हिब्रू 9 - कोन्छ्योककी सुङजम्बुलिङ ताङ देवाच्येनला वोतुप दासा चाङ्मा 1 थल्माला कोन्छ्योक ताङ इस्राएलकी मीतिवा पर्ला थाक्छ्येतुप ताम्ङेला साङ कोन्छ्योकला सोवा देकुप कोर्ला ठिमतिवा नोक। तमा ती ठिमला वोतुप दोके सोवा देकुपला मीतिवी राङ जोवु चाङ्मा वोतुप कुर च्यिक नोक। 2 ती चाङ्मा वोतुप कुरकी नाङ्ला जे ङ्यी नोक। फीकी जेकी नाङ्ला ति मेलाङ ताङ च्योक्ची ताङ ती च्योक्ची खला कोन्छ्योकला पुलुप शुब्ज्याङतिवा नोक। ती जेला ति चाङ्मा वोतुप दासा सिनोक। 3 तमा जेतिवी पर्ला ति गोयोल ग्यप्नी नोक। ती गोयोलकी ग्यप्ला वोतुप नङगी जे तीला ति तेरी सिनाङ चाङ्मा वोतुप दासा सिनोक। 4 ते सेरकी पोके ताङ सेर थ्वोनी कोर्नी जोवु कोन्छ्योककी थाक्छ्येतुप तेर्गाम नोक। तीकी नाङ्ला मन्न देवु सेरकी नेक्योक ताङ ज्योक ग्यावु हारूनकी पेर्का नोक, तमा कोन्छ्योककी थाक्छ्येन नङ्गुप ताम्ङेतिवा नङ्गुप पेला मोशाला बिन्दुप ठिम च्यिथम्बातिवा टिवु दे येम्ज्ये ङ्यी साङ नोक। 5 ती तेर्गामकी खला कोन्छ्योककी मोवा छ्या देन्दुप करूब सिरुप देवाच्येनकी लेन क्योलुप थुतिवा नोक। ती लेन क्योलुप थुतिवी शोक्पा ति दिक्पा पङ्गुप दासाकी खला ग्यानी नोक। तीकी कोर्ला ति तन्दा राङ दाक्पी तेरी सि मुथुपी। 6 ती तेरी टडिक क्या सिन्सिमा जे तङ्बुला वोतुप दासा चाङ्माला कोङ्यारतिवा ङ्यिमी टेङ दाक दाक्पी कि गोवु लाकातिवा तेरी कितुपला डिनोक। 7 यिने जे ङ्यिवी नाङ्ला ति कोङ्यार छ्ये तिराङ लोला थेङ्मा च्यिक ठक खुर्नी डिनोक। ठक माखुर्सिन ती नाङ्ला शुक मुथुप्नोक। ती ठक ति खोरो दिक्पी थोक्ला ताङ मीतिवी हाक्माकोनी क्यावु दिक्पी थोक्ला जिन्बा बुलुपला यिन। 8 तुक क्यानी कोन्छ्योककी थु चाङ्माकी दाक्पुला काङ लोप्किवी सिसिन, जे तङ्बुला वोतुप दासा चाङ्मा ति मादोवा सेक्ला तेरी सिनाङ दासा चाङ्माला शुकुप लाम ति मेपेवी। 9 दी याङ तसाम पेकी तुजेकी थोक्ला पे च्यिक तिराङ यिन। दीकी काङ हाक्कोकिवी सिसिन कोन्छ्योकला बुल्वा ताङ सेम्ज्येन सेनी जिन्बा बुलुप मीतिवी सेम ति टेङ्बु च्युङ मुथुपी। 10 ती बुल्वा ताङ जिन्बा पुलुप ति साप थुङ्गुप ताङ नम्बा कुतुक कुतुककी चाङ्मा जोप ठिमतिवा तेन्दुप दोके तिराङ यिन। ती ठिमतिवा ति कोन्छ्योककी नङ्गुप यम्बा ठिम सम्बा माफोवा सेककी थोक्ला बिन्दुप क तिराङ यिन। ख्रीष्टकी ठक 11 यिने येशू ख्रीष्ट याङ दे वावु ताम्ङे ल्यामु तेरीकी कोर्ला कोङ्यार छ्ये दोके च्युङ्नी फेप्सुङ। खो फेवु दासा चाङ्मा ति तेरी सिनाङ ग्येर्पु ताङ खक्छ्येवु वोतुप दासा यिन। ती दासा ति मी लाक्पी जोवु मिन, दी जम्बुलिङकी दासा दोके साङ मिन। 12 खो दासा चाङ्मा नेसुर क्यानी तेरी सिनाङ चाङ्मा वोतुप दासाला फेप्सुङ। ती पेला खो रौ ताङ लङ्डुकी ठक खुर्नी फेपुप मिन, यिने खो ग्यङ्शिङला टुङ्नी थेन्दुप खोरे ठक नेसुर थेङ्मा च्यिकला राङ फेप्नी ती ठक नेसुर खोकी दाक्पी थोक्ला नाम्साङ मिशिवु थर्वा ङ्येसुङ। 13 रौ ताङ मयेनकी ठक ताङ लङ्डु जिन्बा बुलुपला र्हेवु थल्जाम ति मेचेङ्गा मीतिवी जुला थोर्सिन मीतिवी जु ति चाङ्मा जेवी सिसिन, 14 नरीकी नरी लुवु कोन्छ्योककी थु चाङ्माकी ओङला खुरुङ राङ क्येन मेतुप बुल्वा च्युङ्नी कोन्छ्योकला बुलुप ख्रीष्टकी ठककी याङ मङ छासे क्यानी शेप ते क्योलुप लाकातिवा नेसुर दाक्पी सेम ति टेङ्बु जोनी ङोसु वोतुप कोन्छ्योकला शब्ज्यी कि थुपुप मोजोवी रो? 15 तुक क्यानी ख्रीष्ट ति कोन्छ्योक ताङ मीतिवी पर्ला थाक्छ्येतुप ताम्ङे सम्बाला डिङ तेरुप लाका क्या नङ्गिवी। खोकी तुक क्या नङ्गुप ति कोन्छ्योककी कतङ्गुप मीतिवाला नरीकी थोक्ला खोकी थाक्छ्येन नङ्गुप मोलाम ति थोप्शी सिनी यिन। च्यिलासिसिन खो मीतिवी गोमी थाक्छ्येतुप ठिमला क्यावु दिक्पा ने थर ज्यितुपला टुङ्सुङ। 16 मीतिवी पर्ला थाक्छ्येतुप ताम्ङे ति मीतिवा शेप सिनाङ गोमाला खज्यम ज्यकुप दोके राङ यिन। सी खुरुङ शेप सिनाङ गोमाला खज्यम ज्याक्सिनाङ ती ति माशिवा सेक तीकी खज्यम ज्यकुप ताम्ङे ति फेन मोथोवी। 17 च्यिलासिसिन ती मी ति शिसिमा तिराङ तीकी खज्यम ज्यकुप ताम्ङे ति लाका कि थुप्किवी। खज्यम ज्योकुप मी ति सेन्बु वोता सेक ती खज्यम ज्यकुप ताम्ङेकी लाका कि मुथुपी। 18 तुक क्यानी गोमाला थाक्छ्येतुप ताम्ङेला साङ ठक मातेन्दा सेक्ला लाका कि माथुप। 19 मोशाकी कोन्छ्योककी नङ्गुप ठिमला वोतुप कतिवा तेरी मीतिवाला सिक्यासिमा लङ्डु ताङ रौकी ठक ति छ्यु ताङ मुला र्हेनी पाल मर्वु ताङ हिसपकी येल्काला पानी ठिमकी थेपकी खला ताङ तेरी मीतिवी खला थोर्नी, 20 “दी ठक ति कोन्छ्योक ताङ ख्यिरा पर्ला थाक्छ्येतुप ताम्ङे यिन, तीला ङ्येन गोकिवी।” सिनी तिवाला सिक्यासुङ। 21 तुक राङ क्यानी मोशाकी चाङ्मा वोतुप कुरकी खला ताङ सोवा देकुप पेला थोकुप तेरी च्यालकतिवी खला साङ ती ठक ति थोर्सुङ। 22 वुतुङ के कोन्छ्योककी नङ्गुप ठिमला सिक्यावु दोके ठक तेन्सिन तिराङ माङ्शोक तेरी चाङ्मा जो थुप्किवी। तमा ठक मातेन्सिन दिक्पा मतावी। येशू ख्रीष्टकी ठककी तिराङ दिक्पा ताकिवी 23 दी जम्बुलिङला वोतुप देवाच्येनकी च्यालक जुमातिवा चाङ्मा जोपला सेम्ज्येन सेनी जिन्बा बुल गोसुङ सिसिन देवाच्येनला वोतुप च्यालकतिवाला चाङ्मा जोपला याङ ती सेम्ज्येन सिनाङ मङ खक्छ्येवु ठककी जिन्बा तोङ गोकिवी। 24 तुक क्यानी ख्रीष्ट याङ मी लाक्पी जोवु चाङ्मा वोतुप कुरकी नाङ्ला फेवु मिन, ती कुर ति देवाच्येनकी कुर नेसुर पेशुवु तिराङ यिन। यिने खो ती देवाच्येनला राङ फेप्सिमा दाक्पी छ्योकला कोन्छ्योककी थोङ्दाङला ज्यु वे। 25 यहूदी कोङ्यार छ्ये याङ सेम्ज्येनकी ठक खुर्नी तेरी सिनाङ चाङ्मा वोतुप दासाला ले टेङ शुकिवी, यिने येशू ख्रीष्ट याङ ती दोके क्यानी खुरुङ राङ जिन्बा बुलुपला येलुङ येलुङ देवाच्येनला माफेप। 26 मिसियाङ जम्बुलिङ ज्येङ्गुप पेला नेज्यु तन्दा सेक ख्रीष्टकी येलुङ येलुङ दुक्पा खुर गोवुजा। यिने खो याङ दिक्पा पङ्गुपला थेङ्मा च्यिकला राङ जिन्बा च्युङ्गुपला दी कल्वाकी तिङ्मी तुजेला फेप्सुङ। 27 मी ति थेङ्मा च्यिक वुतुङ के शिवी, शिसिमा तीला कोन्छ्योककी ठिम फोकिवी। 28 तुक क्यानी ख्रीष्ट ति मी बङीकी दिक्पा ता ज्यितुपला थेङ्मा च्यिकला राङ खुरुङ जिन्बा च्युङ्सुङ। त खो थेङ्मा ङ्यिवाला येलुङ फेप्किवी। खो येलुङ फेपुप पेला दिक्पा खुरुपला मिन, यिने खो फेवु लाम ल्हानी देतुपतिवाला थर ज्यितुपला फेप्किवी। |
© 2014, Wycliffe Bible Translators, Inc. All rights reserved.
Wycliffe Bible Translators, Inc.