रोमी 4 - कोन्छ्योककी सुङअब्राहामकी तेपा क्यावु 1 तुक क्यानी दाक्पी हङ्गावा अब्राहाम ति कोन्छ्योककी थोङ्दाङला टेङ्बु वोतुप कोर्ला काङ हाक्कोसुङ? 2 दोजो अब्राहामकी लाका ल्यामु क्यानी टेङ्बु च्युङ्गुप यिन्सियाङ खोकी साङ तीकी थोक्ला तेके कि थुप्किवी, यिने कोन्छ्योककी थोङ्दाङला ति तेके कि मुथुपी। 3 च्यिलासिसिन कोन्छ्योककी सुङगी नाङ्ला “अब्राहामकी कोन्छ्योकला तेपा क्यावु तप्की खोकी तीला टेङ्बु वे सिनी सेमला लासुङ।” सिनी टि वे। 4 तमा लाका कितुप मीला ल तेरुप ति ज्यिन्दाककी कटिन नेसुर मिन, तीकी क्यावु लाकाकी ल बिन्दुप यिन। 5 चुका मी तीकी टेङ्बु वोतुप लाका ति मिकिवी, यिने कोन्छ्योक ति मी मेटेङ्बुतिवाला साङ टेङ्बु वे सिनी सेमला लिङ्गुप कोन्छ्योक यिन सिनी तेपा कितुप पेला तीकी क्यावु तेपाला टेङ्बु वे सिनी खोकी सेमला लिङ्गिवी। 6 ती तप्की लाका टेङ्बु माक्यानी साङ टेङ्बु वे सिनी खोकी सेमला लिङ्गुप मीतिवाला मोलाम थोपुप कोर्ला ग्येल्वु दाऊदकी दुक सिक्या वे, 7 “कोन्छ्योककी नङ्गुप ठिमला मातेन्सिनाङ तिवी दिक्पा तानी दिक्पा ने थरुप मीतिवाला मोलाम थोपुप यिनो। 8 चो दिक्पा क्यासिनाङ चोवो कोन्छ्योककी दिक्पा क्युर्नी बिन्दुप मी तीला मोलाम थोपुप यिनो।” 9 ती मोलाम ति यहूदी च्येतुप लुक्सु क्यावुतिवी थोक्ला तिराङ यिन की, च्येतुप लुक्सु माक्यावुतिवी थोक्ला साङ यिन? अब्राहामकी साङ तीकी क्यावु तेपा नेसुर राङ टेङ्बु वे सिनी कोन्छ्योककी सेमला लासुङ सिनी गोमाला सिक्यावु ताम्ङे नेसुर दाक्पी हाक्कोकिवी। 10 चुक क्यानी अब्राहामला टेङ्बु वे सिनी खोकी सेमला लिङ्गुप यिन? तीकी च्येतुप लुक्सु क्यावु तिङ्ला तीला टेङ्बु वे सिनी खोकी सेमला लिङ्गुप यिन की, ती सिनाङ गोमाला के तीला टेङ्बु वे सिनी सुङ्गुप यिन? तीला टेङ्बु वे सिनी खोकी सेमला लिङ्गुप ति च्येतुप लुक्सु क्यावु तिङ्ला मिन, गोमाला के यिन। 11 अब्राहामकी च्येतुप लुक्सु कितुप सिनाङ गोमाला कोन्छ्योकला तेपा क्यासुङ। ती तप्की तीकी च्येतुप लुक्सु क्यावु ति कोन्छ्योककी थोङ्दाङला टेङ्बु च्युङ्गुप यिन सिरुपला लज्युर ग्यकुप त तिराङ यिन। अब्राहाम ति च्येतुप लुक्सु माक्यासिनाङ कोन्छ्योकला तेपा क्यावु मीतिवा तेरीकी हङ्गावा च्युङ्गुप यिन। तुक क्यानी च्येतुप लुक्सु माक्यावुतिवाला साङ टेङ्बु वे सिनी कोन्छ्योककी सेमला लिङ्गिवी। 12 ती तिराङ मिन, अब्राहाम ति च्येतुप लुक्सु क्यावुतिवी हङ्गावा साङ यिन। च्येतुप लुक्सु क्यावु तिराङ मिन, च्येतुप लुक्सु कितुप सिनाङ गोमाला के कोन्छ्योकला तेपा कितुपतिवा तेरीकी हङ्गावा यिन। थाक्छ्येन नङ्गुप ति तेपा नेसुर गिवी 13 तमा अब्राहाम ताङ खोकी गिपातिवाला ती जम्बुलिङ ति अंश ग्यप्नी नङ्गिवी सिनी कोन्छ्योककी थाक्छ्येन नङ्गुप ति तिवी मोशाकी ठिमला सिक्यावु दोके लाका क्यानी मिन, यिने तेपा क्यानी टेङ्बु च्युङ्गुप नेसुर यिन। 14 मोशाकी ठिमला दोके लाका कितुपतिवी अंश थोपुप यिन्सिन तेपा कितुप ति काङ साङ फेन मोथोवु ताङ खोकी थाक्छ्येन नङ्गुप ति तेर्मेला डिवी। 15 च्यिलासिसिन मोशाकी ठिमला वोतुप कतिवा मेङ्येन्दुपतिवा कोन्छ्योककी पर्च्याला ख्येल्गिवी, यिने ठिम मेतुप यिन्सिन ठिमला मेङ्येन्दुप साङ मेवी। 16 ती तप्की कोन्छ्योककी थाक्छ्येन नङ्गुप ति खोला तेपा कितुप मीतिवाला बिन्दुप यिन। ती थाक्छ्येतुप ति कोन्छ्योककी कटिन नेसुर वावु तप्की मोशाकी ठिमला युकुप मीतिवी थोक्ला तिराङ मिन, अब्राहामकी दोके तेपा कितुप तीकी गिपातिवा तेरीला तेरुप सिनी तेन्तेन क्यावु यिन। तुक क्यानी अब्राहाम ति तेपा कितुप मी तेरीकी हङ्गावा यिन। 17 ती ति कोन्छ्योककी अब्राहामला “ङ ख्युरुङला मिरिक बङीकी पपा जोयिनो।” सिनी खोकी सुङला टिवु दोके राङ यिन। ती थाक्छ्येन नङ्गुप ति अब्राहामकी तेपा क्यावु कोन्छ्योककी तेन्तेन क्या नङ्गुप यिन। खो ति शेपतिवाला मिजी नङ्गुप ताङ मेतुप च्यालकतिवाला वोतुप जो नङ्गुप कोन्छ्योक यिन। 18 अब्राहामला काङ रेवा मेसिनाङ कोन्छ्योकला तेपा क्यानी रेवा क्यावु तप्की खो मिरिक बङीकी हङ्गावा च्युङ्सुङ। ती ति कोन्छ्योककी अब्राहामला “ख्योरो गिपातिवा बङी फेल्गितो।” सिनी सुङ्गुप दोके राङ यिन। 19 तो मिसिन लो सयी लेपुप छलुप अब्राहाम शितुछ्येप ताङ पेर्मी साराला पेजा मेक्येवी सिरुप छ्या वोसिनाङ कोन्छ्योकला तेपा रम्बु क्यानी 20 कोन्छ्योककी थाक्छ्येन नङ्गुप ताम्ङेला च्यिक साङ नाम्दोक माक्या। बोरु तेपा रम्बु क्यानी कोन्छ्योकला मोवा क्यासुङ। 21 कोन्छ्योककी खोरो थाक्छ्येन नङ्गुप ति तेरी छे ज्यितुप ओङ वे सिनी अब्राहामकी तेन्तेन क्यासुङ। 22 तीकी कोन्छ्योकला तेपा क्यावु तप्की “अब्राहाम टेङ्बु वे सिनी कोन्छ्योककी सेमला लासुङ।” सिनी खोकी सुङला टि वे। 23 “अब्राहाम टेङ्बु वे सिनी कोन्छ्योककी सेमला लासुङ।” सिरुप सुङ ति अब्राहामकी थोक्ला तिराङ टिवु मिन, 24 येशू ख्रीष्टला शेप ने ङोसु लोङ्गुप कोन्छ्योकला तेपा क्यानी खोकी थोङ्दाङला टेङ्बु ङ्येतुप दाक्पु तेरीकी थोक्ला साङ टिवु यिन। 25 येशू ख्रीष्ट ति दाक्पी दिक्पी थोक्ला टुङ्सुङ, तमा दाक्पु कोन्छ्योककी थोङ्दाङला टेङ्बु ङ्येतुपला खो ङोसु लासुङ। |
© 2014, Wycliffe Bible Translators, Inc. All rights reserved.
Wycliffe Bible Translators, Inc.