Ulandaan 7 - Uwumbɔr aagbaŋ

Limɔfal ni aalandak aabɔr

¹ Liyimbinyaan ŋan jer tulalee u nu mɔ na, le nwiin mundaal aa ga kpo na mu ŋan jer nwiin mundaal bi ma si na.

² Aa yaa buen lidichal li ponn ni bi wii ikpowiil na kan, ni soor ni ke aa buen li ponn ni binib bi ji njim na, ba pu? ni ŋan ke umɔfadaan mɔk li nyi ke nkun dɔ kiir ti mɔmɔk la.

³ Mpombiin soor ni tilaar, nibaakan mu ga bii aanimbil wɔb, tɔ, ni mu moo kpae si nlan la.

⁴ Unii umɔk dakl mpopiin pu n‑yoonn mɔmɔk na ye ujɔr la. Uchiin ma dakl nkun pu la.

⁵ Binib bi kpa nlan na yaa sak si kan, ni soor ni bilatiirb li gaa ilahn ki pak si.

⁶ Ujɔr yaa laa kan, ni naahn ke ikokon le aah puul mmii ni na. Naa kpa tataa.

⁷ Unii u kpa nlan na yaa jin unii pem pem kan, u ŋani ke ujɔr na la. Aa yaa gaa igaŋgaŋlik kan, aa bii saabimbin le na.

⁸ Tiwan mɔmɔk aadoon ŋan jer naapiin. Limɔr ŋan jer kigaak.

⁹ Taa gee liŋuul mala mala; aa yaa gee unii pu liŋuul ki yunn kan, ni ye kijɔrk la.

¹⁰ Taa baa daalbaadaal ke, “Ni ŋa kinye le n‑yaayoonn na aawan nan ŋan ki jer dandana wee aawan?” Naa ye nlan aabaan.

¹¹ Ni ŋan ke umɔfadaan mɔmɔk li kpa nlan, mu ŋan ke saah ji lifaal li na la,

¹² le mu ga tii si nsisiinyaan ke ŋimombil aah ga tii si pu na. Nlan tii si lifuur la, nlanbaekoo aanyoor le na.

¹³ Dakl lik Uwumbɔr aah tun pu na. Ubaa aan ŋmaa naar Uwumbɔr aah gɔr tiwan ni na.

¹⁴ Tiwan yaa laa ŋan tii si kan, li kpa mpopiin, le tibɔr yaa nan dan kan, teer ke Uwumbɔr le joo ni mpopiin ni tibɔr mu. Saan ŋmaa bee tiwan ni mu ga ki ŋa na.

¹⁵ Maamɔfal ye mi fam la, le m mu tee kan tiwan mɔmɔk li ponn ni. Unibamɔnn ga ŋmaa kpo, le ubaa u ye utunwanbirdaan na ga li beenin chuun.

¹⁶ Kina pu na, taa bui ke aa li kpa tiŋann, bee nlan sakpen, ba ŋa aa bi ku aabaa?

¹⁷ Aa mu taa tee li kpa mbiin, bee aa li kpa kijɔrk sakpen. Taa ku aabaa ki laa fu.

¹⁸ Nyan aabaa nimina mɔmɔk ni. Aa yaa san Uwumbɔr kan, aa ga kan tinyoor.

¹⁹ Nlan aah ga ŋmaa tun lituln li na, bitinjoob kipiik aan ŋmaa tun kina.

²⁰ Ubaa aa bi dulnyaa wee ponn ni ki tun litunyaan n‑yoonn mɔmɔk kaa tun taani ubaa.

²¹ Taa cha aatafal li bi binib aabɔlen mɔmɔk ni, naa ye kina kan, aa ga nan ŋun saatutunn aah seei si pu na.

²² Le aa nyi ke aa mu seei binib biken pam.

²³ M di maalan le tɔŋ nimina mɔmɔk. M nan puu ke m ban m kan nlan la, le kina nan jer mi.

²⁴ Ŋma ga ŋmaa bee limɔfal aatataa aah ye pu na? Naatataa pɔɔ pam ke ti bee ni.

²⁵ Le m nan di maalandak mɔmɔk tii ichiin ni liwanbae; m nan puu ke m kan nlan ni ngarm ki tii mbaan mu m kpa na, ki bae mbiin aah ye kijɔrk ni ilatiir pu na.

²⁶ M nan bee ke upii u kaa ŋan na cho jer nkun. Ngeehm mu u ga di tii si na ga chuu si ke gaawɔb, bee kipɔɔk aah ga chuu si pu na la. Le uŋaal aah kpal si pu na ga chuu si ke tikululn na. Uja u Uwumbɔr aasui piin u pu na ga ŋmar u chee, le u ga chuu utunwanbirdaan ma.

²⁷ Ulandaan ngbaan len ke, mbamɔn, siib, siib le m ti kan nimina buyoonn m nan bi ban maabaan ngbaan aagarm na.

²⁸ M nan ki ban ngarm muken, le kaa kan. M nan kan bijab lichur ponn ni uja ubaa baanja le kpa kipak, le kaa kan upii ma ubaa.

²⁹ Maah nan bae pu na mɔmɔk sɔ: Uwumbɔr ŋa timi ke ti li bi mbimbin mu kaa pɔɔ na, le ti ŋa tibaa tiwan ni pɔɔ na.