Yebɛrɛfa 1 - Yãhã Naambiyãrfãn Saba

Yesu tɛr faale Yãhã kaplãŋ tɔ̃rfa byɛ yaha

¹ Faale cãã na, Yãhã naa n pãã wo wãlɛ ne. Ke ke kaplãŋ tɔ̃rfa busãã lɛhɛ naa n wãã pe ya wuhu na, pe n bii naa ke yɛ̃ kaplãŋ pãã, pe byɛ pe kaplãŋ ter ne ke ya wuhu na.

² Yagaa sẽ na, Yãhã ke yɛ̃ kapãn pãã wo ye ke Dya kãmay na; Yãhã driyɛ̃ kai- byɛ le soho woo koho wo. Yãhã driyɛ̃ kai- byɛ tãhã woo kãmay na.

³ Yãhã nayɔ̃r n yãã Yesu na, tesẽ ke nagboho ne. Yãhã ke ma mii, Yesu ma koo syi. U kaplãŋ ma fãnga ne, koo kẽ ke driyɛ̃ gbã yigi. U nawee- kapee- yee laha kãã pe na. Loo kur ye, u n ka yãhãyĩŋ na, maa nii Yãhã kãndigi koho kuɛ ye, koo gii ke ma wãn byɛ yĩŋ na.

Yesu tɛr yãhãyĩŋ tẽnlɛhɛ yaha

⁴ Yãhã myaha wãã Yãhã Dya kẽ, ke n tɛr yãhãyĩŋ tẽnlɛhɛ wãŋ yaha. Koo kẽ, u n tɛr yãhãyĩŋ tẽnlɛhɛ yaha.

⁵ Ye sẽ yãã, Yãhã sẽ kapãn nde syi pãã yãã yãhãyĩŋ tẽnlɛhɛ waa ye ye ma yee: «Mboo kẽ ma ma ra Dyapuai, ma gbe nanga na, nawee- ga cã, n ma ma Tuhufua.» Ke sẽ maha nde pãã yãã yãhãyĩŋ tẽnlɛhɛ waa wĩĩ na ye ma yee: «N ga nii u ye Tuhufua draha wo, u -sẽ ga nii ra ye Dya draha wo.»

⁶ Yaliile wo Yãhã yee koo ga ke Dyapuai nen nɔ wãã driyɛ̃ wo, woo wii tuu cãã pye wa wãn byɛ yaha, ke le pãã ma yee: «Yãhãyĩŋ tẽnlɛhɛ byɛ yai pe naa u myaha sey.»

⁷ Yãhã lii pãã yãhãyĩŋ tẽnlɛhɛ wĩĩ na, loo ne nde: Ke yee yãhãyĩŋ tẽnlɛhɛ mii gɛ pe sya nii koo wãm, pe ma koo ye tefay wãŋ syi dyaŋ. Ke tẽntẽ- ma ke ye naayĩn wãŋ syi dyaŋ.

⁸ Ke Dya wĩĩ loo na, Yãhã le pãã ma yee: «Ma ma Yãhã, ma Yĩŋfua niisaha yãã. Too yĩnfar nde wãkuayãã wee te na ma ye ye. Kasroŋ koo kẽ, taa ga naa n pye ma Yai wo.

⁹ Kasroŋ wĩĩ tãy ma ye, kapee- wĩĩ sẽ tãy ma ye ye. Loo ne, ma Tuhufua Yãhã n mboo yãŋ yi ma nagboho ta ma na ma nampyeŋ- yaha. Nuhu n -sẽ ma laam yĩĩ.»

¹⁰ Yãhã maha yee: «Yĩŋfua, mboo kẽ taa kãntraha tãhã ke kai- byɛ fegbecãã na. Mboo kẽ taa maha yãhãyĩŋ bya tãhã.

¹¹ Too nde byɛ ga ba kua. Mboo woo na, maa naa n nii yalebyɛ; kãntraha tesẽ yãhãyĩŋ ne, te ga ba lɛ te pye klaha-,

¹² ma n te kur ta yaha te kuãŋ ne. Taa ter ga ba te draha gbe mii nayrefãn dyaŋ pe n le wãlɛr draha wo. Mboo woo na, maa naa n kuee ma wãnii na yalebyɛ, wãkuayãã saa pye ma dyɛ- na ye.»

¹³ Yãhã sẽ maha nde pãã yãã yãhãyĩŋ tẽnlɛhɛ waa ye ye ma yee, u nii koo kãndigi koho kuɛ ye kai- byɛ yĩŋ na, ke n sya ba u napĩĩ- yĩy kor le u kẽ, pe n nii mii, u tãnde fyãhã tã pe na.

¹⁴ Pe yãhãyĩŋ tẽnlɛhɛ ya dyaŋ, pe wee la tẽntẽ- ya Yãhã ye, ke n nii pe lɛhɛ pe ga naa n paha mpãy na, pe yai pe ba sya yaha pe ga nii Yãhã tãy?