लूका 6 - कोन्छ्योककी सुङङासोप ङ्यिमाकी चोवो ( मत्ती १२:१-८ ; मर्कूस २:२३-२८ ) 1 ङासोप ङ्यिमा यीला येशू टे शिङ ख नेवा क्यानी फेपिन कितुप पेला खोकी लोमातिवी टे ङ्यिमा थुनी लाक्पी नाङ्ला मुरिन सोसुङ। 2 ती थोङ्नी फरिसीतिवा ललाइकी तिवाला “ङासोप ङ्यिमाला कितुप मेङ्गुप लाका ति ख्यिराङ च्यिला किवी?” सिनी सिक्यासुङ। 3 तमा येशूकी तिवाला सुङ्सुङ, “दाऊदकी खोरुङ ताङ खोरो मुला वोतुपतिवा ल्होवा लावु पेला काङ क्यासुङ, ती ति ख्यिरा मारा? 4 तीकी कोन्छ्योकला सोवा देकुप खाङ्बी नाङ्ला शुनी कोङ्यारतिवा मिसिन यम्बा सी साङ साप मेङ्गुप कोन्छ्योकला पुलुप शुब्ज्याङ ति सोसुङ, तमा खोरो मुला वोतुपतिवाला साङ बिन्सुङ।” 5 तमा येशूकी तिवाला सुङ्सुङ, “ङ मी पुज्युङ ति ङासोप ङ्यिमाकी चोवो यिन।” ङासोप ङ्यिमाला लाक्पा कम्बु ठोक गलुप मीला टेक च्यितुप ( मत्ती १२:९-१४ ; मर्कूस ३:१-६ ) 6 ती ज्युक्ला यम्बा ङासोप ङ्यिमाला येशू यहूदी छ्योखाङला फेप्नी सुङ लाप नाङ्सुङ। ते लाक्पा नालोक्पा ति कम्बु ठोक गलुप मी यी नोक। 7 यहूदी छ्योकी गेकेनतिवा ताङ फरिसीतिवी येशूला क्येन तेरुप तेन्दोक छोलिन नोक। तुक क्यानी येशूकी ङासोप ङ्यिमाला नेजु टेक ज्यिकिते सिनी चिवा क्यानी देनोक। 8 येशूकी तिवी काङ नासाम तङ्गुप ति हाक्कोनी ती लाक्पा कम्बु ठोक गलुप मी तीला “ख्युरुङ लानी तेरी मीतिवी पर्ला टङी दे।” सिनी सुङ्सुङ। खोकी तुक सुङ्सिमा ती मी ति लानी ते टङी देसुङ। 9 तमा येशूकी खोरुङला चिवा क्यानी देतुपतिवाला सुङ्सुङ, “ङ ख्यिराङला ताम्ङे यी टेयिन। ङासोप ङ्यिमाला काङ कितुप ति दाक्पी ठिमला टेके यिन? लाका ल्यामु कितुप टेके यिनाङ की, लाका मेलोक्पा कितुप? र्होकुप टेके यिनाङ की, सेतुप?” 10 येशूकी तिवा तेरीला रिम्बा क्यानी ल्हानी ती लाक्पा कम्बु ठोक गलुप तीला “ख्योरो लाक्पा क्योङ।” सिनी सुङ्सुङ। तीकी खोकी सुङ्गुप दोके क्यासिमा तीकी लाक्पा ति टेक्सुङ। 11 ती थोङ्नी तिवा छासे ङ्यिर्मु लानी येशूला चुक कितुप सिनी खोप्राङ पर्ला केवुल क्यासुङ। येशूकी लोमा छ्ये च्यिङ्ङीतिवाला पेतुप ( मत्ती १०:१-४ ; मर्कूस ३:१३-१९ ) 12 ङ्यिम्ज्यिक येशू मोपोर कितुपला पम्दोकला फेप्नी नुप सिर कोन्छ्योकला मोपोर क्या नाङ्सुङ। 13 नाम लासिमा खोकी खोरो लोमातिवाला कताङ्नी तिवी पर नेमा मिरा च्यिङ्ङी पेनी तिवाला लोमा छ्ये सिनी मिङ ज्याक्सुङ। 14 ती च्यिङ्ङीतिवा ति दिवा राङ यिन। सिमोन (तीला खोकी पत्रुस सिनी मिङ ज्याक्सुङ), तीकी नुप अन्द्रियास, याकूब, यूहन्ना, फिलिप, बारथोलोमाइ, 15 मत्ती, थोमा, अल्फयसकी पुज्युङ याकूब, लुङ्बाकी थोक्ला टेमु कितुप छोक्पाकी मी सिरुप सिमोन, 16 याकूबकी पुज्युङ यहूदा ताङ यहूदा इस्करियोत नोक। ती यहूदा इस्करियोत ति तिङ्ला येशूला जिम्नी तेरुप मी च्युङ्नोक। येशूकी सुङ लोपुप ताङ टेक च्यितुप ( मत्ती ४:२३-२५ ) 17 ती ज्युक्ला येशू लोमातिवा ताङ मुला पम्दोक नेमा मर पाप्नी दिङ्मा यीला लानी ज्युसुङ। ते खोकी यम्बा लोमातिवा साङ बङी नोक। तमा तेरी यहूदिया, यरूशलेम, टुरोस ताङ सीदोनकी ग्येम्छोकी गारी गुरी नेसुर वावु मीतिवा साङ बङी नोक। 18 तिवा ति खोकी सुङ ङ्येन्दुप ताङ खोप्रे नेजुतिवा टेकुपला वावु मीतिवा यिनोक। डेकी कुलुप मीतिवा साङ टेक्सुङ। 19 तेरी मीतिवा येशूला रेकुप छोल्गिनोक, च्यिलासिसिन खो नेमा ओङ थेन्नी तिवा तेरीला टेक च्यिसुङ। मोलाम ताङ मोताप ( मत्ती ५:१-१२ ) 20 तमा येशूकी खोरो लोमातिवी थाकाला ल्हयी सिरा सुङ्सुङ, “ख्यिराङ पेराङ्बुतिवाला मोलाम थोपुप यिनो, च्यिलासिसिन कोन्छ्योककी ग्येल्खाप ति ख्यिरा ति यिनो। 21 ख्यिराङ तन्दा ल्होवा लावुतिवाला मोलाम थोपुप यिनो, च्यिलासिसिन ख्यिराङ डाकितो। ख्यिराङ तन्दा सेम्दुक लानी ङोपतिवा मोलाम थोपुप यिनो, च्यिलासिसिन ख्यिराङ गा लानी गोटे कितो। 22 ख्यिरा ङ मी पुज्युङला तेपा क्यावु तप्की मीतिवी ख्यिराङला ङ्यिङ्मर कितुप ताङ मीतिवी पर नेसुर तेन तोङ्गुप ताङ मर्च्या कितुप ताङ ख्यिरा मिङ दुक्टा वे सिनी ङोशी मारेला ताङ्सिन ख्यिराङ मोलाम थोपुप यिनो। 23 ती पेला ख्यिराङ गा क्यानी फिरा, च्यिलासिसिन देवाच्येनला थोपुप ख्यिरा छ्यक्तक ति ग्येर्पु वे। गोमाला तिवी हङ्गावातिवी कोन्छ्योककी लुङ्तेम्बातिवाला तुकै राङ क्यावु यिन। 24 यिने ख्यिराङ छ्युक्पु वोतुपतिवाला मोताप सुकुप यिनो, च्यिलासिसिन ख्यिराङला मिजी किर्मु ङ्येनी वे। 25 ख्यिराङ तन्दा डावुतिवाला मोताप सुकुप यिनो, च्यिलासिसिन ख्यिराङला ल्होवा लङ्गितो। ख्यिराङ तन्दा गा लानी गोटे कितुपतिवाला मोताप सुकुप यिनो, च्यिलासिसिन ख्यिराङ सेम्दुक लानी ङ्यिवितो। 26 ख्यिराङ मीतिवा तेरीकी चिताङ क्यावुतिवाला मोताप सुकुप यिनो, च्यिलासिसिन तिवी हङ्गावातिवी लुङ्तेम्बा मेटेङ्बुतिवाला तुकै राङ क्यासुङ।” डतिवाला ङ्यिङ्ज्ये की ( मत्ती ५:३८-४८ ; ७:१२ ) 27 “यिने ख्यिराङ ङे येन्देन ङ्येन्दुपतिवाला ङ सिरिन, ख्यिरा डतिवाला ङ्यिङ्ज्ये की, ख्यिराङला ङ्यिङ्मर कितुपतिवाला ल्यामु की। 28 ख्यिराङला मोताप देपुपतिवी थोक्ला मोलाम बिन, ख्यिराङला मेलोक्पा कितुपतिवी थोक्ला मोपोर की। 29 सी ख्योरो डम्बा च्यिकला बेप्किवे, तीला डम्बा यम्बा साङ जेन बिन। सी ख्योरो छ्योवा ठोकिवे, तीला तेतुङ साङ ठोकुपला माग्येक। 30 ख्योरो मुला लोङ्गुपतिवाला बिन। सी ख्योरो च्यालक खुर्नी डिवे, तीला येलुङ मालोङ। 31 मी यम्बी ख्यिराङला चुकै किशी सिरुप ख्यिरा नो किवे, तुकै राङ ख्यिरा तिवाला की। 32 ख्यिराङला ङ्यिङ्ज्ये कितुपतिवाला तिराङ ङ्यिङ्ज्ये किवी सिसिन ख्यिराङला काङ ख्येप्साङ वे रो? दिक्छेनतिवी साङ खोरुङला ङ्यिङ्ज्ये कितुपतिवाला ङ्यिङ्ज्ये किवी। 33 ख्यिराङला ल्यामु कितुपतिवाला तिराङ ल्यामु किवी सिसिन ख्यिराङला काङ ख्येप्साङ वे रो? दिक्छेनतिवी साङ तुकै राङ किवी। 34 येलुङ ङ्येतुप नो क्यानी मीतिवाला छ्यावा बिन्सुङ सिसिन ख्यिराङला काङ ख्येप्साङ वे रो? दिक्छेनतिवी साङ तोजोयी राङ लोक्नी ङ्येतुप नो क्यानी छ्यावा तेर्किवी। 35 यिने ख्यिरे डतिवाला ङ्यिङ्ज्ये की, तिवाला ल्यामु की, येलुङ लोक्नी ङ्येतुप रेवा माक्यानी छ्यावा बिन। तुक क्यासिन ख्यिराङला छ्यक्तक ग्येर्पु थोप्कितो, तमा ख्यिराङ चोछ्येवु कोन्छ्योककी पुज्युङ च्युङ्गितो। च्यिलासिसिन कोन्छ्योककी टेन मासम्बुपतिवा ताङ दुक्टातिवाला साङ च्यम्बा क्या नङ्गिवी। 36 ख्यिरा पपा कोन्छ्योक च्यम्बा वोतुप दोके ख्यिराङ साङ च्यम्बा वोतुप वुङ्शी।” मी यम्बाला ठिम माकी ( मत्ती ७:१-५ ) 37 “मी यम्बाला ठिम माकी, तमा कोन्छ्योककी साङ ख्यिराङला ठिम मिकितो। मी यम्बाला क्येन मातेर, तमा कोन्छ्योककी साङ ख्यिराङला क्येन मेतेर्तो। मी यम्बाला माफ बिन, तमा कोन्छ्योककी साङ ख्यिराङला माफ नङ्गितो। 38 मी यम्बाला बिन, तमा कोन्छ्योककी साङ ख्यिराङला नङ्गितो। खोकी सिन ताङ सिनी योनी पेता सेक क्यानी बङी नङ्गितो। चुक ताप्केकी ख्यिरा मी यम्बाला ताप्नी तेर्किवे, ती ताप्केकी राङ कोन्छ्योककी ख्यिराङला ताप्नी छुर नङ्गितो।” 39 तमा येशूकी तिवाला दुका पे यी साङ सुङ्सुङ, “काङ मिक मोथोङ्गुप मीकी यम्बा मिक मोथोङ्गुप मीला गोमा कि थुप्किवी? तुक क्यासिन तिवा ङ्यिकर मुक्तुम नाङ्ला मेख्येल्वी रो? 40 लोमा खोरो गेकेन सिनाङ छ्ये मेवी। यिने सी येन्देन तेरी लोप्किवे, ती ति खोरो गेकेन दोके डिवी। 41 ख्युरुङ मी यम्बी मिकला वोतुप बोप ति थोङ्गिवी, यिने खोरो मिकला वोतुप दुङ्मा ति मोथोङ्नोक? ख्युरुङ ख्योरो मिकला वोतुप दुङ्मा ति मोथोङ्गिवी सिसिन चुक क्यानी मी यम्बाला ‘ख्योरो मिकला वोतुप बोप ति ङे थेन तेरुप।’ सिनी सि थुप्किवी? 42 ओ खोनक्पु, गोमाला ख्योरो मिकला वोतुप दुङ्मा ति थेन, तमा तिराङ ख्युरुङ मी यम्बी मिकला वोतुप बोप ति थेन्दुपला ठछ्येली थोङ्गिवी।” दोङ्बु ताङ तीकी डेलु ( मत्ती ७:१६-२० ; १२:३३-३५ ) 43 “दोङ्बु ल्यामुला डेलु मेलोवा मोगोर्वी, तमा दोङ्बु मेलोवाला डेलु ल्यामु मोगोर्वी। 44 चुका दोङ्बु साङ तीकी डेलु ल्हानी हाक्कोकिवी। सी साङ छेर्माङ दोङ्बु नेसुर अन्जीर मुथुवी, तमा छेर्क्योक दोङ्बु नेसुर गुन्डुम मुथुवी। 45 मी ल्यामुकी खोरो सेमला ज्यकुप ताम्ङे ल्यामु नेमा ल्यामु राङ देन्गिवी, तमा मी दुक्टाकी खोरो सेमला ज्यकुप ताम्ङे टुक्टा नेमा दुक्टा राङ देन्गिवी। च्यिलासिसिन खोरो सेमला काङ क्येङ नोके, ती ति ख नेमा राङ लप्किवी।” खाङ्बा जोप मी नम्बा ङ्यी ( मत्ती ७:२४-२७ ) 46 “ख्यिराङ ङे सिक्यावु ताम्ङे मेङ्येन्दुप यिन्सिन च्यिला ङला ‘चोवो, चोवो!’ सिनी सिवी? 47 ङे चाला वानी ङे ताम्ङे ङ्येन्नी ती दोके राङ कितुप मी ति चुकै यिन सिनी ङ ख्यिराङला सिरिन। 48 ती मी ति मुक्तुम तिङ्मु टुनी डम्ज्यी रम्बु तिङ्नी खाङ्बा जोवु मी दोके यिन। तमा टोक्पा ग्यम वानी ती खाङ्बाला फोक्सिनाङ टोक्पाकी ती खाङ्बाला योक साङ माथुप, च्यिलासिसिन ती खाङ्बा ति रम्बु जोनोक। 49 यिने ङे सुङ ङ्येन्नी साङ ती दोके मिकिवु मी ति डम्ज्यी मातिङ्वा क्यानी खाङ्बा जोवु मी दोके राङ यिन। तमा टोक्पा ग्यम वानी ती खाङ्बाला फोक्सिमा ती ति शार्क्येक राम्सुङ, तमा तेरी ना गाल्सुङ।” |
© 2014, Wycliffe Bible Translators, Inc. All rights reserved.
Wycliffe Bible Translators, Inc.