Ulandaan 9 - Uwumbɔr aagbaŋ

¹ M nan kal dakl pam le ni ti yunn, ki lik tiwan nimina, le ki ti kan ke Uwumbɔr le joo bilandam ni binib bi aabimbin ŋan na aabimbin mɔmɔk. Uma le joo baageehm ni baananaŋ mu. Ubaa aa nyi tiwan ni dɔ kiir u na.

² Ni mɔmɔk ye tiwanbaan la. Ubimbinyaandaan ni ubiindaan aadoon ye tiwanbaan la, kina le ye ni ki tii uninyaan ni u kaa ŋan na mu. Binib bi dii Uwumbɔr aasan mbamɔm na, ni bi kaa dii kpala na, ni binib bi toor kitork tii Uwumbɔr na, ni bi kaa toor na mɔmɔk aadoon ye mubaa la. Ubimbinyaandaan aa soor utunwanbirdaan. Unii u puur tipuur na aa soor unii u kaa puur tipuur na.

³ Bi mɔmɔk aadoon ye mubaa la, le nimina mu aa ŋan ke tiwan ni mɔmɔk ŋani dulnyaa wee ni na aah kaa ŋan pu na. Unibɔn umɔk kpa limɔfal na kpa kiwaatiik ni ilandak i kaa ŋan na la, le nkun piir bi libuul ngbaan ni.

⁴ Tɔ, unii umɔk kpa limɔfal dulnyaa wee ni na kpa limakl. Ubɔ u fu na soor ni uchinn u kpo na.

⁵ Mbamɔn, umɔfadaan mɔk nyi ke u ga nan kpo, le bitekpiib ma aa nyi nibaa. Baa ki kpa tipar tibaa; binib suln bibɔr kookoo a.

⁶ Bi ni baageehm, ni baananaŋ, ni lineen kpaan kpo la. Baan ki ŋa tiwan ni ŋani dulnyaa wee ni na nibaa.

⁷ Li ji saajikaar ki li kpa mpopiin; nyu saadaan ki cha aasui li piin. Ni ŋan Uwumbɔr chee.

⁸ Cha aasui li piin n‑yoonn mɔmɔk, ki di nkpan meen aayil pu.

⁹ Cha aa ni upii u aa gee u na ji mmɔɔn saamɔfal li kaa kpa tinyoor tibaa aan Uwumbɔr di tii si dulnyaa wee ni na. Ji mmɔɔn nwiin mɔk, ba pu? saatotoŋ aanyoor le na.

¹⁰ Aa yaa bi tun lituln limɔk na kan, di saapɔɔn mɔmɔk tun li, ba pu? lituln, ni ilandak, ni ichiin, ni Uwumbɔr do aalan aa bi kitekpiitiŋ ni. Nima chee mu le aa cha.

¹¹ M nan ki kan tiwan niken, nima le ye ke naa ye binib bi ŋmaa san sakpen na le ji litaasaln ni, le bijakaab mu aa nyaŋni butɔb ni n‑yoonn mɔmɔk. Bilandam mu aa kpa tijikaar n‑yoonn mɔmɔk, le binib bi bae tiwan ki nyi sakpen na aa kani nkam. Binib bi ŋmaa joo tiwan na aa kani tininkpir n‑yoonn mɔmɔk. Kinimbɔŋ kani unii mɔmɔk la.

¹² Ubaa aa nyi buyoonn nkun ga pii u na. Nkun bub chur unii ke gaawɔb, bee kipɔɔk aah chur inyoon pu aan yaa nyi na la.

Nlan jer mpɔɔn

¹³ Tiwan nibaa mu nan ki bi m kan ni, tiwan ni m ga ŋmaa di ni ŋaŋ baah lik nlan dulnyaa wee ni pu na.

¹⁴ Kitiŋ kibaa le nan bi, le binib bi nan koo ki ponn ni na aa wiir. Ubɔr mpɔɔndaan ubaa nan ti tak ki. U nan gob ki, ki gor ke u tur kaagon lii.

¹⁵ Ujagiin ubaa nan koo ki ponn ni, le ki mu nan tee kpa nlan sakpen ki gaa kitiŋ ngbaan lii. Tɔ, ubaa mu aa nan teer ujagiin ngbaan bɔr.

¹⁶ M len n‑yoonn mɔmɔk ke nlan ŋan jer mpɔɔn, le ubaa aa nyi ke ugiin mu kpa nlan. Ubaa aatafal aa bi waah len pu na ni.

¹⁷ Aa yaa pel ulandaan aalambil li bi suuna na kan, ni ŋan jer ke aa pel uyidaan u bi tar bijɔrb aakuun ni na.

¹⁸ Nlan ŋan jer tijawan, le utunwanbirdaan ubaa ga ŋmaa bii tiwanyaan pam.