लूका 22 - कोन्छ्योककी सुङयेशूला सेतुप च्यु ल्हावु ( मत्ती २६:१-५ , १४-१६ ; मर्कूस १४:१-२ , १०-११ ; यूहन्ना ११:४५-५३ ) 1 त यहूदीतिवी थरुप तुछ्येन सिरुप खमीर मालुकुप शुब्ज्याङ साप तुछ्येन चिप्ला राङ वानोक। 2 तमा कोङ्यार छ्येतिवा ताङ यहूदी छ्योकी गेकेनतिवी येशूला सेतुप च्यु ल्हानी देनोक। यिने तिवा मीतिवाला ज्यिवा किनोक। यहूदाकी येशूला जिम तेरुपला थाक्छ्येतुप 3 तमा लोमा मिरा च्यिङ्ङी पर्ला इस्करियोत सिरुप यहूदाकी सेमला शैतान शुसुङ। 4 तमा ती ति कोङ्यार छ्येतिवा ताङ यहूदी ल्हङाङकी मक्मी छ्येतिवी चाला गल्नी येशूला चुक क्यानी जिम तेरुप सिनी तिवी मुला केवुल क्यासुङ। 5 तमा तिवा गा लानी तीला टङ्गा तेरुप सिनी थाक्छ्येसुङ। 6 यहूदाकी ती ताम्ङे ङ्येन्नी मी माङ्छ्योक मेतुप पेला येशूला जिम तेरुप सिनी च्यु ल्हानी देसुङ। यहूदीतिवी थरुप तुछ्येनकी डेन टडिक क्यावु ( मत्ती २६:१७-३० ; मर्कूस १४:१२-२६ ; यूहन्ना १३:२१-३० ; १ कोरिन्थी ११:२३-२५ ) 7 ती ज्युक्ला खमीर मालुकुप शुब्ज्याङ साप तुछ्येनला लुक रुक सेनी जिन्बा तोङ्गुप छेर्मु वानोक। 8 तमा येशूकी पत्रुस ताङ यूहन्नाला दुक सुङ्नी ताङ्सुङ, “गल्नी दाक्पी थोक्ला यहूदी थरुप तुछ्येनकी डेन साप टडिक की।” 9 तमा तिवी खोला टिसुङ, “ङ्यिराङ कनी गल्नी डेन टडिक कितुप ति गेकेनकी नो वे?” 10 तमा खोकी तिवाला सुङ्सुङ, “ख्यिराङ ग्येसाकी नाङ्ला शुक्सालेन्सिन दिङ्गर नाङ्ला छ्यु खुरुप ख्योक्पेजा यीला ठेकिवी। तमा ती ति चुका खाङ्बी नाङ्ला शुकिवे, तीकी तिङ्ला तिङ्यो। 11 तमा ती खाङ्बी ज्यिन्दाकला ङ्यिरा गेकेनकी ‘ङ ङे लोमातिवा ताङ मुला यहूदी थरुप तुछ्येनकी डेन साप पर्खाङ ति कनी वे?’ सिनी टि नाङ्सुङ सिनी सी। 12 तुक सिक्यासिमा तीकी ख्यिराङला येर तेला टडिक क्या ज्यकुप पर्खाङ ग्येर्पु यी छ्या देन्गिवी। ख्यिराङ ते डेन टडिक की।” 13 तमा तिवा गल्नी ल्हासालेन्सिन येशूकी सुङ्गुप दोके राङ ठेसुङ। तिवी ते यहूदीतिवी थरुप तुछ्येनकी डेन टडिक क्यासुङ। चोवोकी तिङ्मी डेन 14 तमा डेन साप पेला लेप्सिमा येशू लोमातिवी मुला डेन शेवुला ज्युसुङ। 15 ती पेला खोकी तिवाला सुङ्सुङ, “ङे दुक्पा खुरुप सिनाङ गोमाला ख्यिरा मुला दी यहूदीतिवी थरुप तुछ्येनकी डेन साप छासे नो क्यायी। 16 च्यिलासिसिन ङ ख्यिराङला सिरिन, ती यहूदीतिवी थरुप तुछ्येनकी तेन्दोक ति कोन्छ्योककी ग्येल्खापला तेरी माछेवा सेक्ला ङ येलुङ दी डेन मसा।” 17 तमा खोकी कोरा लानी कोन्छ्योकला थुचिछे पुल्नी लोमातिवाला सुङ्सुङ, “दी ति लानी ख्यिरा पर्ला गोनी थुङ। 18 ङ ख्यिराङला सिरिन, त कोन्छ्योककी ग्येल्खाप माङुवा सेक ङ येलुङ गुन्डुम दोङ्बी डेलु नेमा जोवु मुथुङ।” 19 येलुङ येशूकी शुब्ज्याङ लानी कोन्छ्योकला थुचिछे पुल्सिमा च्याक्नी तिवाला दुक सुङ्यिन नाङ्सुङ, “दी ति ख्यिरा थोक्ला तेरुप ङे जु यिन, ङला टेन्दुपला दी ति किसा।” 20 तमा गोमुकी सोल शेन सिन्सिमा खोकी गोमी दोके क्यानी कोरा लानी दुक सुङ्सुङ, “दी कोरा ति ख्यिरा थोक्ला देन्दुप ङे ठक नेसुर कोन्छ्योककी थाक्छ्येन नङ्गुप खोकी ठिम सम्बा यिन। 21 यिने ल्हो ताङ, ङला जिम तेरुप ति ङे मुला सापला देन वे। 22 ङ मी पुज्युङ याङ कोन्छ्योककी खोरो थोक्ला तेन्तेन क्यावु दोके डिवी, यिने ङ मी पुज्युङला जिम तेरुप तीला याङ मोताप सुकिवी।” 23 तमा लोमातिवी तुक कितुप ति सु यिनाङ सिनी खोप्राङ पर्ला च्यिककी च्यिकला टिसुङ। सु छ्ये यिन सिरुप कोर्ला खाँदा क्यावु ( मत्ती २०:२५-२८ ; १९:२८ ; मर्कूस १०:४२-४५ ) 24 ती ज्युक्ला लोमातिवी नाङ ने सु तेरी सिनाङ छ्ये यिन सिरुप कोर्ला खोप्रे पर्ला खाँदा क्यानोक। 25 येशूकी तिवाला सुङ्सुङ, “दी जम्बुलिङकी ग्येल्वुतिवी मीतिवी खला ओङ्ज्येन किवी। तमा मीतिवी खला ओङ्ज्येन कितुपतिवी खोरुङ ति दुक्पाला ख्येलुपतिवाला ल्हाटे कितुप मी यिन सिनी सिवी। 26 यिने ख्यिराङ ति तुकै वुङ्गुप मेङ्गिवी। बोरु ख्यिरा पर्ला सु तेरी सिनाङ छ्ये नोके, ती ति तेरी सिनाङ छ्युङा दोके च्युङ गोकिवी। तमा ओङ्ज्येन कितुपतिवा ति शब्ज्यी कितुप मी दोके च्युङ गोकिवी। 27 चुका मी ति मङ छ्ये यिन? समा सापला देतुप ति छ्ये यिनाङ की, शब्ज्यी कितुप ति छ्ये यिन? समा सापला देतुप ति मिन? यिने ङ याङ शब्ज्यी कितुप मी दोके क्यानी ख्यिरा पर्ला वे। 28 ख्यिराङ ति ङ दुक्पाला ख्येलुप पेला ङ ताङ मुला राङ वोतुप मीतिवा यिन। 29 ङे पपी ङला ग्येला कितुप ओङ्ज्येन नङ्गुप दोके ङ साङ ख्यिराङला ग्येला कितुप ओङ्ज्येन तेरिन। 30 तुक क्यानी ख्यिराङ ङे ग्येल्खापला ङ ताङ मुला देनी साप ताङ थुङ्गुप ङ्येकितो, तमा ग्येल्ठिकला देनी इस्राएलकी मिरिक च्यिङ्ङीतिवी खला ठिम कितो।” पत्रुसकी खोरुङला ङो मेशेवी सिरुप कोर्ला येशूकी सुङ्गुप ( मत्ती २६:३१-३५ ; मर्कूस १४:२७-३१ ; यूहन्ना १३:३६-३८ ) 31 तमा येशूकी सुङ्सुङ, “ओ सिमोन, ओ सिमोन, ल्हो ताङ। शैतानकी ख्यिराङ तेरीला ट दोके योलुपला गोङ्बा शु वे। 32 यिने सिमोन, ख्योरो तेपा ति मोतोर्शी सिनी ङे मोपोर क्यायिन। ख्युरुङ येलुङ लोक्नी वुङ्गुप पेला ख्योरो तेपा कितुप अच्युनुपतिवाला रम्बु जोसा।” 33 तमा पत्रुसकी सिक्यासुङ, “ओ चोवो, ङ याङ चोन्खाङला डो गोसिनाङ, शेप ते डो गोसिनाङ, चोवो ताङ मुला डोप टडिक वे।” 34 तमा येशूकी सुङ्सुङ, “पत्रुस, ङ ख्युरुङला सिरिन, हारिङ च्यवु कुकुरी मातेन्दा सेक ख्योरो ङला थेङ्मा सुम ङो मेशेवी सिवी।” छयी ताङ गिवु ताङ खुर्पा 35 येशूकी लोमातिवाला सुङ्सुङ, “ङे ख्यिराङला छयी साङ गिवु साङ काचा मेता क्यानी तङ्गुप पेला ख्यिराङला काङ ङ्युङ्मु च्युङ्सुङ?” तमा तिवी “माच्युङ।” सिनी सिक्यासुङ। 36 तमा खोकी सुङ्सुङ, “त याङ छयी वोतुप तीकी छयी लो, गिवु वोतुप तीकी साङ तुकै की। तमा दाक दाक्पी लोला खुर्पा मेतुपतिवी खोरो मज्या चोनी खुर्पा ङ्यो। 37 ङ ख्यिराङला सिरिन, ‘ती ति मी दुक्टातिवी दला शोर्सुङ।’ सिनी टि वोतुप कोन्छ्योककी सुङ ति ङला छे राङ गोकिवी। यिन, ङे थोक्ला टि वोतुप कोन्छ्योककी सुङ ति ङला छेयी डिवी।” 38 तमा लोमातिवी येशूला सिक्यासुङ, “ओ चोवो, ल्हो ताङ, दे खुर्पा ङ्यी चोके वे।” तमा येशूकी सुङ्सुङ, “तोजोयी वोसिन लङ्गिवी।” येशूकी जैतुन पम्दोकला मोपोर क्या नङ्गुप ( मत्ती २६:३६-४६ ; मर्कूस १४:३२-४२ ) 39 तमा नरी दोके क्यानी येशू ग्येसा नेसुर थेन्नी जैतुन पम्दोकला फेप्सुङ, तमा लोमातिवा साङ खोकी तिङ्ला गाल्सुङ। 40 ते लेप्सिमा खोकी लोमातिवाला सुङ्सुङ, “ख्यिराङ खोक्पा ल्हापला मेख्येल्शी सिनी मोपोर की।” 41 तुक सुङ्सिमा खो ति लोमातिवी चा नेवा फेचेक फेप्नी पुमुङ चुनी दुक सिनी मोपोर क्या नाङ्सुङ, 42 “ओ पपा, पपी नोवा वोसिन दी छेटाङकी कोरा ति ङ नेसुर दोनी नाङ। यिने ङे नोवाला मिन, पपी नोवा दोके राङ च्युङ्शी।” 43 ती पेला देवाच्येन नेमा लेन क्योलुप थु यी खोकी चिप्ला छ्यर्नी खोला ङाडेङ बिन्सुङ। 44 तमा येशू छासे सेम्दुक लानी मङ ङार क्यानी मोपोर किसालेन्सिन खोकी ङुल्जुर ति ठककी थितोक दोके क्यानी सला लुम्सुङ। 45 खोकी मोपोर क्या छर्सिमा शेङ्नी लोमातिवी चाला फेप्सालेन्सिन लोमातिवा सेम्दुक किसा किसा येन छ्येनी ङ्यी गाल्नोक। 46 तमा खोकी तिवाला सुङ्सुङ, “ख्यिराङ च्यिला ङ्यी लोक्नी देकिवी? लानी खोक्पा ल्हापला मेख्येल्शी सिनी मोपोर की।” येशूला जिम्बुप ( मत्ती २६:४७-५६ ; मर्कूस १४:४३-५० ; यूहन्ना १८:३-११ ) 47 येशूकी तुक सुङ्यिन वोतुप पेला मी माङ्छ्योक ते लेसुङ। तमा लोमा मिरा च्यिङ्ङी पर नेमा यहूदा सिरुप ति तिवाला गोमा क्यानी वासुङ। ती ति खोला पुका कितुपला खोकी चिप्ला वासुङ। 48 यिने येशूकी तीला सुङ्सुङ, “यहूदा, काङ ख्युरुङ ङ मी पुज्युङला पुका क्यानी जिम तेर्किवी?” 49 ते च्युङ्गुप ताम्ङे थोङ्नी येशू ताङ मुला वोतुप लोमातिवी खोला टिसुङ, “चोवो, ङ्यिराङ दिवाला खुर्पा थोकुप?” 50 तोजो पेला तिवी पर नेमा मिरा च्यिककी खुर्पा थेन्नी तेरी सिनाङ कोङ्यार छ्येकी लावा यीकी यावी थाकाकी नम्ज्योक ति टेप च्येसुङ। 51 यिने येशूकी “वोसी, तुक माकी!” सुङ्नी ती लावा तीकी नम्ज्योकला रेक्नी टेक च्यिसुङ। 52 तमा खोला जिम्बुपला वावु कोङ्यार छ्येतिवा ताङ ल्हङाङकी मक्मी छ्येतिवा ताङ यहूदी गोमा कितुप मी छ्येतिवाला खोकी दुक सुङ्सुङ, “ख्यिराङ च्यिला खुर्पा ताङ लकाम खुर्नी ङला जिम्बुपला वावु? काङ ङ च्याक्पा यिन रो? 53 ङ ङ्यिमी टेङ ख्यिरा मुला ल्हङाङला देतिन। ती पेला ति ख्यिरा ङला लाक्पा मालाङ। यिने दी ति नक्तोमीकी ओङ्ज्येन कितुप ख्यिरा तुजे यिन।” पत्रुसकी येशूला ङो मेशेवी सिक्यावु ( मत्ती २६:५७-५८ , ६९-७५ ; मर्कूस १४:५३-५४ , ६६-७२ ; यूहन्ना १८:१२-१८ , २५-२७ ) 54 तमा तिवी येशूला जिम्नी तेरी सिनाङ कोङ्यार छ्येकी खाङ्बा टिनी गाल्सुङ। पत्रुस ति फेचेक नेसुर खोकी तिङ्ला तिङ्यानी गाल। 55 ते लेङाङ पर्ला मीतिवा मे तङ्नी मे गारी गुरीला देनोक। तमा पत्रुस साङ तिवी पर्ला देसुङ। 56 ती पेला लावाम यीकी पत्रुसला ल्यामो क्यान ल्हानी दुक सिक्यासुङ, “दी मी तिङ तीकी मुला राङ नोक।” 57 यिने पत्रुसकी सिक्यासुङ, “ओ नुमो, ङे याङ तीला ङो राङ मेशेवी।” 58 येलुङ चेयी ज्युक्ला यम्बा यीकी तीला थोङ्नी सिक्यासुङ, “ख्युरुङ साङ तिवी पर नेमा मिरा च्यिक यिन।” यिने पत्रुसकी सिक्यासुङ, “अच्यो, ङ याङ मिन।” 59 तमा घण्टा यी ज्युक्ला यम्बा मिरा च्यिककी तेन्तेन क्यानी सिक्यासुङ, “वुतुङ के दी मी याङ तीकी मुला राङ नोक। दी याङ गालीलकी मी यिनोक।” 60 यिने पत्रुसकी सिक्यासुङ, “अच्यो, अच्युकी काङ सुङ्गुप यिन ङला छ्या राङ मे।” पत्रुसकी तुक सिक्यालुङ्मे च्यवु कुकुरी तेन्सुङ। 61 तोजो पेला चोवोकी ग्युर्नी पत्रुसला केरी ल्हासुङ। तमा चोवोकी खोरुङला “हारिङ च्यवु कुकुरी मातेन्दा सेक ख्योरो ङला थेङ्मा सुम ङो मेशेवी सिवी।” सिनी सुङ्गुप ताम्ङे ति पत्रुसकी टेन्सुङ। 62 तमा ती ति पाङ्ला थेन गल्नी कशेन ङुसुङ। येशूला मारे तङ्गुप ( मत्ती २६:५९-६८ ; मर्कूस १४:५५-६५ ; यूहन्ना १८:१९-२४ ) 63 तमा येशूला र्हेन्दुप मीतिवी खोला मारे तोङ्यिन सिरा दुसुङ। 64 तिवी खोकी मिक ति टानी दुक सिक्यासुङ, “ख्युरुङला बेपुप ति सु यिन, सी ताङ।” 65 तमा तिवी खोला यम्बा मारे तोङ्गुप ताम्ङेतिवा साङ बङी सिक्यासुङ। येशू यहूदी गोमा कितुप मी छ्येकी छोक्पाकी दोङ्ला 66 तमा नाम लासिमा कोङ्यार छ्येतिवा ताङ यहूदी छ्योकी गेकेनतिवा जोम्नी येशूला यहूदी गोमा कितुप मी छ्येकी छोक्पाकी दोङ्ला टि वुङ च्यिनी, 67 “ख्युरुङ ख्रीष्ट यिन्सिन ङ्यिराङला सी।” सिनी सिक्यासुङ। तमा खोकी तिवाला सुङ्सुङ, “ङे ख्यिराङला सिक्यासिनाङ ख्यिरा तेपा राङ मिकिवी। 68 ङे ख्यिराङला काङ टिसिनाङ ख्यिरा ङला टिलेन मग्यकिवी। 69 यिने तफेन्ला ङ मी पुज्युङ ति ओङ छ्येवु कोन्छ्योककी यावी थाकाला देकिवी।” 70 ती थोसिमा तेरीकी खोला “तुकै यिन्सिन ख्युरुङ कोन्छ्योककी सेवु राङ यिन?” सिनी टिसुङ। तमा येशूकी सुङ्सुङ, “ख्यिरा सिक्यावु ति ङ राङ यिन।” 71 तिवी “त ङ्यिराङला पङ्बु ल्हक्पा च्यिला गोसुङ? दीकी ख नेमा राङ दाक्पी थोसुङ।” सिनी सिक्यासुङ। |
© 2014, Wycliffe Bible Translators, Inc. All rights reserved.
Wycliffe Bible Translators, Inc.