मत्ती 13 - कोन्छ्योककी सुङसेन देपुप पे ( मर्कूस ४:१-१२ , २५ ; लूका ८:४-१० ; १०:२३-२४ ) 1 ती छेर्मु येशू खो ज्युवु खाङ्बा नेमा थेन्नी ग्येम्छो गारीला फेप्नी ते ज्युसुङ। 2 ती पेला ते मी माङ्छ्योक खोकी चिप्ला जोम्सालेन्सिन येशू टुला जेनी टी नाङ्ला ज्युसुङ। तमा मी माङ्छ्योक तेरी ग्येम्छो गारीला लानी देसुङ। 3 खोकी तिवाला पे नेसुर ताम्ङे बङी शेन नाङ्सुङ, “ङ्येना, ङ्यिम्ज्यिक सेन देपुप मी यी सेन देपुपला शिङ खला थेन्सुङ। 4 तमा सेन देप्सालेन्सिन ललाइ सेन ति लामला ख्येल्सुङ, तमा च्यच्युमतिवा वानी ती सेन ति थुनी सोसुङ। 5 ललाइ ति दोप्रोक खला ख्येल्सुङ, तमा ते थला अला मेतुप तप्की ती ति ङमु राङ क्येसुङ। 6 यिने ङ्यिमा शर्सिमा ती ति ङ्यिमी छिक्सुङ, तीकी मर माक्यङ्गुप तप्की रेर्पा गल्नी शिसुङ। 7 ललाइ ति छेर्माङ दोङ्बी पर्ला ख्येल्सुङ, तमा छेर्माङ दोङ्बु ग्यानी वानी तीला सेप्सुङ। 8 यिने ललाइ ति स ल्यामुला ख्येल्सुङ। ती स ल्यामुला ख्येलुप तीकी ललाइला डुमा दोम्बा सयी ताङ ललाइला डुमा दोम्बा खाल टुक ताङ ललाइला डुमा दोम्बा खल सुम ग्यप्सुङ। 9 सी ति ङ्येन्दुप नम्ज्योक नोके, तीकी ङ्येन्शी।” पेकी तेन्दोक 10 तमा लोमातिवा खोकी चिप्ला वानी खोला “गेकेन, च्यिला गेकेनकी मीतिवाला पे नेसुर शेतुप यिन?” सिनी टिसुङ। 11 तमा खोकी तिवाला सुङ्सुङ, “ख्यिराङला याङ कोन्छ्योककी ग्येल्खापकी छ्याककी ताम्ङे हाक्कोवु रिक्पा बिन वे, यिने मी यम्बातिवाला ति माबिन वे। 12 सी लोला नोके, तीला मङ ल्हक्पा थोप्नी बङी डिवी। यिने सी लोला मेवे, तीकी लोला वोतुप ति साङ ठोकिवी। 13 तिवाला ङे पे नेसुर शेतुप तेन्दोक ति तिवी ल्हासिनाङ मोथोङ्गिवी, ङ्येन्सिनाङ मोथोवी, तमा हाक साङ मोकोवी। 14 तुक क्यानी कोन्छ्योककी लुङ्तेम्बा यशैयाकी दुक सिनी नम्दर शेतुप ति तिवाला छेसुङ, ‘ख्यिरा ङ्येन्दुप याङ ङ्येन्गिवी, यिने हाक्मोकोवी। ल्हाप याङ ल्हेवी, यिने मोथोङ्गिवी। 15 च्यिलासिसिन दी मीतिवी सेम क्योङ्बु गल वे, नम्ज्योक मोथोवु गल वे, मिक साङ चुम वे। मिसियाङ तिवी मिककी थोङ्गुप ताङ नम्ज्योककी थोवु गल्नी हाक्कोवु ताङ दिक्पा ने सेम ग्युर्नी वुङ्गुप्जा। तमा ङे तिवाला टेक ज्यितुप्जा।’ 16 यिने ख्यिराङ ति मिक थोङ्गुप ताङ नम्ज्योक थोवु तप्की मोलाम थोपुप यिनो। 17 वुतुङ के ङ ख्यिराङला सिरिन, कोन्छ्योककी लुङ्तेम्बातिवा ताङ खोकी कला ङ्येन्दुपतिवा बङीकी ख्यिरा ल्हावु खोकी ग्येल्खाप ल्हाप याङ नो क्यासुङ, यिने माथोङ। खोकी ग्येल्खापकी कोर्ला ङ्येन्दुप नो क्यासुङ, यिने माथो।” सेन देपुप पेकी तेन्दोक ( मर्कूस ४:१३-२० ; लूका ८:११-१५ ) 18 “त ख्यिराङ सेन देपुप मीकी पेकी तेन्दोक ति ङ्येन। 19 सी कोन्छ्योककी ग्येल्खापकी सुङ थोसिनाङ हाक्माकोसिन तीकी सेमला ख्येलुप सुङ ति शैतान वानी ठोनी डिवी। लामकी गारीला ख्येलुप सेनकी तेन्दोक ति दी राङ यिन। 20 तमा दोप्रोक खला ख्येलुप सेन ति दुका मी दोके यिन। तीकी सुङ थोनी ती सुङ गा क्यानी शार्क्येक सेमला लिङ्गिवी। 21 यिने तीकी लोला मर मेतुप तप्की चेयी पर सेक तिराङ लुकिवी। तमा सुङगी तेन्दोकला छेटाङ याङ्ना दुङल ख्येल वासिन तीकी ङ्येन्दुप सुङ ति शार्क्येक क्युर्नी ज्योकिवी। 22 तमा छेर्माङ दोङ्बी पर्ला ख्येलुप सेन ति दी मी दोके यिन। तीकी सुङ ङ्येन्गिवी, यिने दी जम्बुलिङकी पप ताङ टोङ्बाकी नासामकी ती सुङला क्येक्नी डेलु मोगोर्वी। 23 यिने स ल्यामुला ख्येलुप सेन ति कोन्छ्योककी सुङ ङ्येन्नी ती सुङ ति ल्यामो क्यानी हाक्कोवु मी दोके यिन। ती ति डेलु ल्यामु गोरुप दोङ्बु दोके क्यानी ललाइला दोम्बा सयी, ललाइला दोम्बा खल टुक ताङ ललाइला दोम्बा खल सुम डुमा ग्यकिवी।” ठिमाकी पे 24 येलुङ येशूकी मीतिवाला दुका पे यम्बा यी शेन नाङ्सुङ। “कोन्छ्योककी ग्येल्खाप ति खोरो शिङ खला सेन ल्यामु देपुप मी दोके यिन। 25 यिने मीतिवा ङ्यी गलुप पेला ती मी तीकी ड वानी टेकी पर्ला ठिमा तम ज्याक्नी गाल। 26 तमा ट क्येनी ग्यानी डुमा ग्यकुप छोलुप पेला ठिमा साङ ग्यानी वानोक। 27 तमा ती मी तीकी लावातिवा तीकी चाला वानी, ‘ज्यिन्दाक, ज्यिन्दाककी याङ सेन ल्यामु राङ तपुप मिन? चुक क्यानी ठिमातिवा क्येवु यिनाङ?’ सिनी टिसुङ। 28 तमा ज्यिन्दाक तीकी ‘दी लाका ति डकी क्यावु यिन।’ सिनी सिक्यासुङ। तमा लावातिवी ज्यिन्दाकला ‘तुकै यिन्सिन ङ्यिराङ गल्नी ठिमातिवा पल्नी क्युरुप?’ सिनी टिसुङ। 29 यिने ज्यिन्दाक तीकी तिवाला सिक्यासुङ, ‘तुक माकी, ख्यिरा ठिमा पलुप पेला ट साङ मुला राङ पल थुप्किवी। 30 डुमा छोता सेक ङ्यिकर मुला राङ छर्शी। तमा ट ङकुप पेला ङ खेतालातिवाला गोमाला ठिमातिवा पल्नी कली जोनी मेला र्हे, तमा टे डुमातिवा ति ङे पङाङ नाङ्ला ज्योक सिनी सिरिन।’” राय छेर्माङकी सेन ताङ खमीरकी पे ( मर्कूस ४:३०-३४ ; लूका १३:१८-२१ ) 31 येलुङ येशूकी तिवाला यम्बा पे यी शेन नाङ्सुङ। “कोन्छ्योककी ग्येल्खाप ति मी मिरा च्यिककी खोरो शिङ खला तपुप राय छेर्माङकी सेन दोके यिन। 32 ती राय छेर्माङकी सेन ति यम्बा तेरी सेन सिनाङ ठेमे वोसिनाङ क्येनी ग्यासिमा तेरी ङोछेलतिवा सिनाङ दोङ्बु ग्येर्पु डिवी, तमा नामगी च्यच्युमतिवा वानी ती दोङ्बी गोला छाङ जेवी।” 33 येलुङ खोकी तिवाला यम्बा दुका पे यी साङ शेन नाङ्सुङ, “कोन्छ्योककी ग्येल्खाप ति खमीर दोके यिन। पुम्पेजा यीकी फे किलो खल्ज्यिक ताङ ङ चोयीकी नाङ्ला ती खमीर लुक्नी वोल्सिमा टम्दोक तेरीला बोसुङ।” पे नेसुर सुङ्गुप तेन्दोक 34 येशूकी ती तेरी ताम्ङेतिवा पे नेसुर राङ मीतिवाला शेन नाङ्सुङ। पे नेसुर मिसिन ताम्ङे काङ साङ तिवाला मासुङ। 35 ती ति कोन्छ्योककी लुङ्तेम्बा नेसुर दुक सुङ्गुप ति तेरी छेवुला यिन, “ङ ताम्ङे लपुप पेला पे नेसुर शेतिन। ङ जम्बुलिङ ज्येङ्गुप पेला नेज्युनी बानी ज्यकुप ति सिरिन।” येशूकी ठिमाकी पेकी तेन्दोक सुङ्गुप 36 ती ज्युक्ला येशू मी माङ्छ्योकला क्युर ज्याक्नी खाङ्बा फेप्सुङ। लोमातिवा ति खोकी चाला वानी, “गेकेन, गेकेनकी सुङ्गुप शिङ खकी ठिमाकी पेकी तेन्दोक ति ङ्यिराङला सुङ्नी।” सिनी सिक्यासुङ। 37 तमा खोकी तिवाला सुङ्सुङ, “सेन ल्यामु देपुप मी ति ङ मी पुज्युङ यिन। 38 स ति जम्बुलिङ यिन। सेन ल्यामु ति कोन्छ्योककी ग्येल्खापकी मीतिवा यिन। ठिमा ति शैतानकी ओङला शोरुप मी दुक्टातिवा यिन। 39 ठिमा देपुप ड ति शैतान यिन। सप्ले दुतुप तुजे ति जम्बुलिङ ना डोप तिङ्मी तुजे यिन। सप्ले दुतुपतिवा ति देवाच्येनकी लेन क्योलुप थुतिवा यिन। 40 ठिमातिवा पल्नी कली जोनी मेला र्हेकुप दोके जम्बुलिङ तिङ्मी तुजेला साङ तुकै राङ किवी। 41 ती पेला ङ मी पुज्युङकी देवाच्येनकी लेन क्योलुप थुतिवा तोङ्गिवी, तमा तिवी मी यम्बाला दिक्पा कि ज्यितुप ताङ दुक्टा कितुपतिवा तेरीला खोरो ग्येल्खाप नेसुर पेनी दुम्गिवी। 42 तमा तिवाला मे बरुप ङ्येलाला क्युर्किवी। ते तिवा स मुरिन सिरा ङुप्राङ किवी। 43 तमा ती पेला कोन्छ्योककी कला ङ्येन्दुपतिवा ति खोप्रे पपी ग्येल्खापला ङ्यिमा दोके शर्किवी। सी ति ङ्येन्दुप नम्ज्योक नोके, तीकी ङ्येन्शी।” बानी ज्यकुप क्येङ्येन ताङ मुतीकी पे 44 “कोन्छ्योककी ग्येल्खाप ति शिङ खला बानी ज्यकुप क्येङ्येन दोके यिन। मी च्यिककी ती ङ्येनी ते राङ बानी ज्योकिवी, तमा गा लानी खोरो खाङ्बा गल्नी खोरो मुला वोतुप टोङ्बातिवा तेरी चोनी ती शिङ ति ङ्येवी। 45 येलुङ कोन्छ्योककी ग्येल्खाप ति मुती ल्यामु छोलुप छोङ्मेन दोके यिन। 46 तीकी ती गोङ नावु मुती च्यिक ङ्येसिमा गल्नी खोरो लोला वोतुप टोङ्बातिवा तेरी चोनी ती मुती ति ङ्येवी।” ङ्या जिम्बुप जालकी पे 47 “लोङ कोन्छ्योककी ग्येल्खाप ति ग्येम्छो नाङ्ला क्युर्नी ङ्या नम्बा बङी जिम्बुप जाल दोके यिन। 48 तमा जाल क्येङ्सिमा ती जाल ति ग्येम्छो गारीला थेन्नी सला देनी साप वुङ्गुप ङ्या ल्यामु ल्यामुतिवा नेक्योक नाङ्ला दुम्गिवी, साप मेङ्गुप ङ्या मेलोक्पातिवा ति थेन्नी क्युर्किवी। 49 ती दोके जम्बुलिङ तिङ्मी तुजेला देवाच्येनकी लेन क्योलुप थुतिवा वानी मी दुक्टातिवाला ति मी टेङ्बुतिवी पर नेसुर बेकिवी, 50 तमा तिवाला बरुप मे नाङ्ला क्युर्किवी। ते तिवा ङुयी सिरा स मुर्किवी।” 51 तोजोयी सुङ्सिमा येशूकी तिवाला “ख्यिरा दी तेरी ताम्ङे हाक्कोसुङ?” सिनी टि नाङ्सुङ। तमा तिवी खोला “लसे, ङ्यिरा हाक्कोसुङ।” सिनी सिक्यासुङ। 52 तमा खोकी तिवाला सुङ्सुङ, “कोन्छ्योककी ग्येल्खापकी कोर्ला लापुप तेरी यहूदी छ्योकी गेकेनतिवा ति समा च्यालक ज्यकुप दासा नाङ ने नागुङ छ्येर्मु वोतुप च्यालक सम्बातिवा ताङ ङ्यिङ्बातिवा पाङ्ला थेन्दुप खाङ्बी ज्यिन्दाक दोके यिन।” नासरतकी मीतिवी येशूकी तेन्दोकला लावु ( मर्कूस ६:१-६ ; लूका ४:१६-३० ) 53 ती पेतिवा शेन सिन्सिमा येशू तेसुर फेप्सुङ। 54 तमा रङगी ग्येसा नासरतला राङ फेप्नी तेकी यहूदी छ्योखाङला येन्देन नाङ्सुङ। खोकी येन्देन नङ्गुप थोङ्सिमा मीतिवा हलेवा क्यानी दुक सिनी टिसुङ, “दी मी तीला दुका रिक्पा ताङ हलेवु लाका कितुप ओङ ति कनी नेसुर थोप ताङ? 55 काङ दी मी याङ शिङ्जोकी पुज्युङ मिन? दीकी आमा याङ मरियम मिन? दीकी नुपतिवा याकूब ताङ योसेफ ताङ सिमोन ताङ यहूदा मिन रो? 56 दीकी नुमतिवा तेरी दाक्पी मुला राङ मे रो? दी मी तीला दी तेरी कितुप रिक्पा ताङ ओङ ति कनी नेसुर थोप ताङ?” 57 तुक सिनी तिवी खोला सेमला लिङ्गुप नो माक्या। तमा येशूकी तिवाला “कोन्छ्योककी लुङ्तेम्बातिवाला ति खोरो केसा ताङ खोरो खाङ्बा मिसिन यम्बा दासा तेरी नेमा ताङ्देन ङ्येकिवी।” सिनी सुङ्सुङ। 58 तेकी मीतिवी खोला तेपा माक्यावु तप्की येशूकी ते हलेवु लाका अला माक्या। |
© 2014, Wycliffe Bible Translators, Inc. All rights reserved.
Wycliffe Bible Translators, Inc.