मर्कूस 13 - कोन्छ्योककी सुङयेशूकी यहूदी ल्हङाङ ना डोप कोर्ला सुङ्गुप ( मत्ती २४:१-२४ ; लूका २१:५-१९ ) 1 येशू यहूदी ल्हङाङ नेसुर पाङ्ला थेनिन वोतुप पेला खोकी लोमातिवी पर्ला मिरा च्यिककी खोला “ल्हो ताङ, गेकेन! चुका दो ग्येर्पुतिवा! चुका खाङ्बा ग्येर्पुतिवा!” सिनी सिक्यासुङ। 2 तमा येशूकी तीला सुङ्सुङ, “ख्योरो दी खाङ्बा ग्येर्पुतिवा थोङ्गिनोक? देकी दो च्यिक साङ यम्बी खला मालुवा क्यानी दिवा तेरी र्होम्गिवी।” 3 तमा येशू यहूदी ल्हङाङकी फर्केन वोतुप जैतुन पम्दोकला ज्यु वोतुप पेला पत्रुस ताङ याकूब ताङ यूहन्ना ताङ अन्द्रियासकी खोला खरक्पा सोक सिरा टिसुङ, 4 “गेकेन, गेकेनकी गोमाला सुङ्गुप ती ताम्ङेतिवा नम पेला च्युङ्गिवी ङ्यिराङला सुङ्नी। येलुङ दी ताम्ङेतिवा च्युङ्गुप छलुप पेला चुका ततिवा च्युङ्गिवी?” 5 तमा येशूकी तिवाला सुङ्सुङ, “च्याङ्से दे! सी साङ ख्यिराङला मुलुशी। 6 मी बङी ङे मिङला वानी ‘ङ ख्रीष्ट यिन।’ सिनी मी बङीला लुकितो। 7 ख्यिरा मक ग्यकिन वोतुप ताङ मक ग्यकुप ताम्ङे थोकिवी, यिने ती पेला ख्यिराङ ज्यिवा माकी। दी ताम्ङेतिवा याङ च्युङ राङ गोकिवी, यिने ती ति तरोङ साङ जम्बुलिङ ना डोप तुजे ति मिन। 8 मिरिक मिरिककी तेन्दोकला, लुङ्बा लुङ्बाकी तेन्दोकला मक ग्यकितो। तमा दासा दासाला सयी ग्यकुप ताङ ङ्यिमा मर्वु शर्कितो। दिवा ति दुक्पाकी थल्मा तिराङ यिन। 9 तुक क्यानी ख्यिराङ त वुङ्गुप दुक्पी थोक्ला च्याङ्से क्यानी दे। मीतिवी ख्यिराङला ठिम्खाङला चेक तेकितो, तमा यहूदी छ्योखाङला ख्यिराङला दुङ्गितो। ख्यिरा ङला तेपा क्यावु तप्की ठिम कितुप मी छ्येतिवा ताङ ग्येल्वुतिवी दोङ्ला लानी ङे थोक्ला पङ्बु तेर्कितो। 10 यिने दी सिनाङ गोमाला तेरी मिरिककी मीतिवाला लेन ल्यामु ति ख्याप्टाक कि गोकितो। 11 तमा मीतिवी ख्यिराङला टिनी चेक तेतुप पेला ख्यिरा काङ सि गोकिवी सिनी गोमाला के पप माकी। ती पेला कोन्छ्योककी थु चाङ्माकी ख्यिराङला काङ लाप्किवे, ती राङ सी। च्यिलासिसिन ताम्ङे कितुप ति ख्यिराङ मिन, कोन्छ्योककी थु चाङ्माकी राङ यिन। 12 ती पेला अच्युनुपकी खोरो अच्युनुपला सेतुपला चेक तेकितो, तमा पपी खोरो पेजाला तुक राङ कितो। पेजातिवी पपाआमी तेन्दोकला लानी तिवाला सेतुपला चेक तेकितो। 13 तमा ख्यिरा ङला तेपा क्यावु तप्की मी तेरीकी ख्यिराङला ङ्यिङ्मर कितो। यिन्सिनाङ तिङ्ला सेक डेकला देतुपतिवाला ति थर्वा ङ्येकितो।” ज्यिवा लङ्गुप छेटाङकी तुजे ( मत्ती २४:१५-२८ ; लूका २१:२०-२४ ) 14 “तमा ना तोङ्गुप क्युक्टो लङ्गुप च्यालक ति वुङ मेङ्गुप दासाला लानी वोतुप ति ख्यिरा थोङ्गिवी। (लोपुप तीकी दीकी तेन्दोक हाक्कोशी) तमा ती पेला यहूदियाला वोतुपतिवा री नेवा टो डोशी। 15 खाङ्बी खाते खला वोतुपतिवा मर मपप्शी, याङ्ना काङ च्यालक साङ थेन्दुपला खाङ्बी नाङ्ला मुशुक्शी। 16 तमा शिङ खला वोतुपतिवा खोरो मज्या लङ्गुपला खाङ्बा मोलोक्शी। 17 ती पेला जु च्येन्दी वोतुप पुम्पेजातिवा ताङ आङाला नुम तेरुप आमातिवाला मङ कले ख्येल्गिवी। 18 तुका छेटाङ ति गुन्बी लला मेख्येल्शी सिनी मोपोर की। 19 च्यिलासिसिन ती ङ्यिमाला छासे छेटाङ ग्येर्पु ख्येल्गिवी, दुका छेटाङ ति कोन्छ्योककी जम्बुलिङ ज्येङ्गुप थल्मा नेज्युन तन्दा सेक नाम्साङ माच्युङ वे, ज्युक्थमाला साङ मेङ्गिवी। 20 कोन्छ्योककी ती तुजेतिवा ङ्युङ्मु माजोवु यिन्सिन सु साङ सेन्बु मुलुवी। यिने खोकी खोरे राङ पेतुपतिवी थोक्ला ती ङ्यिमातिवा ङ्युङ्मु जो वे। 21 ती पेला सी ख्यिराङला ‘ल्हो ताङ, ख्रीष्ट याङ दे वे।’ याङ्ना ‘ल्हो ताङ, खो याङ ते वे।’ सिक्यासिनाङ ती ताम्ङेला तेपा माकी। 22 तुका ख्रीष्ट जुमातिवा ताङ लुङ्तेम्बा मेटेङ्बुतिवा वुङ्गिवी, तमा तिवी ततिवा ताङ हलेवु लाकातिवा छ्या तेन्नी अछ्योता सेक कोन्छ्योककी पेतुपतिवाला लुतुप छोल्गिवी। 23 तुक क्यानी ख्यिराङ च्याङ्से देता। ङ ती तेरी ताम्ङेतिवा गोमाला के ख्यिराङला सिरिन वे।” येशू येलुङ फेप्किवी ( मत्ती २३:२९-३१ ; लूका २१:२५-२८ ) 24 “ती छेटाङकी तिङ्ला ङ्यिमा नक्तोमी डिवी, तमा उलाकी वो मेतेर्वी। 25 कर्मातिवा नाम नेसुर लुम्गिवी, तमा नामला वोतुप ङारतिवा योकिवी। 26 ती पेला मीतिवी ङ मी पुज्युङला ओङ ग्येर्पु ताङ मोवा थोप्नी नामगी मुक्पी खला वुङ्गुप थोङ्गिवी। 27 तमा ङ मी पुज्युङकी देवाच्येनकी लेन क्योलुप थुतिवा ताङ्नी जम्बुलिङ तेरी दासाकी छो ज्यी नेसुर ङे पेतुपतिवाला जोम ज्यिकिवी।” अन्जीरकी दोङ्बु नेसुर लोप ( मत्ती २४:३२-३५ ; लूका २१:२९-३३ ) 28 “त अन्जीरकी दोङ्बु नेसुर ताम्ङे च्यिक लोप। तीकी येल्कातिवा च्योक च्योक गल्नी ती नेमा ज्योक थेन्सिन त याङ येर्वु थेन्दुप छाल्नोक सिनी ख्यिरा हाक्कोकिवी। 29 ती दोके दिवा तेरी ताम्ङेतिवा च्युङ्गुप थोङ्सिन ङ मी पुज्युङ छासे चिप्ला राङ लेप्नी वे सिरुप ति ख्यिरा हाक्कोवा की। 30 ङ ख्यिराङला टेङ्बो सिरिन, ती तेरी ताम्ङेतिवा माच्युङ्वा सेक्ला दी गिपा ना मोडोवी। 31 स ताङ नाम ति तोर्नी डिवी, यिने ङे सिक्यावु ताम्ङेतिवा ति नाम्साङ तोर्नी मोडोवी।” ती ङ्यिमा ताङ तुजे सुला साङ छ्या मे ( मत्ती २४:३६-४४ ; लूका १२:३८ , ४० ) 32 “यिने ती ङ्यिमा ताङ तुजे ति नम गिते सिनी सुला साङ छ्या मे। देवाच्येनकी लेन क्योलुप थुतिवाला साङ छ्या मे, पुज्युङला साङ छ्या मे, ती ति पपाला तिराङ छ्या वे। 33 चेर्मु क्यानी च्याङ्से देता। च्यिलासिसिन ती तुजे ति नम गिवी सिनी ख्यिराङला छ्या मे। 34 दी ताम्ङे ति मी मिरा च्यिककी खोरो लावातिवाला दाक दाक्पी कि गोवु लाका चेक तेनी खाङ्बा र्हेन्दुप तीला ति चेर्मु क्यानी ल्हटे की सिनी खुरुङ ति मी लुङ्बा गलुप दोके यिन। 35 तुक क्यानी ख्यिराङ चेर्मु क्यानी दे। च्यिलासिसिन खाङ्बी ज्यिन्दाक ति नम पेला लोक्नी गिते, गोमु, याङ्ना नुप फेकाला, याङ्ना च्यवु कुकुरी देन्दुप पेला, याङ्ना टोपला टेताङ गिते ख्यिराङला छ्या मे। 36 तमा ज्यिन्दाक शार्क्येक वानी ख्यिराङ ङ्यिलोक्नी वोतुप मेठेशी। 37 ङे ख्यिराङला सिक्यावु दी ताम्ङे ति मी तेरीला सिरुप ताम्ङे यिन। ख्यिराङ चेर्मु क्यानी देता।” |
© 2014, Wycliffe Bible Translators, Inc. All rights reserved.
Wycliffe Bible Translators, Inc.