोशाकी ठिम मेतुप यिन्सिन दिक्पा काङ यिन सिरुप ति ङला हाक्मोकोवी। ठिमकी थेप नाङ्ला ख्युरुङ देर्पा माकी सिनी सिमाक्यावु यिन्सिन देर्पा काङ यिन सिरुप ति ङला हाक्मोकोवुजा। 8 यिने ठिमकी नाङ्ला वोतुप कोन्छ्योककी कला देर्पा माकी सिनी सिमाक्यावु पेला च्यु ल्हानी ङला तेरी परकी देर्पा कितुप नासामतिवा शार्सुङ। तुक क्यानी ठिम मेतुप यिन्सिन दिक्पा ति शेप यिन। 9 गोमाला ठिम मेतुप पेला ङ सेन्बु राङ वोतुप्जा, यिने कोन्छ्योककी क वासिमा दिक्पा काङ यिन सिरुप ताङ ङ दिक्छेन यिन सिरुप ति ङे हाक्कोसुङ। तुक क्यानी ङ ति दिक्पाला शोर्नी शेपला ख्येल्सुङ। 10 तमा कोन्छ्योककी मिजी तेरुपला थाक्छ्येन नङ्गुप क वासिमा ङ ति शेपला ख्येलुप यिन सिनी ङे हाक्कोसुङ। 11 तमा ती कोन्छ्योककी नङ्गुप क नेसुर राङ दिक्पाकी च्यु ल्हानी ङला जिनोक जोसिमा ङला सेसुङ। 12 तुक क्यानी मोशाकी ठिम ति टेङ्बु यिन, ठिमला वोतुप क साङ चाङ्मा ताङ टेङ्बु ताङ ल्यामु वे। 13 काङ तुकै यिन्सिन ती ल्यामु वोतुप तीकी ङला सेतुप यिन रो? तुकै मिन। दिक्पा काङ यिन सिरुप ति छ्या देन्दुपला दिक्पाकी ल्यामु वोतुप ठिम थ्वोनी ङला सेतुप यिन। तुक क्यानी ठिमकी क नेसुर दिक्पा ति मङ मेलोवा वोतुप च्युङ्सुङ। सेमला वोतुप नासाम ङ्यी 14 ठिम ति कोन्छ्योककी थु चाङ्माकी नङ्गुप यिन सिरुप ति दाक्पुला छ्या वे। यिने ङ ति चाङ्मा मेतुप तप्की दिक्पाकी योक्पु च्युङ्गुप यिन। 15 ङ काङ कियी वे सिरुप ति ङला हाक्मोकोवी। ङे काङ कितुप नोक्यावे, ती ति मिकिवी। यिने ङे काङ मिकी सिनी नोक्यावे, ती ति किवी। 16 दोजो ङे नो माक्यावु लाका क्यासुङ सिसिन ङ ती ठिम ति ल्यामु यिन सिनी ङ्येनिन। 17 तुक क्यानी तसाम ङे क्यावु लाका मेलोवा ति ङे क्यावु मिन, यिने ङे सेमला वोतुप दिक्पाकी कि च्यितुप यिन। 18 तुक क्यानी दी ताम्ङे ति ङला छ्या वे। ङे मिजीला ताम्ङे ल्यामु काङ साङ मे। च्यिलासिसिन काङ ल्यामु नोके ती लाका ति कितुप सिनी ङे नोक्यासिनाङ ती ति ङे कि मुथुपी। 19 ङे काङ लाका ल्यामु कितुप नो क्यावे, ती ति मिकिवी। यिने ङे कितुप नो माक्यावु लाका मेलोवा ति ङे किवी। 20 चुका ति ङे मिकी सिनी नो क्यावे, ती ति क्यासुङ सिसिन ती कितुप ति ङ मिन, यिने ङे नाङ्ला वोतुप दिक्पाकी कि च्यितुप यिन। 21 तुक क्यानी ङे हाक्कोवु खक्छ्येवु ताम्ङे ति काङ यिन सिसिन ङला ल्यामु कितुप नासाम वोसिनाङ दुक्टा कि ज्यितुप डे ति ङे मुला वोतुप यिन। 22 ङे सेमगी दिङ नेज्युनी कोन्छ्योककी ठिमला वोतुप दोके लाका कितुप गा लासिनाङ 23 ङे सेमला वोतुप यम्बा ठिम दुक्टाकी नासाम कुतुक शर्किवी। ती ठिम ति कोन्छ्योककी ठिमला गा लङ्गुप ङे सेमगी ठिम ताङ मुला कशेन माडिक्नी ङे मिजीला वोतुप दिक्पी ठिमला शोर्किवी। 24 त ङ काङ कितुप्जा, ङ दिक्पी ओङला ख्येल्नी टला छ्याक्पा गाल्सुङ। सी ङला दिक्पा नेसुर वुङ्गुप शेप ने थर ज्यि थुप्किवी? 25 कोन्छ्योकला थुचिछे बुलिन, च्यिलासिसिन खोकी दाक्पी चोवो येशू ख्रीष्ट नेसुर ङला शेप ने थर ज्यिकिवी। ती तप्की ङ ङे सेमला ति कोन्छ्योककी ठिमला शब्ज्यी बुलिन, यिने ङे दिक्पी किताङ नालु तीकी दिक्पाकी ठिमला शब्ज्यी किवी। |
© 2014, Wycliffe Bible Translators, Inc. All rights reserved.
Wycliffe Bible Translators, Inc.