१ पत्रुस 4 - कोन्छ्योककी सुङकोन्छ्योककी थोक्ला मिजी क्योङ्गुप 1 चुक क्यानी ख्रीष्टकी खोरे जुला दुक्पा खुर नाङ्सुङ, ख्यिरा साङ खोकी दोके क्यानी दुक्पा खुरुपला टडिक क्यानी दे। च्यिलासिसिन सी ख्रीष्टकी थोक्ला जुला दुक्पा खुर्किवे, तीकी दिक्पा कितुप क्युर्किवी। 2 तमा तीकी खोरो मिजी वोता सेक दुक्टा कितुप नोवाला मिन, यिने कोन्छ्योककी नोवाला मिजी क्योङ्गिवी। 3 तोङ्ला याङ ख्यिराङ साङ यहूदी मिन्दुप मिरिक यम्बाकी मीतिवा दोके दुक्टा कितुप ताङ नासाम मेलोक्पा तोङ्गुप ताङ छ्याङ्गेले कितुप ताङ ङ्याम तोङ्गुप ताङ सज्युरे कितुप ताङ कुतिवाला तेन्नी ङोछा लङ्गुप लाका क्यानी बङी लाताक च्यक्सुङ। 4 यिने त याङ ख्यिराङ तुका सेम नोजु कितुप लाका ति तिवी मुला च्यिक्पा राङ क्यानी मिकिवु ल्हानी कोन्छ्योकला ङो मेशेवु मीतिवा हलेवा लानी ख्यिराङला मारे तोङ्गिवी। 5 यिने सेन्बु वोतुप ताङ शेपतिवाला ठिम क्या नङ्गुप कोन्छ्योकला तिवी क्यावु लाकाकी ची ति तिवी ते राङ गोकिवी। 6 ती तप्की शेपतिवाला साङ लेन ल्यामु ख्याप्टाक क्यावु यिन। तुक क्यानी तिवा दी जम्बुलिङला देतुप पेला तिवी क्यावु लाकाकी थोक्ला ठिम फोक्सिनाङ नम्शिङ ति कोन्छ्योक ताङ मुला देकिवी। 7 दी जम्बुलिङकी तिङ्मी तुजे वुङ्यिन वे। तुक क्यानी ख्यिराङ मोपोर ल्यामु कितुपला सेम थिला ज्याक्नी च्याङ्से देता। 8 ख्यिराङ तेरी सिनाङ मङ च्यिककी च्यिकला नरी ङ्यिङ्ज्ये की। च्यिलासिसिन ङ्यिङ्ज्येकी राङ दिक्पातिवा बङी ताकिवी। 9 ख्यिराङ ख्यिरा खाङ्बाला वुङ्गुप डेन्बुतिवाला मुक्तम मातेन्नी च्यिककी च्यिकला ताङ्देन किसा। 10 ख्यिराङ सुला कोन्छ्योक नेमा मीतिवाला शब्ज्यी कितुपला ओङ थोप्वे, ती ओङ थोपुप दोके क्यानी च्यिककी च्यिकला शब्ज्यी की। 11 सी कोन्छ्योककी सुङ ख्याप्टाक किवे, तीकी कोन्छ्योक नेमा थोपुप ओङ नेसुर राङ ख्याप्टाक की। सी शब्ज्यी किवे, तीकी कोन्छ्योक नेमा वावु ओङ नेमा शब्ज्यी की। तमा ख्यिरा क्यावु तेरी लाका नेसुर येशू ख्रीष्टकी छ्योक ने कोन्छ्योकला सोवा वुङ्शी। तमा तेरी मोवा ताङ ओङ ति नाम्साङ मोतोरुप तुजे सेक कोन्छ्योकला वुङ्शी, आमिन। कोन्छ्योकला तेपा क्यावु थोक्ला दुक्पा खुरुप 12 ङ्यिङ्ज्येवु अच्युनुपतिवा, ख्यिराङला तेपा रम्बु जोपला छासे खोक्पा ल्हाप छेटाङतिवा ख्येलुप पेला ख्यिराङ मिच्यिक्पा च्युङ्सुङ सिनी हलेवा माकी, 13 यिने ख्यिराङ ख्रीष्टकी थोक्ला छेटाङ खुरुपतिवा यिन्दुप तप्की ती पेला गा की। तुक क्यासिन खोकी मोवा छ्या देन्दुप पेला ख्यिराङला मङ लोदिमु ताङ गा लङ्गिवी। 14 दोजो ख्रीष्टला तेपा क्यावु तप्की मीतिवी ख्यिराङला ङ्यिङ्मर क्यासिन ख्यिराङला मोलाम थोपुप यिनो, च्यिलासिसिन कोन्छ्योककी मोवा वोतुप थु चाङ्मा ति ख्यिरा मुला ज्यु वे। 15 यिने ख्यिराङ सु साङ मी सेतुप ताङ कुन कितुप ताङ दुक्टा कितुप ताङ मी यम्बी लाकाला लाक्पा ग्यप्नी छेटाङ माखुर। 16 यिन्सिनाङ ख्यिराङ येशूला तेपा क्यावु तप्की दुक्पा खुर्किवी सिसिन ख्यिराङ ङोछा माकी, यिने कोन्छ्योकला राङ सोवा तेक। 17 च्यिलासिसिन कोन्छ्योककी खोरे मीतिवाला ठिम क्या नङ्गुप तुजे गो जुवु पेला लेप्नी वे। खोकी सुङला ङ्येन्दुपतिवाला साङ खोकी ठिम क्या नङ्गिवी सिसिन खोकी सुङला तेपा मिकिवुतिवाला याङ चुका पर्च्या मङ्मु के फोकिताङ? 18 तमा कोन्छ्योककी सुङला साङ दुक सिनी टि वे, “दोजो कोन्छ्योककी सुङला युकुप मीतिवाला साङ दिक्पा ने थरुपला कले वोसिन टेङ्बु मेतुपतिवाला याङ चुकै के डि ताङ?” 19 तुक क्यानी कोन्छ्योककी नोवाला वोतुप दोके दुक्पा खुरुप मीतिवी लाका ल्यामु क्यानी खोप्रे सेम ति खोङ्तेर्मु वोतुप कोन्छ्योकला चेक ते गोकिवी। |
© 2014, Wycliffe Bible Translators, Inc. All rights reserved.
Wycliffe Bible Translators, Inc.