१ थेसलोनिकी 3 - कोन्छ्योककी सुङ1 ख्यिराङला ठेतुप माङ्येसिमा ङ्यिराङ हम क्यानी दे माथुप। तमा ङ ताङ सिलास ति एथेन्सला देतुप ति ल्यामु यिन सिनी नासाम तङ्गुप तप्की 2 कोन्छ्योककी सुङ ख्याप्टाक कितुप दाक्पी नुप तिमोथीला ख्यिरा ते तङ्यिन। च्यिलासिसिन तीकी ख्यिराङला तेपा रम्बु क्यानी दे ज्यितुपला ताङ टोङ्गु तेरुपला ताङ 3 चुका छेटाङ ख्येल वासिनाङ ख्यिराङ सु साङ तेपा नेसुर फला छुला मोडोशी सिनी तीला ख्यिरा ते तङ्गुप यिन। तुका छेटाङ ति दाक्पु तेपा कितुपतिवा तेरीला गिवी सिरुप ति ख्यिराङला छ्या वे। 4 तोङ्ला ङ्यिराङ ख्यिरा मुला वोतुप पेला साङ ख्यिराङला छेटाङ ख्येल्गिवी सिनी ङ्यिरा ख्यिराङला थेङ्मा बङी सिक्यायिन। दी ति वुतुङ के च्युङ्सुङ। ती ति ख्यिराङला साङ छ्या वे। 5 तुक क्यानी ङ तरोङ साङ हम क्यानी दे माथुप्नी ती खोक्पा ल्हाप शैतानकी ख्यिराङला साङ खोक्पा ल्हासिन ङ्यिरा क्यावु टेमु ति तेर्मे राङ डिते सिनी ज्यिवा लानी ख्यिरा तेपा चुकै नोक सिनी ल्हापला तिमोथीला ख्यिरा ते तङ्गुप यिन। 6 यिने तन्दा तिमोथी ख्यिरा तेसुर ङ्यिरा चाला वानी ख्यिरा तेपा ताङ ङ्यिङ्ज्ये क्यावु लेन ल्यामु ति ङ्यिराङला लाप्सुङ। तोजो तिराङ मिन, ख्यिरा ङ्यिराङला ङ्यिङ्ज्ये लानी नरी टेन्गिनोक। तमा ङ्यिरा ख्यिराङला ठेतुप नो क्यावु दोके ख्यिरा साङ ङ्यिराङला छासे ठेतुप नो क्या वे सिरुप ति तीकी ङ्यिराङला लाप्सुङ। 7 तुक क्यानी अच्युनुपतिवा, ख्यिरा तेपा क्यावु तप्की ङ्यिराङ दुक्पा ताङ छेटाङला ख्येलुप पेला साङ ङाडेङ ङ्येनी वे। 8 ख्यिरा कोन्छ्योकला तेपा रम्बु क्यानी देतुप तप्की ङ्यिराङ सेम लोदिमु क्यानी दे थुप्किवी। 9 ख्यिरा थोक्ला ङ्यिराङ कोन्छ्योककी थोङ्दाङला छासे लोदिमु वे। तुक क्यानी ङ्यिरा खोला चो थुचिछे पुल्सिनाङ ङ्युङ्मु डिवी। 10 ख्यिराङला येलुङ ठेनी ख्यिरा तेपा ति मङ रम्बु जोपला ङ्यी ताङ नुप्ज्या ङ्यिराङ कोन्छ्योकला मोपोर कितिन। 11 त दाक्पी पपा कोन्छ्योक ताङ चोवो येशू ख्रीष्टकी ङ्यिराङला ख्यिरा चाला वुङ्गुप लाम ति पेन नङ्शी। 12 चुक क्यानी ङ्यिरा ख्यिराङला ङ्यिङ्ज्ये क्यावे, तुक राङ क्यानी कोन्छ्योककी ख्यिराङला च्यिककी च्यिकला ताङ मी तेरीला मङ मङ ङ्यिङ्ज्ये कितुप जो नङ्शी। 13 तमा चोवो येशू ख्रीष्टकी ख्यिरा तेपा रम्बु जो च्यिनी खो खोरे चाङ्मा वोतुप मीतिवी मुला फेपुप पेला दाक्पी पपा कोन्छ्योककी दोङ्ला ख्यिराङ चाङ्मा ताङ काङ साङ क्येन मेतुप जो नङ्शी। |
© 2014, Wycliffe Bible Translators, Inc. All rights reserved.
Wycliffe Bible Translators, Inc.