मर्कूस 15 - कोन्छ्योककी सुङयेशूला पिलातसकी दोङ्ला टि गलुप ( मत्ती २७:१-२ , ११-२६ ; लूका २३:१-५ , १३-२५ ; यूहन्ना १८:२८–१९:१६ ) 1 ती सला टोपला टेताङ कोङ्यार छ्येतिवा ताङ यहूदी गोमा कितुप छ्येतिवा ताङ यहूदी छ्योकी गेकेनतिवी यहूदी छोक्पाकी मी छ्येतिवी मुला जोम्नी केवुल क्यासुङ। तमा तिवी येशूला कोङ किन्नी टि गल्नी रोमी ठिम कितुप मी छ्ये पिलातसला चेक तेसुङ। 2 पिलातसकी येशूला “ख्युरुङ यहूदीतिवी ग्येल्वु यिन?” सिनी टिसुङ। तमा येशूकी “यिन, ख्योरे सिक्यावु दोके यिन।” सिनी सुङ्सुङ। 3 कोङ्यार छ्येतिवी खोला क्येन बङी ग्यप्सुङ। 4 तुक क्यानी लोङ पिलातसकी खोला “काङ ख्युरुङला च्यिक साङ टिलेन मे? ल्हो ताङ, तिवी ख्युरुङला चुका क्येन मङ्मु ग्यकिनोक।” सिनी सिक्यासुङ। 5 यिने येशूकी काङ साङ टिलेन मासुङ, तुक क्यानी पिलातस हलेवा क्यासुङ। 6 यहूदी थरुप तुछ्येनला चोन्खाङ नाङ्ला शोरुपतिवी पर नेमा मीतिवी पेतुप मिरा च्यिकला पिलातसकी पि तोङ ज्यितुप लुक्सु नोक। 7 ती पेला बरब्बा सिरुप मी ति लुङ्बाकी तेन्दोकला लानी मी सेतुप दुक्टातिवी मुला चोन्खाङला शोर्नोक। 8 मी मङ्मु पिलातसकी चाला वानी, “ले टेङ दोके क्यानी तलिङ साङ मी यी चोन्खाङ नेमा पि तोङ।” सिनी गोङ्बा शुसुङ। 9 तमा पिलातसकी तिवाला “ख्यिरा यहूदीतिवी ग्येल्वु सिरुप तीला ङ पि तोङ्गुप ति ख्यिरा नो किवी?” सिनी सिक्यासुङ। 10 कोङ्यार छ्येतिवी ठतोक लानी येशू ति खोरुङला चेक तेतुप यिन सिनी पिलातसला छ्या नोक। 11 यिने कोङ्यार छ्येतिवी मी मङ्मुला चेन्नी बोरु बरब्बाला पि तोङ सिनी सि च्यिसुङ। 12 पिलातसकी लोङ तिवाला टिसुङ, “तुकै यिन्सिन ख्यिरा यहूदी ग्येल्वु सिरुप तीला ङ काङ कितुप?” 13 तमा तिवा थोर ग्यप्नी, “तीला ग्यङ्शिङला कल्नी काँडी दाप्नी से!” सिनी सिक्यासुङ। 14 पिलातसकी टिसुङ, “दीकी काङ लाका मेलोवा क्या वे?” यिने तिवी मङ च्यार ग्यप्नी, “तीला ग्यङ्शिङला कल्नी काँडी दाप्नी से!” सिनी सिक्यासुङ। 15 पिलातसकी मी माङ्छ्योकला गा लोङ्गुपला बरब्बाला ति पि ताङ्नी येशूला ति पाङ्शर ताङ्सिमा ग्यङ्शिङला कल्नी काँडी दाप्नी सेतुपला चेक तेसुङ। रोमी मक्मीतिवी येशूला ङ्यप्च्ये क्यावु ( मत्ती २७:२७-३१ ; यूहन्ना १९:२-३ ) 16 ती ज्युक्ला रोमी मक्मीतिवी येशूला रोमी ठिम कितुप मी छ्ये देतुप खाङ्बी लेङाङला टि गाल्सुङ, तमा यम्बा मक्मीतिवा तेरीला कताङ्नी ते जोम च्यिसुङ। 17 तिवी येशूला छो मुक्पुकी छ्योवा यी कोन बिन्नी छेर्माङ वोतुप येल्का कुक्नी ग्येल्वी उशाक दोके जोनी खोकी गोला कोन बिन्सुङ। 18 तमा तिवी खोला “यहूदीतिवी ग्येल्वुला छ्याक छलो!” सिनी सिक्यासुङ। 19 लोङ तिवी ङ्युङ्मा थ्वोनी खोकी गोला बेपिन सिरा छ्यिन्दुर ग्यप्सुङ। तमा पुमुङ सला चुनी खोला शावा क्यासुङ। 20 खोला तुक क्यानी मारे ताङ सिन्सिमा छो मुक्पुकी छ्योवा ति पिनी खोकी नुम्बुप नम्सा ति येलुङ कोन बिन्सुङ। ती ज्युक्ला खोला ग्यङ्शिङ लोला ग्येलुपला टि गाल। येशूला ग्यङ्शिङ लोला कलुप ( मत्ती २७:३२-४४ ; लूका २३:२६-४३ ; यूहन्ना १९:१७-२७ ) 21 तमा मक्मीतिवी येशूला टिनी डोयी कितुप पेला सिमोन सिरुप छ्यिग्यपकी कुरेनी ग्येसाकी मी यी ती लामला वुङ्यिन कितुप ठेसुङ। ती ति अलेक्जेन्डर ताङ रुफसकी पपा यिनोक। मक्मीतिवी येशूला कल्नी सेतुप ग्यङ्शिङ ति तीला कार क्यानी खुर च्यिसुङ। 22 तमा तिवी येशूला गलगथा सिरुप दासाला क्याल्सुङ। (ती गलगथाकी तेन्दोक ति ‘कप्लीकी दासा’ सिक्यावु यिन।) 23 तिवी खोला मुर्र र्हेवु गुन्डुम छ्याङ बिन्सिनाङ खोकी माशे। 24 ती ज्युक्ला तिवी खोला ग्यङ्शिङ लोला कल्नी काँडी दाप्नी काल्सुङ। तमा तिवी खोकी नम्सा ति सुला थोप्किवे सिनी ग्येन ग्यप्नी गोसुङ। 25 येशूला ग्यङ्शिङ लोला ग्येलुप पेला टोपकी छ्युजी गु गल्नोक। 26 तमा ग्यङ्शिङ लोला खोला क्येन ग्यपुप यिकी ति “यहूदीतिवी ग्येल्वु यिन।” सिनी टिनी ज्याक्नोक। 27 तिवी येशूला ग्यङ्शिङला काँडी दाप्नी ग्येलुप पेला च्याक्पा मिरा ङ्यी साङ च्यिक ति खोकी यावी थाकाला ताङ च्यिक ति खोकी येन्बी थाकाला ग्यङ्शिङला काँडी दाप्नी काल्सुङ। 28 (तुक क्यावु ति कोन्छ्योककी सुङगी नाङ्ला “खो ति मी दुक्टातिवी पर्ला मिरा च्यिक दोके चिसुङ।” सिनी टिवु ति तेरी छेवुला यिन।) 29 ते ग्यङ्शिङकी लाम नेवा फार छुर युकुप मीतिवी गो युकिन सिरा येशूला मारे ताङ्नी, “ओ ल्हङाङ र्हम्नी ङ्यिमा सुमला जोयी सिरुप मी, 30 त खोरुङला राङ र्होक्नी ग्यङ्शिङ लो नेमा मर पाम शोक ताङ।” सिनी सिक्यासुङ। 31 तुक राङ क्यानी कोङ्यार छ्येतिवा ताङ यहूदी छ्योकी गेकेनतिवी साङ खोला मारे तोङ्यिन सिरा “दीकी मी यम्बाला ति र्होक्सुङ, यिने खोरुङला ति र्होक माथुप। 32 ओ इस्राएलकी ग्येल्वु ख्रीष्ट! त ख्युरुङ ग्यङ्शिङ लो नेमा पाप्नी शोक। तमा ङ्यिराङ ल्हानी तेपा कितुप्जा!” सिनी सिक्यासुङ। खोकी मुला ग्यङ्शिङ लोला कलुपतिवी साङ खोला मारे ताङ्सुङ। येशू टुङ्गुप ( मत्ती २७:४५-५६ ; लूका २३:४४-४९ ; यूहन्ना १९:२८-३० ) 33 तमा ङ्यिमी गुङगी छ्युजी च्यिङ्ङीला लुङ्बा तेरीला नक्तोमी गल्नी छ्युजी सुम सेक लुसुङ। 34 छ्युजी सुमला येशूकी थोर ग्यप्नी, “इलोई, इलोई, लामा सबखथनी?” सिनी सुङ्सुङ। दीकी तेन्दोक ति “ओ ङे कोन्छ्योक, ओ ङे कोन्छ्योक, ङला च्यिला क्युर्नी ज्यकुप यिन?” सिनी सिक्यावु यिन। 35 खोकी तुक सिनी वोरु तेन्दुप थोनी ते लानी देतुप मी ललाइ ललाइकी “ङ्येन ताङ, दीकी याङ एलियाला के कतोङ्गिनोक।” सिनी सिक्यासुङ। 36 तमा मिरा च्यिक ति छ्योङ्बाल ग्यम गल्नी ल्हेन्दा गुन्डुम छ्याङ क्युर्वुला पासिमा ती ति लकाम गोला ज्याक्नी येशूकी खला ज्योकिन सिरा “गुसा, काङ एलिया वानी दीला ग्यङ्शिङ लो नेमा बेप्किते ल्हाप।” सिनी सिक्यासुङ। 37 तमा येशू वोरु थोर ग्यप्नी टुङ्सुङ। 38 ती पेला यहूदी ल्हङाङ नाङ्ला ग्यावु गोयोल ति गो नेमा ज्युनी शाप सेक फेका ङ्यी गल्नी राल्सुङ। 39 येशू तुकै क्यानी टुङ्गुप थोङ्नी येशूला कलुप ग्यङ्शिङकी दोङ्ला लानी देतुप रोमी मक्मी सयी च्यिककी खकी छ्ये तीकी “दी मी ति वुतुङ के कोन्छ्योककी सेवु राङ यिनोक।” सिनी सिक्यासुङ। 40 ते ललाइ पुम्पेजातिवी साङ थाक्रिङ्बु नेसुर ल्हयी नोक। तिवी पर्ला मरियम मग्दलिनी ताङ याकूब टिक्पे ताङ योसेफकी आमा मरियम ताङ सलोमी साङ नोक। 41 तिवी येशू गालीलला ज्युवु पेला खोकी तिङ्ला तिङ्यानी खोला शब्ज्यी क्यावु पुम्पेजातिवा यिनोक। तमा ते येशूकी मुला यरूशलेमला वावु यम्बा पुम्पेजातिवा साङ बङी नोक। येशूकी फुङ्बुला कल्दोक क्यावु ( मत्ती २७:५७-६१ ; लूका २३:५०-५६ ; यूहन्ना १९:३८-४२ ) 42 ती छेर्मु ति टडिक कितुप ङासोप ङ्यिमाकी गोमी ङ्यिमा नोक। तमा नाम ल्होसिमा अरिमाथिया ग्येसाकी योसेफ तीकी ङाडेङ क्यानी पिलातसकी चाला गल्नी येशूकी फुङ्बु ति लाङ्सुङ। 43 दी योसेफ ति यहूदी छोक्पाकी मी छ्येतिवी पर्ला मिरा च्यिक नोक। तमा ती ति कोन्छ्योककी ग्येल्खाप वुङ्गुप ति गुनी देनोक। 44 येशू टुङ सिन्सुङ सिरुप थोनी पिलातस हलेवा क्यासुङ। तमा तीकी रोमी मक्मी सयी च्यिककी खकी छ्ये तीला कताङ्नी, “येशू वुतुङ के टुङ सिन्सुङ?” सिनी टिसुङ। 45 तमा तीकी खो वुतुङ के टुङ्गुप यिन सिनी सिक्यासिमा पिलातसकी योसेफला येशूकी फुङ्बु खुर्नी डो च्यिसुङ। 46 तमा योसेफकी रा नेङेन ङ्यो वानी येशूकी फुङ्बु ति ग्यङ्शिङ लो नेमा पाप्नी ती राकी नाङ्ला टिल्सुङ। तमा दो पुङ्नी जोवु शेप मीला ज्योकुप टककी फुककी नाङ्ला ज्याक्सुङ। ती ज्युक्ला दो ग्येर्पु यी रिल वानी ती टककी फुककी खला च्येनी ज्याक्सुङ। 47 मरियम मग्दलिनी ताङ योसेफकी आमा मरियमकी येशूकी फुङ्बु कनी ज्योकिनोक सिनी ल्हानी देनोक। |
© 2014, Wycliffe Bible Translators, Inc. All rights reserved.
Wycliffe Bible Translators, Inc.