Ulandaan 8 - Uwumbɔr aagbaŋ

¹ Ulandaan baanja le nyi tiwan aatataa aah ye pu na. Nlan cha u laa limɔmumukl ki cha unimbil wiin.

Kii ubɔr aamɔb

² Ŋa ubɔr aah len pu na; ba pu? Uwumbɔr nan puu tipuur tii u.

³ Ubɔr ga ŋmaa ŋa waah ban pu na, kina pu na, taa nya upuwɔb, ki taa dii binib bi kpokl u pu na.

⁴ Ubɔr joo mpɔɔn le tun, le ubaa aan ŋmaa kpak u.

⁵ Aa yaa keei waamɔb n‑yoonn mɔmɔk kan, saan li bi tibɔbir ni. Ulandaan nyi ke libɔjil aayoonn le bi.

⁶ Tiwan nimɔk ŋa na kpa naatataa, ki mu kpa n‑yoonn mu ŋeer ni na. Le binib mu kan tibɔr ti wu na.

⁷ Ti ponn ni ubaa aa nyi tiwan ni ga ŋa na, le ubaa mu aa bi ki ga tuk timi.

⁸ Ubaa aan ŋmaa ter ubaa ki taa kpo, bee u kpeln waakun aawiin. Baan kii ke uja san nya butɔb ni, kina le titunwanbir aan nya utunwanbirdaan nkun ni.

Bibiindam, ni binib bi aabimbin ŋan na aabɔr

⁹ Maah nan kal ki dakl lik tiwan ni ŋani dulnyaa, u ponn ni binib bibaa kpa mpɔɔn, biken mu ji falaa bi chee na ni, le m nan kan nimina mɔmɔk.

¹⁰ Mbamɔn, m kan bi sub bibiindam baakaakul ni, tɔ, taah nyan kicheek ni ki choo kun ni na le binib pak bi, kitiŋ ki ponn ni bi tun baatunwanbir na. Ni ye fam la.

¹¹ Ba ŋa binib gee ki tun titunwanbir? Naah ye pu na le ye ke baa dar titunwanbirdam aatafal mala ke baah tun ti pu na.

¹² Utunwanbirdaan ga ŋmaa bii libiil nfum nkub ki beenin chuun. Mbamɔn, m nyi baah len pu na ke, “Aa yaa kii Uwumbɔr aamɔb kan, aa ŋmar a,

¹³ bibiindam ma kan aan kan kina. Baamɔfal bi ke kijunjuŋ na la, le baah kaa kii Uwumbɔr aamɔb na, bi ga kpo baabiyar ni.”

¹⁴ Tɔ, nimina aa kpa tataa. Lik tiwan ni ŋani dulnyaa ni na: binib bibaa aabimbin ŋan, le bi kani bibiindam aatafadaan; le bibiindam bibaa mu kani binib bi aabimbin ŋan na aapar. Le m bui ke ni ye fam la.

¹⁵ Kina pu na, m kii ke unibɔn li mɔɔni, ba pu? waamɔɔn mu u kpa waamɔfal ni na le ye ke u ji, ki nyu, ki li mɔɔni. Buyoonn u bi nyani waatotoŋ Uwumbɔr aah tii u limɔfal li dulnyaa wee ni na, le u ga ŋmaa ŋa kina.

¹⁶ N‑yoonn mumɔk m pɔɔni mbaa ke m ŋa nlan ki bae tiwan ni ŋani dulnyaa wee ni na, le m kan ke aa ga ŋmaa li dɔ waa kinyeek ni nwiin pu,

¹⁷ kaan ŋmaa bee Uwumbɔr aah ŋani tiwan ni na. Aa gee aa pɔɔn aabaa ba pu, saan bee ni daalbaadaal. Bilandam ga ŋmaa bui ke bi nyi, ki mu aa nyi.