२ पत्रुस 3 - कोन्छ्योककी सुङचोवो येलुङ फेपुप कोर्ला 1 ङे ङ्यिङ्ज्येवु अच्युनुपतिवा, दी ति ङे ख्यिराङला टिवु यिकी ङ्यिवा यिनो। दी यिकी ङ्यिकरकी नाङ्ला माङ्शोक ताम्ङेतिवा ति ख्यिरा सेमला नासाम टेङ्बु तोङ ज्यितुप सिनी टोङ्गु तेरुपला टि वे। 2 तुक क्यानी तोङ्ला लुङ्तेम्बा टेङ्बुतिवी नम्दर शेतुप ताम्ङे ताङ लोमा छ्येतिवी ख्यिराङला दिक्पा ने थर ज्यितुप चोवो येशूकी कोर्ला लापुप सुङ ति ख्यिरा नरी नासाम ताङ्नी टोक माज्येता। 3 तेरी सिनाङ गोमाला ख्यिरा दी ताम्ङे ति हाक्को गोकिवी। ती ताम्ङे ति काङ यिन सिसिन जम्बुलिङकी तिङ्मी तुजेला खोरो सेमगी नासाम मेलोक्पाकी ओङला वोतुप मीतिवी ख्यिराङला मर्च्या क्यानी दुक सिनी टिवी, 4 “ख्रीष्ट फेप्किवी सिनी थाक्छ्येतुप मिन रो? दाक्पी पगावा हङ्गावातिवा शिसिमा साङ दी जम्बुलिङ ति थल्माला ज्येङ्गुप पेला नेज्युन काङ साङ माफो वे।” 5 तिवी तुक सिनी सिक्यावु ति कोन्छ्योककी सुङगी थल्माला नाम ज्ये नङ्गुप यिन, तमा जम्बुलिङ ति छ्यु नेसुर ज्ये नङ्गुप यिन, 6 तमा ती छ्यु नेसुर राङ तोङ्ला जम्बुलिङला छ्यर्वा ग्येर्पु ग्यप्नी जम्बुलिङ तेरी ना तङ्गुप यिन सिनी सिरुप ति तिवाला छ्या वोसिनाङ छ्या मेतुप दोके जोवु यिन। 7 दी कोन्छ्योककी सुङगी राङ तसाम पेलाकी नाम ताङ जम्बुलिङ ति मे नाङ्ला ना तोङ्गुपला र्होक्नी ज्याङ वे। तमा खोकी सुङला मुयुकुप मीतिवाला ठिम कितुप तुजे सेककी थोक्ला सानी ज्याङ वे। 8 यिने ङे ङ्यिङ्ज्येवु अच्युनुपतिवा, दी ताम्ङे ति टोक माज्ये। ती ति काङ यिन सिसिन चोवोकी थोक्ला ङ्यिमा च्यिक ति लो तोङ्डा च्यिक चोयी तिराङ यिन, तमा लो तोङ्डा च्यिक ति ङ्यिमा च्यिक चोयी तिराङ यिन। 9 चोवोकी थाक्छ्येन नङ्गुप सुङ ति फिमु क्या नङ्गिवी सिनी ललाइकी सिक्यासिनाङ खो नाम्साङ फिमु मिकिवी। यिने मी सु साङ ना मोडोशी, तेरी मीतिवी सेम ग्युर्शी सिनी ख्यिरा थोक्ला खो हम क्यानी ज्युवु यिन। 10 यिने चोवोकी तुजे ति कुर्मेन वावु दोके हाक्माकोवा क्यानी गिवी। ती पेला नाम ति वोरु गिर्पो यी तेन्नी ना डिवी, तमा ङ्यिमा उला ताङ कर्मातिवा मे रापकी तेरी शिनी डिवी। जम्बुलिङ ताङ जम्बुलिङला वोतुप तेरी शिनी डिवी। 11 दी तेरी च्यालकतिवा ना डिवी सिरुप हाक्कोनी ख्यिरा मिजी ति चुक क्यानी टेङ्बु ताङ कोन्छ्योककी सुङला युक गोकिवी सिरुप ति नासाम तोङ। 12 ख्यिराङ कोन्छ्योककी ठिम क्या नङ्गुप तुजेला गुनी देन वे, तमा ती तुजे ति ङमु राङ वुङ्शी सिनी नो की। खोकी तुजे छेवु छेर्मु नामतिवा छिक्नी ना डिवी, ङ्यिमा उला ताङ कर्मातिवा साङ तेरी मे रापकी शिकिवी। 13 यिने दाक्पु याङ खोकी थाक्छ्येन नङ्गुप दोके देवाच्येन सम्बा ताङ जम्बुलिङ सम्बाकी थोक्ला लाम ल्हयी वे। ते कोन्छ्योककी थोङ्दाङला टेङ्बु वोतुपतिवा तिराङ दे थुप्किवी। 14 ती तप्की ङे ङ्यिङ्ज्येवु अच्युनुपतिवा, ख्यिराङ ती तुजेला गुनी देतुप तप्की खोकी थोङ्दाङला ख्यिराङ मङ टेङ्बु ताङ क्येन मेतुप ताङ खोकी मुला तम्जी ल्यामु वोतुप मिजी क्योङ। 15 कोन्छ्योककी हम क्यानी गुनी देतुप ति दाक्पु दिक्पा ने थरुपला यिन सिनी नासाम तोङ। दाक्पी नुप पावलकी साङ कोन्छ्योककी नङ्गुप रिक्पा नेसुर ख्यिराङला ती ताम्ङेकी थोक्ला टिवु यिन। 16 खोकी तङ्गुप यिकीतिवा तेरीकी नाङ्ला साङ दी ताम्ङेकी कोर्ला टिनी वोतो। ती नाङ्ला ललाइ ललाइ ताम्ङेतिवा हाक्कोवु कले वे, तुक क्यानी यिकी मेशेवुतिवा ताङ कोन्छ्योकला तेपा रम्बु मेतुप मीतिवी दी ताम्ङेतिवाला यम्बा छ्योकी थेपला वोतुप दोके फिलोक्पा नालोक्पा जोनी खुरुङला राङ खोरो ना तोङ्गिवी। 17 तुक क्यानी ङे ङ्यिङ्ज्येवु अच्युनुपतिवा, ख्यिराङ गोमाला के दी ताम्ङे ल्यामु हाक्कोनी च्याङ्से देता। मी दुक्टातिवी ताम्ङेला येनी मादे, तमा रङगी हाक्कोवु सुङला रम्बु क्यानी डेकला देता। 18 तमा दाक्पुला दिक्पा ने थर ज्यितुप चोवो येशू ख्रीष्टकी कटिन ताङ खोकी रिक्पाला ख्यिराङ मङ मङ फरिन ग्युक। खोला तन्दा ताङ नरीकी नरी मोवा वुङ्शी। आमिन। |
© 2014, Wycliffe Bible Translators, Inc. All rights reserved.
Wycliffe Bible Translators, Inc.